Read Awing Lukasə 7 Bible Online

Lukasə 7 - Awing bible

Lukasə 7

¹Ndzaŋ Yeso a kə məgtə̂ nə á mə́ sóŋ nə́ ndɛn mənu a pěʼ nə̈ ńdoonə̂ ńgə́ pɨ pə́ zóʼ lə́, ńkwú ńgɛnə̂ Kapanawumə.

²Nətû nə́ ngaŋə́maʼə́ntso nətsə́ nə́ kə chî ə́wə́, ngaŋəfaʼ əyǐ yitsə̌ páʼə a kə kɔŋ nə́ tə́shúnə́ a tə́ ńgoonə̂ tə ńtə́əmə á mə́ kwû nə́.

³Ndzaŋ nətû nə́ ngaŋə́maʼə́ntso zə̂ nə́ kə zóʼ nə́ anu ńté Yeso lə́, ńtú mətû mə́ pəjusə mətsə́ á mbô yí ńgə́ a yǐ ńtsóʼə ngaŋəfaʼ əyǐə.

⁴Pó yǐəə á mbô Yeso ńdánə ńchíg ḿbóʼmbô ə́sóŋə ńgə́, “Ŋwu nə́ a lánə ńkoʼnə̂ təmbɔʼ gho kwáalə yə́,

⁵ńté ńgə́ a kɔŋə̂ aláʼə azə́g ḿbɔ́ ndɛ̂ aghóʼkə Əsê á mbô pəgə́.”

⁶Pópə Yeso ghɛnə̂, ndzaŋ pó nə ńtíʼ nə́ ḿbáatə ndɛ̂ nətû nə́ ngaŋə́maʼə́ntso zə́ lə́, a tú ngaŋmə́ko əjí ńgə́ pə sóŋ nə́ Yeso ńgə́, Mmaʼmbî kɔ gho jwaʼ mbɨ əzo, “Maŋ kě koʼə̂ ŋwu mbɔʼ gho kwúnə á ndɛ̂ maŋ pô,

⁷kɨ ńkoʼə̂ ŋwu mbɔʼ maŋ tə́əmə á mbi gho pô. Lə́, sóŋ tsɔʼə táʼə anuə, ngaŋəfaʼə mə a yǐ yáŋə.

⁸Maŋ kə́ ḿbə́ azá lə́ ŋwu ńdzóʼə á mbô nətûə, ńkə́ ńtúg ngaŋə́maʼə́ntso pə́ kə̈ ńdzóʼə á mbô maŋə. Mäŋ sóŋə á mbô ghɛn ńgə́, ‘Ghɛnə̂,’ á ghɛnə̂, ə́sóŋə á mbô yǐ ńgə́, ‘yǐəə’ a yǐəə. Ḿbɨ ə́sóŋə á mbô ngaŋəfaʼə mə ńgə́ faʼ ńgə́, á kə́ ə́faʼə̂.”

⁹Ndzaŋ Yeso a kə zóʼ nə́ anu jɨ lɛ lə́, á kɨʼnə̂ yə a sɛdnə̂ ə́sóŋə á mbô ənɔ pɨ ə́ kə chî nə́ a ndzəm yí lə́ ńgə́, “Mäŋ fiʼtə̂ áwɨ́ ńgə́ tə ńkoʼə̂ pə́ á mə́m Islɛl maŋ kě mbimə́ ándó jɨ kə́ zə́ənə pô.”

¹⁰Pɨ pə̂ páʼ pə́ pěʼ nə́ ńtúmə ághɔ́b lə́ pó tə́ ḿbəənə̂ á ndɛ̂ ńdzə́ənə ngaŋəfaʼ nətû nə́ ngaŋə́maʼə́ntso zə̂ a yáŋə yə́.

¹¹Mɔ́ akəmə ndɛd yitsə̌ á laŋ, Yeso a ghɛnə̂ aláʼ yitsə̌ pə̈ fóŋə ńgə́ Nɛnə. Ngaŋə́zoŋə́ndzəm əjí pópə mɛ́ ənɔ pɨ pətsə́ ə́ zoŋə̂ yə́.

¹²Ndzaŋ páʼə a kə koʼ nə́ á ndú páʼ ə́ kwú nə́ á aláʼ yi wɨ́ lə́, pə́ twáamə akwûə ŋwu ńtə́ ə́fɛ́lə nə́ zə́ələ́, a pə́ ndaʼ mɔ́ mbyâŋnə a kə chî nə́ á mbô nkog məngyě yitsə̌. Mɛ́ ənɔ pɨ pətsə́ á kə chîə á ndzəm məngyě yi wɨ ə́fɛ́lə aláʼ yi wə́.

