Read Awing Jɔnə 17 Bible Online

Jɔnə 17 - Awing bible

Jɔnə 17

¹Əghâ ándó Yeso a nə məgtə̂ nə́ á mə́ tsáb nə́ ndɛn mənu ghɛn lə́, ḿbɨgə̂ atûə ají ńnáŋ nəpó ə́sóŋ ńgə́, “Tǎ, ndɛd zə̂ əyǐə, fɛ̂ nəgháʼə á mbô Mɔ́ əgho, ńjî ńgə́ mbɔʼ Móonə a kə́ ə́fɛ̂ nəgháʼə á mbô gho.

²Gho nə fɛ̂ mətəənə á mbô yə́ á ndu ŋwu ntsəm ńjî ńgə́ a fɛ̂ nchîntɨ páʼ ə́ mɛdnə̂ nə́ ngǎ mɔʼə́ á mbô ŋwu ntsəm páʼ gho nə fɛ̂ nə́ á mbô yə́.

³Lɛ̌ nchîntɨ páʼ ḿmɛdnə̂ ngǎ mɔʼə́ ńgə́, pɨ pə́ jî ńgə́ gho lə́ ndaʼ ndə̌ŋdəŋ Əsê, ńkə́ ńjîə Yeso Klisto páʼ gho nə ńtú nə́.

⁴Maŋ nə nəələ̂ a nəgháʼ əgho á ndu ndəsê; Maŋ nə ńkə́ məgtə̂ afaʼə azô páʼ gho nə́ ńtú nə́ mə ńgə́ maŋ yǐ faʼə̂.

⁵Tǎ, fɛ̂ nəgháʼə á mbô maŋə á mbi gho əghâ nə́, tsɔʼə nəgháʼ maŋ nə ńchî nə́ nə́ wɨ́d záʼ pə́ pɔŋə̂ tsoŋkə̂ mbî lə́.”

⁶Maŋ nə ńgɛd ŋwu ntsəm páʼ gho nə́ fɛ̂ nə́ yə́ á mbô maŋ á mə́m mbî nə́ a jîə gho. Pó nə ḿbə́ lə́ pɨ pó, lə́ fɛ̂ gho fɛ̂ ághóobə́ á mbô maŋə. Pó nə ńdzóʼnə atséebə azô,

⁷lə́ nə́ pə́ əghâ nə́ pó jî ńgə́ ajúmə atsəm páʼ gho nə fɛ̂ nə́ á mbô maŋ á lǒ lə́ á mbô gho.

⁸Maŋ nə náŋkə nkɨ yi ə́wə́ á mbô pó páʼ gho nə ńtú nə́ mə nə́ wɨ́d lə́, pó kə́ ńdzóʼə áwə́ələ́. Pó jî ńgə́ lə́ ndə̌ŋdəŋ ńgə́ maŋ lǒo lə́ á mbô gho, ńkə́ ḿbí ńgə́ lə́ tú gho ńtúmə mə.

⁹Maŋ tə́ ńchaʼtə́sê atû pó, maŋ kě əsê lə́ atû mbî chaʼtə̂ pô, maŋ chaʼtə́sê lə́ atû pɨ páʼ gho fɛ̂ nə́ nə́ maŋə, ńté ńgə́ pó lə́ pɨ pô.

¹⁰Ajúmə atsəm páʼ maŋ túg nə́ lə́ azô, ajúmə atsəm páʼ gho kə́ nə́ ńtúg lə́ azéemə; Pó yǒ zə́ənə nəgháʼə mə laŋ lə́ á ndzəm pɨ pəənə́.

¹¹Lə́ nə́ pə́ əghâ nə́, maŋ tə́ ńgyǐəə á mbô gho, maŋ kě á mə́m mbî pɛ́d pô, lə́ pó pə́ ḿbɛ́lə á mə́m mbîə. Tǎ mə páʼ gho ŋwaʼ nə́, pyáabə ághɔ́b nə́ mətɨ páʼ mə́ chî nə́ nə́ əlɛ́n əghô, əlɛ́n ə́wə́ páʼ gho nə fɛ̂ nə́ nə́ maŋ lə́; ńjî ńgə́ pó pə́ táʼ tsɔʼə ndzaŋ páʼ pɔ̌ pə́ nə́ táʼ lə́.

¹²Əghâ ándó maŋ nə ńchî nə́ pə̌gpo lə́, maŋ nə ḿbyáabə ághɔ́b əshîʼnə nə́ mətɨ mə́ əlɛ́n gho, əlɛ́n ə́wə́ páʼ gho nə fɛ̂ nə́ á mbô maŋ lə́. Maŋ nə ḿbyáabə ághóobə́, tə táʼ ŋwu əghɔb yitsə̌ a kě péŋ pô, tə ńdéʼtə yí páʼ a nə́ ńchî nə́ á mə́ péŋ nə́, á mə́ ghɛd nə́ ńgə́ anu páʼ a nə ńchî nə́ á mə́mə aŋwaʼlə Əsê lə́ á lɔgə̂ aliʼə́.

