Read Awing Jɔnə 19 Bible Online

Jɔnə 19 - Awing bible

Jɔnə 19

¹Payilɛlə a tíʼ ńdɔgə̂ Yeso fɛ̂ yí pə́ shúmə.

²Ngaŋə́maʼə́ntso tíʼ ḿbáʼ nkɛd kɨ́koobə́ ándó lɛ pəfo lə́ ńgwê atû yə́, pó tíʼ ḿmaʼə̂ paŋpaŋə apagə atsəʼə́ a mbɨ yə́,

³ńtíʼə ńgyǐəə a mbi yí ə́sóŋə ńgə́, “Sə̂ə, Əfo Pəjus!” Ńkə́ ńdəbə̂ a yí nə́ mbô móobə́.

⁴Payilɛlə a kɨ ḿbɨ ə́fɛ́lə apeŋ ə́sóŋə á mbô pó ńgə́, “Jɨ́ nə́, mäŋ fɛ́lə nə́ yə́ apeŋ á mə́ fɛ̂ nə́ á mbô pɨ lə́ ńgə́ nə́ jî ńgə́ maŋ kě awǔənuə ají jɨ́ pô.”

⁵Lə́ Yeso a tíʼ fɛ́lə apeŋ, ńgwê lɛ páʼ pə́ nə ḿbáʼ nə́ nə́ kɨ́kɔb á chîə ándó lɛ pəfo lə́ atû yí pó paŋpaŋ apagə atsəʼ wə́. Payilɛlə a tíʼ sóŋə á mbô pó ńgə́, “Náŋ nə́, ŋwu wə̂ a ghɛnə̂!”

⁶Əghâ ándó pətə́kɔʼ pə́ ngaŋə́pêsê pópə ngaŋə́pyáabə á tə́kɔʼndɛ̂sê nə ńdzɨ́ nə́ a yí lə́, ńtíʼ ńtsáb nə́ pətə́kɔʼ pə́ ngye ə́sóŋ ńgə́, “Kwumtə̂ yə́! Kwumtə̂ yə́!” Payilɛlə a sóŋə á mbô pó ńgə́, “Lɔg nə́ yí ńkwumtə̂ yí tsɔʼə á ngǎ pəənə́, ńté ńgə́ maŋ kě zə́ənə awǔənuə ají pô.”

⁷Pəjus pó kwěe a yí ńgə́, “Pəg túgə á noŋkə, lə́ ńdzoŋə̂ á noŋkə yi ə́wɨ́ a chîə mə́ kwû nə́, ńté ńgə́ a sóŋ ńgə́ yí lə́ Mɔ́ Əsê.”

⁸Ndzaŋə ándó Payilɛlə a nə ńdzóʼ nə́ ətsáb pɨ lə́, ḿbɨ ḿbyádnə ḿbɔ́gə.

⁹A pɨ ńkwú ńgɛnə̂ á mə́m ntɔ́ʼ ngǎ yitsə̌ ḿbítə a Yeso ńgə́, “Gho fɛ́d lə́ ə́fó?” Lə́ Yeso a nə ńkě akwe yə ndaʼ fɛ̂ pô.

¹⁰Payilɛlə a tíʼ sóŋə á mbô yí ńgə́, “Gho kě yǐ tséebə á mbô maŋ? Gho kě jî ńgə́ maŋ túg mətɨ təmbɔʼ maŋ mɛdtə̂ gho, ńkə́ ńtúg mətɨ təmbɔʼ maŋ kwumtə̂ gho?”

¹¹Yeso a kwěe a yí ńgə́, “Gho kě mətɨ mətsə́ á ndu maŋ túg pô tə ńdéʼtə lə́ fɛ̂ Əsê ə́fɛ̂ mə́ələ́ á mbô gho. Lə́ pə́ ńgə́ ŋwu páʼ a fɛ̂ nə́ mə á mbô gho a túgə tə́kɔʼ təpɔŋə.”

¹²Ndzaŋə ándó Payilɛlə a nə ńdzóʼ nə́ atsáb jɨ lə́, ńdɔ ndú ətsəmə á mə́ mɛdtə̂ nə́ a Yeso. Lə́ Pəjus pó tsáb nə́ pətə́kɔʼ pə́ ngye ə́sóŋ ńgə́, “Təmbɔʼ gho mɛdtə̂ a ŋwu nə́ a ghɛn tə ḿbə́ gho kě lə́ ngaŋəko Kasa pô. Ŋwu ntsəm páʼ a sóŋ nə́ ńgə́ yí lə́ əfo, a kě lə́ ngaŋəko Kasa pô.”

