Read Awing Məfaʼə 12 Bible Online

Məfaʼə 12 - Awing bible

Məfaʼə 12

¹Nə́ ndɛd zɨ́d zə́ əfo Ɛlɔdə a nə ńchwáakə á mə tsaŋkə̂ nə́ nkyeetə pɔ́ pə́ Yeso.

²A nə́ ńgɛd pə jwítə a Jɛmsə á pə́ nə́ mɔ́mɛ́ Jɔn nə́ ŋwíŋ ntsoolə.

³Ndzaŋə a nə ńdjɨ́ nə́ ńgə́ anu zɨ́d zəənə́ a pɔŋ Pəjusə lə́ ńtíʼ ńgɛd pə́ kə́ ńgwaamə̂ a Pita. A nə ńgɛlə̂ anu zɨ́d zɨ lə́ nə́ ndɛd páʼ pɔ́ pə́ Islɛl pə́ nə ńchî nə́ á mə́mə akɔŋtə ndzáʼkə.

⁴Ndzaŋ pə́ nə ńgwam nə́ Pita lə́, əfo a ghɛd pə́ ńnéŋə yə́ á nkáʼə atsáŋə, ńtíʼ ńgɛd ńgə́ əkwɛlə ngaŋə́maʼə́ntso pɛ́n nəkwa pə́ tə́ ńnáŋə yə́. Akwɛlə atsəmə lə́ nə ńchî ngaŋə́maʼə́ntso zɛ́n nəkwa wə́. Ɛlɔdə á kə loonə̂ lə́ mə́ sáʼ nə́ əsáʼ yə́ á əshîsaŋə əghâ páʼ alě akɔŋtə ndzáʼkə á laŋ nə́.

⁵Pə́ tíʼ ńdɔʼkə̂ Pita a nkáʼə atsáŋə, lə́ ngaŋə́zoŋə́ndzəm Yeso ə́ pə̂ ńtə́ ńchaʼtə́sê nə́ ntɨ́ əghɔ́b ətsəm ńté yə́.

⁶Tsɔʼə nətúʼə alě páʼ mbi yǐ nə́ ə́fóg Ɛlɔd a ghɛd pə fógə a yi əsáʼ əsáʼ əyí lə́, Pita a tə́ ńdê á tətɨ pəsoye pɛ́n pɛ̌, pə́ kwúlə yí nə́ məŋkɛd mə́ atəənə́ mɛ́n mə́ mbɛ̌. Ngaŋə́pyáabə əliʼ pó tə́ ḿbyáb ntsǒnkáʼə atsáŋ wɨ́d wə̂.

⁷Tsɔʼə əghâ yi əwɨ́ Ntseŋndɛ̂ Mmaʼmbîə a ghabkə̂ ńtə́əmə aliʼ wɨ́d wə́, nkyaʼ tíʼ ŋ́ŋwaʼə̂ á mə́m ndɛ̂ atsáŋə. Ntseŋndɛ̂sê wə́ a tíʼ ńchiʼə̂ a Pita atûəmbeʼtə ə́sóŋ nə́ yí ńgə́, “Lǒo əsê nə́ mətəənə,” məŋkɛd mə́ atəənə́ mə́ á mbô Pita mə́ kyakə̂ ńgwukə̂ á ndəsê.

⁸Ntseŋndɛ̂sê wə̂ a tíʼ ə́sóŋə á mbô yí ńgə́, “Wê atsəʼə́ azô pópə ngwub əzô.” Pita a faʼ ə́lɨ́d, Ntseŋndɛ̂ wə́ a pɨ ńkə́ ə́sóŋə á mbô yí ńgə́, “Wáatə sooko əgho, ńgyǐ pɔ̌ ghɛnə̂.”

⁹Pita tíʼ ńdzoŋə̂ yí pó yí fɛ́lə á mə́m ndɛ̂ atsáŋ wə̂, a pə́ ńkě jî ńgə́ anu páʼ ntseŋndɛ̂sê wə̂ a faʼ nə́ lə́, lə́ chigə anu pô. A nə ńkwaŋə̂ ají ńgə́ yə́ lê lə́ ndzəəmə atəəmə́tə́əmə.

¹⁰Pó laŋə̂ aliʼ páʼ ntsɛɛmbi ngaŋə́maʼə́ntso pó nə ńtɨ́ nə́ ə́wə́ ńtə́ ḿbyáabə, ńkə́ ḿbɨ́ ḿbə́ nə́ ndzoŋkə aliʼ páʼ pətsə́ ngaŋə́maʼə́ntso pó nə ńtɨ́ nə́ ə́wə́. Ńtíʼ ńtə́ ńdwegtə̂ ńkoʼə̂ á ntsǒnkáʼə atəənə́ páʼ ə́ kwú nə́ á mə́m tə́kɔʼ tɔ́ŋə. Ntsǒnkáʼ ə́ ŋáʼnə á mbô pó á ngǎ yí, pó tíʼ fɛ́lə apeŋ ńkwúnə á alaŋə́ yitsə̌, ndzaŋ pó nə ńtə́ ńnyinə̂ ńtsóolə alaŋə́ lə́, ntseŋndɛ̂sê wə̂ á ghabkə̂ ḿbéŋə yə́ əmə́g Pita.

¹¹Pita a tíʼ ńjîə anu páʼ á laŋ nə́ á mbɨ yí ńtíʼ ə́sóŋ ńgə́, “Əghâ nə́ maŋ jɨ́ ńgə́ lə́ ndə̌ŋdəŋ ńgə́ Mmaʼmbîə a túmə ntseŋndɛ̂ əyǐ ńgə́ a yǐ ə́fógə mə á mə́m mbô mə́ Ɛlɔdə ńkə́ ḿbɨ́ ə́fógə mə á mə́m mənu mətsəm páʼ pɨ pə́ Islɛl pó nə ńkwaŋ nə́ ńgə́ Ɛlɔdə a yǐ ghɛd nə́ maŋə.”

