Read Awing Jɔnə 18 Bible Online

Jɔnə 18 - Awing bible

Jɔnə 18

¹Əghâ ándó Yeso a nə məgtə̂ nə́ á mə́ chaʼtə̂ nə́ Əsê lə́ pópə ngaŋə́zoŋə́ndzəm əjí ghɛn ńtúmə á mɔ́ tə́chwáŋ nkǐ yitsə̌ páʼ pə́ nə̈ fóŋ nə́ ńgə́ Kidlɔnə. Nkáʼ məjî yitsə̌ nə ńchîə aliʼ yə wɨ́, Yeso pópə ngaŋə́zoŋə́ndzəm əjí tíʼ ńkwúnə á mə́m ə́wə́.

²Judasə ŋwu páʼ a nə fi nə́ Yeso lə́, a kə́ ńjî nkáʼ yi ə́wɨ́ ńté ńgə́ Yeso a zá ńjwánə ə́wɨ́ pópə ngaŋə́zoŋə́ndzəm əjíə.

³Judasə a tíʼ ńgɛnə̂ á mə́m nkáʼ məjî wə̂ pópə ənɔ ngaŋə́maʼə́ntso, ḿbá pɨ pó nə ḿbyáb nə́ tə́kɔʼndɛ̂sê á Jɛlusalɛmə. Pɨ pɨ lə́ nə ńtú pətə́kɔʼ pə́ ngaŋə́pêsê pópə mətû mə́ Pəfalasi, pó nə ńtúg əpú ntsoolə, ḿbá pəlam pópə pətɔsəlamə.

⁴Lə́ Yeso a pə́ ńjîə anu atsəm páʼ a chî nə́ á mə́ laŋ nə́ a mbɨ yə́, ńtíʼ ə́fɛ́d ńgyǐəə á mbi ə́sóŋə á mbô pó ńgə́, “Nə́ náŋə lə́ wə́?”

⁵Pó kwěe a yí ńgə́, “Yeso mɔ́ Nazalɛlə.” Yeso a sóŋə á mbô pó ńgə́, “Maŋ lə́ yə́.” Judas ŋwu páʼ a nə fi nə́ Yeso lə́, a nə ńtɨ́ pó po.

⁶Əghâ ándó Yeso a nə sóŋ nə́ á mbô pó ńgə́, “Maŋ lə́ yí lə́,” pó pɨ nə́ ndzəm ńgwukə̂ á ndəsê.

⁷Yeso a pɨ ńkə́ ḿbítə ághɔ́b ńgə́, “Lə́ əwə ŋwu páʼ pɨ náŋ nə́?” Pó kwěe yí ńgə́, “Yeso mɔ́ Nazalɛlə.”

⁸Yeso a kwěe ághɔ́b ńgə́, “Maŋ pɛ́dtə fiʼtə̂ áwɨ́ ńgə́ maŋ lə́ yə́.” Lə́ələ́ á pə́ ńgə́ təmbɔʼ pɨ tə́ náŋə lə́ mə, nə́ ghɛd pɨ pɨ pó ghɛnə̂.

⁹A nə sóŋə anu zɨ lə́ ńjî ńgə́ anu páʼ a nə ḿbɛ́d nə́ tə ə́sóŋə á yǐ ḿbə́ ndə̌ŋdəŋ ńgə́, “Tǎ! maŋ kě tsɔʼə táʼ ŋwunə á mə́m pɨ pə̂ gho nə fɛ̂ nə́ nə́ maŋ lə́ péŋkə pô.”

¹⁰Saamun Pita a nə ńtúg ŋwíŋ ntsoolə, ə́sɔŋə̂ zə́ələ́ á mə́m ngwâ yí, ńtíʼ ńdɔgə̂ zɨ́d ńdə́g nətôglə nə́ apoʼə Mbêsê yi Ngweŋ zə́, yi nə́ təənə. Əlɛ́nə apoʼ yi wɨ́ nə ḿbə́ lə́ Malikus.

