Read Awing Jɔnə 4 Bible Online

Jɔnə 4 - Awing bible

Jɔnə 4

¹Əghâ ándó Mmaʼmbîə a nə ńjî nə́ ńgə́ Pəfalasi pó zóʼ ńgə́ pɨ pipə nɨ́ nə́ pó nə ńtə́ ndzoŋ ndzəm Yeso a kə́ fɛ̂ nkǐ á mbô pɨ pi nɨ́ nə́ tə ńtsɛɛlə̂ Jɔn lə̂.

²(Lə́ Yeso a nə ḿbə́ ńkě nkǐə á mbô ŋwu tsə̌ fɛ̂ pô, lə́ nə fɛ̂ ngaŋə́zoŋə́ndzəm əjíə.)

³A mɛdtə̂ mboʼ Judya mbɨ ḿbəənə̂ Galiliə.

⁴Ńchîə á mə́ laŋ nə́ á mboʼ Samalya,

⁵ńgyǐ ńkwúnə tɔ̂ŋ yitsə̌ á mboʼ Samalya pə́ fóŋə nə́ Sika, ḿbáatə á afoonə Jekɔb páʼ a nə fɛ̂ nə́ á mbô mɔ́ əyǐ Jɔsɛfə.

⁶Apɛ́lə nkǐ páʼ Jekɔbə a nə ńtóŋ nə́ á nə ńchîə aliʼ yi ə́wə́, Yeso a nə ńnyi tə ńkéenə, ńtíʼ ńnáanə á nəpɛnə́ nə apɛ́lə nkǐ yi ə́wɨ́ ńtə́ ńjwitə̂. Á nə́ ḿbə́ lə́ ándó ntɨ mə́numə.

⁷Məngyě Samalitan yitsə̌ a yǐəə á mə́ tóʼ nə́ nkǐə, Yeso a sóŋə á mbô yí ńgə́, “Fɛ̂ nkǐ maŋ nô.”

⁸(Əghâ wɨ́ lə́, ngaŋə́zoŋə́ndzəm əjí ə́ ghɛnə̂ á mə́m tɔ̂ŋə á mə́ jú nə́ məjîə).

⁹Məngyě Samalitan wə́ a sóŋə á mbô yí ńgə́, “Gho lə́ ŋwu Jus maŋ pə́ məngyě Samalitanə, lə́ ghɛlə̂ akə̂ gho pítə nkǐə á mbô maŋ?” (Ńté ńgə́ Pəjusə pópə Pəsamalitan ə́ kě jínə pô.)

¹⁰Yeso a kwěe yí ńgə́, “Gho lə́ pěʼ jî məfɛ̂nə mə́ Əsê, ə́ kə́ jîə ŋwu páʼ a sóŋ nə́ á mbô gho ńgə́, fɛ̂ nkǐ nə́ yə́ á nô tə ḿbə́ gho pěʼ ḿbítə a yə́ a fɛ̂ nkǐ páʼ ə́ fɛ̂ nə́ nchîmbîə á mbô gho.”

¹¹Məngyě wə̂ a sóŋə á mbô yí ńgə́, “Tǎ, gho kě nə́ ajú chî təmbɔʼ gho soŋ nkǐ ə́wɨ́ pô, apɛ́lə nkǐə á kə́ ə́shǐəə, gho yǐ lɔg nkǐ yi ə́wɨ́ páʼ ə́ fɛ̂ nə́ nchîmbî lə́ ə́fó?

¹²Gho tsɛɛlə̂ a Tǎ əwəg Jekɔb páʼ a nə fɛ̂ nə́ apɛ́lə nkǐ zəənə́ á mbô pəg, ńkə́ ńnô ajíə wɨ́d pópə pɔ́ pí nə məna mí?”

¹³Yeso a kwěe á mbô yí ńgə́, “Ŋwu ntsəm páʼ a nô nə́ nkǐ ghɛn, nji nkǐ ə́ yǐ pɨ záŋə yə́,

¹⁴lə́ ŋwu ntsəm páʼ a yǐ nə́ ńnô nkǐ páʼ maŋ yǐ nə́ fɛ̂ lə́, nji nkǐ ə́ láʼ kě yí pɨ záŋ pô, nkǐ páʼ maŋ yǒ nə́ fɛ̂ á mbô yí ə́ yǒ pə́ lə́ sáʼə́sê nkǐ páʼə ä fɛ̂ nə́ nchîmbî ńkə́ fɛ̂ nchîntɨ páʼ ə́ mɛdnə̂ nə́ ngǎ mɔʼə́ á mbô yə́.”