¹²Əghâ ándó Pita a nə ńjî nə́ anu jɨ lə́ ńtíʼ ńgɛnə̂ á ndɛ̂ Mɛɛlə páʼə a pə́ nə́ mǎpə Jɔn páʼə əlɛ́n əyí yitsə̌ nə ḿbə́ nə́ Mag lə́. Pɨ pipə nɨ́ nə́ pó nə ńkyeetə̂ ə́wɨ́ ńtə́ ńchaʼtə́sê.

¹³Pita a póʼtə ntsǒndɛ̂ á apeŋə́. Ngaŋəfaʼ yi məngyě á ndɛ̂ páʼ pə́ nə̈ fóŋ nə́ nə́ Looda a yǐəə mə́ ŋáʼ nə́ ntsǒndɛ̂.

¹⁴Mɔ̂ məngyě wə́ leŋ ngye Pita, mbɨ əjǐ pɔŋ lɛ tə á kə ḿbəənə̂ yí tsɔʼə tə ghə́ á ŋáʼ ntsǒndɛ̂, ńtíʼ fiʼtə̂ ńgə́ Pita a tə́əmə ntsǒndɛ̂.

¹⁵Lə́ pó sóŋ nə́ yí ńgə́, “Gho tə́ ḿbɛ́ɛlə!” A pə́ ńkə́ ə́fyáalə tsɔʼə fyád nə́ ńgə́ lə́ ndə̌ŋdəŋə́. Pó tíʼ ə́sóŋ ńgə́, “Lə́ ntseŋndɛ̂ əyǐə.”

¹⁶Lə́ Pita a ghɛn nə́ mbiə á mə́ póʼtə nə́ tə pó yǐ ńtíʼ ŋ́ŋáʼ ntsǒndɛ̂ ńdzə́ənə yí, á kɨʼnə̂ ághɔ́b lɛ tə tə.

¹⁷Pita a jíʼtə ághɔ́b nə́ apô ńgə́ pó naʼə̂. A tíʼ ə́fiʼtə̂ ághɔ́b ndzaŋ páʼ Mmaʼmbîə a kə fóg nə́ yə́ á nkáʼə atsáŋə. A tíʼ ə́sóŋə á mbô pó ńgə́ “Sóŋ nə́ á mbô Jɛmsə pó pətsə́ pəlim nə́ anu páʼ á laŋ nə́.” Á sóŋ lə́ ńtíʼ ḿmɛdtə̂ ághɔ́b ńgɛnə̂ yə́ aliʼə́ ndaʼə.

¹⁸Mbî ə́ fóg ngaŋə́maʼə́ntso páʼ pó nə náŋ nə́ yí pó chîə á mə́m mɛ́ ajwaʼlə, ńtíʼə ḿbítə məmbɨ mɔ́b ńgə́ lə́ kə laŋə̂ akə̂ ńdaŋ nə́ Pita?

¹⁹Ndzaŋə ándó Əfo Ɛlɔdə a nə náŋ nə́ Pita ńkě jɨ́ pó lə́, ńtɔʼnə̂ mənuə á mbô ngaŋə́pyáabə əliʼ zə́ ńtíʼ ə́sóŋ ńgə́ pə jwítə ághóobə́. Anu zəənə́ a kə laŋ lə́ Ɛlɔdə a mɛdtə̂ aláʼə Judya ńgɛnə̂ á Sisalya ńchî ə́wɨ́ nə́ ndɛd yitsə̌.

²⁰Ɛlɔd a nə ńchígə́ ńdzáŋ ndě nə́ pɨ pə́ Tayile pó Sidɔnə, pó tíʼ ńtsɛntə̂ ńgɛnə̂ á mə́ jɨ́ nə́ yə́. Pó kə póʼmbô nə́ Bəlastusə, ŋwu páʼ á nə náŋ nə́ ntɔ́ʼ ńgə́ á kwáalə ághóobə́. Pó tíʼ ńgɛnə̂ á mbô Ɛlɔd ḿbóʼmbô ńgə́ pó po chî nə́ mbwɔ́dnə, ńté ńgə́ məjî mə́ aláʼ mɔ́b mə́ kə lǒo lə́ aláʼ Əfo Ɛlɔdə.

²¹A nə ḿbə́ alě yitsə̌ páʼ pə́ tsɔ́ʼ nə́, Ɛlɔdə wê atsəʼə́ nəfoonə ají ńnáanə aləŋənə́fɔ yí ńtíʼ ńtséebə á mbô pó.

²²Pɨ pipə wɨ́ pó jwáglə məngye mɔ́b mə́ kɔ́ʼə atǐə, pó sóŋ ńgə́ “Lə́ ngye əsê lə́ kě yí ŋwu pô.”

²³Tsɔʼə əghâ yi wɨ́ ntseŋndɛ̂ Mmaʼmbîə a póʼə yí ḿmaʼə̂, ńté ńgə́ a nə ńkě nəgháʼə á mbô Əsê fɛ̂ pô. Əkəgho kɔ́lə a yə́ a tíʼ ńkwûə.

²⁴Lə́ atséebə Əsê á nə kwíŋ ńkə́ ńgɛn nə́ mbiə.

²⁵Banabas pó Sɔl tíʼ fɛ́lə á Jɛlusalɛm əghâ pó nə məgtə̂ nə́ afaʼ azóobə́. Ńtíʼ ńdɔgə̂ Jɔn páʼ əlɛ́n yí yitsə̌ ə́ pə́ nə́ Mag lə́ pó po fɛ́lə.