Read Awing Jɔnə 12 Bible Online

Jɔnə 12 - Awing bible

Jɔnə 12

¹Ndzaŋə ándó Akɔŋtə Ndzáʼkə a nə ḿbɛ́d nə́ əlěmbî pɛ́n ntogə́ lə́, Yeso a ghɛnə̂ aláʼə Bɛtani pópə ngaŋə́zoŋə́ndzəm əjíə. Bɛtani á nə ḿbə́ lə́ aláʼə pə́ Lazalɔsə páʼ Yeso a nə ńjúmkə nə́ yə́ á nəwû lə́.

²Pə́ nə ńgɛd məjîə á mbô yə́, Mata a nə ńgyǐ nə́ fɛ̂ məjî á mbô pó, Lazalɔsə a nə ḿbə́ lə́ táʼ ŋwu páʼ a nə ńjî nə́ pópə Yeso.

³Mɛɛlə a nə ńtwáamə akəmə ntsə́ŋ məghɔ́d pə́ ghɛd nə́ nə́ chigə nalə, məghɔ́d mə́ ndɛn nkáb yí nɨ́ nə́, ńkwɛlə̂ mə́ələ́ á məko Yeso, ńtíʼ ńdɔg mənoŋ mə́ atû mí ə́shíg ə́wə́. Ndɛ̂ ntsəm nə ńtíʼ ńdəmkə̂ tsɔʼə nə́ azagə́ məghɔ́d yə əwə.

⁴Lə́ Judas Iskaliɔt páʼ a nə ḿbə́ nə́ táʼ ndzoŋ ndzəm Yeso yitsə̌ ńkə́ ḿbə́ ŋwu páʼ a nə ńchî nə́ mə́ fi nə́ yí lə́ a sóŋ ńgə́,

⁵“lə́ pěʼ ńgɛlə̂ akə̂ pə́ kě məghɔ́d mə́ azagə́ mɨ fi nə́ nkáb əpa tâ ńdɔg nkáb yi əwɨ́ ńkwá pəfə́m wɨ́ pô?”

⁶Judas a nə sóŋ ə́lɨ́d lə́ ńkě té pə́ ńgə́ a nə ńtə́ ńkɔŋə̂ pəfə́m pô, a nə̈ ə́sóŋə ə́lɨ́d lə́ ńté ńgə́ a nə ḿbə́ lə́ ndzə̌lə. Ndzaŋ nkwum nkáb nə ńchî nə́ á mbô yí lə́, a nə ńnyáʼtə ə́fógə yitsə̌ wə́ ńdɔgə̂ yə́.

⁷Yeso a sóŋ ńgə́, “Mɛdtə̂ nə yə́! A nə ńdɔʼkə̂ mə́ələ́ á mə́ yǒ nə́ zɔ́ʼ mbəəmə wə́ alě pə́ yǒ nə́ twə́ŋə mə.

⁸Pəfə́m pə́ zá ńchîə pɨ po, lə́ maŋ pə́ ńkě pɛn zá ńchîə pô.”

⁹Pəjus pi nɨ́ nə páʼ pó nə ńgyǐ nə ə́wɨ́ əghâ ándó pó nə ńdzóʼ nə́ ńgə́ Yeso a nə chîə Bɛtani, pó nə ńkě ghɛnə̂ á Bɛtani lə́ tsɔʼə á mə́ jɨ́ nə́ Yeso pô, pó nə ńkə́ ńgɛn lə́ á mə́ jɨ́ nə́ Lazalɔs páʼ Yeso a nə ńjúmkə nə́ yə́ nəwûə.

¹⁰Lə́ pətə́kɔʼ pə́ ngaŋə́pêsê pó kə́ ńtyáŋə mənaŋ ndzaŋ mbɔʼ pó jwítə Lazalɔsə,

¹¹ńté anu a nə ńdaŋ nə́ nə́ Lazalɔs lə́, Pəjus pi nɨ́ nə́ pó kě ndzəm pətə́kɔʼ pə́ ngaŋə́pêsê pɛlə ńdzoŋə̂ pô, pó nə ńtíʼ ńnéŋ ntɨ́ əghɔ́b nə́ Yeso.

