Read Awing Jɔnə 11 Bible Online

Jɔnə 11 - Awing bible

Jɔnə 11

¹Əghâ yi wɨ́ ŋwu tsə̌ a nə ńtə́ ńgoonə̂, páʼ əlɛ́n əyí nə́ ḿbə́ nə́ Lazalɔsə, a pə́ ŋwu Bɛtani, páʼ a nə ḿbə́ nə́ aláʼə Mɛɛlə pó mɔ́mɛ́ əyǐ Mata.

²Lə́ nə ḿbə́ Mɛɛlə wɨ́d ghɛn páʼ a nə ńkwɛd nə́ məghɔ́d mə́ azagə́ yə ləmkə̂ nə́ á məko Mmaʼmbîə ńtíʼ ńdɔg mənoŋ mə́ atû mi ə́shíg ə́wɨ́ lə́. Lazalɔs páʼ a nə̈ ńgɔ nə́ lə́, lə́ nə ḿbə́ mɔ́mɛ́ əyǐ yi mbyâŋnə.

³Lə́ pɔ́pə́mɛ́ pí, pipə́ pəngyě pó tíʼ ńtú nkɨ nə́ Mmaʼmbî ə́sóŋ ńgə́, “ŋwu páʼ gho kɔŋ nə́ yí lə́ a tə́ ńgoonə̂.”

⁴Əghâ ándó Yeso a nə ńdzóʼ nə́ anu zɨ lə́ ńtíʼ sóŋ ńgə́, “Aghɔ zəənə́ á kě á mə́m nəwû yǐ lwigtə̂ pô, anu zəənə́ á laŋ lə́ á mə́ yǐ nə́ nə́ nəgháʼə á mbô Əsê, ńkə́ ḿbɨ ḿbə́ alaŋə́ á ndú páʼ Mɔ́ Əsê a yǐ nə́ kwáalə nəgháʼ əyǐ ə́wə́.”

⁵Yeso a kə kɔŋə̂ Mata pó mɔ́mɛ́ əyǐ Mɛɛlə ḿbéenə Lazalɔsə.

⁶Əghâ ándó Yeso a nə ńdzóʼ nə́ ńgə́ Lazalɔs a tə́ ńgoonə̂ lə́, ḿbɨ ńchî əlěmbî pɛ́n pɛ̌ aliʼ páʼ a nə ńchî nə́ ə́wɨ́ lə́.

⁷Yeso a tíʼ ə́sóŋə á mbô ngaŋə́zoŋə́ndzəm əjí ńgə́, “Pɛn pɨ ḿbəənə̂ á Judya ngǎ yitsə̌.”

⁸Ngaŋə́zoŋə́ndzəm əjí ə́ ə́sóŋə á mbô yí ńgə́, “Ndzéʼkə,” gho jî ńgə́ á nə ḿbə́ nə́ akəmə ndɛd yitsə̌ Pəjus pó tə́ ńdoonə̂ á mə́ tə́mtə nə́ a gho nə́ məngɔʼə, gho pɛn ḿbɨ ńtə́ ńdoonə̂ á mə́ ghɛn nə́ ə́wə́?

⁹Yeso a kwěe ághɔ́b ńgə́, “Lə́ kě pəmə́nu ntsɔb pɛ̌ atû alěmbî pô? Ŋwu ntsəm páʼ ä nyi nə́ á mə́m nkyaʼ tə mbɔʼ a kě ndəsê wǔ pô ńté ńgə́ a tə́ ńdzɨ́ nkyaʼ mbîə.

¹⁰Lə́ ŋwu ntsəm páʼ ä nyi nə́ á mə́m ndzəmə, a yǐ wǔəə á ndəsê, ńté ńgə́ a kě nkyaʼ tə́ ńdzə́ənə́ pô.”

