Read Awing Jɔnə 10 Bible Online

Jɔnə 10 - Awing bible

Jɔnə 10

¹Yeso a sóŋ ńgə́, “Mäŋ fiʼtə̂ wɨ́ nə́ ndə̌ŋdəŋ ńgə́ ŋwu páʼ a kě nə́ pə́ ntsǒnkáʼ laŋ ńkwúnə á mə́m nkáʼ məmbéŋ mə́ ndzɛd pô, ḿbɨ́ ḿbáʼnə ńkɔ́ʼə a pə́ á ndú yi ndaʼ ńkwú wɨ́, lə́ ndzə̌lə, ńkə́ ḿbə́ mbə́ʼ məláʼə.

²Lə́ ŋwu páʼ a kwú nə́ á mə́m nkáʼ məmbéŋ ńdaŋə̂ a ntsǒnkáʼ lə́ ntseŋnə məmbéŋə.

³Ŋwu páʼ ä tɨ́ nə́ á ntsǒnkáʼ, a yǐ ŋáʼ ntsǒnkáʼə á mbô yə́, məmbéŋ mə́ ndzɛd mə́ kə́ ńdzóʼ ngye əjǐə, a tíʼ fóŋ məmbéŋ mí nə́ məlɛ́n mɔ́b ə́fógə á mə́m nkáʼə.

⁴Əghâ ándó páʼ a fóg nə́ məmbéŋ mí tsɔʼə mətsəmə á mə́m nkáʼ lə́, ńtíʼ ńchîə á mbi məmbéŋ mə́ ə́wɨ́ mə́ chîə á ndzəm yí ńté ńgə́ pó jî ngye əjǐə.

⁵Təmbɔʼ ŋwu ndaʼə a yǐ pó kě yí zoŋ pô, pó kəələ̂ ághɔ́b lə́ kə nə́ á nəpɛnə́ yí ńté ńgə́ pó kě ngye əjí jî pô.”

⁶Yeso a fiʼtə̂ ághɔ́b nə́ atséebə́nə́múʼ zəənə́, lə́ ətû pɔ́b pə́ ńkě lá nə́ anu páʼ a nə̈ sóŋ nə́ á mbô pó pô.

⁷Yeso a kə́ ḿbɨ ə́sóŋə á mbô pó ńgə́, “Mäŋ sóŋə lə́ ndə̌ŋdəŋə́ á mbô pɨ ńgə́, Maŋ lə́ ntsǒnkáʼ məmbéŋ mə́ ndzɛlə.

⁸Pɨ pətsəm páʼ pó nə ńkwá nə́ mbi lə́ nə ḿbə́ pəzə̌ ńkə́ ḿbə́ ngaŋə́pə́ʼə́ məláʼə. Lə́ məmbéŋ mə̂ mə́ nə ńkě ngye əzɔb jî pô.

⁹Maŋ lə́ ntsǒnkáʼə. Ŋwu ntsəm páʼ a laŋ nə́ a ndzəm maŋ ńkwúnə, pə́ yǒ chwádkə yə́; pó yǒ kwúnə kə́ fɛ́lə, kə́ zə́ənə nəyeŋə́ yi féŋtə nə,

¹⁰Ndzə̌lə a yǐ lə́ tsɔʼə á mə́ zə nə́ ə́ kə́ jwítə ə́ kə́ tsəŋkə̂. Maŋ yǐ lə́ ńjî ńgə́ təmbɔʼ nə́ túg nchîmbîə, ńkə́ ńtúg nchîmbî páʼ zɨ́d lwɛ́nkə nə ńgɛn fyagə̂.”

¹¹Maŋ lə́ ntseŋnə məmbéŋ yi əshîʼnə, ntseŋnə məmbéŋ yi əshîʼnə ä fɛ̂ nchîmbî əjǐ ətsəmə á mbô məmbéŋ míə.

¹²Ngaŋəfaʼ páʼ pə́ lɔg nə́ yí lə́ kě ntseŋnə páʼ a túg nə́ məmbéŋ pô; Təmbɔʼ a zɨ́ na təpɔŋ ə́ tə́ ńgyǐəə, a myaʼ məmbéŋ mə̂ ńkəələ̂ yə́, na təpɔŋ zə̂ tíʼ ńgwamtə̂ mətsə́, apuʼə á tíʼ shamnə̂.

