Read Awing Jɔnə 3 Bible Online

Jɔnə 3 - Awing bible

Jɔnə 3

¹Əghâ nə́ ŋwu Falasi yitsə̌ a nə ńchî ə́wɨ́ əlɛ́n yí pə́ Nikodemɔsə, lə́ nə ḿbə́ nətû nə́ Pəjusə.

²Ŋwu nə́ a nə ńgyǐəə á mbô Yeso á nətúʼ ńtíʼ ə́sóŋə á mbô yí ńgə́, “Ndzéʼkə, pəg jî ńgə́ gho lə́ ndzéʼkə páʼ Əsê a tú nə́. Ńté ńgə́ ŋwu tsə̌ a kě ə́wɨ́ chî təmbɔʼ a ghɛd əkyeʼmə́nu pɨ páʼ ghö ghɛd nə́ lɛ̌ pô, tə ńdéʼtə Əsê a chî pó yə́.”

³Yeso a kwěe yí ńgə́, “Maŋ fiʼtə̂ gho nə́ ndə̌ŋdəŋ ńgə́ təmbɔʼ ŋwunə a kě anuə Nəfoonə Əsê jɨ́ tə ńdéʼtə pə́ pɨ ḿbîə a yí ngǎ yitsə̌ pô.”

⁴Nikodemɔsə a sóŋə á mbô yí ńgə́, “Təmbɔʼ pə́ pɨ ḿbîə a ŋwu lə́ ə́lɛ́ páʼ a pɛ́d nə́ tə ńdɛnə̂? Təmbɔʼ a pɨ ḿbégnə ngǎ yitsə̌ ńkwúnə nəpəm mǎ əyǐ pə́ pɨ ḿbîə yí?”

⁵Yeso a kwěe yí ńgə́, “Maŋ fiʼtə̂ gho nə́ ndə̌ŋdəŋ ńgə́ tə ńdéʼtə pə pî a ŋwu nə́ nkǐ pó Ajwǐə, təmbɔʼ a kě á mə́m Anuə Nəfoonə Əsê kwú pô.

⁶Yí páʼ pə́ pî nə́ nə́ na mbɨ lə́ na mbəəmə, yí páʼ pə́ pî nə́ nə́ Ajwi lə́ ajwiə.

⁷Kɔ a kɨʼnə̂ a gho nə́ anu páʼ maŋ sóŋ nə́ á mbô pɨ ńgə́ pə́ shib ḿbîə gho ngǎ yitsə̌.

⁸Kəfəələ á kɔ́ʼə lə́ ndú páʼ á kɔŋ nə́, lə́ gho zóʼ ngye əjǐ, lə́ ḿbə́ ńkě ndú páʼ á lǒo nə́ ə́wɨ́ kɨ ndú páʼ á ghɛn nə́ ə́wɨ́ jî pô, á kə́ ḿbə́ lə́ tsɔʼə ə́lɨ́d nə́ ŋwu ntsəm páʼ pə́ pî nə́ yí nə́ Ajwǐə.”

⁹Nikodemɔsə a sóŋə á mbô yí ńgə́, “Təmbɔʼ ntê anu zɨ chî lə́ ə́lɛ́?”

¹⁰Yeso a kwěe yí ńgə́, “Gho lə́ ndzéʼkə pɔ́ pə́ Islɛlə, ḿbə́ ńkě anu zɨ́d zɨ jî?”

¹¹Maŋ fiʼtə̂ gho nə́ ndə̌ŋdəŋ ńgə́, “Pəg sóŋə lə́ anu pəg jî nə́, ńkə́ fiʼtə̂ lə́ anu páʼ pəg jɨ́ nə́, lə́ gho pə́ ńkě anu pəg sóŋ nə́ lə́ pí pô.

¹²Təmbɔʼ maŋ fiʼtə̂ a gho nə́ mənu mə́ ndu ndəsê nə́ pə́ ńchî pí pô, gho pə ńtíʼ ḿbí lə́ ə́lɛ́ páʼ mbɔʼ maŋ fiʼtə̂ áwɨ́ nə́ mənu mə́ nəpóolə?