¹¹Yeso a sóŋə á mbô Pita ńgə́, “Néŋ ŋwíŋ ntso əzo á mə́m ngwâ yə́! Gho kwaŋ ńgə́ maŋ kě yǐ nô ndɔ́ŋ ngə́ʼ páʼ Tǎ mə a fɛ̂ nə́ á mbô maŋ?”

¹²Akwɛlə ngaŋə́maʼə́ntso ḿbá nətû zɔ́b ḿbɨ́ ḿbə́ nə́ pɨ pó nə̈ ḿbyáb nə́ Tə́kɔʼndɛ̂sê waamə̂ Yeso ńtíʼ ńkwúlə yə́.

¹³Pó peg ńdɔgə̂ a yí ńgɛnə̂ á mbi Anasə, ńté ńgə́ a nə ḿbə́ lə́ nchǐ Kaifasə, páʼ a nə ḿbə́ nə́ Mbêsê yi Ngweŋ á ngoʼ wɨ́d wə̂.

¹⁴Lə́ nə ḿbə́ Kaifas páʼ a nə tə́gtə nə́ Pəjus ńgə́ a pɔŋ ńgə́ táʼ ŋwunə a kwû ńté atûə ŋwu ntsəmə.

¹⁵Saamun Pita pó táʼ ndzoŋdzəm Yeso yitsə̌, pó tíʼə ńdzoŋə̂ ághɔ́b ńgɛnə̂ aliʼ páʼ pó nə ńdɔg nə Yeso ńgɛnə̂ ə́wɨ́ lə́. Mbêsê yi Ngweŋə́ a nə ḿbyádnə ńjîə yitsə̌ ndzoŋdzəm Yeso wə̂, a tíʼ ńgɛnə̂ atətá Mbêsê yi Ngweŋ pó Yeso,

¹⁶pita a tə́əmə á ntsǒndɛ̂ apeŋə́. Yitsə̌ táʼ ndzoŋdzəm Yeso páʼ Mbêsê yi Ngweŋə́ a nə ḿbyádnə nə́ ńjîə yí lə́, a tíʼ ə́fɛ́lə apeŋ ńtsáb pó mɔ̂ məngyě a nə ńtɨ́ nə́ á ntsǒnkáʼ ńtíʼ ńdɔgə̂ Pita ńkwú nə́ yə́.

¹⁷Mɔ̂ məngyě wə̂ a nə ńtɨ́ nə́ á ntsǒnkáʼ lə́ a sóŋə á mbô Pita ńgə́, “Gho kě lə́ táʼ ndzoŋdzəm ŋwu yǐ pô?” Pita a kwěe yí ńgə́, “Maŋ kě lə́ táʼ ŋwu əyǐ pô.”

¹⁸Əghâ yi ə́wɨ́ ngaŋə́faʼ Mbêsê yi Ngweŋ pópə pɨ pó nə ḿbyáb nə́ Tə́kɔʼndɛ̂sê lə́, ə́ nyagtə̂ móg ńtɨ́ ńdíblə ńtə́ ńdzɔ́gə, ńté ńgə́ əfə́g nə ńchîə apeŋə́. Pita a nə ńchî pó po ńkə́ ńtɨ́ ńtə́ ńdzɔ́gə ajíə.

¹⁹Mbêsê yi Ngweŋə́ a tíʼ ḿbítə Yeso nə́ əpítə ətsáb ńté ngaŋə́zoŋə́ndzəm əjí pópə ndzeʼkə́ əjǐə.

²⁰Yeso a kwěe yí ńgə́, “Maŋ pɛ́dtə ńtséebə á əshîsaŋ á mbô mbîə, maŋ nə ńdzá ńdzéʼkə á mə́m məláʼ mə́ Əsê mə́ Pəjus pópə Tə́kɔʼndɛ̂sê, aliʼ páʼ Pəjus tsɔʼə pətsəm pó yǐ nə́ ńkyeetə̂ ə́wə́, maŋ kě anu yətsə́ á nəlyaŋnə́ kə́ sóŋə pô.