¹¹Yeso a sóŋ ə́lɨ́d lə́, ḿbɨ ńkə́ ńgə́, “Əshu əwɛn Lazalɔs a wǔəə á pəlê, lə́ maŋ yǐ ghɛn ə́jimkə̂ yə́ pəlê.”

¹²Ngaŋə́zoŋə́ndzəm əjí kwěe a yí ńgə́, “Mmaʼmbî, təmbɔʼ a tə́ ńdê tə ḿbə́ a yǐ yáŋə.

¹³Yeso a nə sóŋ lə́ anu ńté a nəwû əyǐə, pó pə́ ńkwaŋə azɔ́b ńgə́ a noŋnə̂ ńtə́ ńdê lə́ lê nə́.”

¹⁴Yeso a tíʼ ḿbyádnə ə́fiʼtə̂ ághɔ́b nə́ ndə̌ŋdəŋ ńgə́, Lazalɔsə a kwûə,

¹⁵lə́ ńté atûə a zɨ́ maŋ pyádnə ńkɔŋtə̂ ndzaŋ maŋ nə ńkě nə́ ə́wɨ́ chî pô lə́, ńjî ńgə́ nə́ laŋ ə́lɨ́d néŋ ntɨ́ əwɨ́ nə́ maŋə. Lə́ pɛn ghɛn ńdzə́ənə yə́.

¹⁶Tɔməsə páʼ pə́ nə ńkə́ nə́ fóŋə yí nə Nəfágə, a sóŋə á mbô yitsə̌ ngaŋə́zoŋə́ndzəm Yeso ńgə́, “Pɛn kə́ ńdzoŋə̂ a yí ńgɛnə̂ a zɛ́n ńjî ńgə́ pɛ̌npo pətsəm kwûə.”

¹⁷Əghâ ándó Yeso a nə ńgyǐ nə́ lə́ ńdzɨ́ ńgə́ Lazalɔsə a pɛ́dtə ńchîə á nəse əlěmbî nəkwa.

¹⁸Á mə́ fɛ́d nə́ Bɛtani ghɛn kwúnə Jɛlusalɛm á nə ḿbə́ lə́ ándó pəmad pɛ́n pɛ̌,

¹⁹Pəjus pi nɨ́ nə́ pó nə ńgyǐəə á mbô Mata pó Mɛɛlə á mə́ legtə̂ nə́ ntɨ́ ághɔ́b ńté anuə nəwûə mɔ́mɛ́ əghoobə́.

²⁰Ndzaŋə ándó Mata a nə ńdzóʼ nə́ ńgə́ Yeso a tə́ ńgyǐəə lə́ ńtíʼ fɛ́d ńgɛn ńtéekə a yə́, lə́ Mɛɛlə a pə́ ńchîə a yí tsɔʼə á ndɛ̂.

²¹Mata a sóŋə á mbô Yeso ńgə́, “Mmaʼmbî, təmbɔʼ gho nə ḿběʼ ńchîə aliʼə́ nə́ tə ḿbə́ mɔ́mɛ́ mə a nə ńkě kwû pô.

²²Maŋ jî ńgə́ ḿběʼ ḿbə́ pə́ əghâ nə́ Əsê a yǐ fɛ̂ ajúmə atsəm páʼ gho pítə nə́ zə́ələ́ á mbô gho.”

²³Yeso a sóŋə á mbô Mata ńgə́, “Mɔ́mɛ́ əgho a yǐ pɨ júmnə á nəwûə.”

²⁴Mata a kwěe yí ńgə́, “Maŋ jî ńgə́ a láʼ júmnə á nəwûə á ńdwegtə̂ alě.”

²⁵Yeso a sóŋə á mbô yí ńgə́, “Maŋ lə́ ńjúmkə ńkə́ ḿbə́ əfɛ̂ nchîmbîə, ŋwu ntsəm páʼ a néŋ nə́ ntɨ́ nə́ maŋ, ḿbǎtə ńkwû lə́, a yǐ chîə á mbîə;

²⁶Ŋwu ntsəm páʼ a chî nə á mbî ńkə́ néŋ ntɨ́ nə́ maŋ a yǒ kě kwû pô, nə́ pímə anu zɨ?”