¹³Ŋwu tsə̌ a kě nəpó kə kɔ́ʼə ghɛnə̂ pô, tə ńdéʼtə Mɔ́ Ŋwu páʼ a nə ńdǒ nə́ nəpó ńtsóolə.”

¹⁴Ndzaŋə ándó Mosisə a nə ŋ́ŋáŋkə nóolə á kɔŋ məŋkwâʼlə̌ lə́, lə́ ndzaŋ pə́ yǒ nə́ kə́ ə́shib ŋ́ŋáŋkə Mɔ́ Ŋwunə.

¹⁵Ńjî ńgə́ ŋwu ntsəm páʼ a pí nə́ yə́, a túg nchîntɨ páʼ ḿmɛdnə̂ ngǎ mɔʼə́.

¹⁶Ńté ńgə́ Əsê a nə ńkɔŋ mbî tə ə́fɛ̂ ndaʼ Mɔ́ əyǐ, ńgə́ ŋwu ntsəm páʼ a néŋ nə́ ntɨ́ nə́ yí a yǒ kě kwû pô lə́ pə́ túg nchîntɨ páʼ ḿmɛdnə̂ ngǎ mɔʼə́.

¹⁷Lə́ Əsê a nə ńkě túmə Mɔ́ əyǐ lə́ ńgə́ a yǐ néŋ əsáʼə á mbî pô, a nə ńtúmə a yí lə́ ńgə́ a yǐ ńchwádkə mbîə.

¹⁸Ŋwu páʼ a néŋ nə́ ntɨ́ nə́ yí, pə́ kě yə́ á mə́m əsáʼ yǐ néŋ pô, lə́ ŋwu páʼ a kě nə́ ntɨ́ néŋ pô a pɛ́d tə́ ńchîə á mə́m əsáʼ ńté ńgə́ a kě ntɨ́ əyí nə́ ndaʼ Mɔ́ Əsê néŋ pô

¹⁹Əsáʼ yi wɨ́ chî lə́ ńgə́, nkyaʼ ə́ yǐəə á mə́m mbî, ŋwu məsɔŋə́ á pə́ ńkɔŋ tsɔʼə ndzəmə́ ńtsɛ nkyaʼ ńté ńgə́ ngɛdmə́nu əyí lə́ yi təpɔŋə.

²⁰Ŋwu ntsəm páʼ ä ghɛd nə təpɔŋ a pa nkyaʼ ńkě kɔŋə̂ á mə́ yǐ nə́ á mə́m nkyaʼ pô ńté ńgə́ pə yǐ kyaʼə̂ təpɔŋ əyǐə.

²¹Lə́ ŋwu páʼ ä ghɛd nə́ mənu mə́ tɨ́ nə́ ndə̌ŋdəŋ a yǐəə á mə́m nkyaʼ ńgə́ mbɔʼ pə́ pyádnə ńjɨ́ ńgə́ mənu páʼ a ghɛd nə́, a ghɛlə̂ lə́ nə́ əlɛ́n Əsê.

²²Ndzaŋə ándó Yeso a nə ḿməgtə̂ nə lə́, pópə ngaŋə́zoŋə́ndzəm əjí ghɛnə̂ á mboʼ Judya, ńchî ə́wɨ́ pó po nə́ ndɛd yitsə̌ á fɛ̂ nkǐ nə́ pəənə.

²³Jɔnə a nə ńkə́ ńtə́ fɛ̂ nkǐə á Anonə, á chî nə́ ḿbáatə Salɛm lə́, ńté ńgə́ nkǐ nə ńchî ə́wɨ́ nə́ənə, pɨ pə́ tíʼə ńgyǐəə ńkwá nkǐə.

²⁴Nə́ ndɛd zɨ́d zə̂ Jɔnə a nə ńkě atsáŋ kə́ kwúnə pô.

