Read Awing Məfaʼə 14 Bible Online

Məfaʼə 14 - Awing bible

Məfaʼə 14

¹Anuə á kə lɔg nə́ aliʼə́ á Antiok lə́ zə́ələ́ á kə kə́ nə́ ńdɔgə̂ aliʼə́ Ikonumə: Pɔl pó Banabas kə ghɛnə̂ á ndɛ̂sê Pəjus ńtsáb nə́ əsêndú páʼ Pəjus pópə Pətəjǐsê pipə nɨ́ nə́ pó kə néŋ nə́ ntɨ́ əghɔ́b nə́ Əsê.

²Lə́ Pəjus páʼ pó nə́ ńkě nə́ ntɨ́ əghɔ́b nə́ Əsê néŋ pô pó nə ńtóotə Pətəjǐsê ńgə́ ndě əghɔb záŋ ńté pəlimə́ á mə́m Yeso.

³Pɔl pó Banabasə kə pyádnə ńchî ə́wɨ́, ə́sóŋə anu ntê Mmaʼmbî tə ńkě ŋwu tsə̌ pɔ́gə pô. Mmaʼmbîə a kə nɨd ńgə́ atsáb ntê apɔŋə́ntə́əmə Əsê lə́ ndə̌ŋdəŋə́. A kə fɛ̂ mətəənə a mbô pó ńgə́ pó lɔg ńgɛd əkyeʼmə́nu wɨ́ pópə mənu mə́ yɛ́d nə́ yɛ́d nə́.

⁴Pɨ pó kə chî nə́ á mə́m tə́kɔʼ tɔ̂ŋ ghɛn pó kə ghabnə̂, pətsə́ pó tə́ ńdzoŋə̂ Pəjus pətsə́ pə́ tə́ ńdzoŋə̂ Pɔl pó Banabasə.

⁵Lə́ Pətəjǐsê pópə Pəjus pətsə́ ńdzoŋ ḿbá mətû mɔ́b wɨ́, pó tyáŋə mənaŋə́ á mə́ nɨd nə́ məntú mə́ Yeso mə́ nə́ ngə́ʼ pɨ kə́ tə́mtə ághɔ́b nə́ məngɔʼə.

⁶Məntú mə́ Yeso mə́ mə́ kə zóʼə anu yə wɨ́ lə́ ńtíʼ ńkə ńgɛnə̂ ághóobə́ á mə́m pətə́kɔʼ pə́ tɔ̂ŋ pətsə́ páʼ pə́ kə chî nə́ Layikonya pə́ fóŋə nə́ Listəla pó Debə, ḿbɨ́ ńdzoŋ ḿbá əláʼ pətsə́ wɨ́ páʼ ə́ kə chî nə́ ḿbáatə,

⁷ńtíʼə ńnáŋkə nkɨ yi əshîʼnə wə́ ə́wə́.

⁸Á mə́mə aláʼə Listəla ŋwu tsə̌ a nə ńchî wɨ́ páʼ a kə pə́ nə́ kɔ́ŋə́sê, ə́fɛ́lə ándó pə́ kə pî nə́ yí a kə̂ ńnáanə lə́ tsɔʼə náanə nə́.

⁹A náanə ḿbyádnə ńjwə́ʼtə atséebə Pɔlə. Pɔl a náŋ ńjɨ́ ńgə́ a néŋ ntɨ́ yí wɨ́ ńkə́ ńtúg mbimə́ mbɔʼ pə́ tsóʼə yə́, ńtíʼ ńtə́g əmə́g nə́ yí ńnáŋə yí,

¹⁰ə́sóŋ nə́ tə́kɔʼ ngye ńgə́, “Lǒo əsê ńtɨ́ ndə̌ŋdəŋ nə́ məko mô!” Ŋwu yi wə́ á lî ńkɔ́ʼə atǐ ńtíʼ ńchúʼə mə́ nyintə̂ nə́.

¹¹Əghâ ándó mboŋ pɨ zə́ nə ńjɨ́ nə́ anu páʼ Pɔlə a faʼ nə́ lə́, ńtíʼ ńchúʼə mə́ tsáb nə́ məngye mɔ́b mə́ kɔ́ʼə atǐ nə́ atséebə Layikonya, páʼə á pə́ nə́ atséebə azɔ́b ə́sóŋə ńgə́, “Məsê mə́ sɛdnə̂ ńchîə ándó pəənə, ńtíʼ ńtsó ńchîə á mə́m pɛnə̂!”

¹²Pó kə fɛ̂ əlɛ́nə á mbô Banabas ńgə́ lə́ Zus, ḿbɨ́ fɛ̂ yi Pɔl ńgə́ lə́ Emes ńté ńgə́ lə́ ŋwu páʼ a kə tɨ́ nə́ mbiə.

¹³Lə́ mbêsê Zus páʼ nəpá jí nə́ nə ńchî nə́ tsɔʼə á nəpɛnə́ tə́kɔʼ tɔ̂ŋ lə́, ə́ lɔg pəlú pə́ na pópə pəfəlawa ńgyǐəə á ntsǒnkáʼ ńjî ńgə́ pópə apoŋə pɨ páʼ á kə chî nə́ aliʼ yə wɨ́ ghɛlə̂ afyaʼə́nuə á mbô Pɔl pó Banabasə.

