Read Awing Lukasə 6 Bible Online

Lukasə 6 - Awing bible

Lukasə 6

¹A nə ńdáʼ ḿbə́ Alěláʼə́sê yətsə́, Yeso a tə ńnyinə̂ á mə́mə alíʼə ngəsáŋ yətsə́, ngaŋə́zoŋə́ndzəm əjí pó chúʼə á mə́ pyántə nə́ ətsoʼ ngəsáŋ ə́ kəblə̂ kɔ́lə ághóobə́.

²Pəfalasi pətsə́ pə́ pítə Yeso ńgə́, “Lə́ ghɛlə̂ akə̂ pɨ faʼə̂ anu páʼ noŋkə əwəgə́ á kě nə́ pí ńgə́ pə́ faʼ nə́ Alěláʼə́sê pô.”

³Yeso a kwěe ághɔ́b ńgə́, “Nə́ kě kə́ fóŋə anu ándó Debid pópə pɨ pí kə ghɛd nə́ á əghâ ándó nji ə́ kə tə́ nə́ ńdzáŋə ághɔ́b?

⁴A kə kwúnə á ndɛ̂sê ńtwáamə apéenə məkálə́ Əsê ńjîə yə́ ńkə́ fɛ̂ yətsə́ nə́ pɨ píə, páʼ noŋkə á pěʼ nə́ ńnɨd ńgə́ mbɔʼ lə̈ jîə tsɔʼə pəpépə́sê.”

⁵Yeso a pɨ ńkə́ ə́sóŋ ńgə́, “Mɔ́ Ŋwu lə́ mmaʼmbî pə alěláʼə́sê.”

⁶Alěláʼə́sê yətsə́ á nə ńkə́ ḿbɨ ńkoʼ, Yeso a ghɛnə̂ á Ndɛ̂sê Pəjusə ńtə́ ńdzéʼkə ə́wɨ́ ŋwu tsə̌ a chî ə́wɨ́ páʼ apô ají yə təənə á kwû nə́.

⁷Ngaŋə́zéʼkə pənoŋkə pópə Pəfalasi ə́ nə ńtə́g əmə́g ńtə́ ńnáŋə ńgə́ a lɛ yǐ tsóʼə ŋwu wə̂ á Alěláʼə́sê ńjî ńgə́ pó lɔg ə́lɨ́d ńgwaamə̂ yí ńgə́ a faʼə̂ anu páʼ noŋkə əghoobə́ á kǐ nə́.

⁸Lə́ Yeso a pə́ ńjîə akwaŋə azóobə́, ńtíʼ ə́sóŋ nə́ ŋwu wə̂ páʼ táʼə apô yə á nə ńkwú nə́ lə́ ńgə́, “Lǒo á əsê ńgyǐ ńtə́əmə á mbiə.” A lǒo ńgyǐ ńtɨ́ ə́wə́.

⁹Yeso á tíʼ ə́sóŋə á mbô pó ńgə́, “Maŋ pítə áwɨ́ ńgə́, noŋkə á nɨd ńgə́ mbɔʼ pə́ faʼ lə́ zə́ənə́ ndzaŋə anuə Alěláʼsê? Á mə́ ghɛd nə́ əshîʼnə kəənə təpɔŋə? Á mə́ chwádkə nə́ nchîmbî ŋwu kəənə á mə́ tsəŋkə̂ nə́ ázə́ələ́?”

¹⁰A náŋ ńdíblə ághɔ́b pətsəm ńtíʼ ə́sóŋə á mbô ŋwu wə̂ ńgə́, “Shǐəə apô azô.” A kə́ ə́shǐəə apô ají yə wə̂ á yáŋə ázə́ələ́.

¹¹Lə́ ndě əghɔ́b ə́ záŋ, pó chúʼə á mə́m pó á mə́ kwaŋ nə́ anu mbɔʼ pó ghɛd nə́ Yeso.

¹²A nə ḿbə́ alě tsə́ Yeso a kɔ́ʼə á ndu nkwəənə á chaʼtə́sê, ńdɔgə̂ táʼ nətúʼ wɨ́d wə̂ ntsəm tsɔʼə á chaʼtə́sê.

