Read Awing Jɔnə 13 Bible Online

Jɔnə 13 - Awing bible

Jɔnə 13

¹Ndzaŋə ándó ndɛlə Akɔŋtə Ndzáʼkə nə ńtə́ nə́ ḿbáatə lə́, Yeso a jî ńgə́ ndɛd əjǐə á mə́ mɛdtə̂ nə́ mbî zɨ ə́ ghɛnə̂ á mbô Tǎ ə́ koʼə̂. Ndzaŋə a kə kɔŋ nə́ pɨ pí pó kə chî nə́ á mbî ghɛn lə́, əghâ nə́ a kɔŋə̂ ághɔ́b tə ńgɛn ńdwigtə̂.

²Satanə a nə ḿbɛ́d tə ńkwúnə á ntɨ́ Judas Iskaliɔt mɔ́ Saamun ńgə́ a finə̂ Yeso, záʼ Yeso a pɔŋə̂ tə́ náanə á mə́ jî nə́ məjî mə́ ndɛd nkwanə́ pópə ngaŋə́zoŋə́ndzəm əjíə.

³Yeso a nə ńjî ńgə́ Tǎ əyə́ a nə ḿbɛ́d tə ńnéŋə ajúmə atsəmə á mbô yí, ńkə́ ńjî ńgə́ a nə ńdǒ lə́ á mbô Əsê ńkə́ ḿbɨ ńtə́ ńgɛnə̂ á mbô Əsê.

⁴Lə́ a nə ńtíʼ ḿbə́ á ndɛd məjî mə́ ndɛd nkwanə́ lə́, Yeso a lǒo á ndəsê ńtsɔ́ʼə sooko əyǐ ńnoŋkə̂ əsê, ńtíʼ ḿbyáanə táawúlə ńdə́mə a ntə̂ yí,

⁵ńtíʼ ńtwá nkǐ ńnéŋə á mə́mə atsɛ̂ akáŋ ńchúʼə á mə́ sog nə́ məko mə́ ngaŋə́zoŋə́ndzəm əjï ńdɔgə̂ táawúlə ə́wə́ páʼ a nə ńdə́m nə́ a ntə̂ əyí lə̈ ə́shígə mɨ́d ə́wə́.

⁶Əghâ ándó a nə koʼ nə́ nə́ Saamun Pita lə́, Saamun Pita a pítə yí ńgə́, “Mmaʼmbî, gho loonə̂ lə́ á mə́ sog nə́ məkoolə mə?”

⁷Yeso a kwěe yí ńgə́, “Anu páʼ maŋ faʼ nə́ əghâ nə́ gho kě zɨ́d jî pô, gho lǒo jîə zɨ́d lə́ əghâ ndaʼə.”

⁸Pita a sóŋə á mbô yí ńgə́, “Tə mbî měe, mbɔʼ gho kě məkoolə mə sog pô.” Yeso a kwěe a yí ńgə́, “Təmbɔʼ maŋ chîə a gho sog pô, lə́ələ́ a pə ńgə́ pɔ̌ kě nə́ anu yitsə̌ chî pô.”

⁹Saamun Pita a sóŋə á mbô yí ńgə́, “Mmaʼmbî, mbɔʼ á pə́ ə́lɨ́d, kɔ sog tsɔʼə məkoolə mə, kə́ sog mbô mə pópə atûə mə!”

¹⁰Yeso a sóŋə á mbô yí ńgə́, “Ŋwu ntsəm páʼ a sog nə́ mbɨ əjǐ a kě pɨ ńchîə á mə́ sog nə́ akwub ngǎ yitsə̌ pô tə ńdéʼtə məko mí ńté ńgə́ akwubə ajíə a tə́ ŋwaʼə̂. Nə́ tə́ ŋ́ŋwaʼə̂, lə́ ḿbə́ ńkě pɨ pətsəm tə́ ŋwaʼə̂ pô.”

¹¹Ńté ńgə́ Yeso a nə ńjîə a ŋwu páʼ a yǐ nə́ finə̂ yə́, lə́ nə ńgɛd ə́lə́ələ́ a sóŋ ńgə́, “Lə́ kě pɨ pətsəm tə́ ŋwaʼə̂ pô.”

¹²Əghâ ándó a nə məgtə̂ nə́ á mə́ sog nə́ məko mɔ́b lə́ ńtíʼ ḿbɨ ńgwê a sooko əyǐə, ńtíʼ ńgɛn ńnáanə á ndəsê ḿbítə ngaŋə́zoŋə́ndzəm əjí ńgə́, “Nə́ jîə anu páʼ maŋ ghɛd nə́ nə́ pɨ lə́?”

¹³Nə fóŋə mə ńgə́ Ndzéʼkə pó Mmaʼmbîə, nə́ koʼnə̂ á mə́ fóŋ nə́ mə lə́ələ́, ńté ńgə́ maŋ lə́ Ndzéʼkə ńkə́ ḿbə́ Mmaʼmbîə.

