Read Awing Məfaʼə 17 Bible Online

Məfaʼə 17 - Awing bible

Məfaʼə 17

¹Pɔlə pó Silasə tóokə á mə́m tɔ̂ŋ Amfipolis pó Apolonya ńtíʼ ńgɛnə̂ á Tɛsalonika, aliʼə́ ándó ndɛ̂sê Pəjus nə chî nə́ ə́wə́.

²Pɔl a ghɛn ńkwúnə á ndɛ̂sê Pəjus ndzaŋə a nə̈ ńgɛd nə́ aliʼə́ atsəm páʼ ndɛ̂sê ə́ chî nə́ ə́wə́. Á mə́m əlěláʼsê pɛ́n teelə́ pó po kəʼlə̂ atsáb ńté mənuə á mə́mə aŋwaʼlə Əsê,

³a nə ńdoonə̂ lə́ á mə́ kwá nə́ ághɔ́b pó jî ńgə́ a nə ńkoʼnə̂ ńgə́ yi páʼ Əsê a Tsəʼ nə́ lə́ a chîə mə́ zɨ́ nə́ ngə́ʼ kə́ kwû pɨ júmnə nəwûə. Pɔl a nə sóŋə á mbô pó lə́ ńgə́ Yeso ghɛn páʼ maŋ fiʼtə̂ nə́ áwɨ́ nə́ anu ńté yí lə́, “Lə́ yí páʼ a pə́ nə́ yi ńtsəʼ nə́.”

⁴Pó pətsə́ Pəjus pó nə ńdzóʼə anu yə́ ə́wɨ́ ḿbímə, ńtíʼ ńdzoŋ ndzəm Pɔl pó Silasə. Pɨ pə́ Glik pipə nɨ́ nə́ páʼ pó nə̈ ńgóʼkə Əsê pɔ́ pə́ Islɛl ḿbɨ ḿbə́ nə́ mətû mə́ pəngyě tə nɨ́ nə ńkə́ ḿbí ńdzoŋ ndzəm Pɔl pó Silasə.

⁵Lə́ Pəjus pətsə́ pó kə túgə ŋwéetə́ ńté Pɔl pó Silasə, ńtíʼ ńkyeetə̂ mboŋ pəənə; ngaŋə́ghɛlə mənu mə́ təpɔŋə; ngaŋə́fɛ̂ngə́ʼə, pɨ pə́ kě nə́ atûə anu yətsə́ chî pô ḿbɨ́ ḿbə́ nə́ pəlɔŋə́, pó chúʼə á mə́ maʼ nə́ ajwaʼlə á mə́m tə́kɔʼ tɔ́ŋə. Mboŋ pɨ zɨ kə ghɛn ńgwam pɨ pó kə chî nə́ ndɛ̂ Jasɛn nə́ məlaʼə́ á mə́ náŋ nə́ Pɔl pó Silasə ə́lɔgə̂ ághɔ́b yǐ nə́ pó á mbi nkyeetə ə́ kə chî nə́ apeŋə́.

⁶Lə́ əghâ ándó pó nə ńkě nə́ Pɔl pó Silasə jɨ́ pô lə́, ńtíʼ ńgwaamə̂ á Jasɛn pópə pəlim pə́ pətsɨ́ ə́soŋə̂ ághɔ́b ńgɛnə̂ á mbi mətû mə́ tə́kɔʼ tɔ́ŋə, ńtíʼə̈ ńtɔ́ŋnə ə́sóŋə ńgə́, Pɨ pɨ páʼ pó maʼ nə́ ajwaʼlə á mə́m mbî ntsəm lə́ pó nyi tə ńkoʼə̂ á mə́mə aláʼ pɛnə̂,

⁷tə Jasɛnə a lɔgə̂ ághóobə́ á ndɛ̂ yə́, pó pətsəm tə́ ńkǐə pənoŋkə pə́ əfo əwɛn Kasa ə́sóŋə ńgə́, “Yitsə̌ əfo a chî ə́wɨ́ pə́ fóŋ nə́ nə́ Yeso.”

