Read Awing Lukasə 5 Bible Online

Lukasə 5 - Awing bible

Lukasə 5

¹Á nə ńdáʼ ḿbə́ alě tsə́ Yeso a tə́əmə á nkǎŋkǐə á Jɛnɛsɛlɛlə, pɨ pə́ kə tə́ ńjíʼnə á nəpɛnə́ yə́ á mə́ zóʼ nə́ atséebə Əsê.

²A jɨ́ əŋkənúʼə́ pɛ́n pɛ̌ páʼ ngaŋə́kóolə́shû ə́ tə́g nə́ á nkǎŋkǐ ńgɛn ńtə́ ə́sogə̂ məŋkɛd mə́ akóolə́shû móobə́.

³Yeso a kwúnə á mə́m táʼə aŋkənúʼə́ wə́ yitsə̌, á pə́ yə Saamunə, a sóŋ nə́ yí ńgə́ a nyáʼ ńkwádtə nə́ zɨ́d ńkwúnə á nkǐ mɔ́ aliʼə́, a kwádtə ńkwúnə a tíʼ ńnáanə á mə́m ə́wɨ́ ńtíʼə ńdzéʼkə pɨ pə̂.

⁴Ndzaŋ a kə məgtə̂ nə́ á mə́ tsáb nə́ lə́, ə́sóŋ nə́ Saamun ńgə́, “Kwádtə ńgɛnə̂ aliʼ yə shǐ nə́ ḿmaʼ məŋkɛlə́ á nkǐə, ńjî ńgə́ gho kó əshûə.”

⁵Saamunə a kwěe ńgə́, “Tǎ, pəg lê lə́ tsɔʼə apeŋə́ apeŋ ə́sɛ̂nə̌, ńtáŋnə á mə́ kó nə́ əshûə, ḿbə́ ńkě ajûtsə́ kó pô. Lə́ tə mbɔʼ gho sóŋ ə́lɨ́d tə ḿbə́ maŋ yǐ maʼə̂.”

⁶Ndzaŋ pó kə maʼ nə́ məŋkɛd móobə́ á nkǐ lə́, ńkóolə aláʼə əshû tə məŋkɛd mɔ́b mə́ tíʼə ńdə́kə.

⁷Pó tíʼ ńkɔ́mtə pəlim pɔ́b pó kə chî nə́ nə́ yətsə́ aŋkənúʼə́ ńgə́ pó yǐ ńkwáalə ághóobə́, po yǐ pó po lwɛ́nkə əŋkənúʼə́ pə́ pɛ́n pɛ̌ nə́ əshû tə əŋkənúʼə́ ə́ lɛd ńtíʼə ńdoonə̂ á mə́ mɛ́d nə́.

⁸Ndzaŋ páʼ Saamun Pita a kə jɨ́ nə́ mbô anu jɨ lə́ ńgwǔəə á məko Yeso, ə́sóŋ ńgə́, “Mmaʼmbî, lǒo gho á nəpɛnə́ maŋə, maŋ lə́ ngɛdtəpɔŋə!”

⁹Á nə ńkɨʼnə̂ ághɔ́b pə apuʼə pɨ pə́ nə ńchî nə́ aliʼ yi wɨ́ nə́ ndɛn əshû pó nə ńkó nə́.

¹⁰Ńkə́ ńkɨʼnə̂ Jɛmsə pó Jɔn pɔ́ pə́ Zebedi páʼ pópə Saamun faʼ nə́ lə̂. Yeso a tíʼ ə́sóŋə á mbô Saamun ńgə́, “Kɔ gho pɔ́gə, ə́fɛ́d nə́ pə əghâ nə́ gho yǐ tíʼə kóolə lə́ pəənə.”

¹¹Pó tíʼ ə́fóg əŋkənúʼə́ əpɔ́b ńtə́gə á nkǎŋkǐə, ḿmɛdtə̂ ajúmə atsəm ńdzoŋə̂ Yeso.

¹²Yeso a kə chîə á aláʼ yitsə́ páʼ ngaŋnkaʼə a kə chî nə́ ə́wə́, ndzaŋ a kə jɨ́ nə́ Yeso lə́, ńgwǔəə á məko yí ḿbóʼmbô nə́ yí ńgə́, “Mmaʼmbî, mbɔʼ gho kɔŋə̂, gho ghɛd maŋ ŋwaʼə̂.”

¹³Yeso a tsɛɛkə̂ apô ají ńkwumə̂ yí ə́sóŋ ńgə́, “Maŋ kɔŋə̂, ŋwaʼə̂.” Tsɔʼə əghâ yi wɨ nkaʼ əjǐ zə̂ ə́ měe yə́.