²⁵Əghâ nə́, ngaŋə́zoŋə́ndzəm Jɔn pópə ŋwu Jusə yətsə̌ nə tə ńdzɔŋnə̂ ńté noŋkə Pəjusə páʼ á sóŋ nə̈ ńgə́ pə tə́ sogtə̂ mbəəmə.

²⁶Pó tíʼ ńgyǐəə á mbô Jɔn ə́sóŋ ńgə́, “Ndzéʼkə, ŋwu ə́wə́ páʼ pɨ yí nə ńchî nə́ á nkǐ Jodan á əlá əsáʼ mənu, páʼ gho nə sóŋ nə́ anu ńté yí lə́ a tə́ fɛ̂ nkǐə aliʼə́ nə́, ŋwu ntsəm a tíʼə ńgɛnə̂ á mbô yə́.”

²⁷Jɔnə á kwěe ńgə́, “Təmbɔʼ ŋwunə a kě ajûtsə́ kwá tə́ ghə́ á fɛ̂ Əsê nə́ yí páʼə á lǒo nə́ á nəpó pô.

²⁸Təmbɔʼ pɨ pətsəm nô ngoolə mə ńgə́ maŋ nə sóŋ ńgə́, maŋ kě lə́ Yi Ńtsəʼ nə́ wə́ pô, lə́ pə́ nə ńtúmə mə ńgə́ maŋ kwá mbi əjǐə.

²⁹Ŋwu páʼ a túg nə́ mɔ̂ məngyě lə́ tǎdndzɔʼə́, əshu tǎdndzɔʼə́ páʼ a tɨ́ nə́ nəpɛnə́ yí ńdzóʼə atséebə ají, a chígə́ ńkɔŋtə̂ á mə́ zóʼ nə́ ngye tǎdndzɔʼə́, lə́ələ́ pə ńgə́ akɔŋtə mə a lwɛ́nkə ntə́əmə mə əghâ nə́.

³⁰Ńté ńgə́ nəgháʼ əyǐ á yǐ shib ghɛn nə́ mbi, maŋ tə́ ńkə́gə ńgɛnə̂.”

³¹Ŋwu páʼ a lǒo nə nəpó ńtsóolə á tsɛɛlə̂ ŋwu ntsəmə. Ŋwu páʼ a pə nə́ ŋwu mbî a chî lə́ á ndu mbîə, ńkə̈ sóŋə lə́ mənu mə́ chî nə́ á ndu mbîə. Lə́ ŋwu páʼ a lǒo nə́ nəpó ńtsóolə a tsɛ pɨ pətsəmə.

³²Ä sóŋə lə́ mənu páʼ a jɨ́ nə́ ńkə́ ńdzóʼə, Lə́ ŋwu tsə̌ a pə ńkě atséebə ají pí pô.

³³Lə́ ŋwu páʼ a pí nə́ nkɨ yi ə́wə́, a pí ńgə́ Əsê atsáb ndə̌ŋdəŋə́.

³⁴Ńté ńgə́ ŋwu páʼ Əsê a tú nə́ yə́ a sóŋ lə́ atséebə Əsê, ńté ńgə́ Əsê a fɛ̂ Ajwiə ajíə á mbô yí tsɔʼə tə ŋɔʼtə̂.

³⁵Tǎ a kɔŋə̂ Mɔ́ əyǐə ńtíʼ ə́fɛ̂ ajúmə atsəm á mbô yə́.

³⁶Ŋwu páʼ a néŋ nə́ ntɨ́ nə́ Mɔ́ əyǐ, a túg nchîntɨ páʼ ə́ mɛdnə̂ nə́ ngǎ mɔʼə́, ŋwu páʼ a kě nə́ nə́ Mɔ́ əyǐ zóʼnə pô a yǒ kě mbî jî pô, atsáŋə Əsê á kə́ ńchîə mbɨ yə́.