Read Awing Lukasə 8 Bible Online

Lukasə 8 - Awing bible

Lukasə 8

¹Ndɛd yitsə̌ ə́ laŋ, Yeso pópə ngaŋə́zoŋə́ndzəm əjí zə̂ ntsɔb pɛ̌ ə́ fɛ́lə á mə́m táʼə aláʼ ńkwú nə́ yətsə́, ńnyinə̂ ə́fɛ̂ nkɨ yi əshîʼnə ńté anuə nəfoonə Əsê.

²Lə́ nə ńkə́ ḿbə́ pópə pəngyě pətsə́ páʼə a kə kəm nə́ əjwi təpɔŋə á mə́m pó ńkə́ ńtsóʼ məghɔ móobə́: Mɛɛlə, (pə́ nə ńkə́ nə̈ ə́fóŋə yi nə́ Magdalɛn lə̂), páʼ pɛ̌sê pɛn asaambɛ̂ ə́ nə ə́fɛ́d nə́ á mbɨ yi lə̂.

³Jwana, ngwě Chuza páʼə a nə̈ ńnáŋ nə́ apeʼə á ndɛ̂ Ɛlɔdə, Susana pópə pəngyě pətsə́ tə ńnɨ́ páʼ pó nə ńdɔg nə́ ndə̌ əpú əpɔ́b ńkwáalə Yeso ə́wə́.

⁴Ndzaŋə ándó ŋwu məsɔŋ páʼə a kə fɛ́d nə́ aliʼə́ aliʼ ńkɔ́ʼ ńtsɛntə̂ á mbi yí tə ńtíʼ mɛ́ ənɔ pɨ lə́, a tséebə atséebə́nə́múʼ zəənə́ á mbô pó:

⁵“Ŋwu tsə̌ a kə láʼ ńgɛnə̂ apǐəpúmə, Ndzaŋə ä kə pǐ nə́ lə́, yitsə̌ mbi ə́ wukə̂ á alaŋə́ pə́ nəŋtə̂, pəsə́ŋ pə́ tíʼ ńgyǐ ḿbyántə ńkɔ́lə ághóobə́.

⁶Yitsə̌ ə́ wukə̂ á ndu ngwúb ə́sáʼ mbɨ ńjúmə zɨ́d ńté ńgə́ nkǐ ə́ kě á ndəsê chî pô.

⁷Yitsə̌ ə́ wukə̂ á mə́m məsɔbsoobə, məsɔbsɔb mə́ kɔ́ʼ ńkwúlə zə́ələ́.

⁸Yitsə̌ ə́ wǔəə á ndu ndəsê yi əshîʼnə ńkɔ́ʼ ńdzə́m nga nkɛlə́.” Ndzaŋ a kə məgtə̂ nə́ atsáb zɨ lə́ ə́sóŋə á mbô pó ńgə́, “Jwə́ʼtə nə́, ŋwu páʼə a túg nə́ mətôglə á mə́ zóʼ nə́ a zóʼə.”

⁹Ngaŋə́zoŋə́ndzəm əjí pó pítə yí nə́ anu páʼ atséebə́nə́múʼ zəənə́ á sóŋ nə́.

¹⁰A kwěe ńgə́, Pə́ fɛ̂ ajíənu nə́ pɨ mbɔʼ nə́ jî mənu mə́ nəlyaŋnə́ mətsəm ńté anuə nəfoonə Əsê, lə́ ńgɛn nə́ pɨ pə́ ndaʼ á chî lə́ nə́ atséebə́nə́múʼ ńjî ńgə́ mbɔʼ pó náŋə, ḿbə́ ńkě jɨ́ pô, ńjwə́ʼtə, ḿbə́ ńkě zóʼ pô.

¹¹“Lɛ̌ anu páʼə atséebə́nə́múʼ yəwə́ ä sóŋ nə́: mbǐpú yi wɨ́ lə́ atséebə Əsê.

¹²Yi ə́ wukə̂ nə́ alaŋə́ lə́ pəənə ándó pó zóʼ nə́, Satanə a pə́ ńgyǐ ə́fógə atsáb yəwə́ á ntɨ́ pó ńjî ńgə́ kɔ pó pímə zɨ́d ńchwáalə.

