Read Awing Məfaʼə 16 Bible Online

Məfaʼə 16 - Awing bible

Məfaʼə 16

¹Pɔl pó Silasə ghɛn ńkoʼə̂ á tɔ̂ŋ Dɛbə, ə́fɛ́d ə́wɨ́ pó ghɛn nə́ yətsə́ aláʼ pə́ fóŋ nə́ nə́ Listəla, ndzoŋdzəm Yeso yitsə́ a nə ńchî ə́wɨ́ pə́ fóŋə nə́ Timotiə. A nə ḿbə́ lə́ mɔ́ məngyě yitsə̌ páʼ a nə ḿbə́ nə́ ŋwu Jusə, ńkə́ ḿbî ńdzoŋ ndzəm Yeso, lə́ tǎ əyǐə á nə́ ḿbə́ lə́ ŋwu Glikə.

²Pəlim pətsəmə á mə́m Listəla pó Ikonum tsáb əshîʼnə ńté Timoti.

³Pɔlə a nə ńdɔ ńgə́ Timoti a ghɛn pó yə́, A tíʼ ńdɔgə̂ yí, ḿbóʼə yí ńté ńgə́ Pəjus pó nə ńchî nə́ á mə́m əliʼ pipə wɨ́ pó nə́ ńjî ńgə́ tǎ əyǐ lə́ ŋwu Glikə.

⁴Ndzaŋə ándó pó nə̈ ńgɛn nə́ ńdaŋə̂ á mə́m pətə́kɔʼ pə́ tɔ̂ŋ lə́, ə́fiʼtə̂ pəlimə́ á mə́m Yeso páʼ pó nə ńtéekə nə́, nə́ mənu páʼ məntú mə́ Yeso pópə mətû mə́ nkyeetə á Jɛlusalɛm nə́ ńdɔg nə́ ándó pənoŋkə pó chî nə́ mə́ zoŋ nə́.

⁵Ńdaŋ ə́lɨ́d, mənkyeetə mə́ pɔ́ pə́ Əsê mə́ tɨ́ ńtyantə̂ á mə́m mbimə́ əzoobə́, ndɛn əghɔ́b tíʼə ḿbegə̂ á mə́m əlě mbî ətsəm páʼə ə́ kə laŋ nə́.

⁶Pɔl pópə ngaŋmə́ko əjí nyi ńdaŋə̂ á mə́m mboʼ Fligya pó Galatya, ńté ńgə́ Ajwǐəsê a kə kě pí ńgə́ pó sóŋə anǔəsê á mə́m əlá aláʼ Esya nə́ ndɛd yi ə́wɨ́ pô.

⁷Əghâ ándó pó nə́ ńkwú nə́ á ndɛtə Mysya pó Bitinya, ńtíʼə ńdoonə̂ á mə́ ghɛn nə́ á Bitinya, Ajwiə Yeso a pə́ ńkě pí ńgə́ pó ghɛn ə́wɨ́ pô.

⁸Pó tíʼ ńgɛn nə́ mbi ńdaŋə̂ á mə́m Mysya ńtsó ńgɛnə̂ aláʼ Təlowasə.

⁹Ə́wə́, Pɔlə a lê ndzəəmə atəəmə́tə́əmə á nətúʼ ńgə́ ŋwu tsə́ á fɛ́lə á aláʼə Məsidonya ńgyǐ ńtə́əmə á mbi yí ńtíʼ ḿbóʼmbô nə́ yí ə́sóŋ ńgə́, “Yǐəə á mboʼ Məsidonya ńkwáalə áwə́gə́.”

¹⁰Əghâ ándó Pɔl a nə ńdê nə́ ndzɨ yi wɨ́ lə́, tsɔʼə əghâ yi ə́wɨ́ pəg lɔ ndú ətsəmə á mə́ ghɛn nə́ Məsidonya, ńté ńgə́ pəg kə pyádnə ńjî ńgə́ lə́ nə ńtə́ fóŋ Əsê fóŋə áwə́g ńgə́ pəg ghɛn ńnáŋkə nkɨ yi əshîʼnə á mbô pɨ pə́ aliʼ yə ə́wə́.

¹¹Pəg məgtə̂ Təlowas ńnyinə̂ á mə́m nkǐ ńgɛn ndə̌ŋdəŋ á Samodlasə, mbî fóg pəg ghɛnə̂ a Nyapolisə.