²⁷Mata a sóŋə á mbô yí ńgə́, “Maŋ pí ńgə́ gho lə́ Yi Ńtsəʼ nə́ Wə́, ḿbə́ Mɔ́ Əsê, páʼ a tə́ nə́ ńgyǐəə á mə́m mbîə.”

²⁸Ndzaŋə ándó Mata a nə sóŋ nə́ anu zɨ lə́, ńtíʼ ńgɛn fóŋə a mɔ́mɛ́ əyǐ Mɛɛlə á ndzəmə ndzəm ə́sóŋ nə́ yí ńgə́, “Ndzéʼkə əwɛ́nə a chîə aliʼə́ nə́ ńtə́ fóŋə gho.”

²⁹Əghâ ándó Mɛɛlə a nə ńdzóʼ nə́ lə́, ńgə́glə ńdǒ əsê ńgɛnə̂ á mə́ téekə nə́ yə́.

³⁰Əghâ yi ə́wɨ́ Yeso a nə ńkě á mə́mə aláʼ kə́ yǐəə kwú pô, a nə ḿbɛ́d ńchî tsɔʼə aliʼ páʼ Mata a nə ńgyǐ nə́ ńtégə a yí wɨ́ lə́.

³¹Pəjus páʼ pó nə ńchî nə á ndɛ̂ pópə Mɛɛlə ńtə́ ńdegtə̂ ntɨ́ yí, pó jɨ́ ndzaŋə a ghə́glə nə́ ńdǒ əsê fɛ́lə apeŋə́, pó tíʼ ńdzoŋə̂ a yí ńkwaŋə̂ azɔ́b ńgə́ a ghɛn lə́ á nəse á mə́ kyéŋ nə́.

³²Əghâ ándó Mɛɛlə a nə ńgyǐ nə́ ńkoʼə̂ aliʼ páʼ Yeso a nə ńchî nə́ ə́wɨ́ lə́, ńgwǔəə məko yí ə́sóŋə á mbô yí ńgə́, “Mmaʼmbî, təmbɔʼ gho nə́ ḿběʼ ńchîə aliʼə́ nə́ tə ḿbə́ mɔ́mɛ́ mə a nə ńkě kwû pô.”

³³Ndzaŋə ándó Yeso a nə ńjɨ́ nə́ Mɛɛlə a tə́ ńkyéŋə, Pəjus pó nə ńdzoŋ nə́ yí pó kə́ ńtə́ ńkyéŋə lə́, anu yəwə́ á kwum ntɨ́ yə́ á mə́mə ajwiə ńkə́ ḿbyádnə ńjwaʼə̂ yə́.

³⁴Yeso a pítə ághɔ́b ńgə́, “Nə noŋkə̂ a yí lə́ ə́fó?” Pó kwěe a yí ńgə́, “Mmaʼmbî, yǐ ńdzə́ənə.”

³⁵Yeso a kyéŋə.

³⁶Pəjus pó sóŋ ńgə́, “Jɨ́ nə́ ndzaŋ páʼ a nə kɔŋ nə́ yə́!”

³⁷Lə́ pó pətsə́ pó sóŋ ńgə́, “Lɛ̌ kě ŋwu páʼ a nə ŋáʼ nə́ əmə́g mə́ əfəg wə̂ lə́ pó? Təmbɔʼ a nə ńkě kə́ ńgɛd Lazalɔsə a kě kwû?”

³⁸Anu yə ə́wə́ á pyádnə ńkwum ntɨ́ Yeso nga yitsə̌, a tíʼ ńgɛnə̂ aliʼ páʼ pə́ kə twə́ŋ nə́ Lazalɔsə wə́, aliʼ yə ə́wɨ́ lə́ aghəʼ páʼ pə́ nə ńtóŋ nə́ á mə́m ngwúb ńdɔg ngɔʼ ńkə́bkə ə́wə́.

