Read Awing Jɔnə 7 Bible Online

Jɔnə 7 - Awing bible

Jɔnə 7

¹Əghâ ándó Yeso a nə ḿməgtə̂ nə́ á mə́ tsáb nə́ pópə ngaŋə́zoŋə́ndzəm əjí lə́, ńtíʼ ńgɛnə̂ á Galili ńtə́ ńnyinə̂ wɨ́, ńkě pɨ ńkɔŋə̂ á mə́ nyi nə́ Judya pô, ńté ńgə́ Pəjus pó nə ńtə́ ńnáŋ əsê ndúmə á mə́ jwítə nə́ yə.

²Əghâ yi wɨ́, alě akɔŋtə Məntaŋ mə́ ndɛ̂ əsê Pəjus nə ńtə́ ḿbáatə,

³pɔ́pə́mɛ́ pí pó tíʼ ə́sóŋə á mbô yí ńgə́, “Mɛdtə̂ aliʼ zɨ ńgɛnə̂ á Judya ńjî ńgə́ ngaŋə́zoŋə́ndzəm əzô ə́ jɨ́ mənu páʼ gho faʼ nə́.

⁴Ńté ńgə́ ŋwu tsə̌ a kě anu páʼ ä faʼ nə́ lyáŋə pô páʼ təmbɔʼ a tə́ ńdoonə̂ ńgə́ pə́ pyádnə ńjîə yə́ əshîsaŋə. Təmbɔʼ gho tə́ faʼə̂ mənu mi gho nɨd mbɨ əzo á mbô mbîə.”

⁵Ńté ńgə́ tsɔʼə pɔ́pə́mɛ́ pí pó nə ńkě ntɨ́ nə́ yí néŋ pô.

⁶Yeso a sóŋə á mbô pó ńgə́, “Ndɛlə mə kě kə́ koʼə̂ pô, lə́ ndɛd ətsəm pə́ ńkoʼə̂ á mbô pəənə.

⁷Təmbɔʼ mbî kě áwɨ́ pa pô, lə́ pə́ peenə̂ mə ńté ńgə́ maŋ sóŋə á mbô mbî ńgə́, ngɛdmə́nu əghɔ́b ə́ kě pɔŋ pô.

⁸Kɔ́ʼ nə́ ńgɛnə̂ aliʼə́ akɔŋtə ə́wə́ á ngǎ pəənə, maŋ kě tə́ ńkɔ́ʼə ńgɛnə̂ aliʼə́ akɔŋtə yi ə́wɨ́ pô, ńté ńgə́ ndɛlə mə kě kə́ chígə́ koʼə̂ pô.”

⁹A nə sóŋ ə́lɨ́d lə́ ńtíʼ ńchîə yə́ á Galiliə.

¹⁰Əghâ ándó pɔ́pə́mɛ́ pí pó nə ńkɔ́ʼ nə́ ńgɛnə̂ aliʼə́ Akɔŋtə wə́ lə́, Yeso a kə́ ńkɔ́ʼ ńgɛnə̂ ajíə, a nə ńkě ghɛnə̂ á əshîsaŋ pô, a nə ńgɛn lə́ nəlyaŋnə́.

¹¹Pəjus pó nə ńtə́ ńnáŋə a yə́ aliʼə́ akɔŋtə wə́ ńtíʼə ḿbítə ńgə́, “A ə́fó?”

¹²Məntsəmə́ mimə nɨ́ nə́ mə́ nə ńchîə á mə́mə apoŋə pɨ zə́ ńté Yeso. Pɨ pətsə́ pó sóŋ ńgə́, “Lə́ ŋwu yi əshîʼnə” Pətsə́ pə́ sóŋ ńgə́, “Ngá, a fɨgə̂ lə́ pəənə.”

¹³Lə́ ḿbə́ ńté ńgə́ pó nə ńtə́ ḿbɔ́gə Pəjusə, ŋwu tsə̌ a kě ə́wɨ́ chî təmbɔʼ a fɛ́d ńtə́əmə á əshîsaŋ ńtsáb ńté yí pô.

¹⁴Ndzaŋə ándó alěmbî akɔŋtə zə̂ á nə ńgɛn nə́ tə́ ńgabkə̂ tətɨ lə́, Yeso a kɔ́ʼ ńgɛnə̂ á Tə́kɔʼndɛ̂sê ńtə́ ńdzéʼkə anǔəsê.

