Read Awing Jɔnə 1 Bible Online

Jɔnə 1 - Awing bible

Jɔnə 1

¹Á nə ḿbə́ á nəchwaakənə́ lə́, Atsáb yə ə́wə́ a nə ńchî ə́wə́, Atsáb zɨ́d zə̂ a nə ńchî lə́ pó Əsê, Atsáb yəwə́ a nə ḿbə́ lə́ Əsê.

²A nə ńchîə nəchwaakənə́ pó Əsê.

³Əsê a nə ńtsoŋkə̂ əpú ətsəm ńdaŋ lə́ a ndzəm yə́, təmbɔʼ a nə ńchî ə́wɨ́ chî pô tə ḿbə́ pə́ nə ńkě ajûtsə́ tsoŋkə̂ pô.

⁴Nchîmbî nə fɛ́d lə́ á mbô yə́, nchîmbî zɨ́d zə̂ lə́ nə ḿbə́ nkyaʼə á mbô ŋwu məsɔŋə́.

⁵Nkyaʼ yi ə́wɨ́ ə́ kɛ́lə á mə́m ndzəmə́, lə́ ndzəmə́ yi ə́wɨ́ pə́ ńdáʼ ńkě nkyaʼ yi ə́wɨ́ pə́gtə pô.

⁶Ŋwu tsə̌ a nə ńchî ə́wɨ́ páʼ Əsê a nə tú nə́ yə́, əlɛ́n yí pə́ Jɔnə.

⁷A nə ńgyǐəə á mə́ fiʼtə̂ nə́ pɨ nə́ nkɨ ńté nkyaʼə. A nə ńgyǐəə á mə́ fiʼtə̂ nə́ ághɔ́b ńjî ńgə́ ŋwu ntsəmə a zóʼ nə́ nkɨ yi ə́wɨ́, a kə́ ńnéŋ ntɨ́ nə Əsê ńdaŋə̂ á mə́m yə́.

⁸Yí nə́ nkɔ̌ʼmbɨ əyí a nə ńkě lə́ nkyaʼ yi ə́wɨ́ pô, a nə ńgyǐ lə́ á mə́ sóŋ nə́ anu ńté nkyaʼ yí ə́wə́.

⁹Lə́ kə pə́ ndə̌ŋdəŋ nkyaʼ páʼ ə́ yǐ nə́ mə́m mbîə, ńkyaʼə̂ ŋwu ntsəmə.

¹⁰Atsáb yəwə́ a nə ńchîə á mə́m mbîə, pə́ nə ńtsoŋkə̂ ajúmə atsəm ńdaŋ lə́ a ndzəm yə́, lə́ mbî pə́ ńkě yí jî pô.

¹¹A yǐəə á mə́mə aláʼ yə́, lə́ pɨ pí pó pə́ ńkě yí pyáb pô.

¹²Lə́ ŋwu ntsəm páʼ a nə ḿbyáb nə́ yí, ńkə́ ńnéŋ ntɨ́ nə́ əlɛ́n əyí, a fɛ̂ mətɨ nə́ pó ńgə́ pó lə pɔ́ pə́ Əsê.

¹³Pó nə ńkě lə́ pɔ́ pə́ Əsê lə́ nə ndú pə́ pî nə́ ághɔ́b pô. Lə́ələ́ pə́ ńgə́, nə ndú páʼ pətǎ pə̈ pî nə pɔ́ əwɨ́ lə́ pô, lə́ Əsê nə nkɔ̌ʼmbɨ əyə́ a kə ghɛd pó tíʼ pɔ́ píə.

¹⁴Atsáb yə́ əwə a tíʼ sɛdnə̂ ḿbə́ ŋwunə, ńchîə á mə́m pɛnə̂, ńdwɛ́nkə nə́ apɔŋə́ntə́əmə Əsê pó ndə̌ŋdəŋə́, pɛn zə́ənə́ nəgháʼ əyǐ, nəgháʼ páʼ á nə ńkwá nə́ á mbô Tǎ əyǐə ándó ndaʼ Mɔ́ əyǐə.