⁸Ndzaŋ pɨ pə́ pópə mətû mə́ tə́kɔʼ tɔ̂ŋ mə́ pó kə zóʼ nə́ atsáb zɨ lə́ ńdzáŋ ndě lɛ̂ tətətə.

⁹Əghâ ándó Jasɛn pó pətsə́ pəlim á mə́m Yeso pó kə tû nə́ nkáb yitsə̌ pə́ kə noŋkə̂[12] nə́ ńgə́ pó tû lə́, pə́ tíʼ ḿmɛdtə̂ ághɔ́b pó ghɛnə̂.

¹⁰Túʼə a nə́ ńkə́ sɛ́n tsɔʼə sɛ́n nə́ lə́, pəlim á mə́m Yeso pó ghɛd Pɔl pó Silasə ghɛnə̂ á Bɛlya. Ndzaŋ pó nə ńgɛn nə́ ńkwú ə́wɨ́ lə́, ńtíʼ ńgɛnə̂ á ndɛ̂sê Pəjusə.

¹¹Pəjusə pə́ nə ńchî nə́ Bɛlya pó nə́ ŋáʼ ntɨ́ əghóobə́ á mə́ jwə́ʼtə nə́ á mbô Pɔl pó Silasə ńtsɛ Pəjus pó nə ńchî nə́ Tɛsalonika, ńté ńgə́ pó nə ńkwá nkɨ yi əshîʼnə ńté Yeso klisto nə́ táʼ ntɨ́ ńkə̈ ńdzéʼə aŋwaʼlə Əsê əlě ətsəm á mə́ jɨ́ nə́ ńgə́ anu páʼ Pɔl pó Silasə sóŋ nə́ lə́ á koʼnə̂ á mə́mə aŋwaʼlə Əsê.

¹²Ńdaŋ ə́lɨ́d pó pipə nɨ́ nə́ néŋ ntɨ́ nə́ Yeso, pətə́kɔʼ pə́ pəngyě pə́ Glik tə nə́ənə, ńdzoŋ ḿbeg mbyâŋnə wə́.

¹³Lə́ əghâ ándó Pəjus pó nə ńchî nə́ Tɛsalonika pó kə zóʼ nə́ ńgə́ Pɔlə a kə́ ńtə́ ə́sóŋə anǔəsê á mbô pɨ pə́ Bɛlya lə́, pó ghɛn ə́wɨ́ ńtíʼ ńtóotə pɨ pi wɨ́ ńgə́ pó fɛ̂ ngə́ʼə.

¹⁴Tsɔʼə əghâ yi wɨ́ pəlim pə́ pó ghɛn ńchaakə̂ yə́ á nkaŋ nə́ənə, á ndú páʼə á chî nə́ mə́ ghɛn nə́ wə́, lə́ Silasə pó Timoti tíʼ ḿbɛ́lə Bɛlya.

¹⁵Pɨ páʼ pópə Pɔl nə ńgɛn nə́ lə́ pó kə lɔgə̂ á yí ńgɛn tə ńkoʼə̂ á Atɛnsə. Pɔlə tíʼ ḿbinkə̂ ághóobə́ á Bɛlya nə́ nkɨ ńgə́ Silas pó Timoti téekə yə́ Atɛnsə nə́ mətəənə.

¹⁶Ndzaŋ Pɔl a nə ńtə́ nə́ ḿbyáabə Silas pó Timotiə á Atɛns lə́, ńchígə́ ńchîə mə́mə afɨnə ńté ńgə́ a nə jɨ́ ńgə́ məsê mə́ məfɨgə mə́ nə nə́ənə á mə́m tə́kɔʼ tɔ̂ŋ yi wə́.

¹⁷A tíʼ ńchwáakə á mə́ kəʼlə̂ nə́ atséebə á mə́m ndɛ̂sê Pəjusə pópə Pətəjǐsê pó kə ghóʼkə nə́ Əsê. A nə ńkə̈ ńkəʼlə̂ atsáb əlětsəm pópə pəənə ándó pó kə chî nə́ á məteenə́.