³⁹Yeso a sóŋə á mbô pó ńgə́, “Twá nə́ ngɔʼ zə̂ á ntso nəse.” Mata páʼ a nə ḿbə́ nə́ mɔ́mɛ́ ńkwû ŋwu yi wɨ́ lə́, a sóŋə á mbô Yeso ńgə́, “Mmaʼmbî, nə́ pə́ əghâ nə́ lə́ azagə́ ajíə á yǐ nə́ tə́ kɔ́ʼə, ńté ńgə́ lə́ əlěmbî nəkwa páʼ a nə ńkwû nə́.”

⁴⁰Yeso a sóŋə á mbô yí ńgə́, “Maŋ lə́ ḿběʼ ńkě á mbô gho sóŋ ńgə́ təmbɔʼ gho néŋ ntɨ́ nə́ maŋ tə ḿbə́ gho yǐ zə́ənə́ nəgháʼ Əsê?”

⁴¹Pó tíʼ ńtwá ngɔʼ yi ə́wə́ á ntso nəse. Yeso a náŋə atǐ ə́sóŋ ńgə́, “Tǎ, maŋ fɛ̂ ndǎ á mbô gho ńté ńgə́ gho zóʼə anu mäŋ sóŋ nə́.

⁴²Maŋ jî ńgə́ gho zóʼə anu mäŋ sóŋ nə́ á mbô gho əghâ ətsəmə, maŋ tséebə atsáb zɨ lə́ ńté pɨ́ pɨ pó chî nə aliʼə́ nə́, ńjî ńgə́ mbɔʼ pó pí ńgə́ lə́ tú gho ńtúmə mə.”

⁴³Əghâ páʼ a nə ńtə́ nə́ ńtséebə atsáb zɨ lə́, ńtíʼ ńkyéŋ nə́ tə́kɔʼ ngye ə́sóŋ ńgə́, “Lazalɔs, fɛ́d ńgyǐəə!”

⁴⁴Nkwû ŋwu wə̂ a fɛ́d ńgyǐəə, pə́ lə́mtə mbô mí pópə məko mí nə́ apagə atsəʼə́, ńkə́ ńdə́m əshî əyí nə́ apagə atsəʼə́. Yeso a sóŋə á mbô pó ńgə́, “Kyagtə̂ nə́ yí ḿmɛdtə̂ a ghɛnə̂.”

⁴⁵Pəjus pi nɨ́ nə́ páʼ pó nə ńgyǐ nə́ pópə Mɛɛlə lə́ pó zə́ənə anu páʼ a ghɛd nə́ ńtíʼ ńnéŋ ntɨ́ nə́ Yeso.

⁴⁶Lə́ pó pətsə́ ghɛnə̂ á mbô Pəfalasi ńtíʼ fiʼtə̂ ághɔ́b nə́ anu páʼ Yeso a faʼ nə́.

⁴⁷Ńdaŋ ə́lɨ́d pətə́kɔʼ pə ngaŋə́pêsê pópə Pəfalasi tíʼ ńkyeetə̂ ngaŋə́sáʼə́məsáʼ ə́sóŋ nə́ pó ńgə́, “Pɛn yǐ ghɛd lə́ ə́lɛ́?” Ńté ńgə́ ŋwu nə́ a ghɛd əkyeʼmə́nu pi nɨ́ nə́.

⁴⁸Təmbɔʼ pɛn mɛdtə̂ a yə́ a ghɛn nə́ mbi ńtə́ faʼə̂ mənu mɨ, tə ḿbə́ ŋwu ntsəmə a yǐ néŋ ntɨ́ nə́ yə́, Pəloman pó tíʼ ńgyǐ ńtsəŋkə̂ Tə́kɔʼndɛ̂sê əwɛn pópə aláʼə azɛ̂n tsɔʼə atsəmə!