¹³Yi ə́ wǔ nə́ á ndu ngwúb lə́ pɨ pó zóʼ nə́ atsáb yə wɨ́ ńkə́ ḿbímə zɨ́d nə́ akɔŋtə ḿbə́ ḿbóŋ məŋaŋə́. Pó pí nə́ mɔ́ akəmə ndɛlə́, lə́, akwaʼlə á yǐ pó wǔ ḿbɨ nə́ ndzəmə

¹⁴Yi páʼ ə́ pěʼ nə́ ńgwǔəə á mə́m məsɔbsɔb, lə́ pɨ páʼ pó zóʼ nə́, lə́ nətáŋ mbîə, afoʼə, pópə əpú mbî ə́ kwúlə ághɔ́b pó zə́mə mənta mə́ kě nə̈ təənə̂ pô.

¹⁵Yi páʼ ə́ pěʼ nə́ ńgwǔəə á ndu ndəsê yi əshîʼnə, lə́ pəənə ándó pó zóʼ nə́ atsáb yə wɨ́ ḿbímə zɨ́d nə́ ntɨ́ əghɔ́b ətsəm, ńkə́ ńgwam ntɨ́ nə́ zɨ́d ńtíʼ ńdzə́m mənteemə́.”

¹⁶“Mbɔʼ ŋwunə a kě lám chúʼ ńdɔgə̂ atsɛ̂ akáŋ ńkə́bkə ə́wɨ́ kɨ ńtə́gə wə́ələ́ á ntɛ́n əkwu pô. A tə́gə wə́ələ́ á ndu nəchwɛ́d ńjî ńgə́ ŋwu ntsəm páʼə a tə́ nə́ ńkwúnə á ndɛ̂ a jɨ́ əliʼə́.

¹⁷Ńté ńgə́ ajûtsə́ á kě ə́wɨ́ chî páʼə á lyáŋ nə́ páʼə á láʼ nə́ kě kyaʼnə̂ pô, kɨ anu yətsə́ páʼ pə́ lɔʼkə̂ nə́ páʼə á láʼ nə́ kě á əshîsaŋ ə́fɛ́d pô.

¹⁸Maŋ pɛn ńtíʼə ə́sóŋə á mbô pɨ ńgə́ nə́ lɔg ndɛd ndzaŋ páʼ nə́ jwə́ʼtə nə́, ńté ńgə́ ŋwu páʼə a túg nə́ á nə́ənə, pə yǐ pegə̂ á mbô yə́; ŋwu páʼə a kě nə́ ajûtsə́ túg pô, mɔ́ aliʼ páʼə a kwaŋ nə́ ńgə́ a túg, pə́ yǐ ə́ kwáalə á mbô yə́.”

¹⁹Əghâ yi wɨ́, Mǎpə Yeso pópə pəlim pí ə́ kə yǐəə á mə́ jɨ́ nə́ yə́, ḿbə́ ńkě chî mbɔʼ pó yǐ ḿbáatə yí pô ńté ŋwuməsɔŋə́ a nə ńchî nə́ ə́wə́.

²⁰Ŋwu tsə̌ a sóŋ nə́ yí ńgə́, “Mǎ gho pópə pəlim pô pó tə́əmə apeŋ ńtə́ ńnáŋə gho.”

²¹Lə́ a kwěe ághɔ́b ńgə́, “Mǎ mə pópə pəlimə́ mə lə́ pəənə ándó pö zóʼ nə́ atséebə Əsê ńkə̈ ə́faʼə̂ anu páʼ zə́ələ́ á sóŋ nə́.”

²²A nə ńdáʼ ḿbə́ alě tsə́ Yeso a sóŋ nə́ ngaŋə́zoŋə́ndzəm əjí ńgə́ pó po túmə əfooghɨ ńgɛnə̂ á ndzɛnə́. Pó po tíʼ ńkwúnə á aŋkənúʼə́ ńchúʼə á mə́ tú nə́.

²³Ndzaŋ po kə tə́ nə́ ńtúmə lə́, Yeso á wǔəə pəlê, atyǎntə kəfəələ á chúʼə á mə́ kɔ́ʼ nə́ á mə́m əfooghɨ wə̂, nkǐ ə́ tíʼə ńkwúnə á mə́m aŋkənúʼə́ azóobə́, pó nə ńchîə á mə́m ngə́ʼə.

