Read Awing Jɔnə 8 Bible Online

Jɔnə 8 - Awing bible

Jɔnə 8

¹Lə́ Yeso a kɔ́ʼ ńgɛnə̂ á nkwəənə mətǐ mə́ Olifə.

²Mbî ə́ fóg, á mɛ́ məsânə a pɨ ńgɛnə̂ á Tə́kɔʼndɛ̂sê, ŋwu ntsəmə a yǐəə á mbô yə́, a tíʼ ńnáanə á ndəsê ńdzéʼkə ághóobə́.

³Ngaŋə́zéʼkə pənoŋkə pópə Pəfalasi yǐ nə́ məngyě yitsə̌ páʼ pə́ wam nə́ yə a tə́ ńjîə mə̂ghabə ńgyǐ ńgɛlə̂ a tə́əmə á mbi pó pətsəmə.

⁴Ə́sóŋə á mbô Yeso ńgə́, “Ndzéʼkə, pə́ waamə̂ məngyě nə́ a tə́ ńjîə mə̂ghabə.

⁵Pə́ ŋwaʼlə̂ á mə́m noŋkə Mosisə ńgə́, ntê məngyě zɨ́d zɨ pə́ chîə á mə́ tə́mtə nə́ yí nə́ məngɔʼ ə́ jwítə. Gho sóŋə azô lə́ ńgə́ akə̂ ńté a yə́?”

⁶Pó nə sóŋə anu zɨ lə́ á mə́ kwaʼlə̂ nə́ Yeso, ńjî ńgə́ mbɔʼ pó jɨ́ ndu ńnéŋ əsáʼə atû yə́. Lə́ Yeso a pə́ ńkwúʼnə á ndəsê ŋ́ŋwaʼlə̂ nə́ fîəpô əyə́.

⁷Ndzaŋə ándó pó nə ńtɨ́ nə́ aliʼ yi ə́wɨ̈ ḿbítə yí tsɔʼə nə́ mənu lə́, a lǒo əsê ńtɨ́ ə́sóŋə á mbô pó ńgə́, “Á mə́m pəənə́, ŋwu tsə̌ páʼ a kě nə́ təpɔŋ kə̂ ghɛlə̂ pô a peg ńchúʼə á mə́ tə́m nə́ yí nə́ ngɔʼə,”

⁸A sóŋ ə́lɨ́d lə́, ḿbɨ ńkə́ ńkwúʼnə á ndəsê ńtə́ ŋ́ŋwaʼlə̂ nə́ fîəpô əyǐ ngǎ yitsə̌.

⁹Ndzaŋ pó nə ńdzóʼ nə́ atsáb yə ə́wɨ́ lə́ ńtíʼə ńgɛnkə̂ ághɔ́b táʼ táʼə, ńchúʼ nə́ chigə pətəkaŋ páʼ pó nə ńchî nə́ ə́wə́, Yeso a nə ńtíʼ ńchîə aliʼ yə wɨ́ yí təjiʼ nə́ məngyě wə̂, a tə́əmə á mbi yə́.

¹⁰Yeso a pɨg mbɨ əjǐ ə́sóŋ nə́ məngyě wə̂ ńgə́, “Məngyě, pó ə́fó? Ŋwu tsə̌ a kě pɛ́d mbɔʼ a ghɛd gho wǔ əsáʼ?”

¹¹Məngyě wə̂ a kwěe ńgə́, “Ngá ḿbə́ Mmaʼmbî,” ŋwu tsə̌ a kě ghɛd maŋ wǔ əsáʼ pô. Yeso a tíʼ sóŋə á mbô yí ńgə́, “Təmbɔʼ maŋ kě kə́ ńgɛd gho wǔ əsáʼ pô, ghɛnə̂ a gho, kɔ pɨ ńkə́ ńgɛlə̂ təpɔŋə.”

¹²Yeso a kə́ ḿbɨ ńtséebə á mbô pó ə́sóŋ ńgə́, “Maŋ lə́ nkyaʼ mbîə.” Ŋwu ntsəm páʼ a zoŋ nə́ mə á kě á mə́m ndzəmə yǐ nyi pô, lə́ pə́ túg nkyaʼ nchîmbîə.