¹⁵Jɔnə a nə̈ sóŋə anu ńté yí, ńtíʼə ńkyéŋə ngye əjǐ kɔ́ʼə atǐə, a ə́sóŋə ńgə́, “Lɛ̌ ŋwu páʼ maŋ nə̈ ńtsáb nə ńté yí ə́sóŋə ńgə́, ‘Yí páʼ a yǐ nə́ á ndzəm maŋ lə́, a gháʼ ńtsɛɛlə̂ mə, ńté ńgə́ a nə ḿbeg ńchî ə́wɨ́ záʼ pə́ pɔŋə̂ pîə a mə.’ ”

¹⁶Á mə́mə apɔŋə́ntə́əmə ají yə lwɛ́nkə nə́, a tíʼ fɛ̂ afoʼə á mbô pɛn pətsəm ńdǒo nə́ táʼə afoʼ ńkwúnə nə́ yətsə́.

¹⁷Əsê a nə fɛ̂ pənoŋkə á mbô pɛn ńdaŋə̂ á ndzəm Mosisə, ə́fɛ̂ apɔŋə́ntə́əmə ají pópə ndə̌ŋdəŋ əyǐə, ńdaŋ lə́ a ndzəm Yeso Klisto.

¹⁸Ŋwu tsə̌ a kě Əsê kə́ zə́ənə pô. Ndaʼ mɔ́ mɔʼə́ páʼ a chî nə́ tsɔʼə ándó Əsê a náanə nə́ əlá pô Tǎ əyǐə, lə́ ghɛd yí pə́ jîə yə́.

¹⁹Lɛ̌ anuə ándó Jɔnə a nə sóŋ nə́ əghâ ándó Pəjusə pó nə ńtú nə́ ngaŋə́pêsê pópə pɨ pə́ Lɛbi á Jɛlusalɛm ńgə́ pó ghɛn ḿbítə yí ńgə́, “Gho lə́ əwə?”

²⁰Jɔnə a nə ńkě kǐəə á mə́ kwěe nə pô, lə́ ḿbə́ ńtséebə ndə̌ŋdəŋ á əshîsaŋ ə́sóŋ ńgə́, “Maŋ kě lə́ Yi Ńtsəʼ nə yi ə́wɨ́ pô.”

²¹Pó pítə a yí ńgə́, “Gho tíʼ ḿbə́ lə́ əwə? Gho lə́ Elayija?” Jɔnə a kwěe ńgə́, “Maŋ kě lə́ yí pô.” “Gho lə́ Ntûsê yi wɨ́?” A kwěe ńgə́ “Ngá.”

²²Pó tíʼ ə́sóŋə á mbô yí ńgə́, “Gho lə́ əwə? Fɛ̂ akwe á mbô pəgə́, pəg ghɛn fiʼtə̂ pɨ pó tú nə́ áwə́gə́. Gho sóŋ ńgə́ akə̂ ńté mbɨ əzo?”

²³Jɔnə á kwěe ndzoŋ ndzaŋə ándó á chî nə́ á mə́mə aŋwaʼlə Ntûsê Izaya ńgə́, “Maŋ lə́ ngye ŋwu tsə̌ páʼ ə́ fóŋ nə́ á mə́m kɔŋ məŋkwâʼlə̌ ə́sóŋə ńgə́, Nə́ ghɛd əlaŋə́ Mmaʼmbî ə́ tɨ́ ndə̌ŋdəŋə́.”

²⁴Pɨ pə̂ páʼ Pəfalasi pó nə ńtú nə́ lə́,

²⁵pó pítə yí ńgə́, “Lə́ pə́ ńgɛlə̂ akə̂ gho fɛ̂ nkǐ nə́ pɨ páʼ təmbɔʼ gho chî Yi Ńtsəʼ nə́ wə́ pô, ńchî Elayija pô kɨ Ntûsê pô?”

²⁶Jɔnə a kwěe ághɔ́b ńgə́, “Mäŋ fɛ̂ lə́ tsɔʼə nkǐə, lə́ á mə́m pəənə́, ŋwu tsə̌ a tɨ́ ə́wɨ́ páʼ nə kě nə́ yí jî pô.

²⁷A pǎtə ńdzoŋə̂ a pə́ a ndzəm maŋ lə́, maŋ kě koʼnə̂ á mə́ kyag nə́ məŋkɛd mə́ ngwub mí pô.”

