Read Awing Jɔnə 14 Bible Online

Jɔnə 14 - Awing bible

Jɔnə 14

¹Yeso a sóŋə á mbô ngaŋə́zoŋə́ndzəm əjí ńgə́, “Kɔ məntɨ́ mɨ́ mə́ tə́ ńjwaʼə̂ áwə́ənə́, néŋ nə́ ntɨ́ nə́ Əsê ńkə́ néŋ ntɨ́ nə́ maŋə.

²Á mə́m ndɛ̂ Tǎ mə, ətɔ́g ə́ chî ə́wɨ́ ńnə́ənə, təmbɔʼ a pěʼ ńchî lə́ ə́lɨ́d chî pô, tə ḿbə́ maŋ kě nə́ pɨ tə́ ə́sóŋə ńgə́ maŋ yǐ ghɛn tsoŋkə̂ aliʼə́ á mbô pɨ pô?

³Ndzaŋ ándó maŋ yǐ nə́ ghɛn tsoŋkə̂ aliʼə́ á mbô pɨ lə́, ə́ tíʼ yǐ ngǎ yitsə̌, ə́ lɔgə̂ wɨ́ ghɛn nə́ pəənə́ á aliʼ páʼ mäŋ ghɛn nə́ ə́wə́, ńjî ńgə́ aliʼ páʼ maŋ chî nə́ ə́wɨ́ nə́ kə́ ńchîə azɨ́ ə́wə́.

⁴Lə́ nə́ jî ndú ə́ ghɛn nə́ aliʼ páʼ maŋ ghɛn nə́ ə́wɨ́ lə́.”

⁵Tɔməsə a sóŋə á mbô yí ńgə́, “Mmaʼmbî, pəg kě aliʼ páʼ gho ghɛn nə́ ə́wɨ́ lə́ jî pô, təmbɔʼ pəg pə́ ńjî ndú yi ə́wɨ́ lə́ ə́fó?”

⁶Yeso a sóŋə á mbô yí ńgə́, “Maŋ lə́ ndúmə, ḿbə́ ndə̌ŋdəŋə́, ńkə́ ḿbə́ nchîmbîə, təmbɔʼ ŋwunə a kě á mbô Tǎ ghɛn təghə́ a laŋə̂ á mbô maŋ pô.

⁷Təmbɔʼ pɨ nə́ ńjîə mə, tə ḿbə́ pɨ kə́ ńjîə Tǎ mə. Ə́fɛ́d nə́ pə ə́sɛ̂n pɨ jîə yí ńkə́ ńdzə́ənə yə́.”

⁸Filibə a sóŋə á mbô Yeso ńgə́, “Mmaʼmbî, nəələ̂ áwə́g nə́ Tǎ əgho, lə́ ndaʼə anu pəg lɔ nə́.”

⁹Yeso a kwěe yí ńgə́, “Maŋ kwaŋ ńgə́ maŋ chî pɛn tə ndi sagə̂, tə ńkoʼ əghâ nə́ gho kě mə jî nə́ Filib? Ŋwu páʼ a jɨ́ nə́ mə a jɨ́ lə́ Tǎ. Lə́ ghɛlə̂ akə̂ gho sóŋ ńgə́, ‘Nəələ̂ áwə́g nə́ Tǎ?’

¹⁰Gho kě pí ńgə́ maŋ chîə á mə́m Tǎ, Tǎ kə́ ńchîə á mə́m maŋ? Mənu mɨ páʼ maŋ sóŋ nə́ á mbô pɨ lə́, maŋ kě lə́ nə́ mətəənə mə sóŋə pô, lə́ faʼə̂ Tǎ páʼ a chî nə́ á mə́m maŋə.

¹¹Pí nə́ ńgə́ maŋ chîə á mə́m Tǎ, Tǎ kə́ ńchîə á mə́m maŋə. Kɨ nə́ kə́ ḿbímə mə ńté məfaʼ páʼ mäŋ faʼ nə́.”

¹²Lə́ nə́ ndə̌ŋdəŋ mäŋ sóŋə á mbô pɨ ńgə́, ŋwu páʼ a néŋ nə́ ntɨ́ nə́ maŋ a yǐ kə́ faʼ məfaʼ páʼ mäŋ faʼ nə́. Kɨ a yǐ ḿbɨ faʼ məfaʼ ńtsɛɛlə̂ á mi páʼ maŋ nə faʼ nə́ ńté ńgə́ maŋ ghɛnə̂ lə́ á mbô Tǎ.

¹³Anuə atsəm páʼ pɨ yǐ nə́ ḿbítə nə́ əlɛ́nə mə, maŋ yǐ faʼə̂ zə́ələ́, ńjî ńgə́ Tǎ a yǐ ńtúgə nəgháʼ əyǐ ńté mɔ́ əyǐə.

¹⁴Təmbɔʼ nə́ pítə anuə atsəm nə́ əlɛ́nə mə, maŋ yǐ faʼə̂ zə́ələ́.

¹⁵“Təmbɔʼ nə́ ńkɔŋə̂ mə tə ḿbə́ nə́ yǐ lɔʼkə̂ məntəgə́ mə.

¹⁶Lə́ maŋ yǐ pítə a Tǎ mə, a tíʼ ə́fɛ̂ Nkwá əwɨ yi ndaʼ páʼ a yǐ nə́ mɛdnə̂ pɨ pó ngǎ mɔʼə́.

