Read Awing Jɔnə 9 Bible Online

Jɔnə 9 - Awing bible

Jɔnə 9

¹Ndzaŋə ándó Yeso a nə ńtə́ nə́ ńdaŋə̂ lə́ ńdzə́ənə ŋwu tsə̌ páʼ pə́ nə ḿbî nə́ yə́ a pə́ əfəgə́.

²Ngaŋə́zoŋə́ndzəm əjí tíʼ ḿbítə yí ńgə́, “Ndzéʼkə, á təpɔŋ lə́ nə ńgɛd əwə, ŋwu ghɛn kɨ pətǎ píə, ndzaŋ páʼ pə́ nə ḿbî nə́ yə́ a pə́ əfəg lɛ̌?”

³Yeso a kwěe ághɔ́b ńgə́, “Lə́ kě pə́ ńgə́ ŋwu nə́ a kə ghɛlə̂ təpɔŋ kɨ pətǎ pí pô. A nə fəg lə́ ńjî ńgə́ pə́ yǒ nəələ̂ apô afaʼə Əsê a ndu yə́.

⁴Pɛn yǐ shib faʼ məfaʼ mə́ ŋwu páʼ a tú nə́ mə nə́ mbîə, ńté ńgə́ túʼə á sɛ́n lə́ ŋwu tsə̌ kě ajûtsə́ pɨ faʼ pô

⁵Ndzaŋ páʼ maŋ chî nə́ á mə́m mbî lə́, maŋ lə́ nkyaʼ mbîə.”

⁶Ndzaŋə ándó a nə sóŋ nə́ anu zɨ lə́, ńtwǐ mətwê á ndəsê ńtwábtə atətsáʼ ə́wɨ́, ńdɔgə̂ ájɨ́d ńdzɔ́ʼ əmə́g mə́ ŋwu yi wɨ wə́,

⁷ə́sóŋə á mbô yi ńgə́, “Ghɛn sog əshî əgho á mə́m aləmə́ Nkǐə Silɔmə.” (Əlɛ́n wɨ́d ghɛn ńgə́ Silɔm ə́ sóŋ lə́ ńgə́, “Túmə.”) Ŋwu wə́ tíʼ ńgɛn ə́sog əshî əyí ńtə́ ḿbəənə̂ ńdzɨ́ əliʼə́.

⁸Ngaŋmə́pad əjí pópə pɨ páʼ pə́ nə ḿbɛ́d nə́ tə ńdzə́ənə a yí a tə́ ńdɔ́nə, pó tíʼ ḿbítə ńgə́, “Lɛ̌ kě ŋwu wə̂ a nə ńnáanə nə́ ńdɔ́nə lə́ pô?”

⁹Pɨ pətsə́ pə́ sóŋ ńgə́, “Lə́ yə́,” Pətsə́ pə́ sóŋ ńgə́, “Ngǎ, a fîə yí lə́ fî nə́.” Ŋwu wə̂ a pə́ ə́sóŋ ńgə́, “Lə́ maŋə.”

¹⁰Pó pítə á yí ńgə́, “Əmə́g mô mə́ nə ńtíʼ ńgɛd lə́ ə́lɛ́ ŋ́ŋáʼnə?”

¹¹A kwěe ághɔ́b ńgə́, “Ŋwu wə̂ páʼ pə́ fóŋ nə́ nə́ Yeso lə́, a pěʼ ńtwábtə atətsáʼ ńdɔg ńdzɔ́ʼ əmə́gə mə ə́wə́, ńtíʼ sóŋ nə́ maŋ ńgə́, Ghɛnə̂ á Silɔm ə́sog wə̂, maŋ tíʼ ńgɛn ə́wɨ́ ə́sog ńjɨ́ əliʼə́.”

¹²Pó pítə á yi ńgə́, “Ŋwu yi wə́ a ə́fó?” A kwěe ághɔ́b ńgə́, “Maŋ kě jî pô.”

¹³Pó lɔgə̂ ŋwu páʼ a nə fəg nə́ lə́ ńgɛn nə́ yə́ á mbô Pəfalasi.

¹⁴Lə́ nə ḿbə́ alěláʼə́sê páʼ Yeso a nə ńtwábtə nə́ atətsáʼ ńdzɔ́ʼ əmə́g mə́ ŋwu wɨ́d wə́ ə́wə́.

¹⁵Pəfalasi pó kə́ ḿbɨ ḿbítə ŋwu wə̂ ngǎ yitsə̌ ndzaŋ páʼ a nə ńgɛd nə́ ḿbɔŋə̂ zɨ́ əliʼə́. Ŋwu wə̂ a kwěe ághɔ́b ńgə́, “A nə ńtwábtə atətsáʼ ńdɔg ńdzɔ́ʼ əmə́gə mə ə́wə́, maŋ tíʼ ə́sogə̂ á mɨ́d ńdjɨ́ əliʼə́.”