²⁸Anu zəənə́ á nə ńdɔgə̂ aliʼ lə́ á Bɛtani á ndú əsáʼmə́nu á nəpɛnə́ nə́ nkǐ Jodan, aliʼ páʼ Jɔn a nə fɛ̂ nə́ nkǐ ə́wɨ́ lə́.

²⁹Mbî fóg Jɔnə a zə́ənə Yeso a tə́ ńgyǐəə nəpɛnə́ yə́, a sóŋ ńgə́, “Lɛ̌ Mbéŋ Ndzɛd Əsê páʼ a pěʼ nə́ təpɔŋ mbî ntsəmə.”

³⁰Lə́ yí páʼ maŋ nə̈ ńtsáb nə́ ńté yí ńgə́, “Ŋwu tsə̌ a tə́ ńdzoŋə̂ a ndzəm maŋ páʼ a tsɛ nə́ mə ńté ńgə́ a nə ḿbeg ńchîə a mbî pə́ pɔŋə́ pîə mə.

³¹Maŋ nə́ nkɔ̌ʼmbəəmə mə, maŋ nə ńkě yí jî pô, lə́ maŋ yǐ ə́fɛ̂ nkǐ nə́ pɨ á mə́ ghɛd nə́ ńgə́ pɔ́ pə Izlɛlə pó jîə yə́.”

³²Jɔnə a ghɛn nə́ mbiə á mə́ sóŋ nə́ anu páʼ a nə ńjɨ́ nə́ ńté Yeso ńgə́. “Maŋ zə́ənə Ajwǐəsê a tsóolə nəpóolə ándó alúʼə ńtíʼ ńtə́əmə á ndú yə́.”

³³Maŋ nə ńkě yí jî pô, lə́ yí páʼ a nə ńtú nə́ mə ńgə́ maŋ tə́ fɛ̂ nkǐ lə́ a sóŋ nə́ maŋ ńgə́, “Gho yǐ zə́ənə Ajwiə a tsó nə́ ńkə́ ńchîə á ndu ŋwunə, lə́ yí páʼ a yǐ nə́ fɛ̂ nkǐə Ajwǐəsê.”

³⁴Jɔnə a tíʼ ə́sóŋ ńgə́, “maŋ zə́ənə zə́ələ́,” ńkə́ ə́fiʼtə̂ áwɨ́ ńgə́, “yí lə́ Mɔ́ Əsê.”

³⁵Mbî fóg Jɔnə a pɨ ńtɨ́ pópə ngaŋə́zoŋə́ndzəm əjí zɛ́n pɛ̌,

³⁶ńdzə́ənə Yeso ndzaŋ páʼ a nə ńtə́ nə́ ńdaŋə̂ lə́, ńtíʼ ə́sóŋ ńgə́, “Lɛ̌ Mɔ́ Mbéŋ Ndzɛd Əsê ə́wə́!”

³⁷Ngaŋə́zoŋə́ndzəm Jɔn zə̂ ə́ zóʼ ndzaŋ páʼ a sóŋ nə́ lə́ ńtíʼ ńdzoŋə̂ Yeso.

³⁸Yeso a sɛdnə̂ ńdzɨ́ ndzaŋ pó zoŋ nə́ yí ńtíʼ ḿbítə ághɔ́b ńgə́, “Nə́ loonə̂ lə́ akə̂?” Pó kwěe a yí ńgə́, “Labbi” (páʼ ä sóŋ nə́ lə́ ńgə́ Ndzéʼkə) “Ghö chîə lə́ ə́fó?”

³⁹A sóŋə á mbô pó ńgə́, “Yǐ nə́ ńdzə́ənə.” Pó tíʼ ńdzoŋə̂ a yí ńgɛn ńdzə́ənə aliʼ páʼ a chî nə́ ə́wə́, ńtíʼ ńjwég pó po alě yi ə́wɨ́ ńté ńgə́ á nə́ ḿbə́ lə́ ándó pəmə́nu pɛ́n nəkwa á ndɛd nkwanə́.

⁴⁰Táʼ ŋwunə á mə́m pó pə́ pɛ́n pɛ̌ páʼ a nə ńdzóʼ nə́ anu páʼ Jɔnə a nə sóŋ nə́ ńtíʼ ńdzoŋə̂ a Yeso lə́, lə́ nə́ ḿbə́ Andəlu mɔ́mɛ́ Saamun Pita.

