Read Awing Lukasə 9 Bible Online

Lukasə 9 - Awing bible

Lukasə 9

¹Yeso a fóŋ ngaŋə́zoŋə́ndzəm əjí zə̂ ntsɔb pɛ̌ ə́fɛ̂ mətɨ mətsəmə á mbô pó á mə́ fɨ́dkə nə́ pəpɛ̌sê pətsəm ə́ kə́ tsóʼ məghoonə́.

²A tíʼ ńtúmə ághɔ́b ńgə́ pó ghɛn ə́sóŋə anuə nəfoonə Əsê ńkə́ ńtsóʼ pəghoonə́.

³A sóŋə á mbô pó ńgə́, “Kɔ nə́ lɔgə̂ ajûtsə́ ńgɛn nə́ zə́ələ́; kɨ mbaŋ, kəənə apa, kɨ məjî, kɨ nkáb, kɨ yətsə́ atsəʼə́.

⁴Ndɛ̂ ntsəm páʼ nə́ yǐ nə́ ńkwú ə́wɨ́, pə́ pímə áwɨ́, nə kə̈ ńchîə tsɔʼə ə́wɨ́ tə ńdáʼ fɛ́lə aláʼ yi wə̂.

⁵Aliʼə́ atsəm pə́ kě nə́ áwɨ́ ə́wɨ́ pí pô, nə́ kɔdtə̂ akəpóglə́ á məko pəənə, ə́fɛ́lə áwə́ənə́ aláʼ yi wə́, zəənə́ á yǐ chîə ándó akwantə anuə á mbô pó.”

⁶Pó tíʼ ə́fɛ́d ńgɛn, ńdǒo nə́ táʼə aláʼ ńkwúnə nə́ yətsə́, ńnáŋkə nkɨ yi əshîʼnə ńkə́ ńtsóʼə pəənə aliʼə́ atsəmə.

⁷Ɛlɔd páʼə a nə́ ḿbə́ nə́ nətû nə́ Galiliə a zóʼə anuə atsəm páʼə á nə́ ńdaŋ nə́ ńtíʼ ńjwaʼlə̂ yí ńté ńgə́ pɨ pətsə́ pə́ nə ńtə́ ə́sóŋə ńgə́, “Jɔn páʼə ä fɛ̂ nə́ nkǐ lə́ a júmnə á nəwûə.”

⁸Pətsə́ pə̈ pəənə ə́sóŋə ńgə́, “Elayija a pɨ ḿbəənə̂.” Pətsə́ pə̈ pəənə̂ ə́sóŋə ńgə́, Táʼ ńtú Əsê ngoʼ pəchə́ yitsə̌ a pɨ ńjúmnə á nəwûə.

⁹Lə́ Ɛlɔdə a pə́ ə́sóŋ ńgə́, “Maŋ kə ghɛd pə́ lə́gə atûə Jɔnə, pə́ pɛn ḿbɨ ńtíʼə ə́sóŋə ghɛn ndɛn mənu ńté lə́ ə́wə́?” A tíʼə ńdɔ ndú ətsəmə á mə́ jɨ́ nə́ Yeso.

¹⁰Məntú mə̂ mə́ kwə̂ ə́fiʼtə̂ Yeso nə́ anuə atsəm pó ghɛd nə́, á lɔgə̂ ághɔ́b pó po ghɛn tsɔʼə ngǎ pó á aláʼ yitsə̌ pə́ fóŋə nə́ Bɛdsada.

¹¹Lə́, mboŋ pɨ pə́ ńdzóʼ ńtíʼ ńdzoŋə̂ yə́. A lɔgə̂ ághɔ́b əshîʼnə ńtíʼ ə́sóŋə anu ńté anuə nəfoonə Əsê á mbô pó ńkə́ ńtsóʼ pəghoonə́.

¹²Mə́numə á kə tíʼ ḿmɛ́lə, ngaŋə́zoŋə́ndzəm əjí zə̂ ntsɔb pɛ̌ ə́ yǐ ə́sóŋ nə́ yí ńgə́, “Ghɛd ŋwu məsɔŋə́ nə́ a ghɛn ńjî ńgə́ pó ghɛnə̂ á mə́m əláʼ pópə əfɔ páʼ ə́ chî nə́ ḿbáatə ńchwaalə̂ ajú ńjî ńkə́ ńnáŋə aliʼ ńdê wɨ́ ńté ńgə́ lə́ aliʼə́ tə ŋwunə.”