¹⁷Tsɔ́ʼə Ajwiə á ndə̌ŋdəŋ, páʼ təmbɔʼ mbî kě kwá pô, ńté ńgə́ mbî kě yï zə́ənə pô ńkě kə́ ńjî pô. Lə́ nə́ pə́ ńjîə yí ńté ńgə́ a mɛdnə̂ pɨ po ə́ yǒ kə́ chî pɨ po.”

¹⁸“Maŋ yǒ kě áwɨ́ a ngǎ pɨ mɛdtə̂ pô, maŋ yǐ pɨ pəənə̂ á mbô pəənə́.

¹⁹Lə́, lə́ tsɔʼə ngǎ pɛ̌, mbî kě mə pɨ ńjɨ́ pô, lə́ nə́ yǒ ńdzə́ənə mə; ńté ńgə́ maŋ chîə mbîə, nə́ yǒ kə́ chîə mbîə.

²⁰Á yǒ pə́ alě ə́wɨ́ nə́ jî ńgə́ maŋ chîə á mə́m Tǎ mə, nə chîə á mə́m maŋ, maŋ kə́ ńchîə á mə́m pəənə́.

²¹Ŋwu ntsəm páʼ a pí nə́ məntəgə́ mə ńkə́ ńdzóʼnə á mɨ́d, lə́ ŋwu páʼ a kɔŋ nə́ mə; ŋwu páʼ a kɔŋ nə́ mə, Tǎ mə a yǐ kə́ kɔŋə̂ yə́, maŋ kə́ ńkɔŋə̂ yí ńtíʼ ńnɨd mbəəmə mə á mbô yə́.”

²²Judasə (páʼ a nə ńkě pə́ Judas Iskaliɔt pô lə́) a sóŋə á mbô Yeso ńgə́, “Mmaʼmbî, lə́ ghɛlə̂ akə̂ gho sóŋ ńgə́ gho yǐ nɨd mbɨ əzo á mbô pəg, ə́ pə́ kě á mbô mbî nɨd pô?”

²³Yeso a kwěe a yí ńgə́, “Təmbɔʼ ŋwunə kɔŋə̂ mə, tə ḿbə́ a yǐ lɔgə̂ atséebə mə, Tǎ mə a kə́ ńtíʼ ńkɔŋə̂ yə́, Pəg Tǎ mə tíʼ ńgyǐəə á mbô yí pəg pö tíʼə ńchîə.

²⁴Ŋwu ntsəm páʼ a kě nə́ mə́ kɔŋ pô, a kě atséebə mə kə́ ńdzóʼnə pô; Lə́ atsáb nə zóʼ nə́ á mbô maŋ lə́, á kě lə́ á mbô maŋ lǒo pô, á lǒo lə́ á mbô Tǎ páʼ a tú nə́ mə.”

²⁵“Maŋ sóŋə mənu məənə́ á mbô pɨ əghâ nə́ páʼ maŋ pɛ́d nə́ ńchî pɛnə̂.

²⁶Lə́ Nkwá ə́wə́, páʼ a pə́ nə́ Ajwǐəsê lə́, yi páʼ Tǎ mə a yǐ nə́ tú nə́ əlɛ́n mə, a yǐ zéʼkə áwɨ́ nə́ anuə atsəm, ə́ tíʼ ghɛd nə́ kwúmtə mənu mətsəm páʼ maŋ nə̈ sóŋ nə́ á mbô pəənə́.”

²⁷Maŋ mɛdtə̂ mbwɔ́dnə á mbô pəənə́, lə́ mbwɔ́dnə mə páʼ maŋ fɛ̂ nə́ á mbô pəənə́. Maŋ kě fɛ̂ lə́ a pə́ ándó pɨ pə́ mbî pö fɛ̂ nə́ lə́ pô. Kɔ nə́ pí məntɨ́ mɨ́ mə́ jwaʼə̂ áwə́ənə́, kɨ ńchî nə́ apɔ́gə.

²⁸Nə pěʼ ńdzóʼ maŋ sóŋə á mbô pɨ ńgə́, Maŋ yǐ ghɛn pɨ kə́ pəənə̂ á mbô pəənə́. Təmbɔʼ nə́ pěʼ ńkɔŋə̂ mə tə ḿbə́ nə́ pěʼ ńtə́ ńkɔŋtə̂ ńté ńgə́ mäŋ ghɛnə̂ lə́ á mbô Tǎ, lə́ Tǎ páʼ a tsɛ nə́ mə.

²⁹Lə́ nə́ pə əghâ nə́ maŋ fiʼtə̂ áwɨ́ nə́ mənu mɨ záʼ mə́ pɔŋə̂ lɔgə̂ aliʼə́, ńjî ńgə́ təmbɔʼ mɨ́d mə́ ghɛd ńdɔgə̂ aliʼ, nə́ pímə.

³⁰Maŋ kě pɨ ńchîə á mə́ tsáb nə́ tə́shú pɛn pô ńté ńgə́ ŋwu páʼ a sáʼ nə́ mbî zəənə́ a tə́ ńgyǐəə. Lə́ a kě mətɨ mətsə́ á ndú maŋ túg pô.

³¹Lə́ mäŋ faʼə̂ lə́ ndzaŋ páʼ Tǎ a sóŋ nə́ ńgə́ maŋ faʼə̂, ńjî ńgə́ mbî jî ńgə́ maŋ kɔŋə̂ Tǎ. Lǒ nə́ əsê pɛn ghɛnə̂.