¹²Mbî fóg mboŋ pɨ páʼ pó nə ńgɛn nə á Jɛlusalɛm aliʼə́ Akɔŋtə Ndzáʼkə pó zóʼ ńgə́ Yeso a tə ńkwúnə á mə́mə aláʼə.

¹³Pó tíʼ ńchúʼə á mə́ lə́gtə nə́ əzáŋ ghɛn téekə yə́ alaŋə́, ńtíʼə ńjwáglə ə́sóŋə ńgə́, “Osana! Əsê a néŋ mbwɔ́dnə atû yí páʼ a yǐ nə́ nə́ əlɛ́n Mmaʼmbîə. Əsê a néŋ mbwɔ́dnə atû əfo Pəjusə!”

¹⁴Yeso a nə ńdzə́ənə mɔ́ njakasə yitsə̌ ńkɔ́ʼ ńnáanə á ndu ə́wɨ́ tsɔʼə ndzaŋ pə́ nə ŋwaʼlə̂ nə́ á mə́mə aŋwaʼlə Əsê ńgə́,

¹⁵“Pɨ pə́ Jɛlusalɛm, kɔ nə́ pɔ́gə. Jɨ́ nə́, əfo əwəənə́ a tə́ ńgyǐəə, a náanə lə́ á ndu mɔ́ njakasə.”

¹⁶Á nə ḿbə́ ndɛd yi wɨ́ lə́, atûə ngaŋə́zoŋə́ndzəm Yeso a kě tsɔ́ʼnə nə́ mənu mɨ pô, lə́ əghâ Əsê a kə júmkə nə́ Yeso nəwû a tíʼ ńkɔ́ʼə nəpó ńkwúnə á mə́m nəgháʼ əyǐ lə́, lə́ əghâ yi ə́wɨ́ pó nə ńkwúmtə nə́ ńgə́ mənu mɨ mətsəm pə́ nə ŋ́ŋwaʼlə̂ nə́, pə́ nə ŋwaʼlə̂ ńté lə́ yə́, ḿbɨ́ ḿbə́ ndzaŋ pə́ kə faʼ nə́ mənu məənə́ mbɨ yə́.

¹⁷Mboŋ pɨ páʼ pó nə ńchî nə́ aliʼ páʼ Yeso a nə fóŋ nə́ Lazalɔs á mə́m nəse a pɨ ḿbəənə̂ á mə́m mbî lə́ pó ghɛn nə́ mbiə á mə́ fiʼtə̂ nə́ pɨ nə anu páʼ Yeso a nə ńgɛd nə́ ndzaŋ pó nə ńchî nə́ aliʼ yi wɨ́ ńdzə́ənə.

¹⁸Lə́ nə ńgɛd ə́lɨ́d apoŋə pəənə pɨ fɛ́lə á Jɛlusalɛm ńgɛnə̂ á mə́ lɔg nə́ yə́, ńté ńgə́ pó nə ńdzóʼ ńgə́ a pěʼ ńgɛlə̂ akyeʼə́nu zəənə́.

¹⁹Pəfalasi pó tíʼ sóŋə tətɨ pó ńgə́, “Pɛn zɨ́ ńgə́ pɛn jwaʼ mbɨ əzɛ̂n lə́ kətaŋə, mbî ntsəm ə́ chîə á ndzəm yə́.”

²⁰Á mə́m pɨ pó nə ńgɛn nə́ á Jɛlusalɛm á mə́ ghóʼkə Əsê á ndɛd Akɔŋtə Ndzáʼkə, pɨ pətsə́ pó nə chî ə́wɨ́ páʼ pó nə ńkě nə pə Pəjus pô.