¹⁵Anu yə ə́wə́ a nə ńdánə ńchígə́ ńkɨʼnə̂ Pəjus, pó tíʼə ḿbítə ńgə́, “Ŋwu ghɛnə̂ a lánə ńchígə́ ńdɔgə̂ ají lə́ ə́fó páʼ a nə ńkě nə́ aŋwaʼlə ghɛn pô?”

¹⁶Yeso a tíʼ ńkwěe ághɔ́b ńgə́, “Anu páʼ maŋ zéʼkə nə́ lə́ á kě lə́ á mbô maŋ lǒo pô, a lǒo lə́ á mbô Əsê páʼ ə́ tú nə́ mə.”

¹⁷Ŋwu ntsəm páʼ a kɔŋ nə́ á mə́ ghɛd nə́ anu páʼ Əsê lɔ nə́, ä yǐ jî ńgə́ anu maŋ zéʼkə nə́ lə́ á lǒo lə́ á mbô Əsê kɨ ńgə́ maŋ tséebə lə́ nə́ mətəənə mə.

¹⁸Ŋwu páʼ ä tsáb nə́ nə́ mətɨ míə, a náŋə lə́ əyǐ nəgháʼə, ńkě yi Əsê pô: Lə́ ŋwu páʼ ä lɔ nə́ nəgháʼə á mbô ŋwu páʼ a tú nə́ yí, ä tséebə lə́ ndə̌ŋdəŋə́, ntsɨd yətsə́ kě kə́ ńchî ńté yí pô.

¹⁹Mosisə a nə ńkě Pənoŋkə á mbô pɨ fɛ̂? Lə́ ŋwu ə́wɨ́ yitsə̌ a pə́ ńkě Pənoŋkə pi wɨ́ lɔʼkə̂ pô. Nə́ pɛn ńtíʼə ńdoonə̂ á mə́ jwítə nə́ mə lə́ ńté akə̂?

²⁰Apoŋə pɨ zə́ a kwěe yí ńgə́, “Gho túgə ajwiə təpɔŋə a mbɨ gho! Á gho lə́ lɔ əwə á mə́ jwítə nə?”

²¹Yeso a sóŋə á mbô pó ńgə́, “Maŋ kə ghɛlə̂ táʼ nkɨʼnənuə, anu yə ə́wə́ a kɨʼnə̂ áwɨ́ pətsəmə.

²²Mosisə a nə sóŋ ńgə́ nə̈ tə́ ḿbóʼə pɔ́ pɨ pipə́ mbyâŋnə (anu zɨ́d zəənə́ á nə ńkě lə́ á mbô Mosisə lǒo pô, á nə fɛ́d lə́ á mbô pətǎ pə́ənə́), nə́ kə̈ ḿbóʼə mɔ́ mbyâŋnə Alěláʼsê.

²³Lə́ pə́ ńgə́ təmbɔʼ a pə́ Alěláʼə́sê nə́ póʼə ŋwu ńjî ńgə́ kɔ pə wǔəə noŋkə Mosisə, lə́ ghɛlə̂ akə̂ nə tíʼ ńdzáŋ ndě nə́ maŋ ńté ńgə́ maŋ tsóʼə a ŋwunə Alěláʼə́sê?

²⁴Kɔ nə tsɔ́ʼtə əsáʼ ńdzoŋə̂ á pə́ mənu nə́ jɨ́ nə́ nə́ əmə́gə, tsɔ́ʼtə nə́ əsáʼ á pə́ ndə̌ŋdəŋə́.”

²⁵Əghâ yi ə́wɨ́ pɨ pətsə́ páʼ pó nə ńdǒo nə́ á Jɛlusalɛm pó chúʼə á mə́ pítə nə́ ńgə́, “Lɛ̌ kě ŋwu páʼ pə́ nə ńdɔ nə á mə́ jwítə nə́ lə́ pô?

²⁶Lɛ̌ kě yí páʼ a chî nə́ aliʼə́ nə́ ńtséebə á əshîsaŋ lɛ pô, pó pə́ ńkě anu yətsə́ á mbô yí tə́ ə́sóŋə pô! Təmbɔʼə a pə ńgə́ mətû mə́ aláʼ mə́ pyádnə ńjî ńgə́ lɛ̌ lə́ Yi Ńtsəʼ nə́ Wə́?

²⁷Aŋwaʼlə Əsê sóŋ ńgə́ əghâ ándó Yi Ńtsəʼ nə́ a yǐ nə́ yǐ, ŋwu tsə̌ a kě yǐ jîə aliʼ páʼ a lǒo nə́ ə́wɨ́ pô, lə́ pɛn pə́ ńjîə aliʼ páʼ ŋwu nə́ á lǒo nə́ ə́wə́.”