¹⁸Pəənə ándó pó kə̈ zéʼkə nə́ mənu mə́ pɨ pə́ kə̈ fóŋ nə́ ághɔ́b nə́ Pəpikulyan pópə Pəsətɔyik lə́ a kə kə́ ńkəʼlə̂ atsáb pó po. Pó pətsə́ tíʼ ḿbítə ńgə́, “Akəkógə́ ajú zəənə́ a nɨd mbɨ ə́sóŋə lə́ ńgə́ akə̂?” Pətsə́ pó kwěe ńgə́, “Á chîə pə́ ándó a tséebə lə́ anu ńté məsê mə́ atú yitsə̌.” Pó kə sóŋ lɛ ńté lə́ ńgə́ Pɔlə a kə tə́ ə́sóŋə anu ńté Yeso pó mə júmnə nə́ á nəwûə.

¹⁹Pó tíʼ ńdɔgə̂ Pɔl ńgɛn nə́ yə́ á aliʼ ngaŋə́sáʼə́məsáʼ ə́ kyeetə̂ nə́ ə́wə́, ə́sóŋə á mbô yí ńgə́, “Pəg loonə̂ á mə́ jî nə́ anu páʼ ndzeʼkə́ yi fî zɨ gho yǐ nə́ nə́ zɨ́d lɛ ə́ sóŋ nə́?

²⁰Ńté ńgə́ gho fiʼtə̂ áwə́g nə́ əkɨʼnəmə́nu pətsə́, ńdaŋ ə́lɨ́d pəg loonə̂ mə́ jî nə́ anu páʼ ndɛn mənu ghɛn ə́ sóŋ nə́.”

²¹(Pɨ pə́ Atɛnsə pópə pəyǐyinə́ pó kə chî nə́ əwɨ́, pó nə ńdaŋkə̂ ndɛd əzɔb kətaŋə, tə ńdéʼtə ńgə́ pó tə́ fiʼtə̂ kɨ ńtə́ ńdzóʼə anu yə fî yitsə̌.)

²²Pɔl a tíʼ ńtə́əmə á tətəənə aliʼ ngaŋə́sáʼə́məsáʼ kyeetə̂ nə́ wɨ́ lə́ ə́sóŋ ńgə́, Pɨ pə́ Atɛns, “Maŋ jɨ́ nə́ ndú ətsəm ńgə́ pɨ pyádnə ńtə́gə atú nə́ mənu mə́ məsê mə́ənə́.

²³Mäŋ sóŋə lə́ ńté ńgə́ ndzaŋə ándó maŋ nyi nə́ lə́ ńdjɨ́ əpú páʼ pɨ ghóʼkə nə́ ándó məsê mə́ənə́. Maŋ kə kə́ ńdzɨ́ nəpá páʼ pə́ ŋwaʼlə̂ nə́ ə́wɨ́ ńgə́, ‘Á mbô əsê pə́ kě nə́ nəfɛdnə́ jí jî pô.’ Əsê zə̂ páʼ nə́ ghóʼkə nə́ páʼ nə́ kě nə́ zɨ́d jî pô lə́, lə́ zɨ́d páʼ mäŋ sóŋ nə́ anu ńté yə́.”

²⁴Əsê páʼ ə́ kə tsoŋkə̂ nə́ mbî pó ajúmə atsəmə á chî nə́ á mə́m ə́wə́, lə́ yí páʼə pə́ nə́ Mmaʼmbîə, ə́sáʼə nəpó pó ndəsê. A kě á mə́m məndɛ̂ páʼ ŋwu mbîə á tsoŋkə̂ nə̈ chîə pô.

²⁵Mbɔʼ pɨ pə́ məsɔŋ pə́ kě anu yətsə́ ghɛd ə́fɛ̂ nə́ yí pô, ńté ńgə́ a kě ajûtsə́ póŋ pô. Lə́ yí páʼ ä fɛ̂ nə́ nchîmbî pópə ajwiə á mbô ŋwu ntsəm ḿbɨ ḿbə́ nə́ ajúmə ətsəmə.