⁴⁹Lə́ táʼ ŋwu əghɔb yitsə̌ páʼ pə́ nə̈ fóŋ nə́ yí nə́ Kaifasə a nə ḿbə́ nə́ mbêsê yi ngweŋ nə́ ngoʼ zɨ́d zə̂ a sóŋə á mbô pó ńgə́, “Nə́ kě anu yətsə́ kwéʼnə ńjî pô!

⁵⁰Nə́ kě jî ńgə́ a pɔŋ ńgə́ mbɔʼ táʼ ŋwunə a kwû ńté atûə a ŋwu ntsəm, ńtsɛ ndzaŋ mbɔʼ pə́ tsəŋkə̂ aláʼə atsəm?”

⁵¹Atsáb zəənə́ á nə ńkě lə́ atséebə ají pô. Ndzaŋə ándó a nə́ ḿbə́ nə́ Mbêsê yi ngweŋə́ á ngoʼ wɨ́d wə̂ lə́, a nə ńtíʼ ńtsáb lə́ ándó ntûsê ńgə́ Yeso a yǐ kwû té atûə pɨ pə́ Judya,

⁵²Ə́ kě kə́ kwû té lə́ tsɔʼə ághɔ́b pô, lə́ kə́ kwû lə́ á mə́ kyeetə̂ nə́ pɔ́ pə́ Əsê páʼ pó nə shamnə̂ nə́ á mə́m mbîə.

⁵³Ńtíʼ fɛ́lə alě wɨ́d wə̂ mətû mə́ Pəjus pó tíʼə ńtyáŋə mənaŋ ndzaŋ pó yǐ nə́ jwítə Yeso.

⁵⁴Ńdaŋ ə́lɨ́d, Yeso a kě pəənə̂ ńnyinə̂ á əshîsaŋ á mə́m Pəjus pô, lə́ ə́fɛ́d ə́wɨ́ ńgɛnə̂ aláʼ yətsə́ pə́ fóŋə nə́ Ɛflɛm á nə ḿbáatə nə́ kɔŋ məŋkwâʼlə̌ ńtíʼ ńchî ə́wɨ́ pópə ngaŋə́zoŋə́ndzəm əjíə.

⁵⁵Ndɛlə́ Akɔŋtə Ndzáʼkə nə́ ńtə́ ḿbáatə, pɨ pi nɨ́ nə́ pó fɛ́lə á mə́mə aláʼ ńtíʼ ńkɔ́ʼ ńgɛnə̂ á Jɛlusalɛm á mə́ sog nə́ mbɨ əzɔb ŋ́ŋwaʼə̂ ándó noŋkə á nə nɨd nə́, záʼ alě Akɔŋtə Ndzáʼkə á pɔŋə̂ koʼə̂.

⁵⁶Pó nə ńtə́ náŋə Yeso, ndzaŋə ándó pó nə ńkyeetə̂ nə́ á Tə́kɔʼndɛ̂sê lə́ ńtíʼə ḿbítə mə́ mbɨ mɔ́b ńgə́, “Nə kwaŋ ńgə́ akə̂? Nə kwaŋ ńgə́ a kě aliʼə́ Akɔŋtə Ndzáʼkə yǐ yǐ?”

⁵⁷Á nə ḿbə́ nə́ ndɛd zɨ́d zə̂ lə́, pətə́kɔʼ pə́ ngaŋə́pêsê pópə Pəfalasi pó sóŋ ńgə́ təmbɔʼ ŋwu ntsəmə a jîə aliʼ páʼ Yeso a chî nə́ ə́wɨ́, a yǐ fiʼtə̂ ághɔ́b ńjî ńgə́ mbɔʼ pə́ waamə̂ a yə́.