²⁴Ngaŋə́zoŋə́ndzəm əjí ə́ ghɛn ńjimkə̂ yí ńtíʼə ə́sóŋə ńgə́, “Tǎ, Tǎ, pɛn yǐ kwúkə!” A lǒo á əsê ńkwantə̂ kəfɨd wə̂ pópə nkǐ wə̂ ə́ kə kɔ́ʼ nə́ lə̂, kəfɨd wə̂ a lə́gnə, əliʼ ə́ kə mbwɔ́dnə.

²⁵A pítə ngǎŋndzəm əjí ńgə́, “Mbimə́ əjɨ ə́ ə́fó?” Lə́ nə ḿbə́ nkɨʼnənuə, pó tíʼə ḿbɔ́gə ḿbítə məmbɨ mɔ́b ńgə́, “Lɛ̌ əwə ŋwunə a ghɛn, ńtséebə tə nkǐ pópə kəfɨd zóʼnə yə́?”

²⁶Pó kə ghɛn tə ńkwúnə á əlá ndu Gelasinə, páʼə a chî nə́ á ndzɛnə́ nkǐə á ndú ə́ lǒo nə́ á Galili lə́.

²⁷Ndzaŋ Yeso a kə fɛ́d nə́ á nkǎŋkǐ lə́, ŋwu tsə̌ á mə́mə aláʼ yə wɨ́ páʼ pɛ̌sê á kə chî nə́ á mbɨ yə́ á zə́ənə yə́. Ndi ə́ chî wɨ́ ŋwu nə́ a kě nə́ atsəʼ wê pô, ńkě ndɛ̂ kə́ ńdê pô, ńdê yə́ pə́ á mə́m məse.

²⁸A kə zə́ənə Yeso lə́ ńkyéŋ ngye əjǐ ə́ kɔ́ʼə atǐə, a wǔəə á məko yí ńtíʼə ńkyéŋə ə́sóŋə ńgə́, “Yeso Mɔ́ Əsê, páʼə a tsɛ nə́ ajúmə atsəm, ghö kwáalə lə́ akə̂ á mbô maŋə? Maŋ póʼ mbô, kɔ gho ghɛd maŋ jɨ ngə́ʼə!”

²⁹A kə sóŋ ə́lɨ́d lə́ ńté ńgə́ Yeso a kə sóŋ nə́ əjwi təpɔŋ pə́ ńgə́ ə́ laŋ ə́fɛ́lə á mbɨ ŋwu wə̂. Əghâ pi nɨ́ nə́, əjwi təpɔŋ pə̂ ə́ tsɔ́ʼə yí ḿmáʼə̂ á ndəsê. Pə́ tíʼə ńtseŋnə̂ yí, ńkwúd mbô mí nə́ məŋkɛd mə́ atəənə́, mbɨ ńtô akəʼlə́ ńnéŋə á məko yə́. Lə́, a pə́ ńdzá ńdə́gtə pɨ́d, əjwi təpɔŋ pi wɨ́ ə́ tíʼə ńdɔgə̂ yí ńgɛnə̂ nə́ yə́ á kɔŋ yi njǔbtə.

³⁰Yeso a pítə yí ńgə́, “əlɛ́n əgho lə́ əwə?” A kwěe yí ńgə́, “Apoŋə azóobə́,” ńté ńgə́ pɛ̌sê pi nɨ́ nə́ pə́ kə kwúnə á mbɨ yə́.

³¹Pó póʼ mbô á mbô yí tə ḿbégnə ńgə́ kɔ á kəmə̂ ághɔ́b ńnéŋə á mə́m atéemə́təndwegtə zə̂.

³²Akwɛlə kwúna yətsə́ á kə chîə á ndu kɔŋ ńtə́ ńjîə məjî, pɛ̌sê pi wɨ́ pó póʼ mbô nə́ Yeso ńgə́ a mɛdtə̂ ághɔ́b pó ghɛn ńkwúnə á mə́m pəkwúna pi wə́, Yeso a pímə.

³³Pɛ̌sê pə wɨ́ pó tíʼ ə́fɛ́lə á mbɨ ŋwu wə́ ńkwúnə á mə́m pəkwúna pə̂, akwɛlə zə̂ atsəmə a tíʼ ńtsó məndə̌ á ḿbá ńkwúnə á əfooghɨ ə́fə́mnə ńkwúkə.