²¹Pó nə ńgɛnə̂ á mbô táʼ ndzoŋ ndzəm Yeso yitsə̌ pə́ nə fóŋ nə́ nə́ Filibə, páʼ a nə fɛ́d nə́ Bɛdsada á mboʼ Galiliə, ńtíʼ sóŋ nə́ yí ńgə́, “Tǎ, pəg kɔŋə̂ á mə́ zɨ́ nə́ Yeso.”

²²Filib a ghɛn fiʼtə̂ Andəlu nə anu yə́ ə́wə́, Andəlu pó Filib ghɛn fiʼtə̂ a Yeso.

²³Lə́ Yeso a kwěe ághɔ́b ńgə́, “Ndɛd ə́ koʼə̂ ándó Mɔ́ ŋwunə a yǐ nə́ kwáalə nəgháʼ əyǐə.

²⁴Lə́ nə́ ndə̌ŋdəŋ maŋ sóŋə á mbô pɨ ńgə́ təmbɔʼ pə́ chî pǐ mbəm ngəsáŋə́ á mə́m ndəsê ə́ lə̂ pô, tə ḿbə́ lə́ tsɔʼə zə́ələ́, lə́ təmbɔʼ pə́ pǐ á ndəsê ə́ kwû, ə́ yǐ mbɨ ə́fóg mətsə́ məmbəm mə́ nɨ́ nə́.

²⁵Ŋwu ntsəm páʼ a kɔŋ nə́ nchîmbî əjǐ, a yǐ péŋkə zə́ələ́, lə́ ŋwu ntsəm páʼ pa nə́ nchîmbî əjǐə á ndú ndəsê ghɛn a yǐ lɔʼkə̂ zɨ́d tíʼ túg nchîntɨ páʼ ə́ mɛdnə̂ nə́ ngǎ mɔʼə́.

²⁶Ŋwu ntsəm páʼ a kɔŋ nə́ á mə́ faʼ nə́ á mbô maŋ, a chîə á mə́ tə́ nə́ zoŋə̂ mə. Aliʼ páʼ maŋ chî nə́ ə́wɨ́ ngaŋəfaʼə mə a chî á mə́ kə́ nə́ chîə ají ə́wə́. Ŋwu ntsəm páʼ a tə́ nə́ faʼə̂ á mbô maŋ, Tǎ mə a yǐ ghɛlə̂ a túg ngóʼkə.”

²⁷“Əghâ nə́ ntə́əmə mə tə́ ńjwaʼə̂ mə - maŋ yǐ sóŋ lə́ ńgə́ akə̂, maŋ yǐ sóŋ lə́ ńgə́, ‘Tǎ, təmbɔʼ gho fógə mə á mə́m ngə́ʼ zɨ?’ Ngá, lə́ kě ə́lɨ́d pô! maŋ yǐəə á ndú ndəsê ghɛn ńté lə́ ndɛd ngə́ʼ zəənə́.

²⁸Tǎ, ghɛd pɨ pə́ zə́ənə nəgháʼ əgho.” Ndzaŋə ándó Yeso a nə sóŋ nə́ ə́lɨ́d lə́, ngye fɛ́lə nəpó ə́sóŋ ńgə́, “Maŋ pɛ́dtə nɨd pɨ nə́ nəgháʼə mə, maŋ yǐ kə́ pɨ nɨd ngǎ yitsə̌.”

²⁹Apoŋə pɨ pó nə ńtɨ́ nə́ aliʼ yə ə́wɨ́, pó zóʼ ngye páʼ nə fɛ́d nə́ nəpó ńtíʼ ə́sóŋ ńgə́, Lə́ nəfaŋ nə́ sáʼkə nə́, lə́ pətsə́ pə́ sóŋ ńgə́, “Lə́ tsáb ntseŋndɛ̂sê á mbô yə́.”

³⁰Yeso a sóŋə á mbô pó ńgə́, “Ngye zɨ yǐ ńté lə́ áwə́ənə́, ə́ kě yǐ ńté lə́ mə pô.