²¹Lə́ ńté anu akə̂ páʼ gho pítə nə́ mə nə́ əpítə ətsáb pəənə? Pítə pɨ páʼ pó pɛ́d nə́ tə ńdzóʼə atséebə mə, anu páʼ maŋ nə sóŋ nə́ á mbô pó, pó jîə zə́ələ́.”

²²Əghâ ándó a nə sóŋ nə́ anu zɨ lɛ̌ lə́, táʼ ŋwunə á mə́m ngaŋə́pyáabə tə́kɔʼndɛ̂sê a nə ńtɨ́ nə́ aliʼ yi ə́wə́ a ləbə̂ Yeso nə́ apô ají ńtíʼə ḿbítə yí ńgə́, “Lɛ̌ ndzaŋ páʼ gho kwěe nə́ a Mbêsê yi Ngweŋ?”

²³Yeso a kwěe yí ńgə́, “Təmbɔʼ maŋ pěʼ ńtsáb təpɔŋ á mbô yí, gho fiʼtə̂ á ŋwu ntsəmə aliʼə́ nə́ nə́ anuə təpɔŋ páʼ maŋ sóŋ nə́, maŋ pə́ ńtsáb lə́ anuə á koʼnə̂ nə́, tə ḿbə́ gho pɨ ńdəbə̂ mə lə́ ńté akə̂?”

²⁴Anasə a tíʼ ńtúmə Yeso páʼ pə́ pɛ́d nə́ ńkwúd mbô mí nə́ məŋkɛlə́ á mbô Kaifasə a nə ḿbə́ nə́ Mbêsê yi Ngweŋ lə́.

²⁵Əghâ yi ə́wɨ́ Saamun Pita a tɨ́ ńtə́ ńdzɔ́gə mógə́, pə́ pítə yí ńgə́, “Gho kě lə́ táʼ ndzoŋ ndzəm ŋwu wə̂ yitsə̌ pô?” A kǐə yí ə́sóŋ ńgə́, “Maŋ kě lə́ táʼ pô.”

²⁶Táʼ ngaŋəfaʼ Mbêsê yi Ngweŋ yitsə̌ ḿbə́ ndim ŋwu páʼ Pita a nə ńdə́g nə nətôglə jí lə́, a pítə Pita ńgə́, “Maŋ pěʼ ńkě áwɨ́ ŋwu nə́ á mə́m nkáʼ Olif zɨ́?”

²⁷Ngǎ yitsə̌ Pita a pɨ ńkə́ ńkǐə, əghâ yi wɨ́ aŋkəʼə́ á tɔ́ŋə.

²⁸Pəjus pó tíʼ ńdɔgə̂ Yeso á ndɛ̂ Kaifas ńgɛn nə́ yə́ á ntɔ́ʼ Gɔbnɔ Pəloman. Lə́ nə ḿbə́ chigə mɛ́ məsânə. Pó nə ńkě ághóobə́ á ntɔ́ʼ kwú pô, ńté ńgə́ pó nə ńkě kɔŋə̂ á mə́ tadkə̂ nə mbɨ əzɔb pô. Ńté ńgə́ pó nə ńtə́ ńdoonə̂ á mə́ jî nə́ məjî mə́ Ndzáʼkə.

²⁹Payilɛlə a tíʼ ə́fɛ́lə á ntɔ́ʼ ńtéekə ághóobə́ apeŋə́, ḿbítə ńgə́, “Nə sóŋ ńgə́ ŋwu nə́ a wǔ lə́ akə̂ anu lóo?”

³⁰Pó kwěe a yí ńgə́, “Təmbɔʼ a pěʼ ńchîə anuə təpɔŋ yitsə̌ ghɛd pô, tə ḿbə́ pəg pěʼ ńkě nə́ yə́ á mbô gho yǐ pô.”