¹³Pəfalasi pə́ tíʼ ə́sóŋə á mbô yi ńgə́, “Əghâ nə́, mbɔʼ gho tə́ ə́sóŋə anu ńté pə́ mbɨ əzo, lə́ pə́ ńgə́ anu páʼ gho sóŋ nə́ lə́ kě ndə̌ŋdəŋ pô.”

¹⁴Yeso a kwěe ńgə́, “Maŋ pǎtə ńtə́ ə́sóŋə anu ńté mbəəmə lə́, anu maŋ sóŋ nə́ lə́ ndə̌ŋdəŋ ńté ńgə́ maŋ jîə aliʼ páʼ maŋ lǒo nə́ ə́wə́, ńkə́ ńjîə aliʼ páʼ mäŋ ghɛn nə́ ə́wə́. Nə́ kě jîə aliʼ páʼ maŋ lǒo nə́ ə́wɨ́ pô, ńkě kə́ ńjîə aliʼ páʼ mäŋ ghɛn nə́ ə́wɨ́ pô.

¹⁵Nə̈ lə́gə məsáʼ lə́ ándó pɨ pə́ mbîə, lə́ maŋ pə́ ńkě əsáʼ ŋwü lə́gə pô.

¹⁶Lə́ təmbɔʼ maŋ pěʼ ńtə́ ńdə́g əsáʼ, tə ḿbə́ ndə́gsáʼə mə lə́ ndə̌ŋdəŋə́, ńté ńgə́ lə́ kě tsɔʼə maŋ lə́gə pô, maŋ lə́gə lə́ pəg yi páʼ a tú nə́ mə.

¹⁷Á mə́m məntəgə́ mɨ́, pə́ ŋwaʼlə̂ ə́wɨ́ ńgə́ anu páʼ pɨ pə́ pɛ̌ pə́ sóŋ nə́ lə́ ndə̌ŋdəŋə́.

¹⁸Mäŋ sóŋə anu ńté lə́ mbəəmə mə, lə́ Tǎ páʼ a tú nə́ mə a kə̈ sóŋə anu ńté lə́ mə.”

¹⁹Pó tíʼ ḿbítə yí ńgə́, “Tǎ əgho a chî lə́ ə́fó?” Yeso a kwěe ńgə́: “Nə́ kě mə jî pô ńkě Tǎ mə kə́ ńjî pô,” Təmbɔʼ nə pěʼ ńjîə mə, tə ḿbə́ nə́ kə́ ńjîə Tǎ mə.

²⁰Yeso a nə ńtséebə anu zɨ lə́ əghâ ándó a nə̈ ńdzéʼkə nə́ á Tə́kɔʼndɛ̂sê, ḿbáatə atɔ́gə ndɛ̂ páʼ pə́ nə́ ńdɔʼkə̂ nə́ mənkwum mə́ akáŋə́sê ə́wə́. Lə́ ŋwu tsə̌ a pə́ ńkě yí wam pô ńté ńgə́ ndɛd əjǐ nə ńkě koʼ pô.

²¹Yeso a kə́ ḿbɨ ə́sóŋə á mbô pó ńgə́, “Maŋ yǐ ghɛnə̂ a mə, nə́ tíʼ ńnáŋə mə kə́káŋə́, ńtíʼ ńkwúkə á mə́m təpɔŋ əwəənə́. Aliʼ páʼ mäŋ ghɛn nə́ ə́wɨ́ təmbɔʼ nə́ kě ə́wɨ́ yǐ pô.”

²²Pəjus pó tíʼ ḿbítə ńgə́, “A yǐ jwítə mbɨ əjǐ jwítə nə́, ndzaŋ páʼ a pěʼ nə́ sóŋ ńgə́, Aliʼ páʼ a yǐ nə́ ghɛn ə́wɨ́ təmbɔʼ pɛn kě ə́wɨ́ yǐ pô lə́?”

²³A sóŋə á mbô pó ńgə́, “Nə́ lǒo lə́ ndu ndəsê ghɛnə̂, maŋ pə́ ńdǒ lə́ nəpóolə atǐə. Pɨ lə́ pɨ pə́ mbî pəənə́, lə́ maŋ pə́ ńkě lə́ ŋwu mbî pô.