⁴¹Tsɔʼə əghâ yi ə́wə́ a ghɛn ńnáŋə mɔ́mɛ́ yí Saamun ńtíʼ ə́fiʼtə̂ yí ńgə́, “Pəg zə́ənə a Yi Ńtsəʼ nə́ wə̂,” (páʼ a sóŋ nə́ lə́ ńgə́, “Klisto,” á mə́mə atséebə Glikə)

⁴²A lɔgə̂ a yí ńgyǐəə á mbô Yeso. Yeso a náŋə yí ńtíʼ ə́sóŋ ńgə́, “Gho lə́ Saamun mɔ́ Jɔn. Ə́fɛ́d nə́ pə əghâ nə́ pó yǒ tíʼə fóŋə a gho lə́ nə́ Sifasə” (páʼ a sóŋ nə́ lə́ ńgə́ Pita, páʼə a kə nə́ ə́sóŋə ńgə́, “Ngwúbə.”)

⁴³Mbî fóg Yeso a tsɔʼə á mə́ ghɛn nə́ Galiliə. Ńtíʼ ńdzə́ənə a Filib ə́sóŋ nə́ yí ńgə́, “Zoŋə̂ mə”

⁴⁴Filibə a nə fɛ́d lə́ Bɛdsada, a tə́kɔʼ tɔ̂ŋ páʼ Saamun pó Andəlu nə fɛ́d nə́ ə́wə́.

⁴⁵Filibə a zə́ənə Natanyal ńtíʼ ə́sóŋ nə́ yí ńgə́, “Pəg zə́ənə a ŋwu ə́wə́ páʼ Mosisə a nə ŋwaʼlə̂ nə́ ńté yə́ á mə́mə aŋwaʼlə pənoŋkə lə́, páʼ məntúmə́sê mə́ nə ńkə́ nə́ ŋ́ŋwaʼlə̂ ńté yí lə́. Lə́ Yeso mɔ́ Jɔsɛfə, ŋwu Nazalɛlə.”

⁴⁶Natanyalə a sóŋə á mbô yí ńgə́, “Təmbɔʼ anu yə əshîʼnə yətsə́ á fɛ́lə Nazalɛd?” Filibə a sóŋ nə́ yí ńgə́, “Yǐ ńdzə́ənə azô.”

⁴⁷Yeso a zə́ənə Natanyal a tə ńgyǐəə a nəpɛnə́ yə́, a tíʼ ńtsáb ńté a yí ńgə́, “Lɛ̌ chigə ŋwu Islɛlə, ntsɨd yətsə̌ ə́ kě ntɨ́ yí chî pô.”

⁴⁸Natanyal a sóŋə á mbô yí ńgə́, “Gho jîə mə lə́ ə́lɛ́?” Yeso a kwěe a yí ńgə́, “Filibə a pěʼ ńjǐ tə́ fóŋə a gho əghâ gho pěʼ nə́ ńnáanə nətɛ́nə atǐə fig wə́ lə́, maŋ pɛ́d tə ńdzə́ənə a gho.”

⁴⁹Natanyalə a kwěe yí ńgə́, “Ndzéʼkə, gho lə́ Mɔ́ Əsê! Gho lə́ əfo pɔ́ pə́ Islɛlə!”

⁵⁰Yeso a kwěe yí ńgə́, “Ńté ńgə́ maŋ pěʼ ə́sóŋə á mbô gho ńgə́, maŋ pěʼ ńdzə́ənə a gho á nətɛ́nə atǐə fígə, lə́ ghɛd ə́lɨ́d gho pímə. Gho yǒ jɨ́ pətə́kɔʼ pə́ mənu páʼ mə́ tsɛ nə́ zəənə́!”

⁵¹A tíʼ sóŋ nə́ pó ńgə́, “Mäŋ sóŋə á mbô pɨ nə́ ndə̌ŋdəŋ ńgə́, nə́ yǒ jɨ́ nəpó nə́ ŋáʼnə, pətseŋpə́ndɛ́pə́sê pə́ kɔ́ʼə ńkə́ ńtsóolə á ndu Mɔ́ Ŋwunə.”