¹³Lə́ Yeso a pə́ ńkwěe ághɔ́b ńgə́, “Fɛ̂ nə́ ajú pó jîə.” Pó sóŋ ńgə́, “Pəg túg lə́ tsɔʼə apéenə məkálə́ ntáʼ tâ nə́ əshû ńtáʼ pɛ̌. Gho loonə̂ lə́ ńgə́ pəg ghɛn ńjú məjîə á mbô mboŋ ŋwu məsɔŋ ghɛn ntsəm?”

¹⁴(Pɨ pə́ nə ńchîə aliʼ yi wɨ́ tə ńkoʼ tɔsə tênə) Yeso a sóŋə á mbô ngaŋə́zoŋə́ndzəm əjí ńgə́, “Ghɛd nə́ pó náanə á əsê nə́ əkwɛlə́ məghə́m mɛ́n tâ məghə́m mɛ́n tênə.”

¹⁵Pó ghabtə̂ ághɔ́b ńgɛd ŋwu ntsəmə a náanə á əsê.

¹⁶Yeso a tíʼ ńkwáalə apá zə̂ ntáʼ tâ nə́ əshû zə̂ ntáʼ pɛ̌ ńnáŋ nəpó ə́fɛ̂ ndǎ á mbô[5] Əsê ḿbagtə̂ zɨ́d ə́fɛ̂ á mbô ngaŋə́zoŋə́ndzəm əjí ńgə́ pó gheebə̂ á mbô pɨ pə̂.

¹⁷Pó jî ńdzɛ́d tə ngaŋə́zoŋə́ndzəm Yeso lag əpuʼ məjî ə́ kə pakə̂ nə́ ńgwǔ, ə́ pə́ pəkyíbə́ ntsɔb pɛ̌.

¹⁸Á nə ńdáʼ ḿbə́ alě tsə́ Yeso a tə́ ńchaʼtə́sê á ngǎ yə́, ngaŋə́zoŋə́ndzəm əjí ə́ yǐ ńtégə yə́ a pítə ághɔ́b ńgə́, “Pɨ pə̈ sóŋə ńgə́ maŋ lə́ əwə?”

¹⁹Pó kwěe yí ńgə́, “Pɨ pətsə́ pə̈ sóŋə ńgə́ gho lə́ Jɔn páʼə a fɛ̂ nə́ nkǐ lə̂,” pətsə́ pə̈ sóŋə ńgə́ gho lə́ Elayija, pətsə́ pə kə̈ ə́sóŋə ńgə́ gho lə́ ntûsê ngoʼ pəchə́ páʼ a pɨ nə́ ńjúmnə á nəwûə.

²⁰Yeso a pítə ághɔ́b ńgə́, “Nə́ pɨ lə́, nə̈ sóŋə ajɨ́ ńgə́ maŋ lə́ əwə?” Pita a kwěe yí ńgə́, “Gho lə́ yi páʼ Əsê a Tsəʼ nə́.”

²¹Yeso a chígə́ ńkwantə̂ ághɔ́b ńgə́ kɔ pó fiʼtə̂ a ŋwu tsə̌ nə́ anu yəwə́.

²²Ḿbɨ ə́sóŋ ńgə́, “Mɔ́ ŋwunə a yǐ jɨ́ ngə́ʼ yi ńtyantə̂ nə́, mətû mə́ aláʼ, ḿbá ngaŋə́pêsê yi weŋ, nə́ ngaŋə́zéʼkə pənoŋkə pə kǐəə yə́. Pə yǐ jwítə yə́, lə, əlěmbî pɛ́n teelə́ ə́ laŋə̂ a pɨ ńjúmnə á nəwûə.”

²³A tíʼ ə́sóŋə á mbô pó pətsəm ńgə́, “Mbɔʼ ŋwunə a tə́ ńdoonə̂ á mə́ zoŋ nə́ mə, a shib ńtə́g məmí mənuə á ndzəm ńtwáamə atǐə apagləpaglə ají əlě ətsəm ńdzoŋə̂ mə.

²⁴Ńté ńgə́ ŋwu ntsəm páʼə á lɔ nə́ a mə́ chwádkə nə́ nchîmbî əjǐə a yǐ péŋkə zə́ələ́, lə́ ŋwu ntsəm páʼə a péŋkə nə́ nchîmbî əjǐ ńté mə, a yǐ chwádkə zə́ələ́.

