Read Awing Jɔnə 15 Bible Online

Jɔnə 15 - Awing bible

Jɔnə 15

¹“Maŋ lə́ chigə atǐə məloʼə, Tǎ mə a pə́ ŋwu páʼ ä faʼ nə́ á mə́m nkáʼ mətǐ mə́ məloʼə.

²A kwagə̂ məfag mə́ atǐ páʼ mə́ chî nə́ nə́ maŋ ńkě mənta zə́mə pô, ńtsoŋkə̂ məfag páʼ mə́ zə́m nə́ ńgə́ mə́ zə́m mənta əshîʼnə.

³Pə́ pɛ́dtə ńgɛd nə́ ŋwaʼ ńdzoŋə̂ atséebə Əsê páʼ maŋ pɛ́d nə́ tə ə́sóŋə á mbô pəənə́.

⁴Nə́ mɛdnə̂ nə́ maŋə, maŋ kə́ mɛdnə̂ nə́ pəənə́. Ndzaŋə ándó mbɔʼ əfagə atǐ ə́ kě zə́m mənteemə́ á ngǎ əyí tə ghə́ ə́ pádnə á pə́ á mbəəmə atǐ pô lə́, á kə́ ḿbə́ lə́ tsɔʼə ə́lɨ́d nə́ pəənə́, tə mbɔʼ nə́ kě mənta kə́ ńdzə́m tə ghə́ nə́ mɛdnə̂ nə́ maŋ pô.”

⁵Maŋ lə́ atǐə məloʼ nə́ pə́ məfag míə. Ŋwu ntsəm páʼ a mɛdnə̂ nə́ maŋə, maŋ kə́ mɛdnə̂ nə́ yə, lə́ yí páʼ a yǒ nə́ zə́m mənta mə́ nə́ənə, ńté ńgə́ təmbɔʼ maŋ chî pɛn chî pô nə́ kě anu yətsə́ ghɛd pô.

⁶Təmbɔʼ ŋwunə a chî nə́ maŋ mɛdnə̂ pô, Tǎ mə a yǐ myaʼə̂ yə́ ándó əfagə atǐ pə́ lə́g nə́ myaʼ ə́ júmə, pə́ tíʼ ńkyeetə̂ məfag mimə́ ə́wɨ́ ńgɛn maʼə̂ á mə́m móg mə́ kɛ́lə.

⁷Təmbɔʼ nə́ mɛdnə̂ á mə́m maŋ, atséebə mə á kə́ mɛdnə̂ á mə́m pɨ, nə pítə ajúmə atsəm páʼ nə̈ lɔ nə́ pə́ yǐ fɛ̂ nə́ pəənə,

⁸lə́ ndzaŋ páʼ pə́ yǐ nə́ zə́ənə nəgháʼ Tǎ mə páʼ təmbɔʼ nə́ zə́m mənta mimə́ nɨ́ nə́, ńdaŋ ə́lɨ́d nə́ nɨd ńgə́ pɨ lə́ ngaŋə́zoŋə́ndzəm mə.

⁹Ndzaŋə ándó Tǎ a kɔŋ nə́ mə lə́, lə́ kə́ ḿbə́ ndzaŋ maŋ kɔŋ nə́ áwə́ənə́, tíʼ nə́ ḿmɛdnə̂ á mə́m akɔŋnə mə.

¹⁰Təmbɔʼ nə́ lɔʼkə̂ məntəgə́ mə tə ḿbə́ nə́ mɛdnə̂ á mə́m akɔŋnə mə, tsɔʼə ndzaŋ páʼ maŋ lɔʼkə̂ nə́ məntəgə́ mə́ Tǎ mə ńkə́ mɛdnə̂ á mə́m akɔŋnə ajíə.

¹¹Mäŋ sóŋə mənu məənə́ á mbô pɨ ńjî ńgə́ mbɨ əzɨ ə́ tə́ ḿbɔŋə̂, akɔŋtə mə á tíʼ ńdwɛ́nkə á mə́m pəənə́.

¹²“Lɛ̌ ntəgə́ mə, ńgə́ nə́ túgə akɔŋnə á ndzɔʼ pɨ tsɔʼə ndzaŋ maŋ kɔŋ nə áwɨ́ lɛ̌

¹³Chigə tə́kɔʼ akɔŋnə páʼ mbɔʼ ŋwunə a túgə á mbô pəshu pí lə́ ńgə́ təmbɔʼ a kwû ńté atûə azóobə́.

¹⁴Pɨ lə́ pəshunə́ mə páʼ təmbɔʼ nə́ faʼə̂ anu maŋ sóŋ nə́ ńgə́ nə́ faʼə̂.