¹⁵Məngyě wə̂ a sóŋə á mbô yí ńgə́, “Tǎ, fɛ̂ nkǐ yí wə́ á mbô maŋ ńjî ńgə́ kɔ nji nkǐ ə́ yǒ ḿbɨ́ ńdzáŋə mə, kɔ maŋ kə́ ḿbɨ ńgyǐəə aliʼə́ nə́ atóʼə́nkǐə.

¹⁶Yeso a sóŋə á mbô yí ńgə́, Ghɛn ə́fóŋə a ndú əgho pɨ yí yǐəə.”

¹⁷Məngyě wə̂ a kwěe Yeso ńgə́, “Maŋ kě nə́ ndú chî pô.” Yeso a sóŋə á mbô yí ńgə́, “Gho sóŋə lə́ ndə̌ŋdəŋ ńgə́, ‘maŋ kě nə́ ndu chî pô’.

¹⁸Ńté ńgə́ gho nə ḿbɛ́d tə ńdzɔ́ʼ pəlú pɛ́n pə́ tênə, lə́ ŋwu mbyâŋnə pɨ yí chî nə əghâ nə́ lə́, lə́ kě ndú gho pô. Gho sóŋ lə́ ndə̌ŋdəŋə́.”

¹⁹Məngyě wə̂ a sóŋə á mbô yí ńgə́, “Tǎ, maŋ jɨ́ ńgə́ gho lə́ ntûsê.”

²⁰Pətǎ pə́ pətǎ pə́g á Samalya pó nə̈ ńgóʼkə Əsê lə́ á ndú nkwəənə ghɛnə̂, lə́ pɨ Pəjusə nə́ sóŋ ńgə́ Jɛlusalɛm lə́ aliʼ páʼ pɨ pə́ chî nə́ á mə́ ghóʼkə nə Əsê ə́wə́.

²¹Yeso a sóŋə á mbô yí ńgə́, “Məngyě, pímə anu páʼ mäŋ sóŋ nə́, ndɛd tə ńgyǐəə páʼ pə yǒ nə́ kě Tǎ a ndu nkwəənə ghɛn kəənə Jɛlusalɛm pɨ ghóʼkə pô.

²²Nə̈ ghóʼkə lə́ ŋwu páʼ nə́ kě nə jî pô, lə́ pəg pə̈ ńgóʼkə lə́ ŋwu pəg jî nə́, ńté ńgə́ mə chwádkə nə́ mə́ fɛ́d lə́ á mbô Pəjusə.

²³Lə́ ndɛd ə́ tə́ ńgyǐəə, ə́ pɛ́d tə ńgyǐəə, páʼ pɨ pó ghóʼkə nə́ Əsê nə́ ntɨ́ əghɔ́b ətsəm pó yǒ nə́ ghóʼkə Tǎ á mə́mə ajwi pópə ndə̌ŋdəŋə́, Lɛ̌ mbô pɨ páʼ Tǎ ä lɔ nə́ ńgə́ pó ghóʼkə yə́.

²⁴Əsê lə́ ajwǐə, pɨ pə̈ ghóʼkə nə́ a yí, pó shib ńgóʼkə a yə́ á mə́mə ajwi pópə ndə̌ŋdəŋə́.”

²⁵Məngyě wə̂ á sóŋə á mbô yí ńgə́, “Maŋ jî ńgə́ Yi Ńtsəʼ nə́ wə̂ a tə́ ńgyǐəə (yí páʼ pə̈ fóŋ nə́ nə́ Klisto lə́). Əghâ páʼ a yǒ nə́ yǐ a yǒ zéʼkə áwɛ́n nə́ mənu mətsəmə.”

²⁶Yeso a sóŋə á mbô yí ńgə́, “Maŋ páʼ mäŋ tsáb nə́ á mbô gho, lə́ Yi Ńtsəʼ nə́ yi ə́wə́.”

²⁷Ndzaŋə ándó Yeso a nə ńtə́ nə́ ḿbɛ́lə ńtséebə pó məngyě wə́ lə́ ngaŋə́zoŋə́ndzəm əjí páʼ pó nə ńgɛn nə́ á mə́ jú nə́ məjî lə́ pó pəənə̂. A kɨʼnə̂ ághɔ́b ndzaŋ pó nə́ ńjɨ́ nə́ Yeso a tə́ ńtséebə pó məngyě wə́, ŋwu tsə̌ á mə́m pó a pə́ ńkě anu yitsə̌ pítə ńgə́, Gho loonə̂ lə́ akə̂? kɨ “gho tséebə pɨ yí ńté lə́ ńgə́ akə̂?”