¹³Nə́ əghâ nə́ maŋ tə́ ńgyǐəə á mbô gho, mäŋ sóŋə mənu məənə́ á mə́m mbî lə́ ńjî ńgə́ mbɔʼ pó túgə akɔŋtə mə á lwɛ́nkə məntɨ́ móobə́.

¹⁴Maŋ nə fɛ̂ nkɨ əghô á mbô pó, lə́ mbî tíʼ ḿbeenə̂ ághɔ́b ńté ńgə́ pó kě lə́ pɨ pə́ mbî pɨ pô, tsɔʼə ndzaŋ páʼ maŋ kě nə́ kə́ ḿbə́ ŋwu mbî ghɛn pô lə́.

¹⁵Maŋ kě sóŋ lə́ ńgə́ gho fógə ághóobə́ á mə́m mbî pô, maŋ sóŋ lə́ ńgə́ gho pyáabə ághóobə́ á mə́m mbô mə́ Ŋwu Təpɔŋ Wə́.

¹⁶Ndzaŋə ándó maŋ kě nə́ pə́ ŋwu mbî nə́ lə́, pó kě kə́ ḿbə́ lə́ pɨ pə́ mbî pɨ pô.

¹⁷Tsɔ́ʼə ághɔ́b pópə pɨ pô pipə́ ŋwaʼ nə́ ńdaŋə̂ ndzəm ndə̌ŋdəŋ, ńté ńgə́ atséebə azô lə́ ndə̌ŋdəŋə́.

¹⁸Maŋ nə ńtúmə ághóobə́ á mə́m mbî lə́ tsɔʼə ndzaŋ páʼ gho nə ńkə́ nə́ ńtúmə a mə á mə́m mbî lə́.

¹⁹Ńté atû azɔ́b maŋ fɛ̂ mbəəmə mə á mbô gho ńjî ńgə́ təmbɔʼ pó kə́ fɛ̂ əzoobə́ á mbô gho ndə̌ŋdəŋə́.

²⁰“Maŋ kě Əsê lə́ tsɔʼə á mbô pó chaʼtə̂ pô, maŋ kə́ ńchaʼtə́sê á mbô pɨ páʼ pó néŋ nə́ ntɨ́ nə́ maŋ ńdaŋ nə́ atséebə azóobə́.

²¹Maŋ chaʼtə́sê ńgə́ mbɔʼ pó pətsəm yǐ ḿbə́ táʼə. Tǎ! Ghɛd pó chîə á mə́m pɔ̌, tsɔʼə ndzaŋ páʼ gho chî nə́ á mə́m maŋə, maŋ kə́ ńchîə á mə́m gho lə́. Ghɛd pó pə́ táʼ ŋwu, ńjî ńgə́ mbî pí ńgə́ lə́ nə ńtú gho ńtúmə mə.

²²Maŋ nə fɛ̂ á nəgháʼə á mbô pó lə́ tsɔʼə yi páʼ gho nə fɛ̂ nə́ á mbô maŋ lə́, ńjî ńgə́ mbɔʼ pó pə́ táʼ ŋwu tsɔʼə ndzaŋ pɔ̌ pə́ nə́ táʼ ŋwu lə́.

²³Maŋə á mə́m pó, gho á mə́m maŋə, ńjî ńgə́ təmbɔʼ pó kwéʼnə ḿbə́ táʼ ŋwunə, ńjî ńgə́ mbî yǐ ńjî ńgə́ lə́ tú gho ńtúmə mə, ńkə́ ńkɔŋə̂ ághɔ́b tsɔʼə ndzaŋ páʼ gho kɔŋ nə́ mə lə́.

²⁴Tǎ! Gho fɛ̂ ághóobə́ á mbô maŋə, maŋ kə́ ńdoonə̂ ńgə́ pó chîə aliʼ páʼ maŋ chî nə́ ə́wə́, ńjî ńgə́ mbɔʼ pó zə́ənə á nəgháʼə mə, nəgháʼ páʼ gho nə fɛ̂ nə́ nə́ maŋ ńté ńgə́ gho nə ńkɔŋə̂ mə záʼ ḿbɔŋə̂ tsoŋkə̂ mbîə

²⁵Tǎ mə páʼ a tɨ́ nə́ ndə̌ŋdəŋə́! Mbî kě a gho jî pô, lə́ maŋ pə́ ńjîə gho, lə́ pó pə́ ńjî ńgə́ lə́ tú gho ńtúmə mə.

²⁶Maŋ nə ńgɛd pó jî əlɛ́n əghô, lə́ maŋ yǐ ghɛn nə́ mbi á mə́ ghɛd nə́ pó jîə gho ńjî ńgə́ akɔŋnə páʼ gho túg nə́ ńté mə, á kə́ ńchî nə́ pó, ńjî ńgə́ maŋ kə́ ńchî nə́ pó.”