²⁸Ndzaŋ Yeso kə tə́ nə́ ńdzéʼkə á tə́kɔʼndɛ̂sê lə́, ńtíʼ ḿbítə ághɔ́b nə́ tə́kɔʼ ngye ńgə́, “Lə́ pə́ ńgə́ nə́ jîə ŋwu páʼ maŋ pə́ nə́ wɨ́d, ńkə́ ḿbɨ ńjîə aliʼ maŋ lǒo nə́ ə́wɨ́? Maŋ kě yǐəə aliʼə́ nə́ lə́ a ngǎ maŋ pô, ŋwu páʼ a tú nə́ mə lə́ ndə̌ŋdəŋə́ ŋwunə, lə́ nə́ pə́ ńkě yí jî pô,

²⁹maŋ jîə a yí ńté ńgə́ maŋ lǒo lə́ á mbô yə́, lə́ a kə́ ńtú yí ńtúmə mə.”

³⁰Əghâ yi əwɨ́ pó tíʼə ńdoonə̂ á mə́ wam nə́ yə́, lə́ ŋwu tsə̌ a pə́ ńkě yí nə́ apô kwum pô ńté ńgə́ ndɛd əjǐ nə́ ńkě kə́ koʼə̂ pô.

³¹Lə́ pɨ pi nɨ́ nə́ pə́ nə́ ḿbɛ́d ńnéŋ ntɨ́ nə́ yí, ńtíʼ ə́sóŋ ńgə́, “Əghâ ándó Yi Ńtsəʼ nə́ Wə́ a yǒ nə́ ńgyǐ, tə a yǒ ghɛd əkyeʼmə́nu tə tsɛ pi páʼ ŋwu nə́ a pɛ́d nə́ tə ńgɛd?”

³²Pəfalasi pó zóʼ ndzaŋə ándó apoŋə pɨ zə́ a ŋwuntə̂ nə́ ńté əkyeʼmə́nu páʼ a nə ńgɛd nə́, mbêsê yi ngweŋ pópə Pəfalasi tíʼ ńtú ngaŋə́pyáabə Tə́kɔʼndɛ̂sê ńgə́ pó ghɛn ńgwaamə̂ Yeso.

³³Yeso a sóŋ ńgə́, “Maŋ yǐ chî pɛn lə́ tsɔʼə nə́ mɔ́ akəmə ndɛlə, ə́ tíʼ ghɛnə̂ á mbô ŋwu páʼ a nə ńtú nə́ mə.

³⁴Nə́ yǒ ńnáŋə mə ə́ pə́ kě mə zɨ́ pô, aliʼ páʼ maŋ ghɛn nə́ ə́wɨ́ təmbɔʼ nə́ kě ə́wɨ́ yǐ pô.”

³⁵Pəjus pó tíʼ ə́sóŋə a tətɨ pó ńgə́, “Ŋwu nə́ a lánə ńgɛnə̂ lə́ ə́fó, páʼ mbɔʼ pɛn láʼ ńkě yí jɨ́ pô? A loonə̂ á pə́ mə́ ghɛn nə́ á Glik, aliʼ páʼ pɨ pɛn pə́ nə shamnə̂ nə́ ńgɛnkə̂ ə́wɨ́ lə́, ə́tíʼ zéʼkə Pəglik?

³⁶A pěʼ ńkwaŋ lə́ ńgə́ akə̂ ə́sóŋ ńgə́ pɨ yǒ ńnáŋə mə ə́ pə́ kě jɨ́ pô? Aliʼ páʼ maŋ chî nə́ ə́wɨ́ təmbɔʼ nə́ kě ə́wɨ́ yǐ pô?”

³⁷A nə ḿbə́ ndwigtə alě páʼ a nə ḿbə́ nə́ tə́kɔʼə alě akɔŋtə lə́, Yeso a tɨ́ ńtsáb nə́ tə́kɔʼ ngye ə́sóŋ ńgə́, “Ŋwu ntsəm páʼ nji nkǐ tə́ nə́ ńdzáŋə a yə́ a yǐəə á mbô maŋ ńnô nkǐə.