³⁴Ndzaŋ pɨ pə́ kə̈ tseŋnə̂ nə́ pəkwúna pɨ pó kə zɨ́ nə́ anu páʼə á laŋ nə́ lə́ ńkə ńgɛn ə́fiʼtə̂ á mə́mə aláʼ pópə mbɛnə́ mə́ aláʼə,

³⁵Pɨ pə́ tíʼ ə́fɛ́d ńgɛnə̂ á mə́ zɨ́ nə́ anu páʼə á laŋ nə́. Ndzaŋ pó kə yí nə́ á mbi Yeso lə́, ńdzə́ənə ŋwu wə̂ páʼ pɛ̌sê pə́ pěʼ nə́ ə́fɛ́lə á mbɨ yí lə́ a náanə á məko yí ńgwê ətsəʼ pí əshîʼnə ńkə́ ńtə́ ńdzóʼ əliʼə́. Pó pɔ́gə.

³⁶Pɨ páʼ pó nə ńjɨ́ nə́ anu páʼə á laŋ nə́, pó tíʼə ə́fiʼtə̂ pɨ pə́ ndzaŋ pə́ pěʼ nə́ ńdǎa ḿbɔŋə́ tsóʼə ŋwu wə̂ pɛ̌sê pə́ pěʼ nə́ ńchîə mbɨ yí lə̂.

³⁷Ŋwu ntsəmə á mə́m əláʼ ə́ líblə nə́ Gelasin tíʼ ə́sóŋ ńgə́ Yeso a ghɛnə̂ yí ńté ńgə́ ntɨ́ əghɔ́b ə́ kə lwɛ́nkə nə́ apɔ́gə. A tíʼ ńkwúnə á mə́mə aŋkənúʼə́ ńgɛnə̂ yə́.

³⁸Ŋwu pɛ̌sê pə́ pěʼ nə́ ə́fɛ́lə mbɨ yí lə́ a póʼ mbô ńgə́ pó Yeso ghɛnə̂, Yeso a pə́ ńkəmə̂ yí ə́sóŋ ńgə́,

³⁹“Kwə̂ á nchîndɛ̂ gho, ə́fiʼtə̂ ndɛn mənu Əsê a ghɛd nə́ á mbɨ gho.” Ŋwu wə̂ a tíʼ ńkwə̂ ə́fiʼtə̂ aláʼə atsəm nə́ ndɛn mənu Yeso a ghɛd nə́ á mbɨ yə́.

⁴⁰Ndzaŋə ándó Yeso a nə ḿbɨ nə ḿbəənə̂ á ndzɛnə́ nkǐ lə́, ənɔ pɨ ə́ kwáalə yí əshîʼnə ńté ńgə́ pó pətsəm nə ńtə́ ḿbyáabə yə́.

⁴¹Tsɔʼə əghâ yi wɨ, ŋwu tsə̌ páʼ pə nə̈ fóŋ nə́ yí nə́ Jaliɔs páʼə a pə́ nə́ nətû nə́ ndɛ̂sê Pəjusə, a yǐ ńgwǔəə á məko Yeso ḿbóʼmbô nə́ yí ńgə́ a yǐəə á ndɛ̂ yə́,

⁴²Ńté ńgə́ ndaʼ mɔ́ yǐ yi məngyě páʼə a nə ḿbə́ nə́ ándó ngoʼ ntsɔb pɛ̌ a nə ńtə́ ńkwûə. Ndzaŋ Yeso a nə ńtə́ nə́ ńgɛnə̂ lə́, pɨ pə́ jwíʼnə á mbɨ yə́

⁴³Məngyě yitsə̌ a nə ńchî ə́wɨ́ páʼə a nə̈ ńgɔ nə́ nə́ mə́sɔ́ nə́ ngoʼ ntsɔb pɛ̌, ńtsəŋə̂ ajúmə atsəm páʼə a nə ńtúg nə́ á mbô ngaŋə́ghɛlə məfǔə[4], lə́ ŋwu tsə̌ a pə́ ńkě ə́wɨ́ chî təmbɔʼ a tsóʼə yí pô.