¹³Mbî ə́ yǒ ə́fóg a fóŋ ngaŋə́zoŋə́ndzəm əjí ńtíʼ ńtsɔ́ʼ ntsɔb pɛ̌ á mə́m pó ə́fóŋə ághɔ́b nə́ məntúmə:

¹⁴Saamun (páʼ a nə ńkə́ nə̈ ə́fóŋə yí nə́ pita) nə́ ndim əyǐ Andəlu, Jɛmsə pó Jɔnə, Filibə pó Batolomiə,

¹⁵Matyo pó Tɔməsə, Jɛmsə mɔ́ Alfɔsə, Saamun páʼ pə́ nə̈ fóŋ nə́ yi nə́ Zilɔlə,[3]

¹⁶Ḿbɨ ḿbə́ nə́ Juda páʼə a nə ḿbə́ nə́ mɔ́ Jɛmsə, ńtíʼ ḿbɨ ḿbə́ nə́ Juda Iskaliɔt, páʼ a nə ńtíʼ nə́ finə̂ yə́.

¹⁷Ndzaŋ pópə Yeso pó lǒo nə́ á ndu nkwəənə ńtsó lə́, Yeso a tə́əmə aliʼ yətsə́ páʼə á noŋnə̂ nə́. Ngaŋə́zoŋə́ndzəm əjí ə́ kə chîə aliʼ yi wɨ́ tə ńnə́ənə, ḿbá mboŋ pɨ páʼ ə́ kə fɛ́d nə́ aliʼə́ atsəmə á əlá aláʼə Judya, ḿbéenə Jɛlusalɛm, ḿbá pɨ páʼ pə́ nə ə́fɛ́d nə́ á Tayile pó Sidɔn páʼ lə́ nə ḿbə́ nə́ əláʼ pətsə́ ńchî ḿbáatə nkǎŋkǐə.

¹⁸Pó kə yí lə́ á mə́ zóʼ nə́ atséebə yə́, a kə́ ńtsóʼ məghɔ móobə́. Pɨ páʼ əjwi təpɔŋ ə́ nə̈ ńjwaʼ nə́ ághɔ́b pó nə ńgyǐəə a tsóʼə ághóobə́.

¹⁹Ŋwu ntsəmə a tíʼə ńnáŋ ndúmə á mə́ kwum nə́ yə́ ńté ńgə́ mətɨ mə́ nə ńtə́ ə́fɛ́lə á mbɨ yi ńtsóʼə ŋwu ntsəmə.

²⁰Yeso a náŋ ngaŋə́zoŋə́ndzəm əjí ńtíʼ ə́sóŋ ńgə́, “Mbɔŋə́ azɨ́ pɨ póŋ nə́, ńté ńgə́ anuə nəfoonə Əsê lə́ azə́ənə́!

²¹Mbɔŋə́ yə pɨ páʼ nji ə̈ záŋ nə́ ághɔ́b əghâ nə́, ńté ńgə́ pó yǒ zɛ́lə. Mbɔŋə́ yə pɨ páʼ pö kyéŋ nə́ əghâ nə́, ńté ńgə́ pó yǒ weŋə̂!

²²Mbɔŋə́ lə́ azô páʼ pɨ pə́ pa nə́ gho, ńkəmə̂ gho á mə́m pó, ńtûə ńdzoomə̂ gho ḿbɨ ḿmyaʼə̂ gho ńgə́ gho lə́ ngɛdtəpɔŋ ńté Mɔ́ Ŋwunə.”

²³Mbɔʼ á pə́ ə́lɨ́d gho kɔŋtə̂ tə ḿbɛ́n ńté ńgə́ tə́kɔʼ ntsɔ́ʼəfaʼə a chîə á mbô gho á nəpóolə. Lə́ tsɔʼə ndzaŋ pətǎ pɔ́b pə nə̈ ə́faʼ nə́ nə́ məntúmə́sê.

²⁴Gho əfoʼ, ndɔ ə́ chîə atû gho ńté ńgə́ gho pɛ́dtə ńdzóʼ əghô əshîʼnə əghâ nə́.

²⁵Ndɔ ə́ chîə atû gho páʼ ghö jî nə́ ńdzɛ́lə gho əghâ nə́ ńté ńgə́ nji ə́ yǒ záŋə gho, ndɔ ə́ chîə atû gho páʼ ghö weŋ nə́ əghâ nə́, ńté ńgə́ gho yǒ fɨnə̂ ə́ kə́ kyéŋə.

²⁶Ndɔ ə́ chîə atû gho páʼ ŋwu ntsəmə ä tsáb nə́ əshîʼnə ńté gho, ńté ńgə́ lə́ tsɔʼə ndzaŋ páʼ pətǎ pɔ́b pə́ nə ńtsáb nə́ ńté məntúmə́sê mə́ məfɨgə.

²⁷“Lə́ mäŋ fiʼtə̂ ŋwu ntsəm páʼ a tə́ nə́ ńjwə́ʼtə mə ńgə́: kɔŋ ngaŋkə́pa əzô, ńgɛd əshîʼnə á mbô ŋwu ntsəm ä pa nə́ gho.