¹³Ndzaŋə ándó Payilɛlə a nə ńdzóʼ nə́ ətsáb pɨ lə́, ńtíʼ ńdɔgə̂ a Yeso fɛ́d nə́ yí, ńtíʼ ńnáanə á ndumə aləŋə́ asáʼə́məsáʼ ají aliʼ páʼ pə́ nə ḿbɔ́ nə́ nə́ ngɔʼ pə́ fóŋə nə́ Azéenə, páʼ pə́ fóŋ nə́ nə́ atséebə Iblu ńgə́ Gabata.

¹⁴Lə́ nə ḿbə́ alě Atyáŋtə́púmə Akɔŋtə Ndzáʼkə, ándó ntɨ̌mə́numə. Payilɛlə a sóŋə á mbô Pəjusə ńgə́, “Zɨ́ nə, lɛ̌ əfo əwəənə́!”

¹⁵Pó tsáb nə́ pətə́kɔʼ pə́ ngye ə́sóŋ ńgə́, “Jwítə nə́ yə́! Jwítə nə́ yə́! Kwumtə̂ nə́ yə́ atǐə apagləpaglə.” Payilɛlə a pítə ághɔ́b ńgə́, “Nə́ loonə̂ ńgə́ maŋ kwumtə̂ a əfo əwɨ?” Pətə́kɔʼ pə́ ngaŋə́pêsê pó kwěe ńgə́, “Pəg kě əfo yitsə̌ túg tə ńdéʼtə Kasa pô.”

¹⁶Payilɛlə a tíʼ fɛ̂ yə́ á mbô pó ńgə́ pó ghɛn ńkwumtə̂ yə́. Ngaŋə́maʼə́ntso tíʼ ńdɔgə̂ a Yeso fɛ́d nə́ yə́.

¹⁷Pə́ fɛ́d nə́ yə́ apeŋ páʼ a pěʼ nə́ atǐə apagləpaglə ajíə, ńgɛn ńkwúnə aliʼ pə́ fóŋ nə́ ńgə́ Akəghə́ʼlə́ atû, (páʼ pə́ fóŋ nə́ nə́ atséebə Iblu ńgə́ Gɔlgɔta).

¹⁸Á aliʼ yi ə́wɨ́ pó kwumtə̂ yə́, pó nə ńkwumtə̂ yí lə́ pópə pətsə́ pɨ pɛ́n pɛ̌ á nəpɛnə́ yə́. Táʼə á əlá apô yə kwaabə, táʼə á əlá apô yə təənə, nə́ Yeso tətɨ pó.

¹⁹Payilɛlə a kə́ ńtíʼ ŋ́ŋwaʼlə̂ aŋwaʼlə ḿbanə̂ atǐə apagləpaglə Yeso, páʼ aŋwaʼlə yə ə́wə́ á sóŋ nə́ lə́ ńgə́, “Yeso Mɔ́ Nazalɛd, Əfo Pəjusə.”

²⁰Pəjus pi nɨ́ nə́ pó nə fóŋə aŋwaʼlə zəənə́, ńté ńgə́ aliʼ pə́ nə ńkwumtə̂ nə́ Yeso wə́ a nə ńchî ḿbáatə a tɔ́ŋə, pə́ nə ńkə́ ŋwaʼlə̂ aŋwaʼlə zɨ lə́ nə́ atséebə Iblu, Pó yə́ Latin nə́ yə Glikə.

²¹Pətə́kɔʼ pə́ ngaŋə́pêsê pə́ Pəjus pó sóŋə á mbô Payilɛd ńgə́, “Kɔ gho ŋwaʼlə̂ pə́ ńgə́ ‘Əfo Pəjus, ŋwaʼlə̂ pə́ ńgə́ ŋwu nə́ a sóŋ ńgə́, Yí lə́ Əfo Pəjusə.’ ”

²²Payilɛlə a kwěe ńgə́, “Anu páʼ maŋ ŋwaʼlə̂ nə́, lə́ zɨ́d maŋ ŋwaʼlə̂ nə́.”

²³Əghâ ándó ngaŋə́maʼə́ntso nə ńkwumtə̂ nə́ Yeso lə́, ńgabtə̂ ətsəʼ pí nə́ əpag pɛn nəkwa, ngaŋə́maʼə́ntso ətsəm pó lɔgə̂ táʼ táʼə apagə. Pó nə ńkə́ ńdɔgə̂ tə́sɛ atsəʼ əyǐ páʼ wə́ələ́ a nə fɛ́d nə́ nətsɛ̂ ńtsó ńkwúnə á nətɛ́n təghə́ pə́ sɛɛlə̂ aliʼ yətsə̌ ə́wə́.

