Read Awing Jɔnə 21 Bible Online

Jɔnə 21 - Awing bible

Jɔnə 21

¹Ndzaŋə ándó mənu mɨ́d mɨ mə́ nə ńdaŋ nə́ lə́, Yeso a pɨ nɨd mbɨ əjǐə á mbô ngaŋə́zoŋə́ndzəm əjí yitsə̌ á nkaŋ Əfooghɨ Tibelyasə. Lɛ̌ ndzaŋ páʼ a nə nɨd nə́ lə́.

²Saamun Pita nə́ Tɔməsə páʼ pə́ nə (fóŋ nə́ yí nə́ mɔ́ nəfág) lə́ ḿbɨ ḿbə́ nə́ Natanyal páʼ a nə ńdǒo nə́ á Kana á mə́m Galili, ḿbá pɔ́ pə́ Zebedi, ḿbɨ ḿbə́ nə́ ngaŋə́zoŋə́ndzəm Yeso yitsə̌ pó pɛ́n pɛ̌ pó nə ńchî nə́ táʼə aliʼə́.

³Saamun Pita a sóŋə á mbô pó ńgə́, “Maŋ ghɛnə̂ akóolə́shûə.” Pó sóŋə á mbô yí ńgə́, “Pəg yǐ ghɛn pɛnə̂.” Pó fɛ́d ńtíʼ ńgɛn ńkwúnə á mə́m aŋkənúʼə́, lə́ á nətúʼ wɨ́d ə́wə́ pó kě ajûtsə́ kó pô.

⁴Ndzaŋ mbî kə tə́ nə́ ə́fógə lə́, Á mɛ́ məsânə alě wɨ́d wə̂, Yeso a tə́əmə á nkǎŋkǐə, lə́ ngaŋə́zoŋə́ndzəm əjí ə́ pə́ ńkě jî ńgə́ lə́ Yeso pô.

⁵Yeso a sóŋə á mbô pó ńgə́, “Póonə mə, pɨ kó əshû yitsə̌?” Pó kwěe ńgə́, “Ngá.”

⁶Yeso a sóŋə á mbô pó ńgə́, “Maʼ nə nkɛlə́ á əlá aŋkənúʼə́ yə təənə, pɨ yǐ zɨ́ əshûə.” Pó kə́ ńtíʼ ḿmaʼ nkɛd ndzaŋə ándó Yeso a pěʼ nə́ ə́sóŋ lə́, pó nə ńkě chî təmbɔʼ pó pɨ ə́soŋ nkɛd wə̂ ńnéŋə á mə́mə aŋkənúʼə́ pô, ńté ndɛn əshû páʼ ə́ nə ńkwú nə́ ə́wə́.

⁷Ndzoŋdzəm Yeso wə́ páʼ Yeso a nə ńkɔŋ nə́ yí lə́ a sóŋə á mbô Pita ńgə́, “Lə́ Mmaʼmbî!” Ndzaŋə ándó Saamun Pita a nə ńdzóʼ nə́ ńgə́ lə́ Mmaʼmbî lə́, ńtíʼ ngwě ətsəʼ əpíə, (ńté ńgə́ a nə ńtsɔ́ʼ ətsəʼ pí nə́ ndɛd páʼ a nə̈ faʼ nə́), ńkanə̂ á mə́m nkǐə.

⁸Lə́ ndzoŋdzəm Yeso yǐəə á mə́mə aŋkənúʼə́, ńtə́ soŋ nkɛd wə́ páʼ ə́ lwɛ́nkə nə́ nə́ əshûə, ńté ńgə́ pó nə ḿbáatə nkaŋ asəgə́, ándó pəmɛta táʼ nkɛlə́.

⁹Əghâ ándó pó nə fɛ́d nə́ á əsəg lə́, ńdzɨ́ móg ə́ tə́ ńkɛ́lə, əshû pó apá noŋnə̂ á ndu wə̂.

¹⁰Yeso a sóŋə á mbô ńgə́, “Yǐ nə́ nə́ əshû zə̂ yitsə̌ páʼ nə́ wam nə́ tsɔʼə əghâ nə́ lə́.”

¹¹Saamun Pita a tíʼ ńgɛn ńkwúnə á mə́mə aŋkənúʼ zə̂, ə́soŋ nkɛd wə̂ ńkɔ́ʼkə asəgə́, páʼ ə́ lwɛ́nkə nə́ nə́ pətə́kɔʼ pə́ əshûə, pətə́kɔʼ pə́ əshû pə́ nə ḿbə́ lə́ táʼ nkɛd nə́ məghə́m mɛ́n tâ nə́ ntáʼ teelə́. Əshû nə mbǎtə ńchî ə́wɨ́ nɨ́ lə́, nkɛd pə́ ńkě sɛɛnə̂ pô.

¹²Yeso a sóŋə á mbô pó ńgə́, “Yǐ nə́ ńjî məjî mə́ məsânə.” Lə́ ŋwu tsə̌ á mə́m pó a nə kě yí pítə ńgə́, “Gho lə́ əwə pô?” Ńté ńgə́ pó pətsəm nə́ ńjî ńgə́ lə́ Mmaʼmbîə.

¹³Yeso a yǐ ńdɔgə̂ apá zə̂ pópə əshû zə̂ ə́fɛ̂ á mbô pó.

¹⁴Lɛ̌ nə́ ḿbə́ ngǎ zɛ́n teelə́ páʼ Yeso a nɨd nə́ mbɨ əjǐə á mbô ngaŋə́zoŋə́ndzəm əjí ə́fɛ́lə ándó páʼ a nə ńjúmnə nə́ nəwûə.