²⁸Néŋ mbwɔ́dnə atû ŋwu tsəm páʼ ä zɔ nə́ gho, ńchaʼtə́sê atû pɨ páʼ pó kě nə́ gho əshîʼnə túg pô.

²⁹Mbɔʼ ŋwunə ləb nəghág zô, sɛdkə̂ nətsə́ ə́fɛ̂ nə́ yə́ a ləbə̂, mbɔʼ ŋwunə kwáalə atsəʼə́ azô, gho tsɔ́ʼə yə mə́m ḿbá ə́wɨ́ ə́fɛ̂ nə́ yə́.

³⁰Fɛ̂ ajúmə atsəmə á mbô ŋwu páʼ a lɔ nə́, ŋwunə a kə́ ḿbyáanə ajúmə á pə́ nə́ azô kɔ gho pɨ ńkwáalə.

³¹Ghɛlə̂ anuə atsəm á mbô pɨ ndzaŋ gho pěʼ nə́ ńkə́ ndɔ ńgə́ mbɔʼ pə́ ghɛlə̂ á mbô gho.

³²Mbɔʼ gho kɔŋ tsɔʼə pɨ pə́ kɔŋ nə́ gho zə́ pə́ ńtûə gho nə́ akə̂? Tsɔʼə ngaŋə́ghɛlə təpɔŋ ə́ kə́ ńkɔŋ pɨ pə́ kɔŋ nə́ ághóobə́.

³³Mbɔʼ gho ghɛd əshîʼnə tsɔʼə nə́ pɨ pə̈ ghɛd nə́ əshîʼnə nə́ gho zə́ pə́ ńtûə gho nə́ akə̂? Tsɔʼə ngaŋə́ghɛlə təpɔŋ ə́ chî lə́ ə́lə́ələ́.

³⁴Mbɔʼ gho tə́ ńtsɔ́ʼkə ajú, ńtsɔ́ʼkə tsɔʼə á mbô pɨ páʼ pó yǐ nə́ pɨ ə́ tûə á mbô gho, á kwáalə gho nə́ akə̂? Tsɔʼə ngaŋə́ghɛlə təpɔŋ ə́ tsɔ́ʼkə lə́ á mbô ngaŋə́ko əzɔ́b ḿbə́ ńtə́ ḿbyáabə ńgə́ ndɛn yi wɨ́ ətsəm ə́ pɨ ḿbəənə̂ á mbô pó.

³⁵Lə́, kɔŋ ngaŋkə́pa əzô ńkə́ ńgɛd əshîʼnə á mbô pó. Tsɔ́ʼkə á mbô pó tsɔʼə tə akwaŋə á mə́ pɨ nə́ kwáalə, ńjî ńgə́ ntsɔ́ʼəfaʼ əzɨ ə́ yǒ ḿbə́ tə́kɔʼə, pɨ tíʼ ḿbə́ pɔ́ pə́ Əsê páʼ ə́ tsɛ nə́ ajúmə atsəmə. Lə̂, Əsê lə́ Əsê páʼ ə́ túg nə́ akóolə́mə́lə́ŋə á mbô pɨ pó kě nə́ əshîʼnə kwaŋə̂ pô, pópə ngǎŋsóomə.

³⁶Túgə akóolə́mə́lə́ŋ ndzaŋ Tǎ gho a kə nə́ ńtúg lə̂.”

³⁷“Kɔ gho tsɔ́ʼtə əsáʼ pɨ pə́ ndaʼ ńjî ńgə́ kɔ əsê kə́ ńtsɔ́ʼtə əghô əsáʼə. Kɔ gho sóŋ ńgə́ ŋwu lə́ ŋwu təpɔŋ ńjî ńgə́ kɔ ŋwu tsə̌ a kə́ ə́sóŋ ńgə́ gho lə́ ŋwu təpɔŋə. Ləgnə̂ pəfankə pə́ pəənə ńjî ńgə́ pə́ kə́ ńdəgnə̂ pəpô.

³⁸Fɛ̂ á mbô pɨ pə́ ndaʼə ńjî ńgə́ Əsê a pɨ ə́fɛ̂ á mbô gho. Pə́ yǐ ə́ kə́ʼ néŋə á mə́m nkɔʼ, ə́ chiʼə̂ zə́ələ́ á kwú əshîʼnə pə pɨ ńkə́ ḿbegə̂ á lwɛ́nkə tə ńjáʼ pə́ fɛ̂ nə́ gho. Ńté ńgə́ ndzaŋ ghö kə́ʼ nə́ ə́fɛ̂ nə́ pɨ pətsə́, lə́ ndzaŋə ándó pə́ yǐ nə́ kə́ kə́ʼ ə́fɛ̂ nə́ gho.”