²⁵Mbɔʼ ŋwunə a túgə apeʼə á mbî jɨ tsɔʼə atsəm, pə́ pə́ ńkwá nchîmbî əjǐ kɨ nchîmbî əjǐ ə́ péŋə yí, a pə́ ńtûə yi nə́ akə̂ lə́?

²⁶Mbɔʼ ŋwunə a kó əshɨ́ ńté mə kɨ ńté ndzeʼkə́ mə, ḿbə́ Mɔ́ Ŋwunə a yǒ kə́ ə́ kó əshɨ́ té yí nə́ ndɛlə́ a yǒ nə́ ńtə́ ŋ́ŋwaŋkə̂ ńgyǐəə á mə́m nəpɔŋ əyǐə, ḿbɨ ḿbə́ nə́ nəgháʼ əyǐ, ḿbɨ ḿbə́ nə́ yi Tǎ, nə́ yi pətseŋpə́ndɛ́pə́sê páʼ pə́ ŋwaʼ nə́.

²⁷Mäŋ kyaʼə̂ áwɨ́ ńgə́ pɨ pətsə́ pə́ chîə á aliʼə́ nə́ pó yǒ nə́ zə́ənə anuə nəfoonə Əsê záʼ pɔŋə̂ kwûə.”

²⁸Yeso a kə tséebə atsáb jɨ lə́, á laŋə̂ ándó əlě nəfeemə́, a lɔgə̂ Pita pó Jɔn nə Jɛmsə pó po kɔ́ʼə á ndu nkwəənə á chaʼtə́sê.

²⁹Ndzaŋ a kə tə́ nə́ ńchaʼtə́sê lə̂, əshî əyí ə́ kwúblə, ətsəʼ əpí ə́ tíʼə ə́fógə ńtɛ̂ ándó mɔ́ sáŋə.

³⁰Pɨ pə́ pɛ̌ pə́ ghabkə̂ ńjáʼə á mbi yə́, ḿbə́ Mosisə pó Elayija pó po tíʼ ńchúʼə á mə́ tsáb nə́.

³¹Pó kə jáʼ lə́ ŋ́ŋwaŋkə̂ ndzaŋ pɨ pə́ chî nə́ á nəpó ńchîə, ńtíʼə ńtséebə pópə Yeso ə́sóŋ ndzaŋə ándó a yǐ nə́ pə́ tsɔʼə ngǎ pɛ̌ Yeso a faʼə̂ anu páʼ Əsê a kə kwaŋ nə́, páʼ zə́ələ́ á pə́ nə́ mə́ kwû nə́ á Jɛlusalɛmə.

³²Pita pópə ngaŋə́ko əjí ə́ kə wǔəə ntɨ pəlê, ńdê tə ńgyǐ ńjimnə̂ ńdzə́ənə ándó Yeso a tɨ́ nə́ ŋ́ŋwaŋkə̂, pɨ pə̂ pə́ pɛ̌ pə́ tə́əmə á nəpɛnə́ yə́.

³³Ndzaŋ pɨ pɨ pə́ nə ńtə́ nə́ ńgɛnə̂ ághɔ́b lə́, Pita a sóŋə á mbô Yeso ńgə́, “Tǎ, á pɔŋ ndzaŋ pɛn chî nə́ aliʼə́ nə́. Tíʼ pəg kwúd məntaŋ mɛ́n teelə́, táʼə á mbô gho, táʼ á mbô Mosisə, táʼ yitsə̌ á mbô Elayija.” (A nə ńkě jîə anu páʼə a kə̈ sóŋ nə́ pô.)

³⁴Ndzaŋ a kə tə́ nə́ ḿbɛ́lə ńtséebə lə́, alə́mə á jáʼ ńkə́bkə ághóobə́. Á kə́bkə ághɔ́b lə́, ngaŋə́zoŋə́ndzəm əjí ə́ pɔ́g lɛ tətətə.

³⁵Ngye yitsə̌ ə́ fɛ́lə á mə́mə alə́m yə wɨ́ ə́sóŋ ńgə́, “lɛ̌ móonə mə páʼ maŋ tsɔ́ʼ nə́, zóʼ nə́ á mbô yə́.”

³⁶Ngye jɨ ə́ kə məgtə̂ á mə́ tsáb nə́ lə́, pó tíʼ ńjɨ́ Yeso a tə́əmə pə́ á ngǎ yə́. Ngaŋə́zoŋə́ndzəm əjí ə́ lɔʼkə̂ ndɛn mənuə nə́ á ntɨ́ pó ńkě tɔ́g ə́fiʼtə̂ ŋwu tsə̌ əghâ yi wɨ́ nə́ anu páʼə á laŋ nə́ pô.

