Read Awing Məfaʼə 1 Bible Online

Məfaʼə 1 - Awing bible

Məfaʼə 1

¹Á mə́m ntsɛɛmbiə aŋwaʼlə mə á mbô Tiyofilos, maŋ nə ŋ́ŋwaʼlə̂ mənu mətsəm páʼ Yeso a nə ə́faʼ nə́ ńkə́ ńdzéʼkə, ə́fɛ́d nə́ ndɛd páʼ a nə ńchúʼ nə́ afaʼə ajíə,

²tə ńkoʼ nə́ ndɛd páʼ pə́ nə ńdɔg nə́ yí ńkɔ́ʼ ńgɛnə̂ á nəpóolə. Pə́ nə ńjǐ tə́ lɔgə̂ yí kɔ́ʼ ghɛnə̂ nəpó lə́, a fɛ̂ məntəgə́ ńdaŋə̂ á mə́m mətɨ mə́ Ajwǐəsê á mbô məntú mí mə̂ a nə ńtsɔ́ʼ nə́ lə́.

³Ndzaŋə ándó ngə́ʼ əjǐ ə́ nə ḿměe nə́ lə́, a yǐəə á mbi pó ńnɨd mbɨ əjǐə á mbô pó ńkə́ ńnɨd mənu mimə nɨ́ nə́ páʼ mbɔʼ mɨ́d mə́ ghɛd pó pí ńgə́ a chîə á mbîə. A nə̈ ńgabkə̂ ə́fɛ́lə á mbi pó tə ńkoʼ əlěmbî məghə́m mɛ́n nəkwa ə́sóŋə anu ńté Anuə Nəfoonə Əsê.

⁴Ndzaŋ pó po nə ńtə́ nə́ ńjîə məjîə[1] alě yitsə̌ lə́, a sóŋə á mbô pó ńgə́, “Kɔ nə́ fɛ́lə Jɛlusalɛmə, pyáb nə́ ńdaʼnə̂ Tǎ mə a nə ńdaʼnə̂ nə́ áwɨ́ ə́wə́, páʼ maŋ nə ə́fiʼtə̂ nə́ áwɨ́ ńté lə́.

⁵Jɔnə a kə̈ ə́fɛ̂ lə́ nkǐ nə́ pəənə, lə́ nə́ pɔ́ pə́ əlě pətsə́ nə́ yǐ kwá nkǐ Ajwǐəsê.”

⁶Əghâ ándó Yeso pópə məntú mí nə́ ńgyǐ nə́ ńkyeetə̂ aliʼə́ mɔʼə́ lə́, pó pítə Yeso ńgə́, “Mmaʼmbî, gho yǐ pɨnkə̂ nəfoonə á mbô pɨ pə́ Islɛl nə́ ndɛd jɨ́d zə́?”

⁷Yeso a sóŋə á mbô pó ńgə́, “Lə́ kě aliʼə́nuə azə́ənə́ á mə́ jî nə́ ndɛd yi wɨ́ kɨ əghâ yi wɨ́ páʼ Tǎ mə a tsɔʼ nə́ nə́ məmí mətɨ pô.

⁸Lə́ pə́ yǒ fɛ̂ mətəənə á mbô pɨ əghâ ándó Ajwǐəsê a yǒ nə́ tsóolə á ndu pəənə́; pɨ̈ tíʼə fiʼtə̂ pɨ nə́ anu páʼ nə́ jî nə́ ńté mə á mə́m Jɛlusalɛm pópə Judya tsɔʼə ntsəm, nə́ Samalya tə ńkoʼ nə́ məndwigtə mə́ mbî tsɔʼə mətsəmə.”

⁹Əghâ ándó a nə sóŋ nə́ anu jɨ ḿməgtə̂ lə́, pə́ lɔgə̂ yí ńtə́ ńkɔ́ʼə ńgɛnə̂ á nəpó, pó tɨ́ ńtíʼə náŋ ndzaŋə á kɔ́ʼ nə́, tə alə́mə a yǐ ńdyáŋə yə́ á əmə́g pó.

¹⁰Pó nə ḿbɛ́d ńtə́g əmə́g mɔ́b ńtə́ ńnáŋə nəpó ndzaŋə a nə̈ ńgɛn nə́. Tsɔʼə əghâ yi wɨ́ pɨ pə́ pɛ̌ pə́ wê pəfú pə́ ətsəʼ ńtə́əmə á nəpɛnə́ pó,

¹¹ḿbítə ághɔ́b ńgə́, “Pɨ pə́ Galili, pɨ tə́əmə aliʼə́ nə́ ńnáŋə nəpó lə́ ńgə́ akə̂? Yeso ghɛn páʼ pə́ lɔg nə́ yə́ á mbô pɨ ńkɔ́ʼ ńgɛnə̂ á nəpó lə́, a yǒ kə́ pɨ pɨ tsɔʼə ndzaŋ páʼ nə́ jɨ́ nə́ yə́ ä kɔ́ʼə ńgɛnə̂ á nəpó lə̂.”

¹²Məntú mə́ Yeso mə̂ mə́ tíʼ ńdǒ á nkwəənə mətǐ mə́ Olif ḿbəənə̂ á Jɛlusalɛm páʼ lə́ nə ḿbə́ nə́ mɔ́ akəmtə nənyinə ándó táʼ kilóméta á mə́ koʼ nə́ aláʼə.