³⁹A kə ḿbɨ ńtséebə atséebə́nə́múʼ zəənə́ á mbô pó ńgə́: “Mbɔʼ əfəgə́ a kě əfəg nə́ ndú lɔg pô. Mbɔʼ pó pətsəm wǔəə á apɛ́lə.

⁴⁰Mbɔʼ ndzoŋdzəmə a kě jî ńtsɛɛlə̂ ŋwunə ä zéʼkə nə́ yí pô, lə́ mbɔʼ a zéʼ tə ḿməg a jîə ándó yə́.”

⁴¹“Lə́ ghɛlə̂ akə̂ gho náŋə mɔ́ akəmə atítíə á chî nə́ á nələ́g mɔ́mɛ́ əgho, ḿbə́ ńkě mɛ́ akəmə nkwə́ŋə á chî nə́ nələ́g gho tə́ ńdzə́ənə pô?

⁴²Mɛ́ akəmə nkwə́ŋə á chîə nələ́g gho, gho kě tə́ ńdzə́ənə pô, mbɔʼ gho pə́ ńtíʼ ə́sóŋ nə́ mɔ́mɛ́ əgho lə́ ə́lɛ́ ńgə́, ndim, tíʼ maŋ fógə mɔ́ atítíə á chî nə́ á nələ́g gho. Ngaŋməfɨg! peg ə́fógə mɛ́ akəmə nkwə́ŋ wə̂ a nələ́g gho ńjî ńgə́ əmə́g mô mə́ ŋwaʼ gho tíʼ ńdzə́ənə mɔ́ akəmə atítí páʼ á chî nə́ á nələ́g ndim əgho ə́fógə.”

⁴³“Atǐ yə əshîʼnə yətsə́ á kě ə́wɨ́ chî páʼə ä zə́m nə́ mənta mə́ təpɔŋ pô, kɨ yə təpɔŋ yətsə́ á kě ə́wɨ́ kə́ ńchî páʼə ä zə́m nə́ mənta mimə əshîʼnə pô.

⁴⁴Pə jîə atǐə atsəm lə́ nə́ mənta páʼə á zə́m nə́, mbɔʼ gho kě ghɛnə̂ akoobə́ mənkɨ́ŋkɨ́ ńdagə̂ pyâ ə́wɨ́ pô, kɨ ńgɛnə̂ akoobə́ kɨ́kɔb ńdagə̂ lámə́sə ə́wɨ́ pô.

⁴⁵Ŋwu yi əshîʼnə ä yǐəə nə́ əshîʼnə páʼ wɨ́d fɛ́d nə́ á mə́m əshîʼnə a lɔʼkə̂ nə́ á ntɨ́ yə́, ŋwu təpɔŋ ä yǐəə nə́ təpɔŋ páʼə á fɛ́d nə́ á mə́m təpɔŋ páʼ lɔʼkə̂ nə́ á ntɨ́ yə́, Ńté ńgə́ ŋwunə ä sóŋə lə́ anu á lwɛ́nkə nə́ á ntɨ́ yə́.”

⁴⁶“Lə ghɛlə̂ akə̂ gho fóŋə mə ńgə́, ‘Mmaʼmbî, Mmaʼmbî’ ḿbə́ ńkě chî mbɔʼ gho faʼə̂ anu mäŋ sóŋ nə́ ńgə́ gho faʼ pô?

⁴⁷Maŋ yǐ nəələ̂ gho ndzaŋ páʼ ŋwu páʼə a yǐ nə́ á mbô maŋ ńdzóʼə atséebə mə, ńkə́ ə́faʼ a chî nə́.

⁴⁸A chî lə́ ándó ŋwunə a tə́ nə́ ḿbɔ́ ndɛ̂, ńtóŋə achîəndɛ̂ ají á shǐəə, a noŋkə zə́ələ́ á ndu ngwúbə. Awɛ̌nkǐə á ghɛd ńdaŋ ńkɔnə̂ ázə́ələ́ ḿbə́ ńkě chî mbɔʼ á chiʼ pô ńté ńgə́ pə́ nə ńkwúlə ájɨ́d, ə́ tyantə̂

⁴⁹Lə́ ŋwu páʼə a zóʼ nə́ atséebə mə ńkě zɨ́d nə́ anu néŋ pô, a chî lə́ ándó ŋwu páʼə a kə pɔ́ nə́ ndɛ̂ tə achîə. Awɛ̌nkǐə á ghɛd ńdaŋ ńkɔn ndɛ̂ yi ə́wɨ́ ə́ tɔ́g ńkwɛdnə̂ yə́ á ndəsê anuə á měe yə́ aliʼ yəwə́.”