¹⁶Pəfalasi pətsə́ pó sóŋ ńgə́, “Ŋwu nə́ a kě lə́ á mbô Əsê lǒo pô, ńté ńgə́ a kě zóʼnə məntəgə́ mə́ alěláʼə́sê pô.” Lə́ pətsə́ pɨ pó pítə ńgə́, “Təmbɔʼ ńgɛd təpɔŋ a pə́ ńtíʼ ńgɛd ntê əkyeʼmə́nu pɨ lə́ ə́lɛ́?” Ńdaŋ ə́lɨ́d pó tíʼ ńgabnə̂.

¹⁷Pó kə́ ḿbɨ ə́sóŋə á mbô əfəg wə́ ńgə́, “Gho sóŋə azô ńgə́ akə̂ ńté yə́, ndzaŋ páʼ a ŋáʼkə nə́ əmə́g mô lə́?” Ŋwu wə̂ ghə́, “Lə́ ntûsê.”

¹⁸Pəjus pó kě pí ńgə́ a nə ḿbə́ lə́ əfəg záʼ ńgyǒ ḿbɔŋə́ jɨ́ əliʼ pô, tə́ ńtíʼ ə́fóŋə tǎ əyǐə pó mǎ əyǐə,

¹⁹ḿbítə ághɔ́b ńgə́, “Lɛ̌ mɔ́ əwɨ páʼ pɨ sóŋ nə ńgə́ pə́ nə ḿbîə yə́ a fɛ́d ḿbə́ əfəg lə́? Lə́ a pɛn ńtíʼ ńgɛlə̂ akə̂ a jɨ́ əliʼ əghâ nə́?”

²⁰Pətǎ pí pó kwěe ńgə́, “Pəg jî ńgə́ lɛ̌ mɔ́ əwəgə́, pə́ nə ńkə́ ḿbîə yə a fɛ́d ḿbə́ lə́ əfəgə́.

²¹Nə əghâ nə́ anuə a ghɛd nə́ yə́ a jɨ́ əliʼ lə́ pəg kě jî pô ńkě kə́ ńjîə ŋwu páʼ a ŋáʼkə nə́ əmə́g mí pô, pítə nə́ a yə́, a kě lə́ mɔ́ pɛ́d pô, a yǐ tséebə a ngǎ yə́.”

²²Tǎ pó mǎ yi nə ńtə́ ńtséebə á zɨ lə́ ńté ńgə́ pó nə́ ńtə́ ḿbɔ́gə Pəjusə, ńté ńgə́ Pəjus pó nə ḿbɛ́d tə ḿbímnə ńgə́, ŋwu ntsəm páʼ a pí nə́ ńgə́ Yeso lə́ Yi Ńtsəʼ nə́ Wə́, pə́ yǐ kəmə̂ a yə á mə́m ndɛ̂sê Pəjusə.

²³Lə́ ghɛlə̂ anu yə ə́wɨ́ tǎ pó mǎ əyǐ pó sóŋ ńgə́, “pə́ pítə a pə́ yí ńté ńgə́ a kě lə́ mɔ́ pɛ́d pô.”

²⁴Ngǎ yitsə̌ pó kə́ ḿbɨ ə́fóŋə a ŋwu wə́ pə́ nə ḿbî nə́ yə a fɛ́d ḿbə́ əfəg lə́ ə́sóŋ nə́ yí ńgə́, “Ŋáŋkə Əsê, ńté ńgə́ pəg jî ńgə́ ŋwu ghɛn lə́ ńgɛd təpɔŋə.”

²⁵Əfəg wə̂ a kwěe ághɔ́b ńgə́, “Təmbɔʼ a pə́ pə́ ńgɛd təpɔŋ, tə ḿbə́ maŋ kě jî pô, táʼə anu maŋ jî nə́ lə́ ńgə́ pə nə ḿbǎtə ḿbîə mə ándó ə́fəg lə́, əghâ nə́ maŋ tə́ ńdjɨ́ əliʼə́.”

²⁶Pó tíʼ ḿbítə a yí ńgə́, “A nə ńgɛd lə́ ə́lɛ́ nə́ gho? A nə ŋáʼ əmə́g mô lə́ ə́lɛ́?”