²⁸Əghâ wɨ́d wə̂ məngyě wə̂ a mɛdtə̂ ambáŋə́ nkǐə ají ńtíʼ ńgɛnə̂ á mə́m tɔ̂ŋ ə́sóŋə á mbô pɨ ńgə́,

²⁹“Yǐ nə́ ńdzə́ənə a ŋwu páʼ a fiʼtə̂ anuə atsəm páʼ maŋ nə ḿbɛ́d nə tə ńgɛlə̂ á mə́m nchîmbîə mə. Təmbɔʼ a pə́ lə́ Yi Ńtsəʼ nə́ wə̂?”

³⁰Pɨ pə̂ pó tíʼ fɛ́lə á tɔ̂ŋ ńchúʼə á mə́ ghɛn nə́ á mbô Yeso.

³¹Əghâ wɨ́d wə̂ ngaŋə́zoŋə́ndzəm əjí pó legtə̂ a yí ə́sóŋ ńgə́, “Ndzéʼkə jî məjîə.”

³²Lə́ Yeso a tíʼ ə́sóŋə á mbô pó ńgə́, “Maŋ túg məjîə á mə́ jî nə́ páʼ nə́ kě nə́ anu yətsə̌ ńté mɨ́d jî pô.”

³³Ngaŋə́zoŋə́ndzəm əjí tíʼ ḿbítə tətɨ pó ńgə́, “Təmbɔʼ ŋwu tsə̌ a pěʼ ńgyǐəə nə́ məjî ə́fɛ̂ á mbô yí?”

³⁴Yeso a kwěe ághɔ́b ńgə́, “Məjîə mə lə́ mə faʼ nə́ anuə ŋwu yi páʼ a tú nə́ mə́ á lɔ nə́, ə́ kə́ məgə̂ afaʼ páʼ a fɛ̂ nə́ nə́ maŋ.

³⁵Pɨ túgə atséebə́nə́múʼ yitsə̌ páʼ á sóŋ nə́ ńgə́, Nə́ sáŋ nəkwa pə́ yǐ foʼ məjîə, Maŋ fiʼtə̂ wɨ́ ńgə́ nə́ chígə́ ńnáŋ əliʼ páʼ ə́ páatə nə́ áwə́ənə́, nə yǐ jɨ́ ńgə́ məjî mə́ koʼə̂ á mə́ foʼ nə́.

³⁶Ŋwu páʼ a tə́ nə foʼə̂ məjîə afɔ a túg ńtsɔ́ʼə afaʼ əjǐə; məjî páʼ a kyeetə̂ nə́ lə́ pɨ páʼ pó túg nə́ nchîntɨ páʼ ə́ ḿmɛdnə̂ ngǎ mɔʼə́[1], ńjî ńgə́ ŋwu páʼ a tə́ nə́ ḿbîə pó ŋwu páʼ a tə́ nə́ ə́foʼə̂, pó pətsəm kyeetə̂ ńkɔŋtə̂.

³⁷Lə́ atsáb páʼ á sóŋ nə́ ńgə́, ‘Ŋwu ndaʼə a pǐ əpú yí ndaʼə a foʼ; lə́ ndə̌ŋdəŋə́.’

³⁸Maŋ túmə áwɨ́ ńgə́ nə́ ghɛn ə́foʼ məjîə afɔ páʼ pɨ nə́ ńkě nə pǐ pô, pɨ pə́ ndaʼ pó faʼ ə́wɨ́ nə́ tíʼ ə́foʼə̂ á mə́m nətáŋ əghoobə́.”

³⁹Pɨ pə́ Samalitan pipə nɨ́ nə́ á tɔ̂ŋ wə́ kə néŋ ntɨ́ nə́ yí ńté ńgə́ məngyě wə́ a kə sóŋ ńgə́, “A fiʼtə̂ mə nə́ anuə atsəm páʼ maŋ nə̈ ḿbɛ́d nə́ tə ńdáʼ ə́faʼə̂.”

⁴⁰Lə́, əghâ ándó Pəsamalitan pó nə ńgyǐ nə́ ńdzə́ənə Yeso lə́, ḿbóʼmbô ńgə́ a chî pó po, Yeso a tíʼ ńchî pó po əlěmbî pɛn pɛ̌.

⁴¹Ńté anu páʼ Yeso a kə́ sóŋ nə́ pɨ pə́ nɨ́ nə́ pó néŋ ntɨ́ nə́ yə́.