¹³Ngaŋəfaʼ wə̂ a tíʼ ńkəələ̂ yí ńté ńgə́ məmbéŋ mə̂ mə́ pěʼ ńkě nə́ anu yətsə́ á mbô yí chî pô.

¹⁴Maŋ lə́ ntseŋnə məmbéŋ yi əshîʼnə, maŋ jî məmbéŋə mə, məmbéŋə mə mə́ kə́ ńjîə mə.

¹⁵Lə́ tsɔʼə ndzaŋ páʼ Tǎ a jî nə́ mə, Maŋ kə́ ńjîə yə́, Maŋ fɛ̂ nchîmbîə mə ńté məmbéŋə mə.

¹⁶Maŋ túg mətsə́ məmbéŋ mə́ ndzɛd páʼ mə́ kě nə́ á mə́mə akwɛlə məmbéŋ zɨ chî pô, maŋ yǐ kə́ shib yǐ nə́ pó, pó kə́ ńjwə́ʼtə ngye mə. Pó yǒ tíʼ pə́ táʼə akwɛlə nə́ táʼ ntseŋnə.

¹⁷Lɛ̌ anuə a ghɛd nə́ Tǎ a kɔŋə̂ mə ńté ńgə́ maŋ nə fɛ̂ nchîmbî mə nə́ anu yi ə́wɨ́ ńjî ńgə́ mbɔʼ maŋ pɨ ńkwáalə zə́ələ́.

¹⁸Ŋwu tsə́ a nə ńkě nchîmbîə mə á mbô maŋ kwá pô, lə́ nə ńkɔŋ maŋ á mə́ fɛ̂ nə́ zə́ələ́. Maŋ nə ńtúg mətəənə á mə́ fɛ̂ nə́ ázə́ələ́, ńkə́ mbɨ ńtúg mətəənə á mə́ kwá nə́ zɨ́d ngǎ yitsə̌; Lɛ̌ anu páʼ Tǎ mə a nə sóŋ nə́ ńgə́ maŋ faʼə̂.

¹⁹Pəjus pó nə mbɨ ńkə́ ńgabnə̂ əpag pɛ̌ ńté ətsáb pəənə́.

²⁰Pó pi nɨ́ nə́ nə sóŋ ńgə́, “A túgə pɛ̌sê a mbɨ yə́, ńkə́ ḿbɛ́ɛlə. Nə́ jwə́ʼtə lə́ anuə akə̂ á mbô yə́?”

²¹Lə́ pətsə́ pɨ pó sóŋ ńgə́, “Lɛ̌ kě atséebə a ŋwu páʼ a túg nə́ pɛ̌sê a mbɨ yí pô. Təmbɔʼ pɛ̌sê ə́ ŋáʼkə əmə́g mə́ əfəg.”

²²Lə́ nə ḿbə́ ndɛlə akɔŋtə páʼ Pəjus pó kə kwúmtə nə́ ndɛd páʼ pə́ kə pɨ nə́ ńtə́ ŋáʼə Tə́kɔʼndɛ̂sê á Jɛlusalɛmə, lə́ pə́ ḿbə́ ndɛd əfə́gə,

²³Yeso a tíʼ ńtə́ ńnyinə̂ á mə́m Tə́kɔʼndɛ̂sê, á mə́mə alaakə Solomunə.

²⁴Pəjus pó tíʼ ńkyeetə̂ ńdíblə yí, ḿbítə yí ńgə́, “Gho yǐ ghɛd pəg pyáabə a mə́ jî nə́ ŋwu páʼ gho pə́ nə́ wɨ́d tə koʼ lə́ nə́ ndɛlə́ akə̂? Təmbɔʼ gho pə́ pə́ Yi Ńtsəʼ nə́ Wə́, gho fiʼtə̂ áwə́g nə́ ndə̌ŋdəŋə́.”

²⁵Yeso a kwěe ághɔ́b ńgə́, “Maŋ nə ḿbɛ́d tə fiʼtə̂ áwə́ənə́, nə pə́ ńkě pímə anu páʼ maŋ sóŋ nə́ pô. Məfaʼ páʼ maŋ faʼ nə́ nə́ əlɛ́n Tǎ mə, mə́ sóŋə anu ńté mə.

²⁶Lə́ nə́ pə́ ńkě mə pí pô ńté ńgə́ nə́ kě lə́ məmbéŋ mə́ ndzɛlə mə pô.

²⁷Məmbéŋ mə́ ndzɛlə mə mə́ zóʼ ngye mə, maŋ jîə ághóobə́, pó kə́ ńdzoŋə̂ a mə.