²⁴Maŋ nə ə́fiʼtə̂ áwɨ́ ńgə́ nə́ yǒ kwúkə á mə́m pətəpɔŋ pə́ənə́, nə́ yǒ kwúkə á mə́m pətəpɔŋ pɨ́ tə ńdéʼtə nə́ pí ńgə́, ‘maŋ lə́ yə́.’ ”

²⁵Pó pítə yí ńgə́, “Gho lə́ əwə?” Yeso a kwěe ághɔ́b ńgə́, “Tsɔʼə anu páʼ mäŋ sóŋ nə́ á mbô pɨ ə́fɛ́lə á nəchwaakənə́;

²⁶Maŋ chî nə́ mənu mimə nɨ́ nə́ á mə́ lɔg nə́ ńnéŋ əsáʼ wə́ atû pəənə́. Lə́ yí wə̂ páʼ a nə ńtú nə́ mə lə́ ŋwu ndə̌ŋdəŋə́, maŋ kə̈ fiʼtə̂ á mə́m mbî lə́ tsɔʼə anu páʼ a sóŋ nə́ á mbô maŋə.”

²⁷Ətû pɔ́b nə ḿbə́ ńkě lá ńté anu páʼ a nə̈ sóŋ nə́ ńté Tǎ lə́ pô.

²⁸Yeso a tíʼ ə́sóŋə á mbô pó ńgə́, “Əghâ ándó pɨ yǒ nə́ ŋ́ŋáŋkə Mɔ́ Ŋwunə atǐ nə́ yǐ jî ńgə́ maŋ lə́ Ŋwu Páʼ Maŋ Pə́ Nə́, nə́ yǐ jî ńgə́ maŋ kě anu yətsə́ nə́ məmá mətɨ faʼə̂ pô, mäŋ sóŋə lə́ tsɔʼə anu páʼ Tǎ a zéʼkə nə́ mə əwə.

²⁹Lə́ ŋwu páʼ a tú nə́ mə a chî pəg yə́, a kě mə mɛdtə̂ ńgə́ maŋ chîə á ngǎ maŋ pô, ńté ńgə́ maŋ zá ńgɛlə̂ mənu páʼ mə̈ ghɛd nə́ mbɨ əjǐ pɔŋə̂.”

³⁰Ndzaŋə ándó a nə ńtsáb nə́ atsáb zɨ lə́ pɨ pipə nɨ́ nə́ pó néŋ ntɨ́ nə́ yə́.

³¹Yeso a tíʼ ə́sóŋə á mbô Pəjus pó néŋ nə́ ntɨ́ nə́ yí ńgə́, “Təmbɔʼ nə́ mɛdnə̂ á mə́mə atséebə mə, tə ḿbə́ pɨ lə́ chigə ngaŋə́zoŋə́ndzəmə mə

³²nə́ yǒ jîə ndə̌ŋdəŋə́, lə́ ndə̌ŋdəŋ wɨ́d wə̂ á yǐ nə́ ə́fógə áwə́ənə́ á mə́mə apoʼə.”

³³Pó kwěe yi ńgə́, “Pəg fɛ́d lə́ mə́m əla Ablaamə, pəg kě kə́ pə́ əpoʼə á mbô ŋwu tsə̌ pô. Gho tíʼ ńdǎ lə́ ə́lɛ́ á mə́ sóŋ nə́ ńgə́, Nə́ yǒ kě pɨ pə́ əpoʼ pô?”

³⁴Yeso a sóŋə á mbô pó ńgə́, “Lə́ ndə̌ŋdəŋ maŋ sóŋ nə́ á mbô pɨ ńgə́ ŋwu ntsəm páʼ ä ghɛd nə́ təpɔŋ lə́ apoʼə á mbô təpɔŋə.

³⁵Apoʼə a kě yǐ mɛdnə̂ á mə́m əla wɨ́d wə́ pô, lə́ móonə a pə́ ḿbə́ lə́ əla wɨ́d wə́ tə ḿmɛdnə̂.

³⁶Təmbɔʼ Mɔ́ Əsê a fógə áwə́ənə́ á mə́m ndɛ̂ apoʼ nə́ jî ńgə́ nə láʼ kě apoʼ pɨ faʼ pô.

³⁷Maŋ jî ńgə́ pɨ fɛ́d lə́ á mə́m əla Ablaamə, lə́ ḿbə́ ńtə́ ńdoonə̂ á mə́ jwítə nə́ mə ńté ńgə́ atséebə mə á kě anu yətsə́ á mbô pɨ kwú pô.

