Read Awing Jɔnə 2 Bible Online

Jɔnə 2 - Awing bible

Jɔnə 2

¹Əlěmbî pɛ́n pɛ̌ ə́ laŋ, ndzɔʼə́ chîə Kana á mə́m Galiliə, mǎpə Yeso a chîə aliʼə́ ndzɔʼ yi ə́wə́,

²pə nə ńkə́ ńgwúnə a Yeso pópə ngaŋə́zoŋə́ndzəm əjí nə ndzɔʼə́ yi ə́wə́.

³Əghâ ándó məloʼ mə́ nə měe nə́ lə́, mǎpə Yeso a sóŋə á mbô yí ńgə́, “Pó kě məloʼ pɨ ńtúg pô.”

⁴Yeso tíʼ ə́sóŋə á mbô yí ńgə́, “Məngyě, gho kě chîə á mə́ sóŋ nə́ anu yətsə̌ á mbô maŋ pô, Ndɛlə mə kě kə́ koʼ pô.”

⁵Mǎpə Yeso a tíʼ ə́sóŋə á mbô pɨ pə́ nə̈ ńtád nə́ pəənə aliʼə́ ndzɔʼə́ yi ə́wɨ́ ńgə́, “Faʼ nə́ anu atsəm páʼ a sóŋ nə́ á mbô pəənə́.”

⁶Əghâ ə́wɨ́ mbáŋə́ atóʼə́nkǐ pɛ́n ntogə́ páʼ pə́ tsoŋkə̂ nə́ nə́ məngɔʼ tə́əmə aliʼ yə wɨ́, lə́ pɨ́d Pəjus pó lɔg nə́ nkǐə á mə́m pɨ́d ə́sog əpú ə́wɨ́ pópə məmbɨ mɔ́b, ńdzoŋə̂ noŋkə anǔəsê əghoobə́. Táʼ ambáŋə́ atsəmə á nə ńchîə á mə́ lɔg nə́ nkǐə ándó gallɔn məghə́m mɛ́n mbɛ̌ kɨ məghə́m mɛ́n teelə́ pɔŋə́ lwɛ́nkə.

⁷Yeso a sóŋə á mbô pó ńgə́, “Lwɛ́nkə nə́ mbáŋə́ pɨ nə́ nkǐə.” Pó néŋ nkǐ ə́wɨ́ tə ə́ kɔ́ʼ ńdɛɛlə̂ á ntso pɨ́d ətsəmə.

⁸A tíʼ ə́sóŋə á mbô pó ńgə́, “Əghâ nə́, tóʼ nə́ nkǐ ə́wə́ yitsə̌ ńgɛn ə́fɛ̂ á mbô nətû nə́ chî nə́ á ndzɔʼ pəənə́.” Pó tíʼ ńtóʼ ńgɛn fɛ̂ nə́ yə́.

⁹Ndzaŋə ándó nətû nə́ ndzɔʼə́ yi wɨ́ nə́ jwə́ʼ nə́ nkǐ ə́wə́ páʼ ə́ nə ḿbə́ nə́ əghâ nə́ sɛdnə̂ nə́ ńtíʼ məloʼ lə́, ḿbə́ ńkě jîə aliʼ páʼ mə́ lǒo nə́ ə́wɨ́ pô (lə́ pɨ pə̂ páʼ pó nə ńtád nə́ ndzɔʼə́ lə́ pó pə́ ńjîə), ndzaŋə a jwə́ʼ nə́ lə́ ə́fóŋə a tǎdndzɔʼə́ yi ə́wə́

¹⁰ńtíʼ ə́sóŋə á mbô yí ńgə́, “Pə́ pegə̂ ə́fɛ̂ lə́ məloʼ mimə əshîʼnə záʼə, əghâ ándó ŋwu ntsəmə a nô nə́ ńdzɛ́d, pə́ pɔŋə́ tíʼ fɛ̂ mimə shwəgtə̂ nə́ á ndzəmə. Lə́ ghɛlə̂ akə̂ gho lɔʼkə̂ məloʼ mimə əshîʼnə ḿbɔŋə́ tíʼə yǐəə nə́ mɨ́d əghâ nə́.”

¹¹Lɛ̌ nə ḿbə́ ntsɛɛmbi akyeʼə́nu páʼ Yeso a nə́ ńgɛd nə́ á Kana á mə́m Galiliə. Ńtíʼ ńnəələ̂ a nəgháʼ əyǐ, ngaŋə́zoŋə́ndzəm əjí tíʼ ńnéŋ məntɨ́ mɔ́b nə́ yə́.