⁴²Pó tíʼ sóŋə á mbô məngyě wə́ ńgə́, “Pəg kě pɛ́d ḿbí ńté lə́ anu páʼ gho nə sóŋ nə nə́ pəg lə́ pô, pəg pí ńté lə́ ńgə́ pəg zóʼə a ngǎ pəgə́, ńtíʼ ńjî ńgə́ lə́ Nchwádkə mbîə.”

⁴³Ndzaŋə ándó əlě pɛ́n pɛ̌ páʼ a nə ńchî nə́ pópə Pəsamalitan nə ńdaŋ nə́ lə́, Yeso a fɛ́d ńtíʼə ńgɛnə̂ á mboʼ Galiliə.

⁴⁴Ńté ńgə́ Yeso nə́ nkɔ̌ʼmbɨ əyə́ a nə́ sóŋ ńgə́ pə́ kě a ntûsê aláʼ pó pímə pô.

⁴⁵Əghâ páʼ a nə ńkoʼ nə́ á Galili lə́, pɨ pə́ Galili pó kwáalə yí əshîʼnə, ńté ńgə́ pó nə́ ńkə́ ńgɛnə̂ aliʼ Akɔŋtə Ndzáʼkə á Jɛlusalɛm ńjɨ́ mənu mətsəm páʼ a ghɛd nə́.

⁴⁶Yeso a pɨ ḿbəənə̂ á Kana á mboʼ Galiliə, aliʼ páʼ a nə sɛdkə̂ nə́ nkǐ nə məloʼ lə́. Nətû nə́ ngaŋə́maʼə́ntso yitsə̌ nə́ chîə á Kapanawum, mɔ́ əyǐ a tə́ ńgoonə̂.

⁴⁷Əghâ ándó nətû nə́ ngaŋə́maʼə́ntso zə́ nə́ zóʼ nə́ ńgə́ Yeso a fɛ́lə á mboʼ Judya ńgyǐəə á Galili lə́, a ghɛn ḿbóʼmbô nə́ yí ńgə́ a yǐəə Kapanawum ńtsóʼə a mɔ́ əyǐ páʼ a nə ńgɔ nə tə ńtíʼ á mə́ kwû nə.

⁴⁸Yeso a tíʼ ə́sóŋə á mbô yí ńgə́, “Tə ńdéʼtə nə́ jɨ́ əkyeʼmə́nu pópə mənu mi yɛ́d nə́ yɛ́d nə́ pɨ yǐ ńkě ntɨ́ əwɨ́ nə́ maŋ néŋ pô.”

⁴⁹Nətû nə́ ngaŋə́maʼə́ntso zə̂ nə́ sóŋ nə́ yí ńgə́, “Tǎ, yǐ pɔ̌ ghɛn záʼ móonə mə a pɔŋə̂ kwûə.”

⁵⁰Yeso a kwěe yí ńgə́, “Ghɛnə̂ á ndɛ̂, mɔ́ əgho a kě yǐ kwû pô.” Ŋwu ə́wə́ á néŋ ntɨ́ nə́ anu páʼ Yeso a sóŋ nə́ nə́ yí lə́ ńtíʼ ḿbəənə̂ yə́.

⁵¹Ndzaŋə ándó a nə ńtə́ nə́ ḿbəənə̂, ngaŋə́faʼ əjí tégə yí ńtíʼ sóŋ nə́ yí ńgə́, “Mɔ́ əgho a yáŋə.”

⁵²A pítə ághɔ́b nə́ ndɛd páʼ əfə́g wə́ nə ńchúʼ nə́ á mə́ ḿmɛdtə̂ nə́ mɔ́ ə́wə́, pó kwěe a yí ńgə́, “Lə́ nə́ ḿbə́ á ndzəŋ mə́numə á əzoonə́ páʼ əfə́g wə́ kə měe nə́.”

⁵³Tǎ əyǐə a jî ńgə́ lə́ nə́ ḿbə́ tsɔʼə nə́ ndɛd páʼ Yeso a nə fiʼtə̂ nə́ á mbô yí ńgə́, “Mɔ́ əgho a kě yǐ kwû pô.” A néŋ ntɨ́ əyí nə́ yí ńdzoŋ ḿbegə̂ ŋwu ntsəmə a ndɛ̂ yə́.

⁵⁴Mə tsóʼ nə́ mɔ́ nətû nə́ ngaŋə́maʼə́ntso ə́wə́ lə́ nə ḿbə́ azoŋkə nkɨʼnənu páʼ Yeso nə́ ńgɛd nə́ əghâ páʼ a nə ńdǒo nə́ á Judya ńgyǐəə á Galiliə lə́.