¹⁴Lə́ əghâ ándó Pɔl pó Banabas nə ńdzóʼ nə́ anu pó lɔ nə́ mə́ faʼ nə́ lə́, ə́sɛɛtə̂ ətsəʼ əpɔ́b ńtíʼ ńkə ńkwúnə á mə́mə apoŋə pɨ zə́ ńtíʼə ńtɔ́ŋnə ə́sóŋə ńgə́,

¹⁵“Pɨ ghɛlə̂ zəənə́ anu lə́ ńté akə̂? Pəg kə́ ḿbə́ azə́g lə́ tsɔʼə pəənə ándó pəənə́! pəg yǐ lə́ mə́ náŋkə nə́ nkɨ yi əshîʼnə, á mə́ fóg nə́ áwə́ənə́ á mə́m ənukə́taŋ pəənə́, pɨ zoŋ Əsê páʼ ə́ chî nə́ mbîə, páʼ a kə tsoŋkə̂ nə́ nəpó pó ndəsê nə́ nə́ənə, ndzoŋ ḿbá əpú ətsəm ə́ chî nə́ á mə́m wə́.

¹⁶A nə ḿbə́ ntsɛɛmbi lə́ a mɛdtə̂ ətú mbî ətsəm ńgə́ pó faʼ mənu mɔ́b ndzaŋ pó kɔŋ nə́.

¹⁷Lə́ ńdaŋə̂ á mə́m mənu mimə́ əshîʼnə páʼ a faʼ nə́ pɛn jî ńgə́ a chîə mbîə; a ə́fɛ̂ mbəŋə á mbô pɨ ḿbəənə̂ ńgɛlə̂ məjî mə́ kɔ́ʼə nə́ chigə ndɛd əyǐə, ḿbəənə̂ ə́fɛ̂ məjîə á mbô pɨ ńkə́ ńgɛlə̂ nə́ chîə mə́mə akɔŋtə.”

¹⁸Pó nə ḿbǎtə ńtsáb ndɛn mənu ghɛn lə́, atsáb yəwə́ pə́ ńkě ághɔ́b kɨ́ʼ ńgə́ kɔ pó fyaʼə́nuə á mbô pó pô.

¹⁹Lə́ Pəjusə pətsə́ pó ə́fɛ́lə Antiok pó Ikonum ńgyǐ ə́wɨ́ ə́sɛdkə̂ məntɨ́ mɔ́b ńtíʼ ńgɛd pó tə́mtə Pɔl nə́ məngɔʼ ńtíʼ ə́soŋə̂ yí ə́fógə á mə́m tɔ́ŋə, ńkwaŋə̂ azɔ́b ńgə́ a kwûə.

²⁰Lə́ əghâ ándó pɨ pó néŋ nə́ ntɨ́ nə́ Yeso pó kə tɨ́ nə́ ńdíblə yí lə́, á lǒo á ndəsê ḿbəənə̂ yə́ á mə́m tə́kɔʼ tɔ́ŋə. Mbî ə́ fóg pó Banabasə ghɛnə̂ ághɔ́b yə́ Debə.

²¹Pɔl pó Banabas kə náŋkə nkɨ yi əshîʼnə á Debə, pɨ pipə nɨ́ nə́ pó sɛdnə̂ ńtíʼ ngaŋə́zoŋə́ndzəm Yeso. Pó tíʼ ḿbəənə̂ Listəla, ńdǒo wɨ́ ńkwúnə Ikonum, ḿbɨ́ ə́fɛ́lə Ikonum ńgɛnə̂ Antiok páʼə á chî nə́ Pisidya lə́.

²²Ńtíʼə ńnéŋə məntɨ́ mə́ ngaŋə́zoŋə́ndzəm Yeso ḿbóʼtə́mbô á mbô pó ńgə́ pó mɛdnə̂ á mə́m mbimə́. Ḿbəənə̂ ə́sóŋə ńgə́, “Pɛn yǐ shib laŋə̂ á mə́m məngə́ʼ mimə nɨ́ nə́ záʼ pɔŋə̂ ə́ kwúnə á mə́mə Anuə Nəfoonə Əsê.”

²³Á mə́m nkyeetə pɔ́ pə́ əsê ətsəm pó tsɔ́ʼtə mətûə, ńchî nə́ nji ńchaʼtə́sê ə́fɛ̂ ághóobə́ á mbô Mmaʼmbîə, ŋwu páʼ pó néŋ nə́ məntɨ́ mɔ́b nə́ yə́.

²⁴Pó tíʼ ńdaŋə̂ á mə́mə aláʼə Pisidya ńtíʼ ńgyǐ ńkwúnə á Pamfilya.

²⁵Əghâ ándó pó nə ə́sóŋ nə́ anǔəsê á Pega lə́ ńtíʼ ńtsó ńgɛnə̂ Atalya,

²⁶ə́fɛ́d ə́wɨ́ ńtíʼ ńnyinə̂ á mə́m nkǐ ńgɛnə̂ Antiok, aliʼ páʼ pə́ nə ə́fɛ̂ nə́ ághɔ́b ńgə́ Əsê á túg nə́ apɔŋə́ntə́əmə ají ńté afaʼə ándó pó kə məgtə̂ nə́.

²⁷Əghâ ándó pó nə ńkwú nə́ Antiok lə́ ńtíʼ ńtsɛntə̂ pəənə ándó pó chî nə́ á mə́m nkyeetə pɔ́ pə́ əsê ə́fiʼtə̂ anuə atsəm páʼ Əsê a faʼ nə́ á mbô pó, ńkə́ ḿbɨ́ ḿbə́ nə́ ndzaŋə ándó a ŋáʼkə nə́ ndúmə á mbô Pətəjǐsê pó néŋ ntɨ́ əghɔ́b nə́ yə́.

²⁸Pó kə pyádnə ńchîə aliʼ yə wɨ́ pópə ngaŋə́zoŋə́ndzəm Yeso tə ndi sagə̂.