¹⁴Yeso a pə́ ə́sóŋ nə́ yí ńgə́, “Kɔ gho fiʼtə̂ ŋwu tsə̌, lə́ ghɛn ńnɨd mbɨ əzo á mbô mbêsê ńkə́ ə́fɛ̂ akáŋə́sê ńdzoŋə̂ noŋkə páʼ Mosisə a kə fɛ̂ nə́. Zə́ələ́ á yǐ nəələ̂ á mbô ŋwu ntsəm ńgə́ gho ŋwaʼə̂.”

¹⁵Atsáb ńté Yeso á pəənə̂ ńgáʼə ńgɛnə̂ pə́ nə́ mbîə, ńdaŋ ə́lɨ́d ənɔ pɨ tíʼə ńgyǐəə á mə́ zóʼ nə́ atséebə ajíə, a kə̈ ńtû ńtsóʼə ághóobə́

¹⁶Lə́ Yeso a pə̈ ńdzá ə́fɛ́lə á mə́m pɨ ńgɛnə̂ ńchîə kɔŋ məŋkwâʼlə̌ ńchaʼtə́sê.

¹⁷A kə láʼ ḿbə́ alě tsə́ Yeso á tə́ ńdzéʼkə, Pəfalasi pópə ngaŋə́zéʼkə pənoŋkə pó lǒo nə́ nə́ əláʼ ətsəm ə́ chî nə́ á Galili, nə́ Judya ḿbɨ ḿbə́ nə́ Jɛlusalɛm pó náanə ə́wə́. Mətɨ mə́ Mmaʼmbî mə́ kə chîə mbɨ yí á mə́ tsóʼ nə́ pəghoonə́.

¹⁸Pɨ pətsə́ pə́ peʼə̂ nkweglə yitsə̌ á ndumə apaʼ ńtə́ ńdoonə̂ á mə́ kwú nə́ nə́ yə́ á ndɛ̂ ńnoŋkə̂ á mbi Yeso.

¹⁹Ndzaŋ ŋwu məsɔŋə́ a kə kwéʼnə nə́ nɨ́ tə pó kě jɨ́ ndú mbɔʼ pó laŋ ə́wɨ́ ńkwú lə́, ńkɔ́ʼə atǐ ḿbub ngɔ́d nə́ nəgha ńtsóokə yí ndǎndǎ nə́ apaʼə á tətɨ ŋwuməsɔŋ wə̂ ńnoŋkə̂ á mbi Yeso.

²⁰Ndzaŋ Yeso a kə jɨ́ nə́ mbimə́ əzɔb lə́, ə́sóŋ ńgə́, “Ngəənə mə, pə́ ləgnə̂ pətəpɔŋ pô.”

²¹Ngaŋə́zéʼkə pənoŋkə pópə Pəfalasi chúʼə á mə́ pítə nə́ məmbɨ mɔ́b ńgə́ “Lɛ̌ əwə ŋwu páʼ a zɔ nə́ Əsê lɛ̌? Mbɔʼ əwə a ləgnə̂ təpɔŋ tə ńdéʼtə Əsê?”

²²Yeso a jîə akwaŋə azɔ́b ńtíʼ ḿbítə ághɔ́b ńgə́, “Lə́ ghɛlə̂ akə̂ pɨ túgə jɨ ndzaŋə akwaŋə á ntɨ́ pəənə́?

²³Lə́ pwɔ́dnə zə́ənə? Mə́ sóŋ nə́ ńgə́, ‘Pə́ ləgnə̂ təpɔŋ əgho,’ kəənə á mə́ sóŋ nə́ ńgə́, ‘Lǒo á əsê ńnyinə̂?’

²⁴Lə́ maŋ yǐ ghɛd pɨ jî ńgə́ mɔ́ ŋwunə [1] a túg mətəənə á ndu mbîə á mə́ ləgnə̂ nə́ təpɔŋə.” Ńtíʼ ə́sóŋə á mbô kɔ́ŋə́sê wə́ ńgə́, “Maŋ sóŋə á mbô gho ńgə́ lǒo á əsê ḿbyáanə mə́ta əgho ńkwə̂ gho á nchîndɛ̂!”

²⁵Tsɔʼə əghâ yi ə́wɨ́ ŋwu yi wə̂ a lǒo á əsê á mbi pó pətsəmə, ḿbyá əpú páʼə a pěʼ nə́ ńnoŋnə̂ á ndu wɨ́ lə́ ńtíʼə ńkwə̂ ńnyinə̂ ńgóʼkə Əsê.

²⁶Á nə ńkɨʼnə̂ ŋwu ntsəmə! apɔ́gə á chîə məntɨ́ pó, pó tíʼə ńgóʼkə Əsê ə́sóŋə ńgə́, “Pəg jɨ́ əkɨʼnəmə́nu ə́sɛ̂nə̌!”