³⁷Mbî ə́ kə fóg lə́, Yeso pópə ngaŋə́zoŋə́ndzəm əjí ə́ tsóolə á nkwəənə wə̂, mboŋ ŋwu məsɔŋ a yǐ ńtégə yə́.

³⁸Ŋwu tsə̌ á mə́m ənoonə a fóŋnə ə́sóŋ ńgə́, “Ndzéʼkə, náŋə móonə mə, Maŋ póʼ mbô, lə́ ndaʼ mɔ́ maŋ túg nə́.

³⁹Ajwiə təpɔŋ á twáamə yə́, ńgɛlə̂ a póʼ ngoŋə; ä tsɔʼə yi ńtə́mə á əsê ńgɛlə̂ a fwɔʼkə̂ mətwê á ntso yə́. Ä nuʼə̂ yi tsɔʼə əghâ ətsəm ńkě yí mɛdtə̂ a jwitə̂ pô.

⁴⁰Maŋ kə póʼ mbô nə́ ngaŋə́zoŋə́ndzəm zô ńgə́ pó fɨ́dkə ájɨ́d pó pə́ ńkě chî təmbɔʼ pó fɨ́dkə pô.”

⁴¹Yeso a sóŋ ńgə́, “Lə́ ghɛlə̂ akə̂ mbimə́ əjɨ ə́ chígə́ ńkə́g, mənu mɨ́ mə́ kə́ ə́fə́ŋkə nə́ jɨ əsê ndú leenə́? Maŋ yǐ lánə chî pɛn ə́wam ntɨ́ tə koʼ lə́ ə́lɛ́?” A sóŋ lə́ ńtíʼ ə́sɛdnə̂ ə́sóŋ nə́ ŋwu wə̂ ńgə́, “Yǐ nə́ mɔ́ əgho wə̂ á aliʼə́ nə́.”

⁴²Ndzaŋə a tə nə́ ńgyǐəə nə́ yí lə́ pɛ̌sê yi wə́ a twáamə yí ḿmaʼə̂ á ndəsê nə́ aghɔ yə saʼ nə́. Lə́ Yeso a pə́ ə́sáʼə ajwiə təpɔŋ zə̂, ńtsóʼə mɔ́ wə̂ ńtíʼ ə́fɛ̂ yə́ á mbô tǎ əyǐə.

⁴³Á kə kɨʼnə̂ ŋwu ntsəm ndzaŋə ándó mətɨ mə́ Əsê mə́ tyantə̂ nə́. Ndzaŋ ŋwu ntsəmə a kə tíʼ nə́ ńkwaŋ ndɛn mənu Yeso a faʼ nə́ á tsɛɛlə̂ ághɔ́b lə́, a sóŋ nə́ ngaŋə́zoŋə́ndzəm əjí ńgə́,

⁴⁴“tsoŋkə̂ nə́ ńjwə́ʼtə anu maŋ lɔ nə́ á mə́ sóŋ nə́ á mbô pəənə́; Maŋ loonə̂ lə́ ńgə́ nə́ jî ńgə́, pə́ yǐ fɛ̂ Mɔ́ Ŋwunə á mbô pɨ pə́ mbîə.”

⁴⁵Lə́ atûə azóobə́ a pə́ ńkě tsɔ́ʼnə nə́ anuə ándó ä sóŋ nə́ pô, ńté ńgə́ pə́ kə lyáŋə ázə́ələ́ á mbô pó ńgə́ kɔ pó jîə, pó pɨ ńtə́ ḿbɔ́gə yə́ á mə́ pítə nə́.

⁴⁶Azɔŋə á kə fɛ́lə á tətɨ ngaŋə́zoŋə́ndzəm əjí, pó pítə məmbɨ mɔ́b ńgə́, lə́ əwə a pə́ nə́ ŋwu yi ngweŋə́?

⁴⁷Yeso a kə jîə anu pó nə ńkwaŋ nə́, ńtíʼ ńdɔgə̂ Mɔ̂nkə̂ ńtə́gə á nəpɛnə́ yə́.