⁴⁴A kɔ́ʼə á mə́m mboŋ pəənə á ndzəm Yeso ńtíʼ nkwum nəlwî nə́ atsəʼ jí, tsɔʼə əghâ yí wɨ́, mə́sɔ́ əyǐ wə̂ á lə́gnə.

⁴⁵Yeso a pítə ńgə́, “Əwə a kwum nə́ mə?” Ŋwu ntsəmə a kǐəə yə́. Pita a sóŋ ńgə́, “Tǎ, ŋwu məsɔŋə́ a ghɛn ńjíʼnə á mbɨ gho!”

⁴⁶Lə́, Yeso a pə́ ə́sóŋ ńgə́, “Ŋwu tsə̌ a kwumə̂ mə. Maŋ jî lə́ ńté ńgə́ mətɨ mə́ fɛ́lə á mbɨ maŋə.”

⁴⁷Məngyě wə̂ a tíʼ ńjɨ́ ńgə́ ndú yitsə̌ ə́ kě ə́wɨ́ chî təmbɔʼ a lyáŋ pô, ńtíʼ ə́fɛ̈d ńnyinə̂ ḿbɛ́nkə nə́ apɔ́g ńgyǐ ńgwǔəə məko Yeso, ə́fiʼtə̂ anu páʼ á ghɛd nə́ a kwumə̂ yə́ á mbi ŋwu ntsəmə. Ḿbɨ ḿbə́ nə́ ndzaŋ páʼə a yáŋ nə́ tsɔʼə əghâ yi wə́.

⁴⁸Yeso a tíʼ ə́sóŋə á mbô yí ńgə́, “Móonə mə, mbimə́ əzo ə́ tsóʼə gho. Ghɛn nə́ mbwɔ́dnə.”

⁴⁹Ndzaŋ Yeso a nə ńtə́ nə́ ḿbɛ́lə ńtséebə lə́, ŋwu tsə̌ a lǒo á ndɛ̂ Jaliɔs páʼə a nə ḿbə́ nə́ nətû nə́ ndɛ̂sê Pəjus lə̂ ńgyǐ ə́sóŋ ńgə́, “Mɔ́ gho a kwûə yə́, kɔ gho pɨ ńjwaʼə̂ a Ndzéʼkə.”

⁵⁰Ndzaŋə ándó Yeso a nə ńdzóʼ nə́ anu jɨ lə́, ńtíʼ ə́sóŋə á mbô Jaliɔsə ńgə́, “Kɔ gho pɔ́gə, pí tsɔʼə pí nə́, mɔ́ gho a yǐ yáŋə.”

⁵¹Əghâ ándó Yeso a nə ńgyǐ nə́ ńkwúnə á ndɛ̂ Jaliɔsə lə́, ńkě pí ńgə́ ŋwu tsə̌ a zoŋə̂ yí ńkwúnə á mə́m ndɛ̂ pô tə ńdéʼtə Pita pó Jɔn nə́ Jɛmsə ḿbɨ ḿbə́ nə́ tǎpə mɔ́ yi wɨ pó mǎ əyǐ.

⁵²Ŋwu ntsəmə a nə ńchî nə́ aliʼ yi wɨ́ a nə ńtə́ ńkyéŋə ə́fɨnə̂ ńté mɔ́ yi wə́. Yeso a sóŋ ńgə́, “Naʼ nə́ nəkyéŋə, mɔ́ yi wə́ a kě kwú pô, a lê yi lə́ lê nə́.”

⁵³Pó pətsəm weŋə̂ yi ńté ńgə́ pó nə ńjî ńgə́ mɔ́ yi wə́ a kwûə.

⁵⁴Lə́ Yeso a pə́ ńgwaamə̂ apô ají ńtíʼ ə́sóŋ ńgə́, “Móonə mə, lǒo á əsê!”

⁵⁵Nchîmbî əji ə́ pəənə̂, a tɔ́g ńdǒo á əsê. Yeso a tíʼ ə́sóŋ nə́ pó ńgə́, “Fɛ̂ nə́ ajúmə a jîə.”

⁵⁶Anu yəwə́ á nə ńkɨʼnə̂ tǎ əyǐ pó mǎ əyǐə. Lə́ Yeso a pə́ ə́sóŋ ńgə́ kɔ pó fiʼtə̂ ŋwu tsə̌ nə́ anu páʼə á laŋ nə́.