²⁴Pó tíʼ sóŋə tətɨ pó ńgə́, “Kɔ pɛn sɛɛlə̂ áwə́ələ́, pɛn tə́m pilə́ á ndu ə́wɨ́ ńdzə́ənə a ŋwu páʼ a yǐ nə lɔgə̂ zə́ələ́.” Zəənə́ á nə ńdɔgə̂ aliʼ lə́ á mə́ lwɛ́nkə nə́ anu páʼ aŋwaʼlə Əsê a nə sóŋ nə́ ńgə́, “Pó nə ńgabtə̂ ətsəʼə́ mə á tətɨ pó, ńtíʼ ńdɔgə̂ tə́sɛ atsəʼə́ mə ńtə́m pid ə́wə́.” Lɛ̌ anu ngaŋə́maʼə́ntso nə ńtíʼ nə́ ńgɛlə̂.

²⁵Pɨ pó nə ńtɨ́ nə́ ḿbáatə atǐə apagləpaglə a Yeso, lə́ nə ḿbə́ Mǎ əyǐə, nə́ mɔ́mɛ́ mǎ əyǐ yǐ məngyě, nə́ Mɛɛlə ngwě Klusfas ḿbéenə Mɛɛlə Madalɛnə.

²⁶Əghâ ándó Yeso a nə ńdzɨ́ nə́ a mǎ əyǐ, pó táʼ ndzoŋdzəm əyǐ páʼ a nə ńdánə ńkɔŋə̂, pó tɨ́ ḿbáatə yí lə́, a tíʼ ə́sóŋ nə́ mǎ əyǐ ńgə́, “Mǎ, lə́ mɔ́ əgho a wə̂,”

²⁷Yeso a tíʼ ə́sóŋə á mbô táʼ ndzoŋdzəm əyǐ wə̂ ńgə́, “Lə́ mǎ əgho a wə̂” Ə́fɛ́d nə ndɛd zɨ́d zə̂ táʼ ndzoŋdzəm Yeso wə̂ a tíʼ ńdɔgə̂ mǎpə Yeso ńgɛn nə́ yí pó yí tíʼə ńchîə.

²⁸Yeso a jî ńgə́ nə́ pə́ əghâ nə́ lə́, anuə atsəmə á měe, á mə́ tíʼ nə́ ghɛlə̂ anuə atsəm pə́ ŋwaʼlə̂ nə́ á mə́mə aŋwaʼlə Əsê á pə́ ndə̌ŋdəŋ, Yeso a sóŋ ńgə́, “Nji nkǐ tə́ ńdzáŋə mə.”

²⁹Ambáŋə́ á nə́ ńtə́əmə aliʼ yə ə́wə́ ńdwɛ́nkə nə məloʼ mimə́ tsə́g nə́, pó tíʼ ńchibə̂ á kwunchá á mə́m məloʼ mimə́ ə́wə́, ńtóŋ nə́ akəmə akəkaʼ ńkɔ́ʼkə ńnéŋə á ntso Yeso.

³⁰Əghâ ándó Yeso a nə ńjwə́ʼ nə́ məloʼ mimə tsə́g nə́ mə́ lə́, ńtíʼ sóŋ ńgə́, “A měe!” Ńtíʼ ńtsəŋkə̂ atûə ají, ńkwûə yə́.

³¹Əghâ yí ə́wɨ́ Pəjus pətsə́ pó yǐəə á mbô Payilɛlə, mboʼ mbô nə́ yí ńgə́ a mɛdtə̂ pó ghɛn ḿbə́ʼtə məko mə pɨ pə̂, pə́ pěʼ nə ńkwumtə̂ ághɔ́b lə́ ńjî ńgə́ pə́ tsóokə əkwû póobə́ atǐə apagləpaglə. Pó nə ḿbítə əkwû pɔ́b lə́ ńté ńgə́ lə́ nə ḿbə́ alě Atyáŋtə́pú mbî fóg ḿbə́ Alěláʼə́sê. Pó nə ńkě kɔŋ ńgə́ əkwû pi wɨ́ ə́ pɛ́lə atǐə apagləpaglə á Alěláʼsê pô, ńté ńgə́ Alěláʼə́sê yi wə́ a nə ḿbə́ lə́ chigə tə́kɔʼ alěmbîə.