³¹Ndɛd ə́ koʼ páʼ Əsê a yǐ nə́ tsɔ́ʼtə əsáʼ pɨ pə́ mbî pəənə. Ndɛd kə́ ńkoʼ páʼ Əsê yǐ nə́ tsóokə ŋwu páʼ ä sáʼ nə́ mbî zəənə́ aləŋənə́fɔ yə́ ə́ tíʼ kəmə̂ yə́.

³²Əghâ ándó pə́ yǒ nə́ kɔ́ʼkə mə atǐ lə́, maŋ yǒ soŋə̂ ŋwu ntsəmə a yǐ ḿbáatə mə.

³³Yeso a nə ńtsáb lə́ á mə́ nɨd nə́ ntê nəwû páʼ a yǐ nə́ kwûə áwə́ələ́.”

³⁴Apoŋə pɨ zə́ a kwěe yí ńgə́, “Aŋwaʼlə Əsê a sóŋə á mbô pəg ńgə́ Yi Ńtsəʼ nə́ a chîə á mə́ chî nə́ á mbî ḿmɛdnə̂. Lə́, lə́ ghɛlə̂ akə̂ gho sóŋ ńgə́ pə́ yǐ shib kɔ́ʼkə Mɔ́ Ŋwunə atǐə? Mɔ́ Ŋwu ghɛn lə́ əwə lə́?”

³⁵Yeso a sóŋə á mbô pó ńgə́, “Nkyaʼ pɛ́d ńchî nə́ pɨ nə́ akəmə ndɛlə́. Ghɛn nə́ nə́ mbiə á mə́ nyi nə́ əghâ ándó nkyaʼ pɛ́d nə́ ə́wə́, záʼ túʼə á pɔŋə́ sɛ́nə gho, ŋwu páʼ ä nyi nə́ á mə́m ndzəmə a kě jîə aliʼ páʼ a ghɛn nə́ ə́wɨ́ pô.

³⁶Ndzaŋ nə́ pɛ́d nə́ ńtúg nkyaʼ lə́, néŋ nə́ ntɨ́ əwɨ́ wɨ́, ńjî ńgə́ pɨ tíʼ ḿbə́ pɨ pə́ nkyaʼə.” Ndzaŋə ándó Yeso a nə ńtsáb nə́ lə́ ńgɛn ḿbánə yə́.

³⁷A nə́ ḿbǎtə ńgɛd əkyeʼmə́nu mimə nɨ́ nə́ a mbi pó lə́, pó pə́ ńkě ntɨ́ nə́ yí néŋ ńgə́ lə́ Yi Ńtsəʼ nə́ wə̂ pô.

³⁸Á nə ńdaŋ ə́lɨ́d lə́ ńjî ńgə́ anu páʼ ntûsê Izaya a nə tsáb nə́ á yǐ pə́ ndə̌ŋdəŋ ńgə́ “Mmaʼmbî, lə́ néŋ əwə néŋ ntɨ́ nə́ nkɨ páʼ pɛn náŋkə nə́? Lə́ á mbô əwə páʼ Mmaʼmbîə á nɨd nə́ mətɨ míə?”

³⁹Lə́ pó pə́ ńkě pɛ́d ńjîə mə́ néŋ nə́ ntɨ́ pô, tsɔʼə ndzaŋ páʼ Izaya a nə ńkə́ nə́ ə́sóŋ ńgə́,

⁴⁰“Əsê a fəkə̂ əmə́g mɔ́b ńkə́ ńgɛd məntɨ́ mɔ́b mə́ tyantə̂, ńjî ńgə́ kɔ pó zə́ənə anu páʼ mäŋ faʼ nə́, kɔ pó kə́ ńjîə anu páʼ mäŋ sóŋ nə́, ńtíʼ ńgyǐəə á mbô maŋ, maŋ tsóʼə ághóobə́.”