¹⁵Əghâ ándó pó nə məgtə̂ nə́ á mə́ jî nə məjî lə́, Yeso a sóŋə á mbô Saamun Pita ńgə́, “Saamun mɔ́ Jɔn, gho kɔŋə̂ a mə ńtsɛ ndzaŋ pɨ pɨ pətsəm pó kɔŋ nə́ mə?” Saamun a kwěe ńgə́, “Lə́ ə́lə́ələ́ Mmaʼmbî, gho jî ńgə́ maŋ kɔŋə̂ gho.” Yeso a sóŋə á mbô yí ńgə́, “Zə́g məmbéŋ mə́ ndzɛlə mə.”

¹⁶Ngǎ yitsə̌ Yeso a sóŋə á mbô yí ńgə́, “Saamun mɔ́ Jɔn, gho kɔŋə̂ mə?” A kwěe yí ńgə́, “Lə́ ə́lə́ələ́ Mmaʼmbî, gho jî ńgə́ maŋ kɔŋə̂ gho.” Yeso a sóŋə á mbô yí ńgə́, “Lɔg ndɛd nə́ məmbéŋ mə́ ndzɛlə mə.”

¹⁷Yeso a kə́ ḿbɨ ḿbítə yí tə ńkoʼ ngǎ teelə́ ńgə́, “Saamun mɔ́ Jɔn, gho kɔŋə̂ mə?” Pita a nə ńtíʼ ńchîə á mə́mə afɨnə ńté ńgə́ a nə ḿbítə tə ńkoʼ ngǎ teelə́ ńgə́, “Gho kɔŋə̂ mə?” A tíʼ ə́sóŋə á mbô yí ńgə́, “Mmaʼmbî, gho jîə anuə atsəmə, gho jî ńgə́ maŋ kɔŋə̂ gho.” Yeso a sóŋə á mbô yí ńgə́, “Zə́g məmbéŋ mə́ ndzɛlə mə.”

¹⁸Maŋ sóŋə á mbô gho nə́ ndə̌ŋdəŋ ńgə́ əghâ gho nə ḿbɛ́d nə́ nkaŋŋwu lə́, gho nə̈ ńkwúlə atwíŋə azô ńgɛn ndú ətsəm páʼ gho kɔŋ nə́, lə́ nə́ ndɛd páʼ gho lɛn nə́, gho yǒ shǐ mbô mô ŋwu ndaʼə a kwúlə atwíŋə azô ńdɔgə̂ gho ńgɛnə̂ aliʼ páʼ gho pěʼ nə́ ńkě kɔŋ pô.

¹⁹(Yeso a nə sóŋə anu zɨ lə́, ə́fiʼtə̂ a yí lə́ nə́ ndú páʼ Pita a yǒ nə́ kwû ə́wə́, ə́ tíʼ yǐ nə́ nəgháʼə á mbô Əsê.) Yeso a tíʼ ə́sóŋə á mbô yí ńgə́, “Zoŋə̂ mə.”

²⁰Pita a sɛdnə̂ ńdzə́ənə ndzoŋdzəm Yeso wə̂ páʼ Yeso a nə ńkɔŋ nə́ lə́ a tə́ ńdzoŋə̂ á ndzəm pó, yi páʼ a nə ńdzə́ʼnə nə́ Yeso əghâ ándó pó nə ńtə́ nə́ ńjîə ndwegtə məjî pópə Yeso lə́, a pítə ńgə́, “Mmaʼmbî, ŋwu páʼ a yǐ nə́ finə̂ gho lə́ əwə?”

²¹Əghâ ándó Pita a nə ńdzɨ́ nə́ yí lə́ ḿbítə Yeso ńgə́, “Mmaʼmbî, ńgɛd ə́lɛ́ nə́ ghɛn ŋwunə?”

²²Yeso a kwěe yí ńgə́, “Mbɔʼ maŋ lɔ ńgə́ a chîə á mbî tə ńkoʼ ndɛd maŋ yǒ nə́ pɨ yǐ, a yǐ ḿbə́ akə̂ á mbô gho? Zoŋə̂ mə!”

²³Atsáb yi ə́wə́ á shamnə̂ á mə́m ətú ətsəmə á tətɨ nkyeetə pɔ́ pə Əsê ńgə́ ndzoŋdzəm Yeso wɨ́d wə̂ a yǒ kě kwû pô. Lə́ Yeso a nə ḿbə́ ńkě á mbô yí sóŋ lə́ ńgə́ a yǒ kě kwû pô, a kə sóŋ lə́ ńgə́, “təmbɔʼ maŋ lɔ ńgə́ a chîə á mbî tə ńkoʼ nə́ ndɛd maŋ yǐ nə́ pɨ yǐ, zɨ́d zə̂ a pə́ akə̂ anu á mbô gho?”

²⁴Lə́ yí ndzoŋdzəm Yeso wə́ páʼ a nə sóŋ nə́ mənu mɨ́d mə̂ mətsəm páʼ a nə ńdzɨ́ nə́, ńkə́ ŋ́ŋwaʼlə̂ á mɨ́d tsɔʼə mətsəmə. Pɛn kə́ ḿbɨ ńjî ńgə́ anuə atsəm páʼ a nə sóŋ nə́ lə́ ndə̌ŋdəŋə́.

²⁵Lə́ mətsɨ́ mənu mimə́ nɨ́ nə́ mə́ chî ə́wɨ́ páʼ Yeso a nə faʼ nə́. Təmbɔʼ pə́ nə ńtə́ ŋ́ŋwaʼlə̂ mə́ələ́ á ndəsê táʼ táʼ, tə ḿbə́ maŋ kwaŋ ńgə́ mbî ntsəm nə ńkě chî təmbɔʼ ə́ túg əŋwaʼlə páʼ pə́ yǐ nə́ ŋwaʼlə̂ ə́wɨ́ pô.