¹²Ndzaŋə ándó zɨ́d zəənə́ a nə ńdaŋ nə́ lə́, Yeso nə́ mǎ əyǐ nə́ pɔ́pə́mɛ́ pí pi pə́ mbyâŋnə ḿbá ngaŋə́zoŋə́ndzəm əjí tsó ńgɛnə̂ á Kapanawum ńchî ə́wɨ́ nə́ pɔ́ pə́ əlěmbîə.

¹³Ndɛlə Akɔŋtə Ndzáʼkə Pəjusə á nə ńtə́ ḿbáatə, Yeso a tíʼ ńkɔ́ʼ ńgɛnə̂ Jɛlusalɛm.

¹⁴A nə ńkɔ́ʼ lə́ ńgɛn ńkwúnə Tə́kɔʼndɛ̂sê ńjɨ́ pɨ pó tə́ finə̂ məna, məmbéŋ mə́ ndzɛd pópə əlúʼə ḿbá ngaŋə́kwúblə́nkáb pó náanə á ndu təpɛlə pó, ńtə́ ńkwúblə nkáb əzoobə́.

¹⁵Yeso a ghɛn ńchwa məŋkɛd ńdɔg ńgɛd ngwan ə́wə́, ńtíʼ ńkəmə̂ ághɔ́b pətsəm, ḿbá məmbéŋ mə́ ndzɛd mə̂ nə́ məna mə̂, ńtíʼ ńkwɛd nkáb ngaŋə́kwúblə́nkáb zə̂, ə́sɛdkə̂ pətəpɛlə pɔ́b ńkə́bkə á Tə́kɔʼndɛ̂sê.

¹⁶Ə́sóŋə á mbô pɨ pó nə fi əlúʼə lə́ ńgə́, “Lɔg nə fɛ́d nə́ pə́ələ́, nə yǒ kě lɔg ndɛ̂ Tǎ mə ghɛlə̂ aliʼə́ məta ə́wɨ́ pô!”

¹⁷Ngaŋə́zoŋə́ndzəm Yeso kwúmtə anu páʼ á chî nə́ á mə́mə aŋwaʼlə Əsê ńgə́, “Maŋ lánə ńchígə́ ńkɔŋə̂ anuə ndɛ̂ əzo, a chîə á mə́m ntɨ́ maŋ ńkɛ́lə ə́wə́ ándó mógə́.”

¹⁸Pəjus pó tíʼ ə́sóŋə á mbô yí ńgə́, “Lə́ zə́ənə́ akyeʼə́nu təmbɔʼ gho ghɛd á mə́ nɨd nə́ ńgə́ gho koʼnə̂ təmbɔʼ gho ghɛd mənu məənə́?”

¹⁹Yeso á kwěe ághɔ́b ńgə́, “Shaʼtə̂ nə́ á Tə́kɔʼndɛ̂sê ghɛnə̂, maŋ pɨ ńkɔ́ʼkə nə́ əlěmbî pɛ́n teelə́.”

²⁰Pəjus pó tíʼ ə́sóŋ ńgə́, “Á lɔgə̂ áwə́g lə́ nə́ ngoʼ mbî məghə́m mɛ́n nəkwa nə́ ngoʼ ntogə́ á mə́ pɔ́ nə́ Tə́kɔʼndɛ̂sê ghɛnə́, gho pɛn sóŋ ńgə́ təmbɔʼ gho kɔ́ʼkə ázɨ́d nə́ əlěmbî pɛ́n teelə́?”

²¹Lə́ Tə́kɔʼndɛ̂sê Yeso a nə sóŋ nə́ lə́ nə́ ḿbə́ nkɔ̌ʼmbɨ əyə́.

²²Ndzaŋ páʼ a nə ḿbɛn ńjúmnə nəwû lə́, ngaŋə́zoŋə́ndzəm əjí tíʼ ńkwúmtə ńgə́ a nə sóŋə anu zɨ́d zəənə́. Pó tíʼ ḿbímə aŋwaʼlə Əsê pópə atséebə Yeso.

²³Əghâ ándó Yeso a nə ńchî nə́ Jɛlusalɛm alě Akɔŋtə Ndzáʼkə lə́, pɨ pi nɨ́ nə́ pó nə ḿbí ndzoŋ ndzəm əjí ńté əkyeʼmə́nu pi nɨ́ nə́ páʼ a nə ńgɛd nə́.

²⁴Lə́ Yeso a nə ńkě mbɨ əjǐ á mbô pó myaʼ pô, ńté ńgə́ a nə ńjî məntɨ́ mə́ ŋwu ntsəmə.

²⁵A nə ńkě kə́ ńdɔ ńgə́ ŋwu tsə̌ a yǐ ńtɨ́ ə́sóŋə anuə á mbô yí ńté yətsə̌ ŋwu pô, ńté ńgə́, yí nə́ nkɔ̌ʼmbɨ yí a nə ńjî məntɨ́ mə́ ŋwu ntsəmə.