¹²Ə́fɛ́d ə́wɨ́ ńnyi ńgɛnə̂ á Filipiə a nə ḿbə́ nə́ lə́ ntsɛɛmbi tə́kɔʼ tɔ́ŋə[11] á mə́m mboʼ Masedonya, lə́ nə ḿbə́ aláʼ páʼ pɨ pə́ Loman pó kə kwúd nə́ ńchî ə́wə́. Pəg chîə á mə́m tɔ̂ŋ wɨ́d ghɛn nə́ əlěmbî pətsə́.

¹³Ndzaŋə ándó Alěláʼə́sê á nə ńgyǐ nə́ lə́, pəg fɛ́lə á mə́m tɔ̂ŋ ńgɛnə̂ á nkǎŋkǐə, aliʼ páʼ pəg nə́ ńkwaŋ nə́ ńgə́ pɨ pə̈ jwánə ə́wə́ á mə́ chaʼtə̂ nə́ Əsê, ńnáanə əsê ńtíʼ ńtséebə á mbô pəngyě páʼ pó nə ńkyeetə̂ nə́ ə́wə́.

¹⁴Məngyě yitsə̌ a nə ńchî ə́wɨ́ pə̈ fóŋə yí nə́ Lidya, a nə́ fɛ́lə á mə́m tə́kɔʼ tɔ̂ŋ páʼ pə́ fóŋ nə́ ńgə́ Tiyatika lə́. A nə ḿbə́ lə́ ntâŋməteenə́, ə́finə̂ lə́ ətsəʼ pipə dya nə́ páʼ pɨ́d nə́ ḿbə́ nə́ paŋpaŋə. A nə ńkə̈ ńgóʼkə Əsê, Mmaʼmbîə a tíʼ ŋ́ŋáʼ ntɨ́ əyí a jwə́ʼtə anu páʼ Pɔlə a nə́ sóŋ nə́, ńkə́ ḿbí ńdzoŋə̂ anu páʼ Pɔlə a kə sóŋ nə́.

¹⁵Əghâ ándó a nə ńkwá nə́ nkǐ ḿbéenə ŋwu ntsəm páʼ á nə chî nə́ á ndɛ̂ yí lə́, ḿbóʼmbô nə́ pəg ńgə́, “Mbɔʼ nə́ lɔgə̂ á mə́ ándó ŋwu páʼ a néŋ nə́ ntɨ́ yí nə́ Mmaʼmbî, nə́ yǐ ńchîə á ndɛ̂ maŋə.” A kə tə́g nə́ pəteenə́, tə pəg ghɛnə̂.

¹⁶Ndzaŋ pəg kə tə́ nə́ ńgɛnə̂ aliʼə́ achaʼtə́sê lə́, ńjwánə mɔ̂ məngyě yitsə̌ páʼ a nə ḿbə́ nə́ apoʼə. A nə ńtúgə Ajwiə təpɔŋ páʼ a nə ńgɛd nə́ ä sóŋə mənu á mbô pɨ páʼ mə́ yǐ nə́ lɔgə̂ aliʼə́. A kə̈ ghɛd ndɛn mənu ghɛn lə̈ ə́faʼ nkáb yi nɨ́ nə́ ə́fɛ̂ á mbô pɨ pó nə ńdɔʼkə̂ nə́ yə́ ándó apoʼ lə́.

¹⁷Əghâ ándó a nə ńdzɨ́ nə́ áwə́g lə́, ńchúʼə á mə́ zoŋ nə́ Pɔl ńkə́ ńdzoŋə̂ áwə́gə́, ńtïʼ ńgyɛ́ɛlə ə́sóŋə ńgə́, “Lɛ̌ ngaŋə́faʼ Əsê, Əsê páʼə a tsɛ nə́ ajúmə atsəmə, pö fiʼtə̂ áwɨ́ lə́ nə́ ndú páʼ mbɔʼ pə́ laŋ wɨ́ ńchwáalə.”

¹⁸A kə faʼə̂ anu zɨ nə́ əlěmbî pipə nɨ́ nə́. Lə́ Pɔlə pə́ ńdzáŋ ndě ə́sóŋə á mbô ajwiə təpɔŋ zə̂ ńgə́, “Nə́ əlɛ́n Yeso Klisto maŋ sóŋ ńgə́ gho fɛ́lə á mə́m mɔ̂ məngyě nə́!” Tsɔʼə əghâ ə́wɨ́ ajwiə təpɔŋ zə̂ á fɛ́lə á mə́m mɔ̂ məngyě ə́wə́.

¹⁹Lə́ pɨ páʼ pó nə́ ńtúg nə́ a mɔ̂ məngyě wə́ pó jɨ́ ńgə́ ndú páʼ pó nə̈ ńtúg nə́ nkáb əzɔb wɨ́ ə́ kě wɨ́ pɨ̌ ńchî pô, Pó tíʼ ńgwaamə̂ Pɔl pó Silasə ə́soŋə̂ ághɔ́b ńgɛn nə́ pó á tətɨ məteenə́ á mbi mətû mə́ aláʼə.