²⁸Maŋ fɛ̂ nchîntɨ páʼ ḿmɛdnə̂ ngǎ mɔʼə́ á mbô pó, pó láʼ kě kwû pô, təmbɔʼ ŋwu tsə̌ láʼ ńkě lɔg mətɨ ńkwáalə ághóobə́ á mbô maŋ pô.

²⁹Tǎ mə páʼ a fɛ̂ nə́ ághóobə́ á mbô maŋ, a tsɛɛlə̂ ajúmə atsəmə, ŋwu tsə́ a kě ə́wɨ́ chî təmbɔʼ a kwáalə ághóobə́ á mbô Tǎ mə pô.

³⁰Pəg Tǎ lə́ táʼə.”

³¹Pəjus pó pyá məngɔʼə á mə́ tə́mtə nə́ yí ə́wə́.

³²Lə́ Yeso sóŋə á mbô pó ńgə́, “Maŋ nəələ̂ áwɨ́ nə́ mənu mimə əshîʼnə páʼ mə́ lǒo nə́ á mbô Tǎ. Á mə́m mənu mɨ́d mɨ pɨ̈ tə́mə mə nə́ ngɔʼ ńté lə́ zəənə́?”

³³Pəjus pó kwěe ńgə́, “Pəg kë tə́mə gho ńté lə́ mənu mimə əshîʼnə páʼ gho faʼ nə́ pô, lə́ pə̈g tə́mə gho ńté lə́ ńgə́ gho zɔmtə̂ Əsê, gho lə́ tsɔʼə ŋwu mbîə, ḿbə́ sóŋ ńgə́ gho lə́ Əsê.”

³⁴Yeso a kwěe ághɔ́b ńgə́, “Pə́ kě á mə́mə aŋwaʼlə pənoŋkə azɨ́ ŋwaʼlə̂ ńgə́ ‘Maŋ sóŋ ńgə́, pɨ lə́ məsê?’

³⁵Təmbɔʼ Əsê a tíʼ ə́fóŋ pɨ páʼ a kə fɛ̂ nə́ nkɨ əyə́ á mbô pó lə́ nə́ məsê (Anu páʼ aŋwaʼlə sóŋ nə́ lə́ ndə̌ŋdəŋ tə láʼ kě kwúblə pô).

³⁶Lə́ nə́ maŋ, Tǎ a kə́ tsɔʼə mə ńtíʼ ńtúmə mə á mə́m mbîə. Lə́ ghɛlə̂ akə̂ nə́ sóŋ ńgə́ maŋ zɔmtə̂ Əsê ńté ńgə́ maŋ sóŋ ńgə́ maŋ lə́ Mɔ́ Əsê?

³⁷Kɔ nə néŋ ntɨ́ nə́ maŋ páʼ mbɔʼ maŋ chîə pə́ afaʼə Tǎ mə tə̈ faʼə̂ pô.

³⁸Lə́ təmbɔʼ mäŋ faʼə̂ lə́ zɨ́d, ndzaŋ nə́ pǎ nə́ tə ńkě mə pí pó lə́, nə́ pí məfaʼ mə́ wɨ́ ńjî ńgə́ ńdaŋ ə́lɨ́d pɨ jî ńgə́ Tǎ a chîə á mə́m maŋ, maŋ kə́ ńchîə á mə́m yə́.”

³⁹Pó nə ńkə́ ḿbɨ ńtə́ ńdoonə̂ á mə́ wam nə́ yə́, lə́ a pə́ ḿbéŋə á ndzɔʼ pó.

⁴⁰Yeso a pɨ ḿbəənə̂ á ndzɛnə́ nkǐ Jodan aliʼ páʼ Jɔnə a nə ḿbeg nə́ ə́fɛ̂ nkǐ ə́wɨ́ lə́ ńtíʼ ńchî ə́wə́.

⁴¹Pɨ pi nɨ́ nə́ pó yǐəə á mbô yi ńtíʼ ə́sóŋə ndzɔʼ pó ńgə́, “Jɔnə a nə ńkě akyeʼə́nu yitsə̌ kə́ ghɛlə̂ pô, lə́ anuə atsəm páʼ Jɔnə a nə sóŋ nə́ ńté ŋwu nə lə́ ndə̌ŋdəŋə́”

⁴²Aliʼ wɨ́d wə̂ pɨ pi nɨ́ nə́ pó néŋ ntɨ́ nə́ Yeso.