¹³Mmaʼmbîə a kə zə́ənə nkog məngyě wɨ́d ghɛn ńtíʼ ńkó mələ́ŋ mí ə́sóŋə á mbô yí ńgə́, “Kɔ gho kyéŋə,”

¹⁴ńtíʼ ńgɛn ńkwum nkwumə akwûə ŋwu wə̂. Pɨ pə́ pěʼ nə́ ḿbeʼə̂ wɨ́d lə́ pó tə́əmə, a sóŋ ńgə́, “Mɔ́ ngwəshu, mäŋ sóŋə á mbô gho ńgə́ gho lǒo á əsê!”

¹⁵Akwûə ŋwu yəwə́ á lǒo á əsê ńnáanə ńchúʼə á mə́ tsáb nə́, Yeso a pɨ ńkə́ ńtíʼ ə́fɛ̂ yə́ á mbô mǎ əyǐə.

¹⁶Ŋwu ntsəmə nə ḿbɔ́gə anu yə wɨ́ lɛ tətətə, pó tíʼə ńgóʼkə Əsê ə́sóŋə ńgə́, “Ntûsê yi ngweŋə́ a yǐəə á mbô pɛnə̂, Əsê ə́ yǐəə á mə́ kwá nə́ pɨ píə!”

¹⁷Atsáb ńté anu jɨ páʼ Yeso a kə ghɛd nə́ lə́, á nə ńnyinə̂ á mə́m əlá aláʼə Judya tsɔʼə ntsəm ḿbá ngaŋmə́peelə.

¹⁸Ngaŋə́zoŋə́ndzəm Jɔn nə ə́fiʼtə̂ yi nə́ ndɛn mənu ghɛn tsɔʼə ətsəmə. A fóŋə ághɔ́b pə́ pɛ̌

¹⁹ńtúmə á mbô Mmaʼmbî ńgə́ pó pítə yí ńgə́, “Gho lə́ ŋwunə ándó pə́ nə ə́sóŋ nə́ ńgə́ gho tə́ ńgyǐəə lə́ kɨ pəg pyáabə yi ndaʼə?”

²⁰Pɨ pipə wɨ́ pó yǐəə á mbô Yeso ə́sóŋ ńgə́, “Jɔn Əfɛ̂nkǐə a ghə́ pəg yǐ ḿbítə gho ńgə́, ‘Gho lə́ ŋwunə ándó páʼ pə́ kə sóŋ nə́ ńgə́ a lǒo yǐ lə́ kɨ pəg pyáabə yi ndaʼə?’ ”

²¹Tsɔʼə əghâ yi wɨ́, Yeso a tsóʼ pɨ pi nɨ́ nə́ nə́ məghɔ mɔ́b, ńtsóʼ məghɔ mə́ təpɔŋ, ńkəm əjwi təpɔŋə á mbɨ pɨ, ńkə́ ńgɛd pəfəg pə́ jɨ́ əliʼə́.

²²Ńtíʼ ńkwěe ngaŋə́zoŋə́ndzəm Jɔn ńgə́, “Ghɛn nə́ ə́sóŋə Jɔn nə́ anu páʼ pɨ yǐ nə́ ńjɨ́ ńkə́ ńdzóʼə: pəfəg pə́ jɨ́ əliʼə́, pəkɔ́ŋə́sê pə́ nyinə̂, ngǎŋnkaʼ ə́ ŋwaʼə̂, əkə̌tû ə́ zóʼ əliʼə́, pəkwû pə́ júmnə, pə́ kə́ ńnáŋkə nkɨ yi əshîʼnə á mbô pəpóŋə.

²³Mbwɔ́dnə ə́ chîə á mbô ŋwu páʼ atûə ajíə á kě nə̈ koʼlə̂ ńté mə pô.”

²⁴Əghâ ándó məntú mə́ Jɔn mə́ nə ńgɛn nə́ lə́, Yeso a chúʼə á mə́ fiʼtə̂ nə́ pɨ nə́ anu ńté Jɔn ə́sóŋə ńgə́, “Əghâ ándó pɨ nə ńgɛn nə́ á kɔŋ məŋkwâʼlə̌ á mə́ tég nə́ Jɔn lə́, pɨ nə ńkwaŋ ńgə́ pɨ yǐ jɨ́ lə́ akə̂? Á nəyeŋ páʼ kəfəələ á chiʼ nə́?

²⁵Ńchî ə́lɨ́d pô, pɨ nə ə́fɛ́d ńgɛn lə́ á mə́ jɨ́ nə́ akə̂? Á ŋwu páʼə a wê nə́ ətsəʼ pi əshîʼnə? Ngá, pɨ pə̈ wê nə́ ətsəʼ pi əshîʼnə ḿbəənə̂ ńtúg əpú nkáb pö chîə lə́ á mə́m məntɔ́ʼə.