¹⁴Ndzaŋə ándó maŋ pə́ nə́ Mmaʼmbî əwɨ ńkə́ ḿbə́ Ndzéʼkə əwɨ lə́, maŋ sog məko mə́ənə́, á kə́ ḿbɔŋ ńgə́ nə́ tə̈ sogə̂ məko mə́ ŋwu ntsəmə á mə́m pəənə́.

¹⁵Maŋ nəələ̂ áwɨ́ lə́ ndzaŋ nə́ chî nə́ á mə́ ghɛd nə́, ńjî ńgə́ tsɔʼə ndzaŋ maŋ faʼ nə́ á mbô pɨ lə́, nə́ yǐ kə́ faʼ lə́ tsɔʼə ə́lə́ələ́ á tətɨ pəənə.

¹⁶Nə́ ndə̌ŋdəŋ maŋ sóŋə á mbô pɨ ńgə́, mbɔʼ ngaŋəfaʼə a kě Tǎ afaʼ əyǐ tsɛ pô, ŋwu pə́ tú nə́ yí a kě kə́ ńtsɛɛlə̂ a ŋwu páʼ a tú nə́ yí pô.

¹⁷Mbɔʼ nə́ jî mənu mɨ, tə ḿbə́ afoʼə á yǐ chîə á mbô pɨ páʼ mbɔʼ pɨ tə̈ faʼə̂ mə́ələ́.

¹⁸Yeso a ghɛn nə́ mbiə á mə́ sóŋ nə́ á mbô pó ńgə́, “Anu páʼ maŋ sóŋ nə́ á mbô pɨ əghâ nə́ á kě lə́ áwɨ́ pətsəm náŋə pô, maŋ jî pɨ páʼ maŋ tsɔ́ʼ nə́ ńgə́ pópə ngaŋə́zoŋə́ndzəm mə. Anu zəənə́ atsəmə á lɔgə̂ aliʼ lə́ ńjî ńgə́ anu páʼ á chî nə́ á mə́mə Aŋwaʼlə Əsê á yǐ ḿbə́ ndə̌ŋdəŋ ndzaŋ pə́ ŋwaʼlə̂ nə́ ńgə́, Ŋwu páʼ a tə́ nə́ ńjîə məjî pəg yí a sɛdnə̂ ńtíʼ ḿbə́ ngaŋkəpeenə́ mə

¹⁹Mäŋ fiʼtə̂ anu zəənə́ á mbô pɨ lə́ nə́ ndɛd páʼ á kě nə́ aliʼ kə́ lɔgə̂ pô, ńjî ńgə́ təmbɔʼ á yǐ ńdɔgə̂ aliʼ nə́ chîə á mə́ pí nə́ ńgə́ maŋ lə́ ŋwu páʼ maŋ sóŋ nə́ ńgə́ maŋ lə́ wɨ́d lə́.

²⁰Nə́ ndə̌ŋdəŋ maŋ sóŋə á mbô pɨ ńgə́ ŋwu ntsəm páʼ a kwá nə́ ŋwu páʼ maŋ tú nə́, lə́ələ́ pə́ ńgə́ a kwá lə́ mə. Lə́ ŋwu páʼ a kwá nə́ mə, a kwá lə́ ŋwu páʼ a tú nə́ mə.”

²¹Əghâ ándó Yeso a nə məgtə̂ nə́ á mə́ tsáb nə́ lə́, ntɨ́ əyí ə́ chúʼə á mə́ jwaʼ nə́ yə́, a tíʼ ə́sóŋə á əshîsaŋ ńgə́, “Nə́ ndə̌ŋdəŋ maŋ sóŋə á mbô pɨ ńgə́ táʼ ŋwunə á mə́m pəənə́ a yǐ finə̂ mə.”

²²Ngaŋə́zoŋə́ndzəm əjí chúʼə á mə́ náŋ nə́ á tətɨ pó, lə́ ḿbə́ kě ŋwu páʼ Yeso a nə ńtsáb nə́ ńté yí lə́ jî pô.

²³Táʼ ndzoŋdzəm Yeso yitsə́ páʼ a nə ḿbyádnə nə́ ńkɔŋə̂ a nə ńnáanə nəpɛnə́ Yeso.

²⁴Saamun Pita a fóŋə yí nə́ apô ńtíʼ ḿbítə a yí ńgə́, “Pítə yí nə́ ŋwu páʼ ä tsáb nə́ ńté.”

²⁵Lə́ ndzoŋdzəm Yeso wə̂ á ghɛn ḿbáatə Yeso ḿbítə yí ńgə́, “Mmaʼmbî, gho sóŋə ńté lə́ əwə?”