²⁷A kwěe ághɔ́b ńgə́, “Maŋ pěʼ ḿbɛ́dtə ə́sóŋə á mbô pəənə, nə́ pə́ ńkě chî təmbɔʼ nə́ jwə́ʼtə pô. Nə́ pɨ ńkə́ ńdoonə̂ á mə́ zóʼ nə́ ngǎ yitsə̌ faʼ lə́ akə̂ ə́wə́? Nə́ loonə̂ azɨ́ lə́ mə́ kə́ nə́ pə́ ngaŋə́zoŋə́ndzəm əjí?”

²⁸Pó zɔmtə̂ yí ə́sóŋ ńgə́, “Gho lə́ ndzoŋdzəm əyǐə, lə́ pə̂gpə ḿbə́ lə́ ngaŋə́zoŋə́ndzəm Mosisə.

²⁹Pəg jî ńgə́ Əsê ä tséebə á mbô Mosisə, lə́ ḿbə́ ńgɛn nə́ ŋwu nə́, pəg pěʼ ńkě pə́ nəfɛdnə́ jí jî pô.”

³⁰Ŋwu wə̂ a kwěe ághɔ́b ńgə́, “Anu yə wə̂ á chígə́ ńkɨʼnə̂ áwɨ́ lə́ ə́lɛ́! Nə́ kě nəfɛdnə́ jí jî pô, lə́ a pə̂ ŋ́ŋáʼkə əmə́gə mə.

³¹Pəg jî ńgə́ Əsê a kě á mbô ngaŋə́ghɛlə təpɔŋ jwə́ʼtə pô, a jwə́ʼtə lə́ á mbô pɨ pə́ ghóʼkə nə yí ńkə̈ ə́faʼə̂ anu páʼ ä lɔ nə́.

³²Ə́fɛ́lə a nəchwaakənə́ nə́ mbî, pəg kě kə́ zóʼə ńgə́ ŋwu tsə̌ a pɛ́d tə́ ŋáʼ əmə́g mə́ ŋwu páʼ pə́ nə ḿbî nə́ yə́ a pə́ əfəg pô?

³³Təmbɔʼ ŋwu nə́ a nə ńchî lə́ á mbô Əsê lǒo pô, tə ḿbə́ mbɔʼə a nə ńkě anu yətsə́ faʼ pô.”

³⁴Pó kwěe á mbô yí ńgə́, “Pə́ nə ḿbîə a gho lə́ mə́m təpɔŋ yi ńchaanə̂ nə́, gho pɛn yǐ zéʼkə áwə́g?” Pó tíʼ ńkəmə̂ yə́ á mə́m ndɛ̂sê Pəjusə ə́fɛ̂ apeŋə́.

³⁵Yeso a zóʼ ńgə́ pó pěʼ ńkəmə̂ a yi ə́fɛ̂ apeŋə́, ńchwaalə̂ yí tə ńdjɨ́ ə́sóŋ nə́ yí ńgə́, “Gho néŋ ntɨ́ əghô nə́ Mɔ́ Ŋwu?”

³⁶Ŋwu wə̂ a kwěe á mbô yí ńgə́, “Lə́ əwə ŋwunə Tǎ, ńjî ńgə́ maŋ néŋ ntɨ́ nə́ yə́.”

³⁷Yeso a sóŋə á mbô yí ńgə́, “Gho pɛ́dtə ńdzə́ənə yə́, lə́ kə́ ḿbə́ yí páʼ a tsáb nə́ á mbô gho əghâ nə́.”

³⁸Ŋwu wə̂ a sóŋ ńgə́, “Mmaʼmbî, maŋ néŋ ntɨ́ nə́ gho!” ńtíʼ ńgóʼkə yə́.

³⁹Yeso a sóŋ ńgə́, “Maŋ yǐəə á mbî lə́ á mə́ tsɔ́ʼtə nə́ məsáʼ mə́ pəənə, ńjî ńgə́ pəfəg pó zɨ́ əliʼə́, pɨ páʼ pö jɨ́ nə́ əliʼ pó tíʼ ḿbə́ pəfəgə́.”

⁴⁰Pəfalasi pətsə́ páʼ pó nə ńchî nə́ aliʼ yi ə́wɨ́ ńdzóʼ ndzaŋ páʼ a sóŋ nə́ anu yi ə́wɨ́ lə́, ńtíʼ ə́sóŋə á mbô yí ńgə́, “Pəg kə́ fəgə̂ azə́g?”

⁴¹Yeso a sóŋə á mbô pó ńgə́, “Təmbɔʼ nə pěʼ ḿbə́ lə́ pəfəg, tə ḿbə́ nə́ kě afankə́nu yitsə̌ túg pô, lə́ nə́ pə əghâ nə́ páʼ pɨ sóŋ nə́ ńgə́ pɨ tə́ ńdjɨ́ əliʼ lə́, afankə́nuə azə́ənə́ á chî tsɔʼə ə́wə́.”