²⁶Fiʼtə̂ nə́ mə, nə́ kə ghɛnə̂ apeŋ lə́ á mə́ jɨ́ nə́ akə̂? Á ntûsê? Lə́ ndə̌ŋdəŋ mäŋ fiʼtə̂ nə́ áwɨ́ ńgə́ pɨ kə zə́ənə ŋwu páʼə a tsɛ nə́ ntûsê.

²⁷Ńté ńgə́ Jɔn lə́ ŋwu páʼ atséebə Əsê á sóŋ nə́ ńgə́, ‘Əsê a sóŋ ńgə́, lɛ̌ ntúmə mə, maŋ yǐ nə́ ə́ túmə yə́ á mbi pəənə́ a ghɛn ŋ́ŋáʼ ndúmə á mbô pəənə́.’ ”

²⁸Yeso a ghɛn nə́ mbiə á mə́ sóŋ nə́ ńgə́, “Mäŋ kyaʼə̂ áwɨ́ ńgə́, á mə́m pɨ páʼ lə́ pî nə́ mengyě ḿbîə ághɔ́b, ŋwu tsə̌ páʼ a tsɛ nə́ Jɔnə a kě ə́wɨ́ chî pô. Lə́, chigə mɔ́ kə́nyaŋ ŋwunə á mə́mə anuə nəfoonə Əsê, a tsɛɛlə̂ yə́.”

²⁹Ŋwu ntsəm páʼə a kə chî nə́ aliʼ yi wɨ́ tə ḿbá ngaŋə́kwáalə́ nchubə aláʼ, əghâ ándó pó kə zóʼ nə́ atséebə Yeso lə́, ḿbí ńgə́, ndú Əsê lə́ yi ŋwaʼ nə́. Ńté ńgə́ pó nə ńkwá nkǐə á mbô Jɔnə.

³⁰Lə́ Pəfalasi pópə ngaŋə́zéʼkə pənoŋkə, pó kǐə ághóobə́ akwaŋə anu páʼ Əsê a nə ńtúg nə́ ńté ághóobə́. Ńté ńgə́ pó nə ńkě nkǐə á mbô Jɔn kwá pô.

³¹“Əghâ nə lɛ̌, mbɔʼ maŋ lánə ə́fiʼkə̂ pɨ pə́ ngoʼ pɨ lə nə́ akə̂? Pó chî lə́ ándó akə̂?

³²Pó chî lə́ ándó pɔ̂nkə̂ pə́ náanə á aliʼə́ məteenə́, ńtíʼə ə́fóŋ ngaŋmə́ko əzɔ́b ə́sóŋə ńgə́, ‘Pəg póʼə apɛ́nə́ndzɔ́ʼə́ á mbô pəənə́, lə́ nə́ pə́ ńkě pɛ́n pô. Ńdzɔb mənkǐ mə́ nəwûə á mbô pəənə́, lə́ nə́ pə́ ńkě kyéŋ pô.’

³³Jɔn Əfɛ̂nkǐə a kə yï ńchîə tə́ jî məjî ńkə̈ ńchîə tə́ nô məloʼ, nə́ sóŋ ńgə́, ‘A túgə pɛ̌sê!’

³⁴Mɔ́ ŋwunə a pɛn ńgyǐəə, ńtə́ ńjîə ńkə́ ńnô, nə́ sóŋ ńgə́, ‘A jîə tə́shú ńkə́ ḿbɛ́ɛlə məloʼə, ḿbɨ ḿbə́ ngaŋəko ngaŋə́kwáalə́ nchubə aláʼ pópə ngaŋə́ghɛlə təpɔŋə!’

³⁵Pɨ páʼ pó pí nə́ ajíənuə Əsê pö nəələ̂ ńgə́ zə́ələ́ á koʼnə̂.”

³⁶Ŋwu Falasi yitsə̌ a kə láʼ ńgwúnə Yeso ńgə́ a yǐ pó yí jî məjîə á ndɛ̂ yə́. Yeso a ghɛnə̂ á ndɛ̂ yí ńnáanə á əsê á mə́ jî nə́ məjîə.

³⁷Məngyě yitsə̌ a kə chîə aláʼ wɨ́d wə̂ páʼə a kə pə́ nə́ ngɛdtəpɔŋə, ńdzóʼ ńgə́ Yeso a tə ńjîə məjîə á ndɛ̂ ŋwu Falasi wə̂ ńtíʼ ńgyǐ nə́ fúfú ntsə́ŋ məghɔ́d mə́ azɔ́ʼə́kwub mimə ləmkə̂ nə́ á mə́m ntsə́ŋ pə́ tsoŋkə̂ nə́ nə́ fúfú ngɔʼ,

³⁸ńtə́əmə á ndzəm məko Yeso ńkyéŋə, nkǐmə́g əyí ə́ tsóolə ńnwáakə məko mə́ Yeso. A lɔg mənoŋ mə́ atû mí ə́shíg ə́wə́, ńdɔg ntso yí ńchweg məko mə́ Yeso ə́wɨ́ ńtíʼ ńdzɔ́ʼ nə́ məghɔ́d mimə ləmkə̂ nə́ mə̂.