²⁰Əghâ ándó pɨ pó nə ńtúg nə́ mɔ̂ məngyě ə́wə́ pó nə ńdɔg nə́ Pɔl pó Silasə ńgyǐ nə́ pó á mbi ngaŋə́sáʼə́məsáʼ lə́ ńtíʼ ə́sóŋ ńgə́, “Pɨ pɨ lə́ Pəjusə, pó tə́ maʼə̂ ajwaʼlə á mə́m tə́kɔʼ tɔ̂ŋ əwɛ̂nə.”

²¹Pö zéʼkə áwɛ̂n nə́ mənu páʼ noŋkə əwɛ̂n Pəlomanə a kě nə́ pí ńgə́ pɛn zoŋ pô.

²²Mboŋ pɨ zə̂ kwúnə azɔ́b wɨ́ ńchwáakə mə́ jwábtə nə́ Pɔlə pó Silasə, ngaŋə́sáʼə́məsáʼ zə̂ ə́sɛɛtə̂ ətsəʼ Pɔl pó Silasə mɛdtə̂ ághɔ́b ntə̌blə, ńtíʼ ńgɛd pə́ shúmə ághɔ́b nə́ ngwanə atəənə́.

²³Əghâ ándó pə́ nə ńchígə́ nə́ ə́shúmə ághɔ́b lə́, ńtíʼ ńnéŋə ághóobə́ á nkáʼə atsáŋə, ə́sóŋ nə́ ŋwu páʼə a kə náŋ nə́ nkáʼə atsáŋ lə́ ńgə́, a lɔg ndɛd nə́ pó kɔ pó kəələ̂.

²⁴Ndzaŋ ŋwu páʼ a nə ńnáŋ nə́ nkáʼə atsáŋə a kə zóʼ nə́ ntəgə́ zɨ lə́, ńtíʼ ńnéŋ ághɔ́b nə́ atɔ́g páʼə á chî nə́ á tətɨ nkáʼə atsáŋə, ńtíʼ ńnéŋ məko móobə́ á mə́m kəpoʼə.

²⁵A yǐ ḿbə́ ándó ntɨ̌túʼ, Pɔl pó Silasə tə́ ńchaʼtə́sê ńtûə ńdzoobə̂ mənkǐ ńgóʼkə Əsê, ngaŋə́tsáŋ tíʼə ńjwə́ʼtə.

²⁶Tsɔʼə əghâ yi wɨ́ ndəsê páʼ atsáŋə á kə tɨ́ nə́ ndu wɨ́ ə́ tíʼə̈ ńchiʼnə̂ tsɔʼə nə́ mətɨ mətəənə, ńdaŋ ə́lɨ́d nchîndɛ̂ atsáŋ chiʼnə̂, məntso mə́ ndɛ̂ mə́ tíʼ ŋ́ŋáʼkə, məŋkɛd mə́ atəənə́ pə́ kə kwúd nə́ ngaŋə́tsáŋ wɨ́ mə́ kyakə̂.

²⁷Əghâ ándó ŋwu páʼ á náŋ nə́ nkáʼə atsáŋ a kə jimnə̂ nə́ lə́, ńtíʼ ńdjɨ́ ńgə́ məntso mə́ ndɛ̂ mətsəm á nkáʼə atsáŋ mə́ kə ŋáʼkə. A tsɔ́ʼə mɔ́ ŋwéŋ ntso ńtə́ ńdoonə̂ mə́ jwítə nə́ mbɨ əji wɨ́, nə́ akwaŋ ńgə́ ngaŋə́tsáŋ shamnə̂ ńkəəkə̂.

²⁸Lə́ Pɔlə á kyéŋ nə́ tə́kɔʼ ngye ə́sóŋ ńgə́, “Kɔ límkə mbɨ əzo, pəg pətsəm chîə aliʼə́ nə́!”

²⁹Ŋwu páʼ a nə̈ náŋ nə́ nkáʼə atsáŋ lə́ a ghɛd pə́ yǐ nə́ nkyaʼ ə́fɛ̂ nə́ yə́, a kə ńkwúnə á mə́m nkáʼə atsáŋ nə́ mətəənə, ńgwǔəə á məko Pɔl pó Silasə ńtíʼə ḿbénkə nə́ apɔ́gə.