⁴¹Izaya a nə sóŋə atsáb zɨ lə́ ńté ńgə́ a kə zə́ənə nəgháʼ Yeso ńkə́ ńtsáb ńté wə́ələ́.

⁴²Á kə pǎtə ḿbə́ ə́lɨ́d lə́ pɨ pə́ nɨ́ nə́ pó néŋ ntɨ́ nə́ Yeso ńdzoŋ ḿbeg mətû mə́ Pəjus wə́, lə́ ḿbə́ ńkě nəələ̂ á əshîsaŋ ńgə́ pó néŋ ntɨ́ nə́ yí pô ńté ńgə́ pó nə ńtə́ ḿbɔ́gə ńgə́ Pəfalasi pó yǐ kəmə̂ ághóobə́ á mə́m ndɛ̂sê Pəjusə.

⁴³Pó kɔŋ ńgə́ pɨ pə́ mbî pó tə́ ŋ́ŋáŋkə nəkwíŋ zóobə́ atǐ ńtsɛ ndzaŋ mbɔʼ Əsê a ŋáŋkə ághóobə́.

⁴⁴Yeso a kyéŋ nə́ tə́kɔʼ ngye ə́sóŋ ńgə́, “Ŋwu ntsəm páʼ a néŋ nə́ ntɨ́ nə́ maŋ, a kě ntɨ́ lə́ tsɔʼə nə́ maŋ néŋ pô, a kə́ ńnéŋ ntɨ́ lə́ nə́ ŋwu páʼ a tú nə́ mə.

⁴⁵Ŋwu tsəm páʼ ä zɨ́ nə́ mə, a kě lə́ tsɔʼə mə̈ zə́ənə pô, a kə́ ńdzə́ənə lə́ ŋwu páʼ a tú nə́ mə.

⁴⁶Maŋ yǐ lə́ ándó nkyaʼə á mə́m mbîə, ńjî ńgə́ ŋwu páʼ a néŋ nə́ ntɨ́ nə́ maŋ, a kě á mə́m ndzəmə́ yǐ ghɔ́ŋ pô.

⁴⁷Təmbɔʼ ŋwu ntsəm páʼ a zóʼ nə́ anu páʼ mäŋ sóŋ nə́ ńchîə zɨ́d zoŋ pô, maŋ kě əsáʼ əyí yǐ sáʼ pô, ńté ńgə́ maŋ kě á ndu ndəsê ghɛn yǐ lə́ á mə́ sáʼ nə́ mbî pô, lə́ maŋ yǐ lə́ á mə́ chwádkə nə́ mbîə.

⁴⁸Ŋwu páʼ a kǐə nə́ mə ńkě tə́ faʼə̂ mənu páʼ maŋ sóŋ nə́ pô á túgə ŋwu páʼ a yǒ nə́ sáʼ əsáʼ əyə́. Lə́ atsáb páʼ mäŋ tsáb nə́, lə́ zɨ́d páʼ a yǒ nə́ ə́sáʼ əsáʼ əyə́ á ndwigtə mbîə.

⁴⁹Á chîə á mə́ pə́ nə́ ə́lɨ́d ńté ńgə́ maŋ kě sóŋə anu yətsə́ lə́ nə́ mətəənə mə pô. Tǎ páʼ a tú nə́ mə, lə́ yí páʼ a fiʼtə̂ nə́ mə nə́ mənu páʼ maŋ yǐ nə́ sóŋ ə́ kə́ tséebə.

⁵⁰Maŋ jî ńgə́ mənu páʼ a sóŋ nə́ ńgə́ maŋ tsáb, mɨ́d mə́ fɛ̂ nchîntɨ ə́ mɛdnə̂ nə́ ngǎ mɔʼə́. Lə́ələ́ pə́ ńgə́ anuə atsəm páʼ maŋ sóŋ nə́ lə́ ndzaŋ páʼ Tǎ a sóŋ nə́ ńgə́ maŋ sóŋə.”