²⁷Yeso a fɛ́lə aliʼ wɨ́d wə̂ ńgɛn ńdzə́ənə ŋwu tsə̌ páʼə a nə ḿbə́ nə́ nkwânchubə aláʼ pə̈ fóŋə yí nə́ Lebiə, a náanə aliʼə́kwáalə́ nchubə aláʼ yə́. Yeso a sóŋə á mbô yí ńgə́, “Zoŋə̂ mə.”

²⁸Lebiə a mɛdtə̂ ajúmə atsəm ńdǒo á əsê ńdzoŋə̂ yə́.

²⁹Lebiə a tíʼ ńgɛlə̂ mɛ́ akɔŋtə á ndɛ̂ yí ńté Yeso. Pó kə jî məjî lə́ pópə ngaŋə́kwáalə́ nchubə aláʼ yitsə̌ tə ńnə́ənə, ḿbɨ ḿbə́ nə́ pətsə́ pəənə.

³⁰Pəfalasi pətsə́ pópə ngaŋə́zéʼkə pənoŋkə pó kə tə́ ŋ́ŋwuntə̂ ńté ngaŋə́zoŋə́ndzəm Yeso ḿbítə ńgə́, “Lə́ ghɛlə̂ akə̂, nə́ jîə məjî ńkə́ ńnô pɨ̌pə ngaŋə́kwáalə́ nchubə aláʼ ḿbá ngaŋə́ghɛlə təpɔŋə?”

³¹Yeso a kwěe ághɔ́b ńgə́, “Pɨ páʼ pó chî nə́ əshîʼnə pó kě ntsóʼ náŋə pô. Ntsóʼə a chî lə́ ńté pəghoonə́.”

³²Maŋ kě yǐ lə́ mə́ fóŋ nə́ pɨ páʼ pó tɨ́ nə́ ndə̌ŋdəŋ pô. Maŋ yǐ lə́ mə́ fóŋ nə́ ngaŋə́ghɛlə təpɔŋ ńgə́ pó kwúblə.

³³Pɨ pətsə́ pə́ kə sóŋə á mbô Yeso ńgə́, “Ngaŋə́zoŋə́ndzəm Jɔn ə́ zá ńchîə nə́ nji, ńchaʼtə́sê. Ngaŋə́zoŋə́ndzəm Pəfalasi ə́ kə́ ńgɛlə̂ ə́lə́ələ́; lə́ əzô ngaŋə́zoŋə́ndzəm ə́ pə́ ńjîə ńkə́ ńnô.”

³⁴Yeso a kwěe ńgə́, “Nə kwaŋ ńgə́ təmbɔʼ nə ghɛd ngaŋnə́ghá tǎdndzɔʼə́ páʼ ə́ chî nə́ á ndzɔʼə́ yí ə́ ghɛlə̂ achaʼtə́sênji?

³⁵Lə́ ndɛd ə́ yǒ koʼə̂ ándó pə́ yǒ nə́ ə́ kwáalə tǎdndzɔʼə́ á mbô pó. Nə́ əlě pɨ́d pə̂ pó ghɛlə̂ achaʼtə́sênjiə.”

³⁶Yeso a kə tséebə atséebə́nə́múʼ zəənə́ á mbô pó ńgə́, “Mbɔʼ ŋwunə a kě atsəʼ yə fî sɛ ńdɔg ńtɛ̂ yə lɛn wɨ́ pô. Mbɔʼ a fiʼə̂, a tsəŋə̂ atsəʼ yə fî zə̂ kətaŋə, ńté ńgə́ apagə atsəʼ yə fî zə̂ á kě yǐ pímnə pó yə lɛn pô.

³⁷Mbɔʼ ŋwunə a kě məloʼ mimə pwɔ́d kə́ ńtwá ńnéŋə á mə́m ndɛn ngwub páʼ pə̈ néŋ nə́ məloʼ ə́wɨ́ pô. Mbɔʼ a ghɛd ə́lɨ́d məloʼ mimə pwɔ́d mə̂ mə́ sá ngwub na yi wɨ́ ńkwɛdnə̂ mə́ələ́, ngwub pə́gə ázə́ələ́.

³⁸Lə́ pə̈ néŋə məloʼ mimə pwɔ́d lə́ á mə́m ngwub yi fî pə́ néŋ nə́ məloʼ ə́wə́.[2]

³⁹Ŋwu tsə̌ a kě ə́wɨ́ chî mbɔʼ a nô məloʼ mimə tyantə̂ nə́ ḿbɨ ńkɔŋ mimə pwɔ́d pô. A yǐ kə́ sóŋ lə́ tsɔʼə ńgə́ mimə tyantə̂ nə́ mə̂ mə́ pɔŋə̂.”