⁴⁸Ə́sóŋə á mbô pó ńgə́, “Ŋwu ntsəmə a pí nə́ mɔ́ ghɛn nə́ əlɛ́nə mə, a pí lə́ mə; ŋwunə ándó a kə́ nə́ ḿbímə mə, a pí lə́ ŋwu páʼə a tú nə́ mə. Ńté ńgə́ ŋwu páʼə a kə́g nə́ á mə́m pəənə́, lə́ yí ḿbə́ ŋwu yi ngweŋə́.”

⁴⁹Jɔnə a sóŋ ńgə́, “Tǎ, pəg zəənə́ ŋwu tsə̌ a tə́ ńkəmə̂ pə pɛ̌sê nə́ əlɛ́n əghô, lə́ pəg pə́ ə́sóŋ nə́ yí ńgə́ kɔ a pɨ ńgɛd ə́lɨ́d ńté ńgə́ a kě lə́ táʼ ŋwu əwɛn yitsə̌ pô.”

⁵⁰Yeso a sóŋ nə́ pó ńgə́, “Kɔ nə́ zɔŋ nə́ yə́, ŋwu ntsəm páʼə a kě nə́ məsɔŋə́ á ndzəm gho sɔb pó, lə́ ngaŋndzəm zô.”

⁵¹Ndzaŋə ándó ndɛd ə́ kə páatə nə́ páʼ pə́ yǐ nə́ lɔgə̂ yí ə́ kɔ́ʼə á nəpó lə́, a tə́əmə alaŋə́ ńtə́ ńgɛnə̂ á Jɛlusalɛm nə́ ntɨ́ əyí ətsəmə.

⁵²A tú pɨ ńgə́ pó kwá mbi ńgɛn nə́ aláʼə Pəsamalitan yətsə́ ńtsoŋkə̂ əliʼ ə́wə́ á mbô yə́.

⁵³Lə́ pɨ pə́ aliʼ pə́ wɨ́ pə́ pə́ ńkě yí pí pô ńté ńgə́ a kə̈ laŋə̂ ńgɛnə̂ lə́ á Jɛlusalɛmə.

⁵⁴Ngaŋə́zoŋə́ndzəm əjí ə́ nə ḿbə́ nə́ Jɛmsə pó Jɔn lə́, po pítə ńgə́, “Mmaʼmbî, gho loonə̂ lə́ ńgə́ pəg fóŋ mógə́ á nəpó wɨ́d ə́ tsó ńtoonə̂ ághɔ́b?” [6]

⁵⁵Yeso a pə́ ə́sɛdnə̂ ə́sáʼə ághóobə́, [7]

⁵⁶Pó po tíʼ ńgɛn aláʼ yə ndaʼə.

⁵⁷Ndzaŋ po kə tə́ nə́ ńnyinə̂ alaŋə́ lə́ ŋwu tsə̌ a sóŋə á mbô Yeso ńgə́, “Maŋ yǐ zoŋə̂ gho aliʼə́ atsəm páʼ gho ghɛn nə́ ə́wə́,”

⁵⁸Yeso a kwěe ńgə́, “Ntsɔb ə́ túg məngɔ́d móobə́, pəsə́ŋ pə́ túg məŋka móobə́, lə́ Mɔ́ Ŋwunə a pə́ ńkě túgə aliʼ mbɔʼ a noŋkə̂ atûə ají ə́wɨ́ ńjwitə̂ pô.”

⁵⁹A sóŋə á mbô yitsə̌ ŋwu ńgə́, “Zoŋə̂ mə.” Ngaŋə a kwěe yí ńgə́, “Mmaʼmbî, tíʼ maŋ ghɛn ńtwə́ŋə tǎ mə záʼə.”

⁶⁰Yeso a sóŋ nə́ yí ńgə́, “Mɛdtə̂ pəkwû pə́ twə́ŋ pəkwû póobə́, lə́ gho pə́ ńgɛn ə́sóŋə Anuə Nəfoonə Əsê.”

⁶¹Yitsə̌ a pɨ ńkə́ ə́sóŋə á mbô yí ńgə́, “Maŋ yǐ zoŋə̂ gho ḿbə́ Mmaʼmbî, lə́ mɛdtə̂ maŋ pəənə̂ á nchîndɛ̂ ḿbookə̂ pəlimə́ mə záʼə.”

⁶²Yeso a kwěe yí ńgə́, “Ŋwunə ándó a twá nə́ asóolə afaʼ ḿbɨ ńtə́ ńnáŋ ndzəm, a kě koʼnə̂ á mə́ faʼ nə́ Anuə Nəfoonə Əsê pô.”