¹³Pó kwúnə á Jɛlusalɛm ńkɔ́ʼ ńgɛnə̂ á mə́mə atɔ́gə ndɛ̂ pó nə̈ ńchî nə́ ə́wə́ á atǐə. Pɨ pə́ nə ńchî nə́ aliʼ yi wɨ́ lə́ nə ḿbə́ Pita pó Jɔnə, nə́ Jɛmsə ḿbéenə Andəlu, nə́ Filibə ḿbéenə Tɔməsə, nə́ Batolomiə, nə́ Matyo, nə́ Jɛmsə mɔ́ Alfɔsə, ḿbɨ ḿbə́ nə Saamun páʼ a nə ńchî nə́ á mə́m nkyeetə yitsə̌ páʼ pə́ nə fóŋ nə́ nə́ Zilɔlə ḿbɨ ḿbə́ nə́ Juda mɔ́ Jɛmsə.

¹⁴Pó nə ńdzá ńkyeetə̂ aliʼə́ mɔʼə́ ńchaʼtə́sê nə́ táʼ apímnə pópə pəngyě pə̂ páʼ pó nə ńdzoŋ nə́ Yeso lə́, ḿbéenə Mɛɛlə mǎpə Yeso pópə pɔ́pə́mɛ́ pə́ Yeso pipə́ mbyâŋnə.

¹⁵A mə́m əlě pɨ́d pə̂ Pita a lǒo əsê ńtə́əmə a ndzɔʼ pəlimə́ á mə́m Yeso. (Pó nə ńkoʼə̂ ándó pó táʼ nkɛd ńchúʼ məghə́m mɛ́n mə́ mbɛ̌)

¹⁶ə́sóŋ ńgə́, “Pəlimə́ mə, anu páʼ aŋwaʼlə Əsê á nə sóŋ nə á lɔgə̂ aliʼə́ ndzaŋ páʼ Ajwǐəsê a nə ə́sóŋ nə́ á ngoʼ pəchə́ ńdaŋə̂ á mbô Debid ńté Juda páʼ a nə ńnɨd nə́ ndúmə á mbô pɨ pə́ nə ńgwam nə́ Yeso.

¹⁷Juda a nə ḿbə́ lə́ táʼ ŋwunə á mə́m nkyeetə əzɛ̂n ńté ńgə́ pə́ nə ńtsɔ́ʼə yí ńgə́ pɛ̌npo tə́ faʼə̂.”

¹⁸(Juda a nə ńdɔg nkáb páʼ a nə ńkwá nə́ ńté anuə təpɔŋ páʼ a nə ńgɛd nə́ ájɨ́d lə̂ ńjúnə aliʼə́ ndəsê ə́wə́; a nə ḿbɛn ńgwǔ ə́wə́ atoŋə́tóŋə, nəpəm jí nə́ shwegnə̂, mətô mí mə́ túmnə ə́fɛ́lə.

¹⁹Ŋwu ntsəm a Jɛlusalɛmə a nə ńdzóʼə anu zəənə́ ńtíʼ ə́fóŋ əlɛ́nə aliʼə́ ndəsê yi wɨ́ nə́ atséebə aláʼə azɔ́b ńgə́, Akɛldama, páʼ wɨ́d sóŋ nə lə́ ńgə́, “Aliʼə́ Ndəsê Achǐə.”)

²⁰Ńté ńgə́ pə́ ŋwaʼlə̂ á mə́mə aŋwaʼlə Pəsamsə ńgə́, “Tíʼ ndɛ̂ əjǐ ə́ tə́əmə afəmə́; kɔ ŋwu tsə̌ a láʼ ńchî ə́wə́.” Pə́ kə́ ŋ́ŋwaʼlə̂ ńgə́, “Tíʼ ŋwu tsə̌ a lɔgə̂ aliʼə́ ajíə á mə́ faʼ nə́.”

²¹Lə́ələ́ pə́ ńgə́ á pyádnə ḿbɔŋ ńgə́ pɛn tsɔ́ʼə táʼ ŋwunə á mə́m pɛn páʼ pɛ̌npo nə̈ ńchî nə́ ndɛd ntsəm páʼ Mmaʼmbî Yeso a nə̈ ńkád nə́ ńnyinə̂ pɛn pó.

²²Ə́fɛ́d nə́ ndɛd páʼ Jɔnə a nə̈ fɛ̂ nə́ nkǐ tə ńkoʼ nə́ ndɛd pə́ nə ńdɔg nə́ Yeso á mə́m pɛn ńkɔ́ʼ ńgɛnə̂. Ńjî ńgə́ táʼ ŋwunə á mə́m pɨ pɨ́d pɨ a shib ńtɨ́ pɛn pô á mə́ sóŋ nə́ anu ńté mə júmnə nə́ míə.

²³Pó tíʼ ńtə́g pɨ pɛ́n pɛ̌: Jɔsɛf páʼ pə́ nə̈ fóŋ nə́ nə́ Basabasə (pə́ nə ńkə́ ə́fóŋə yí nə́ Justusə), ḿbɨ ḿbə́ nə́ Matyasə.

²⁴Pó tíʼ ńchaʼtə́sê ə́sóŋ ńgə́, “Mmaʼmbî gho jî ntɨ́ ŋwu ntsəmə. Nəələ̂ áwə́g ńgə́ á mə́m pɨ pɨ pɛ́n pɛ̌ gho tsɔ́ʼ lə́ wə́ənə́

²⁵á mə́ lɔg nə́ aliʼə́ afaʼ zəənə́ á mə́ pə́ nə́ ntúmə, aliʼ páʼ Judasə a nə ḿmɛdtə̂ nə́ á mə́ ghɛn nə́ nə́ ajíə aliʼə́.”

²⁶Pó tíʼ ńtə́m pilə́ á mə́ tsɔ́ʼ nə́ táʼ ŋwunə á mə́m pɨ pə̂ pɛ́n pɛ̌, pid wə̂ á wǔəə á ndu Matyasə. Pə́ tíʼ ḿbegə̂ yə́ á mə́m məntú mə́ Yeso mə̂ ntsɔb mɔʼə́.