³⁰A tíʼ ńdɔgə̂ Pɔl pó Silasə ńgɛnə̂ apeŋ ḿbítə ághɔ́b ńgə́, “Mbɔʼ maŋ shib ńgɛd lə́ ə́lɛ́ ḿbɔŋə́ chwáalə?”

³¹Pó kwěe yí ńgə́, “Néŋ ntɨ́ əghô nə Mmaʼmbî Yeso, ńjî ńgə́ gho chwáalə, pɨ̌pə ngwud əzo ntsəmə.”

³²Pɔl pó Silasə tíʼ náŋkə nkɨ Mmaʼmbîə á mbô yí, ńdzoŋ ḿbéenə ŋwu ntsəm páʼ a nə ńchî nə́ ndɛ̂ yə́.

³³A tíʼ ńdɔgə̂ ághɔ́b tsɔʼə əghâ wə́ á nətúʼ ə́sog məfəŋ mɔ́b, pə́ tíʼ ə́fɛ̂ nkǐ nə́ yí ńdzoŋ ḿbá ngwud əjǐ tsɔʼə ntsəmə.

³⁴A tíʼ ńdɔgə̂ ághɔ́b ńgɛnə̂ á ndɛ̂ yí ə́fɛ̂ məjîə á mbô pó ńgə́ pó jîə. Yə́, ḿbéenə á ŋwu ntsəmə á ndɛ̂ yí pó nə ḿbyádnə ńchígə́ ńkɔŋtə̂ ńgə́ pó néŋ ntɨ́ əghɔ́b nə́ Əsê.

³⁵Mbî ə́ fóg, ngaŋə́sáʼə́məsáʼ zə̂ ə́ tú ngaŋə́maʼə́ntsoolə á mbô ŋwu páʼə a nə ńnáŋ nə́ nkáʼə atsáŋ lə́ ńgə́, “Mɛdtə̂ pɨ pə̂ pó ghɛnə̂.”

³⁶Ŋwu páʼ a nə náŋ nə́ nkáʼə atsáŋ lə́ a tíʼ ə́fiʼtə̂ anu yə ə́wə́ á mbô Pɔl, ńgə́, Ngaŋə́sáʼə́məsáʼ ə́ sóŋ ńgə́ maŋ mɛdtə̂ áwɨ́ nə́ ghɛnə̂, laŋ nə́ ńtíʼ ə́fɛ́d ńgɛn nə́ mbwɔ́dnə.

³⁷Lə́ Pɔlə á sóŋə á mbô ngaŋə́maʼə́ntso zə́ ńgə́, “Pó ghɛd pə́ shúmə áwə́gə́ á əshîsaŋə, ńtíʼ ńnéŋə áwə́gə́ á nkáʼə atsáŋə, páʼ pəg kě nə́ əsáʼ yitsə̌ wǔ pô, pəg pɨ ńkə́ ḿbə́ tsɔʼə pɨ pə́ Lomanə, pó tíʼə ńdɔ əghâ nə́ ńgə́ pəg pánə ə́fɛ́lə á nkáʼə atsáŋə? mbɔʼ pəg kě fiʼ pô. Pó chîə á mə́ yǐ nə́ á ngǎ pó ə́fógə áwə́gə́.”

³⁸Lə́ ngaŋə́maʼə́ntso zə́ pó ghɛn ə́fiʼtə̂ anuə atsəmə á mbô ngaŋə́sáʼə́məsáʼ tsɔʼə ndzaŋ Pɔl a pěʼ nə́ ə́sóŋə. Ngaŋə́sáʼə́məsáʼ nə ḿbɔ́g ńté ńgə́ pó nə ńdzóʼ ńgə́ Pɔl pó Silasə lə́ pɨ pə́ Loman.

³⁹Ngaŋə́sáʼə́məsáʼ zə̂ ghɛn ḿbóʼmbô á mbô Pɔl pó Silasə ńgə́ pó ləgnə̂ awǔənuə azóobə́, ńtíʼ ńdɔgə̂ Pɔl pó Silasə ə́fɛ́d nə́ pó á nkáʼə atsáŋ ńtíʼ ńgɛd pó mɛdtə̂ á tə́kɔʼ tɔ̂ŋ yi ə́wə́.

⁴⁰Pɔl pó Silasə tíʼ ḿmɛdtə̂ nkáʼə atsáŋ ńgɛnə̂ á ndɛ̂ Lidya. Pó tséebə á mbô pəlim pə́ pó nə ńtéekə nə́ ə́wɨ́ lə́ ńkə́ ńtû néŋ ntɨ́ əghóobə́, ńtíʼ ḿmɛdtə̂ á tɔ̂ŋ Filipi ńgɛnə̂ ághóobə́.