³²Ngaŋə́maʼə́ntso tíʼ ńgyǐ ḿbə́ʼtə məko mə́ ntsɛɛmbi ŋwunə, ńkə́ ḿbɨ ḿbə́ʼtə mimə́ yitsə̌ ŋwu pə́ kə kwumtə̂ ághɔ́b pə Yeso lə́.

³³Lə́ əghâ pó nə ńkoʼ nə nə́ Yeso lə́, ńdzɨ́ ńgə́ a pɛ́dtə ńkwû, ńkě məko mí pə́ʼtə pô.

³⁴Lə́ táʼ mmaʼntso yitsə̌ a lɔg nəkɔŋ ə́sɔb əlá ngyéŋ Yeso wə̂, achǐə pó nkǐ tíʼ ńkóŋ fɛ́d wə̂.

³⁵(Ŋwu páʼ a nə ńdzɨ́ nə́ anu zəənə́ a lɔgə̂ aliʼ lə́, a kə tsáb ńté ázə́ələ́, ńjî ńgə́ təmbɔʼ nə́ kə́ ḿbímə. Anu páʼ a kə sóŋ nə́ lə́ ndə̌ŋdəŋə́, ńkə́ ńjî ńgə́ á tséebə lə́ ndə̌ŋdəŋə́.)

³⁶Anu zəənə́ á nə́ ńdɔgə̂ aliʼ lə́ á mə́ lwɛ́nkə nə́ anu aŋwaʼlə Əsê á sóŋ nə́ ńgə́, “Tsɔʼə táʼə akwəŋə́ ají yitsə̌ pə́ yǒ kě pə́ʼ pô.”

³⁷Yətsə̌ aliʼə́ aŋwaʼlə Əsê á kə́ ḿbɨ́ sóŋ ńgə́, “Pɨ pə́ yǒ zə́ənə yí páʼ pə́ kə sɔb nə́ lə́.”

³⁸Ndzaŋə ándó anu zəənə́ á nə ńdaŋ nə́ lə́, Jɔsɛfə a nə ḿbə́ nə́ ŋwu Alimatya, a nə ńkə́ ḿbə́ lə́ táʼ ndzoŋdzəm Yeso yitsə̌ a nəlyaŋnə́, ńté ńgə́ a nə ńtə́ ḿbɔ́gə Pəjusə. A yǐəə a mbi Payilɛd ḿbítə yí nə́ akwûə Yeso. Payilɛlə a fɛ̂ zə́ələ́ á mbô yə́, a tíʼ ńdɔgə̂ zɨ́d ńgɛn nə́ zə́ələ́.

³⁹Nikodemɔs páʼ a nə ḿbeg nə́ ńgɛnə̂ á mbô Yeso a nətúʼ lə́, a tíʼ ńdzoŋə̂ a Jɔsɛfə. A nə ńtə́ ńgɛnə̂ lə́ ńtúg məghɔ́d mə́ azagə́ páʼ pə́ nə ńgwɛd nə́ mɨ́d nə́ ajú tsə́ pə́ fóŋə nə́ mɛlə pó yətsə́ pə́ fóŋə nə́ aloyis, məghɔ́d mimə́ wɨ́ mə́ nə ńchî təmbɔʼ mə́ pə́ pəkilo məghə́m mɛ́n teelə́.

⁴⁰Mbyâŋnə zɨ zɛ́n pɛ̌ pó nə ńdɔgə̂ akwûə Yesö ńdə́mtə nə́ fufu apagə atsəʼ ńnéŋə mɨ́d wɨ̈ ńdzoŋə̂ noŋkə Pəjus ndzaŋ pó twə́ŋ nə́ a ŋwunə.

⁴¹Nkáʼ məjî yitsə̌ nə ńchîə aliʼ pə́ nə ńkwumtə̂ nə́ Yeso ə́wɨ́ lə́, ḿbáatə nkáʼ wə̂ nəse yi nətsə́ nə́ chî ə́wɨ́ páʼ pə́ nə ńkě nə́ ŋwu tsə̌ ə́wɨ́ kə́ twə́ŋə pô.

⁴²Ndzaŋə a kə pə́ nə́ alě, mbî yǐ nə́ fóg a pə́ alěláʼə́sê Pəjus lə́, nəse nə́ kə́ ńchî ḿbáatə lə́, pó tíʼ ńtwə́ŋə Yeso ə́wə́.