²⁶Yeso a kwěe yí ńgə́, “Ŋwu páʼ maŋ yǐ nə́ tsɛnə̂ apá zəənə́ á mə́mə akáŋə náʼ ə́fɛ̂ nə́ yə́.” Əghâ ándó Yeso a nə́ ńtsɛn nə́ apá zə̂ á mə́mə akáŋə náʼ lə́, ńtíʼ ə́fɛ̂ á mbô Judas mɔ́ Saamun Iskaliɔt.

²⁷Ndzaŋə ándó Judasə a nə ńkɔ́d nə́ apá zə́ lə́, Satanə á kwúnə á ntɨ́ yə́. Yeso a tíʼ ə́sóŋə á mbô yí ńgə́, “Faʼə̂ anu páʼ ghö lɔ nə́ á mə́ faʼ nə́ lə́ nə́ mətəənə.”

²⁸Á mə́m pɨ pətsəm páʼ Yeso a nə ńtə́ nə́ ńjîə məjî pó po lə́, pó nə ńkě jîə anu páʼ Yeso a nə sóŋ nə́ á mbô Judasə lə́ pô.

²⁹Pətsə́ pó kwaŋ ńgə́ ndzaŋ Judasə a lɔʼkə̂ nə́ nkwum nkáb əghɔ́b lə́, Yeso a tíʼə ńdoonə̂ mə́ fiʼtə̂ nə́ Judasə lə́ ńgə́ a jú əpú páʼ pó po yǒ nə lɔg jîə Akɔŋtə Ndzáʼkə ə́wə́, kɨ ńgə́ Judas a fɛ̂ ajúmə á mbô pəpóŋə.

³⁰Əghâ ándó Judas a nə ńkwá nə́ apá zə̂ ńkɔ́d lə́ ńtíʼ ə́fɛ́lə apeŋ tsɔʼə əghâ yi ə́wə́. Lə́ kə pə́ nətúʼə.

³¹Ndzaŋə ándó Judas a nə fɛ́d nə́ apeŋ lə́ Yeso a sóŋ ńgə́, “Əghâ nə́ pə́ zə́ənə nəgháʼ Mɔ́ Ŋwunə, ńkə́ ńdzə́ənə nəgháʼ Əsê ńdaŋə̂ á ndzəm yə́.

³²Lə́ mbɔʼ pə́ zə́ənə nəgháʼ Əsê ńdaŋə̂ á ndzəm yí, tə ḿbə́ Əsê a yǐ nəələ̂ nəgháʼ Mɔ́ Ŋwunə á ngǎ yə́. A yǐ kə́ faʼ ə́lɨ́d táʼ ngǎ.

³³Póonə mə, maŋ kě yǐ chî pɛn ndi sag pô, nə́ yǒ náŋə mə, tsɔʼə ndzaŋ maŋ nə sóŋ nə́ á mbô mətû mə́ Pəjus lə́. Mäŋ sóŋə wɨ́ əghâ nə́ lə́ nə́ anu páʼ maŋ kə sóŋ nə́ á mbô mətû mə́ Pəjusə. Tə mbɔʼ nə́ kě ghɛnə̂ aliʼ páʼ maŋ ghɛn nə́ wɨ́ pô.

³⁴Maŋ fɛ̂ lə́ ntəgə́ yi fîə á mbô pəənə́, túg nə́ akɔŋnə ndzɔʼ pəənə́; ndzaŋ páʼ maŋ kɔŋ nə́ áwɨ́ lə́ nə́ kə́ shib ńtúgə akɔŋnə ndzɔʼ pəənə́.

³⁵Təmbɔʼ nə́ túgə akɔŋnə ndzɔʼ pɨ, a yǐ ńgɛd ŋwu ntsəmə a jî ńgə́ pɨ lə́ ngaŋə́zoŋə́ndzəm mə.”

³⁶Saamun Pita a pítə Yeso ńgə́, “Mmaʼmbî, gho ghɛnə̂ lə́ ə́fó?” Yeso a kwěe yí ńgə́, “Á aliʼ páʼ mäŋ ghɛn nə́ ə́wɨ́ əghâ nə́ təmbɔʼ gho kě ə́wɨ́ əghâ nə́ yǐ pô, nə́ ndɛd ə́ tə́ nə́ ńgyǐəə gho yǒ zoŋə̂ mə.”

³⁷Pita a pítə Yeso ńgə́, “Mmaʼmbî, təmbɔʼ maŋ kě gho əghâ nə́ zoŋ ńté lə́ akə̂? Maŋ chî təmbɔʼ maŋ kwû ńté atûə azô.”

³⁸Yeso a kwěe yí ńgə́, “Gho sóŋ ńgə́ təmbɔʼ gho kwû ńté atûə mə? Nə́ ndə̌ŋdəŋ maŋ sóŋə á mbô gho ńgə́ aŋkəʼə́ á yǐ tə́ tɔ́ŋə ə́sɛ̂n lə́, gho sóŋ ngǎ teelə́ ńgə́ gho kě mə jî pô.”