³¹Payilɛlə a sóŋə á mbô pó ńgə́, “Lɔg nə́ yə́ á ngǎ pɨ sáʼ əsáʼ əyí ńdzoŋ pəpɨ́ pənoŋkə.” Pəjus pó kwěe a yí ńgə́, “Pəg kě mətɨ túg təmbɔʼ pəg sáʼ əsáʼ ŋwu ńjwítə yí pô.”

³²Zəənə́ á nə ńdɔgə̂ aliʼ lə́ á mə́ lwɛ́nkə nə́ anu Yeso a nə sóŋ nə́ ńté ndzaŋ mbô nəwû páʼ a yǐ nə́ kwûə.

³³Payilɛlə a sɛdnə̂ ńkwúnə á mə́m ntɔ́ʼ ńtíʼ ə́fóŋə Yeso ḿbítə ńgə́ “Gho lə́ əfo Pəjus?”

³⁴Yeso a kwěe yí ńgə́, “Lə́ azô akwaŋə á zə̂ ńté mə kɨ gho zóʼ lə́ á mbô pɨ pipə́ ndaʼə?”

³⁵Payilɛlə a kwěe ńgə́, “Maŋ pɛn ḿbə́ lə́ ŋwu Pəjusə?” Lə́ fɛ̂ pɨ pô, pópə pətə́kɔʼ pə́ ngaŋə́pêsê ə́fɛ̂ gho á mbô maŋə. Gho lánə ńgɛd lə́ lɛ̌?

³⁶Yeso a sóŋ ńgə́, “Nəfoonə mə lə́ kě yi nə́ mbî zɨ pô, təmbɔʼ nə́ pěʼ ḿbə́ lə́ yi nə́ mbî zɨ, tə ḿbə́ ngaŋə́faʼə mə pěʼ ḿbóʼnə ńgə́ kɔ pə́ waamə̂ mə. Lə́ nə́ pə́ əghâ nə́ nəfoonə mə nə́ kě lə́ á mbîə nə́ lǒo pô.”

³⁷Payilɛlə a sóŋ ńgə́, “Lə́ pə́ ńgə́ gho lə́ əfo?” Yeso a kwěe yí ńgə́, “Gho koʼnə̂ á mə́ sóŋ nə́ ńgə́ maŋ lə́ əfo. Pə́ nə ḿbîə mə ńté lə́ anu zɨ́d zəənə́, maŋ kə́ ńgyǐəə á mbî ńté lə́ anu yə ə́wə́, á mə́ fiʼtə̂ nə́ ndə̌ŋdəŋə́. Ŋwu ntsəmə a chî nə́ á mə́m ndə̌ŋdəŋə́ ä jwə́ʼtə á mbô maŋə.”

³⁸Payilɛlə pítə a yí ńgə́, “Ndə̌ŋdəŋ lə́ akə̂?” Əghâ ándó a pítə nə́ zɨ lə́ ə́fɛ́d ńgɛnə̂ á mbô Pəjus sóŋ nə́ pó ńgə́, “Maŋ kě awǔənu yitsə̌ nə́ yí zɨ́ pô,

³⁹lə́ nə́ pə́ ńtúgə noŋkə ńgə́ təmbɔʼ á pə́ nə́ ndɛd Akɔŋtə Ndzáʼkə maŋ fógə táʼ ngaŋətsáŋ ḿmɛdtə̂. Nə́ kɔŋ ńgə́ maŋ mɛdtə̂ a əfo Pəjus ghɛn?”

⁴⁰Pó yɛ́ɛlə ńgə́, “Ngá, lə́ kě ŋwu nə́ pô, fɛ̂ pə́ Balabasə!” Lə́ Balabasə a nə ḿbə́ ḿbə́ lə́ túʼ ndzə̌lə.