³⁸Ŋwu ntsəm páʼ a néŋ nə́ ntɨ́ yí nə́ maŋ ndzoŋ ndzaŋ páʼ aŋwaʼlə Əsê á sóŋ nə́ ńgə́, ‘Á mə́m ntɨ́ əyə́ ńkǐ páʼ ə́ fɛ̂ nə́ nchîmbî ə́ yǒ tíʼə ə́fɛ́lə ə́wə́.’ ”

³⁹Yeso nə sóŋə anu yə wɨ́ ńté lə́ Ajwiə pɨ páʼ pó néŋ nə́ ntɨ́ nə́ yí pó yǒ nə́ kwáalə zə́ələ́, ńté ńgə́ a kə pə́ nə́ ndɛd yǐ ə́wɨ́ lə́ pə́ kě Ajwi kə́ fɛ̂ pô, nə́ ndɛd yi wɨ́ Yeso a nə ńkě kə́ júmnə ə́ kwúnə a mə́m nəgháʼ əyǐ pô.

⁴⁰Ndzaŋə ándó pɨ pə̂ pó nə ńdzóʼ nə́ atséebə ají lə́, pɨ pətsə́ pó sóŋ ńgə́, “Lə́ ndə̌ŋdəŋə́, ŋwu nə́ lə́ ntûsê.”

⁴¹Pətsə́ pó sóŋ ńgə́, “Lə́ Yi Ńtsəʼ nə Wə́!” Lə́ pətsə́ pó pítə ńgə́, “Təmbɔʼ Yi Ńtsəʼ nə́ a fɛ́lə á Galili lə́ ə́lɛ́?

⁴²Lə́ aŋwaʼlə Əsê a pə́ sóŋ ńgə́ Yi Ńtsəʼ nə́ a yǒ fɛ́d lə́ nə́ ngwud əfo Debilə, pə́ pîə yə́ á Bɛtəlɛɛmə, á aláʼ páʼ Debilə a nə ńchî nə́ ə́wə́.”

⁴³Pɨ pə́ nə ńtíʼ ńgabnə̂ ńté Yeso.

⁴⁴Pɨ pətsə́ pə́ loonə̂ á mə́ wam nə́ yə́, lə́ ŋwu tsə́ a pə́ ńkě yí nə́ apô kwum pô.

⁴⁵Ngaŋə́pyáabə Tə́kɔʼndɛ̂sê kə ḿbɨ ḿbəənə̂ á mbô pətə́kɔʼ pə́ ngaŋə́pêsê pópə Pəfalasi lə́, pó tíʼ ḿbítə ághɔ́b ńgə́, “Lə́ á pěʼ ńgɛlə̂ akə̂ nə kě nə́ yí yǐ pô.”

⁴⁶Ngaŋə́pyáabə Tə́kɔʼndɛ̂sê zə̂ pó kwěe ńgə́, “Ŋwu tsə̌ a kě ándó ŋwu nə́ kə́ láʼə tséebə pô!”

⁴⁷Pəfalasi pó pítə ághɔ́b ńgə́, “Nə loonə̂ á mə́ sóŋ nə́ lə́ ńgə́ pə kə́ fɨgə̂ azə́ənə́ aliʼə́?”

⁴⁸Pɨ pɛ́d tə ńdjɨ́ mətû mə́ Pəfalasi mətsə́ mə́ néŋ ntɨ́ nə́ yí?

⁴⁹Apoŋə pɨ zəənə́ á kě noŋkə Mosisə jî pô, ndɔ Əsê ə́ chîə atû pó.

⁵⁰Nikodemɔs páʼ a nə ḿbə́ nə́ táʼ ŋwu əghɔb yitsə̌, lə́ nə ḿbə́ yí páʼ a nə ḿbeg nə́ ńgɛn ńdzə́ənə Yeso. A tíʼ ə́sóŋə á mbô pó ńgə́,

⁵¹“Ńdzoŋ ndzaŋ páʼ noŋkə əwɛ́nə á sóŋ nə́, təmbɔʼ pɛn kě əsáʼ ŋwu lə́g tə́ ghə́ pə́ peg ńdzóʼə anu páʼ a sóŋ nə́, kɨ ńjîə anu páʼ a ghɛd nə́ pô.”

⁵²Pó kwěe ńgə́, “Gho kə́ ńdǒ azô lə́ tsɔʼə Galili? Chígə́ ńnáŋ, gho yǐ jɨ́ ńgə́ təmbɔʼ ntûsê a kě á mə́m Galili fɛ́d pô.

⁵³Ŋwu ntsəmə a fɛ́d ńtíʼ ńkwə̂ á ngyaʼə́ yə́.”