³⁸Maŋ sóŋ lə́ anu páʼ maŋ jɨ́ nə́ á mbô Tǎ mə, lə́ nə́ pə́ ńkə́ ə́faʼə̂ lə́ anu páʼ pɨ nə ńdzóʼ nə́ á mbô tǎ əwəənə́.”

³⁹Pó kwěe á mbô yi ńgə́, “Tǎ əwəg lə́ Ablaamə.” Yeso a sóŋə á mbô pó ńgə́, “Təmbɔʼ pɨ nə ḿběʼ ḿbə́ lə́ pɔ́ pə́ Ablaam, tə ḿbə́ pɨ nə faʼə̂ anu páʼ Ablaamə a nə faʼ nə́.”

⁴⁰Lə́ nə́ pə́ əghâ nə́, nə́ pə́ ńtə́ ńdoonə̂ á mə́ jwítə nə́ mə, á ŋwu páʼ a nə fiʼtə̂ nə́ áwɨ́ nə́ ndə̌ŋdəŋ páʼ a nə́ ńdzóʼ nə́ á mbô Əsê, lɛ̌ kě anuə ándó Ablaam a nə̈ ə́faʼ nə pô!

⁴¹Nə́ faʼə̂ lə́ anu páʼ tǎ əwəənə́ ä faʼ nə́. Pó sóŋə á mbô yí ńgə́, “Pə́ nə ńkě áwə́g lə́ nə́ mə̂ghabə pî pô, pəg túg lə́ tsɔʼə táʼ Tǎ páʼ a pə́ nə́ Əsê.”

⁴²Yeso a sóŋə á mbô pó ńgə́, “Təmbɔʼ Əsê a pěʼ ḿbə́ lə́ Tǎ əwɨ tə ḿbə́ nə́ kɔŋə̂ mə, ńté ńgə́ maŋ nə ńdǒo lə́ á mbô Əsê ńgyǐəə aliʼə́ nə́. Maŋ nə ńkě lə́ a ngǎ maŋ yǐ pô, lə́ nə ńtú Əsê ńtúmə mə.

⁴³Lə́ ghɛlə̂ akə̂ nə́ kě chî təmbɔʼ nə́ zóʼə anu páʼ mäŋ sóŋ nə́ pô? Lə́ ńté ńgə́ təmbɔʼ nə́ kě wam məntɨ́ mi ńdzóʼə atséebə mə pô.

⁴⁴Pɨ lə́ pɔ́ pə́ tǎ əwɨ dɛbəələ, nə́ kə́ ńdoonə̂ lə́ tsɔʼə á mə́ faʼ nə́ ándó páʼ tǎ əwəənə́. Ə́fɛ́lə á nəfɛdnə́, tǎ əwəənə́ a nə ḿbə́ lə́ ńjwítə pəənə. A kě kə́ láʼə tə́əmə əlá ndə̌ŋdəŋ pô, ńté ńgə́ ndə̌ŋdəŋ a kě nə́ yí chî pô. Ndzaŋ páʼ ä tsɨd nə́ ntsɨd lə́ ä faʼə̂ lə́ tsɔʼə anu páʼ á koʼnə̂ nə́ á mbô yə́, ńté ńgə́ lə́ ngaŋntsəələ ńkə́ ḿbə́ tǎpə ngaŋntsɨd ntsəmə.

⁴⁵Lə́ ńté ńgə́ mäŋ tséebə ndə̌ŋdəŋə́, lə́ nə́ pə́ ńkě ntɨ́ nə́ maŋ néŋ pô.

⁴⁶Lə́ əwə ŋwunə á mə́m pɨ təmbɔʼ a sóŋ ńgə́ maŋ lə́ ńgɛd təpɔŋə? Təmbɔʼ mäŋ fiʼtə̂ áwɨ́ lə́ nə́ ndə̌ŋdəŋə́, lə́ pə́ ńgɛlə̂ akə̂ nə́ kě ntɨ́ nə́ maŋ néŋə?

⁴⁷Ŋwu páʼ a chî nə́ pó Əsê a zóʼə atséebə Əsê, anu páʼ á ghɛd nə́ nə́ kě atséebə Əsê zóʼ lə́, ńté ńgə́ nə́ kě lə́ á mbô Əsê lǒo pô.”