²⁶A nə ńdɔgə̂ táʼ ŋwu ńtsoŋkə̂ ətú ətsəm wə́ á mə́m mbîə, tsɔʼə tə ndɛd tə koʼ, a kə pɛ́dtə ńdɔʼkə̂ məndɛlə́ ándó pó yǒ nə́ chîə á mbî ńdzoŋ ḿbá məndɛdtə ándó pó yǒ nə́ jî tɨ́ wə́.

²⁷Əsê a nə ńgɛd lɛ lə́ ńjî ńgə́ mbɔʼ pó chwaalə̂ yə́, nə́ akwaŋ ńtə́ ḿbyáabə ńgə́ mbɔʼ pó məmtə̂ əliʼ ńdzə́ənə yə́. Ndə̌ŋdəŋə́ a chî nə́ əwɨ́ lə́ ńgə́ Əsê a kě chî ndi sag pô,

²⁸ńté ńgə́, Lə̈ ghɛlə̂ yí ńgɛlə̂ pɛn chîə á mbîə, ńnyinə̂ ḿbɨ́ ńkə́ ńtúg nchîmbîəʼ Tsɔʼə ndzaŋ ngaŋə́ŋwaʼlə aŋwaʼlə azɨ́ yətsə́ ə́ sóŋ nə́ ńgə́, Pɛn kə́ ḿbə́ lə́ pɔ́ píə.

²⁹“Ndzaŋ pɛn pə́ nə́ pɔ́ pə́ Əsê lə́, pɛn kě chîə á mə́ kwaŋ nə́ ńgə́ Əsê lə́ ajú páʼ mbɔʼ ŋwunə a lɔgə̂ gôlə kɨ ngɔʼ yi ŋwaŋkə̂ nə́ kɨ ntê ngɔʼ yitsə̌ páʼ ə́ pɔŋ nə́ á mə́ kɔ́ nə́ yí ə́wɨ́ pô.

³⁰Á nə ḿbə́ nə́ ndɛd pɨ pə́ nə ńkě nə́ Əsê kə́ jîə pô lə́, Əsê a nə ńkə́bkə əmə́g mí nə́ mənu páʼ pó nə ńgɛd nə́, lə́ nə́ əghâ nə́ ä sóŋə á mbô ŋwu ntsəmə aliʼə́ atsəm ńgə́, Pó kwúblə ntɨ́ əghɔ́b ə́fɛ́lə á mə́m pətəpɔŋ póobə́.

³¹Ńté ńgə́ a lɔʼkə̂ ndɛd páʼ a yǒ nə́ əsáʼ əsáʼ mbî ntsəm nə́ ndú páʼ wɨ́d tɨ́ nə́ ndə̌ŋdəŋə́, əlaŋə̂ á mə́m ŋwu tsə̌ páʼ a tsɔ́ʼ nə́. A ghɛd ŋwu ntsəmə á ndú mbîə a jîə a ŋwu ghɛn ńté ńgə́ a kə júmkə yə́ nəwûə.”

³²Əghâ ándó pɨ pə̂ pó nə ńdzóʼ nə́ anu ńté á mə́ júmnə nə́ á nəwû lə́, pó pətsə́ nyegnə̂ a yə́, lə́ pətsə́ pə́ sóŋ ńgə́, “Pəg kɔŋ ńgə́ gho pɨ ə́sóŋə anu ńté á mə́ júmnə nə́ nəwûə á mbô pəg əghâ ndaʼə.”

³³Pɔl a tíʼ ḿmɛdtə̂ ághɔ́b ńgɛnə̂ yə́,

³⁴Lə́ pɨ pətsə́ pó néŋ ntɨ́ nə́ anu páʼ a kə sóŋ nə́ lə́, ńtíʼ ńdzoŋə̂ yə́. Á mə́m pó lə́ kə pə́ Dionysius páʼ a nə ḿbə́ nə́ táʼ əsáʼməsáʼə pó məngyě yitsə̌ pə́ fóŋə nə́ Damalisə ḿbɨ ḿbə́ nə́ pətsə́ pəənə.