¹⁵Maŋ kě pɛ́lə̈ ə́fóŋə áwɨ́ nə́ ngaŋə́faʼ pô, ńté ńgə́ ngaŋə́faʼə a kě jîə anu páʼ Tǎ afaʼ əghoobə́ a ghɛd nə́ po. Maŋ fóŋə áwɨ́ nə́ pəshunə́ mə ńté ńgə́ maŋ pɛ́dtə fiʼtə̂ áwɨ́ nə́ anuə atsəm páʼ maŋ zóʼ nə́ á mbô Tǎ mə.

¹⁶Lə́ nə́ ńkě pɨ tsɔ́ʼ ńtsɔ́ʼə mə pô, lə́ nə ńtsɔ́ʼ maŋ ńtsɔ́ʼə áwɨ́ ńtú ńgə́ nə́ ghɛn ńdzə́m mənta ńjî ńgə́ mənta mimə ə́wɨ́ mə́ mɛdnə̂. Ńdaŋ ə́lɨ́d ajúmə atsəm páʼ nə́ pítə nə́ á mbô Tǎ ńdaŋ nə́ əlɛ́nə mə, a yǐ fɛ̂ á mbô pəənə́.

¹⁷Lɛ̌ anu páʼ maŋ lɔ nə́ ńgə́ nə́ ghɛlə̂, ńgə́ nə́ túgə akɔŋnə a ndzɔʼ pəənə́.”

¹⁸Təmbɔʼ mbî peenə̂ áwɨ́ nə́ jî ńgə́ mbî nə ḿbɛ́dtə ḿbeg ḿbeenə̂ mə.

¹⁹Təmbɔʼ pɨ nə ḿbə́ lə́ pɨ pə́ mbî pɨ, tə ḿbə́ mbî nə ńkɔŋə̂ áwə́ənə́ ándó pɨ píə. Lə́ maŋ nə ńtsɔ́ʼə áwə́ənə́ á mə́m mbî zəənə́, pɨ kě pɛ́d ḿbə́ lə́ pɨ pə́ mbî pɨ pô, lɛ̌ anu páʼ a ghɛd nə́ mbî peenə̂ áwɨ́ lə́.

²⁰Kwúmtə nə́ atsáb páʼ maŋ nə sóŋ nə́ á mbô pɨ ńgə́, Təmbɔʼ ngaŋəfaʼə a kě Tǎ afaʼ əyǐ tsɛ pô. Təmbɔʼ pə́ nə ńtsaŋkə̂ mə, tə ḿbə́ pə yǐ kə́ tsaŋkə̂ áwə́ənə́. Təmbɔʼ pó zóʼnə atséebə mə, tə ḿbə́ pó yǐ kə́ zóʼnə azə́ənə́.

²¹Lə́ pó yǒ kə́ ghɛd ndɛn mənu ghɛn ətsəm a mbɨ pɨ ńté mə, ńté ńgə́ pó kě a ŋwu páʼ a tú nə́ mə lə́ jî pô.

²²Təmbɔʼ maŋ nə ńchî yǐ tséebə á mbô pó pô, tə ḿbə́ pó nə ńkě təpɔŋ ghɛd pô, nə́ pə́ əghâ nə́ anu yətsə́ á kě ə́wɨ́ pɨ ńchî təmbɔʼ pó sóŋ ńgə́ pó nə ńtə́ ńgɛlə̂ təpɔŋ lə́ ńkě jî pô.

²³Ŋwu ntsəm páʼə a pa nə́ mə a kə́ ḿbeenə̂ Tǎ mə lə́ tsɔʼə lə́ələ́.

²⁴Təmbɔʼ maŋ nə ńchî faʼə̂ á mə́m pó məfaʼ páʼ ŋwu tsə̌ a nə ńkě nə́ kə́ faʼə̂ pô, tə ḿbə́ pó nə ńkě təpɔŋ ghɛd pô. Lə́ nə́ pə əghâ nə́, pó zɨ́ məfaʼ mimə wɨ́ ńtíʼə ḿbeenə̂ áwə́g Tǎ mə.

²⁵Zəənə́ a chîə á mə́ lɔg nə́ aliʼ ńjî ńgə́ anu pə́ nə ŋ́ŋwaʼlə̂ nə́ á mə́m Pənoŋkə pɔ́b á pə́ ndə̌ŋdəŋ ńgə́, Pó peenə̂ mə lə́ tsɔʼə kətaŋə.

²⁶“Lə́ əghâ ándó Nkwá əwəənə́ á yǐ nə́ yǐ, páʼ maŋ yǐ nə́ túmə á mbô pɨ páʼ a lǒo nə́ á mbô Tǎ mə lə́, tsɔʼə Ajwiə ndə̌ŋdəŋ páʼ a lǒo nə́ á mbô Tǎ a yǐ sóŋə anu ńté mə.

²⁷Lə́ pɨ yǐ kə́ ə́sóŋə anu té mə, ńté ńgə́ maŋ nə ńchî pɛn ə́fɛ́lə a nəchwaakənə́.”