⁴⁸Pəjus pó kwěe yi ńgə́, “Gho kwaŋ ńgə́ pəg kě koʼnə̂ á mə́ sóŋ nə́ ńgə́ gho lə́ ŋwu Samalitan ńkə́ túg pɛ̌sê a mbɨ gho.”

⁴⁹Yeso a kwěe ńgə́, “Maŋ kě pɛ̌sê túg pô, lə́ ḿbə́ ńdzóʼnə a Tǎ mə, lə́ nə́ pə́ ńkě mə zóʼnə pô”

⁵⁰Maŋ kě náŋə nəgháʼ nə́ mbəəmə pô, ŋwunə chî ə́wɨ́ páʼ a náŋ nə́ áwə́ələ́, mbɔʼə a kě sáʼ əsáʼ maŋ wǔ pô.

⁵¹Mäŋ sóŋə lə́ ndə̌ŋdəŋə́ á mbô pɨ ńgə́, “təmbɔʼ ŋwu ntsəm páʼ a zóʼ nə́ atséebə mə a yǒ kě kwû pô.”

⁵²Pəjus pó sóŋə á mbô yí ńgə́, “Nə́ pə́ əghâ nə́ pə́ jî ńgə́ gho túgə pɛ̌sê a mbɨ gho. Ablaamə a nə ńkwûə, məntúmə́sê mə́ kə́ ńkwúkə, lə́ gho pə́ ńtíʼə̈ ńdoonə̂ á mə́ sóŋ nə́ ńgə́, Ŋwu páʼ a lɔʼkə̂ nə́ atséebə azô a yǒ kě nəwû jwə́ʼ pô

⁵³Gho loonə̂ lə́ á mə́ sóŋ nə́ ńgə́ gho tsɛɛlə̂ tǎ əwəg Ablaamə, páʼ a nə ńkwû nə́, məntúmə́sê mətsəm mə́ kə́ ńkwúkə! Gho kwaŋ ńgə́ gho lə́ əwə?”

⁵⁴Yeso a kwěe ághɔ́b ńgə́, “Təmbɔʼ maŋ pěʼ ńtə́ ńdoonə̂ nəgháʼ nə́ mbəəmə, tə ḿbə́ nəgháʼ yi ə́wə́ a kě nə́ anu yətsə́ chî pô. Ŋwu páʼ a fɛ̂ nə́ nəgháʼ nə́ maŋ lə́ Tǎ mə, ŋwu páʼ pɨ sóŋ nə́ ńgə́ lə́ Əsê əzɨ lə́.

⁵⁵Lə́ nə́ pə́ ńkě yí jî pô, maŋ pə́ ńjîə yə́. Lə́ təmbɔʼ maŋ pə́ ə́sóŋ ńgə́ maŋ kě yi jî pô, tə ḿbə́ maŋ lə́ ngaŋntsəələ ándó pəənə́, lə́ maŋ jîə yí ńkə́ ńdɔʼkə̂ atséebə ajíə.

⁵⁶Tǎ əwɨ Ablaamə a nə ńtə́ ńkɔŋtə̂ ńgə́ a chîə á mə́ zɨ́ nə́ alěmbîə mə. A nə ńdzə́ənə zɨ́d ńkə́ ńkɔŋtə̂.”

⁵⁷Pəjus pó tíʼ ə́sóŋə á mbô yí ńgə́, “Gho kě ngoʼ məghə́m mɛ́n tâ kə́ koʼə̂ pô, ḿbə́ ə́sóŋ ńgə́ gho nə ńdzə́ənə Ablaamə?”

⁵⁸Yeso a sóŋə á mbô pó ńgə́, “Mäŋ sóŋə áwɨ́ nə́ ndə̌ŋdəŋ ńgə́, záʼ pə́ jî tə́ pîə Ablaam lə́, Maŋ Pə́ chî ə́wə́.”

⁵⁹Pó tíʼ ḿbyá məngɔʼ ńdoonə̂ á mə́ tə́mtə nə́ yí ə́wə́, lə́ Yeso a lyáŋ mbɨ əjǐ ńtíʼ ə́fɛ́lə a yə́ á mə́m Tə́kɔʼndɛ̂sê.