³⁹Ŋwu Falasi wə̂ páʼ a kə wú nə́ Yeso á ndɛ̂ yí lə́, a jɨ ndɛn mənu ghɛn tsɔʼə ətsəm ńtíʼ ə́sóŋə á ntɨ́ yí ńgə́, “Mbɔʼ ŋwu nə a pěʼ ḿbə́ lə́ Ntûsê, tə ḿbə́ a pěʼ ńdánə ńjî ntê məngyě páʼ ə́ kwum nə́ yə́, tə ḿbə́ a pěʼ ńjî ńgə́ lə́ chigə ngɛdtəpɔŋə.”

⁴⁰Akwe Yeso á pə́ ńgə́, “Saamun, maŋ túgə anu yətsə̌ á mə́ fiʼtə̂ nə́ gho.” Saamun a ghə́ “Ndzéʼkə, fiʼtə̂ mə.”

⁴¹Yeso a ghə́, “Ŋwu tsə̌ páʼ ä tsɔ́ʼkə nə́ nkéebə a nə́ ńdáʼ ńtsɔ́ʼkə nkéebə á mbô pɨ pətsə́ pə́ pɛ̌, táʼ a tsɔ́ʼ tɔsə məghə́m mɛ́n tênə, yitsə̌ a tsɔ́ʼ tɔsə nkɛd tênə.

⁴²Ŋwu tsə̌ a mə́m pó mbɔʼ a nə ńtû a nə ńkě ə́wɨ́ chî pô. A kwéʼnə ə́sóŋ ńgə́ pó lɔgə̂ ághóobə́ zə́ələ́. Nə́ kwaŋ ńgə́ á mə́m pó pə́ pɛ̌, wə́ənə́ a yǐ kɔŋə̂ yí tsɛɛlə̂ yitsə̌?”

⁴³Saamunə a kwěe ńgə́ “Maŋ kwaŋ ńgə́ lə́ ŋwu páʼə a nə ńtúg nə́ tə́kɔʼ nəkyɛ́ɛlə.” Yeso a sóŋ nə́ yí ńgə́, “Akwe azô á koʼə̂.”

⁴⁴A sɛdnə̂ ńnáŋə məngyě wə́ ńtíʼ ə́sóŋə á mbô Saamun ńgə́, “Gho zə́ənə məngyě nə́? Maŋ pěʼ ńgyǐəə á ndɛ̂ gho, gho kě fɛ̂ nkǐ ńgə́ maŋ sog məkoolə mə ə́wɨ́ pô, a pɛn ə́sog məkoolə mə nə́ nkǐmə́g əyíə, ə́shíg nə́ mənoŋ mə́ atû míə.

⁴⁵Maŋ pěʼ ńgyǐ lə́, gho kě mə chweg pô, a pɛn ńkě kə́ mɛdtə̂ á mə́ chweg nə́ məkoolə mə nə́ ntso əyí ə́fɛ́d páʼ maŋ pěʼ nə́ ńkwúnə á ndɛ̂ nə́ pô.

⁴⁶Gho pěʼ ńkě atûə mə nə́ məghɔ́d zɔ́ʼ pô, a pɛn ńdzɔ́ʼ məkoolə mə nə́ məghɔ́d mimə ləmkə̂ nə́.

⁴⁷Mäŋ pɛn ə́fiʼtə̂ gho ńgə́, ndɛnə akɔŋnə nə́ páʼ a nɨd nə́ lə́ ə́ nəələ̂ ńgə́ pə́ ləgnə̂ təpɔŋ əyǐ yi nɨ́ nə́. Ŋwu páʼ pə́ ləgnə̂ nə́ təpɔŋ əyǐ tsɔʼə mɔ́ aliʼə́ a kə̈ ńnəələ̂ lə́ mɔ́ aliʼə́ akɔŋnə.”

⁴⁸Yeso a tíʼ ə́sóŋ nə́ məngyě yi wɨ́ ńgə́, “Pə́ ləgnə̂ təpɔŋ əgho.”

⁴⁹Apuʼə pɨ páʼ pó po pěʼ nə́ ńnáanə ńtə́ ńjîə məjî pó tíʼə ńtséebə ə́sóŋə nə́ məmbɨ mɔ́b ńgə́, “lɛ̌ əwə ŋwu tə ńtíʼə ńdəgnə̂ pətəpɔŋ pə́ pəənə?”

⁵⁰Lə́ Yeso a pə́ ə́sóŋ nə́ məngyě wə̂ ńgə́, “Mbimə́ əzo ə́ chwádkə gho: ghɛn nə́ mbwɔ́dnə.”