Read Awing Məfaʼə 19 Bible Online

Məfaʼə 19 - Awing bible

Məfaʼə 19

¹Ndzaŋə ándó Apolosə a nə ńchî nə́ Kolin lə́, Pɔlə á laŋ ńtóokə mboʼ məkɔʼnə́ ńgɛnə̂ Ɛfesus ńjɨ́ ngaŋə́zoŋə́ndzəm Yeso yitsə̌ wɨ́

²ḿbítə ághɔ́b ńgə́, “Əghâ pɨ kə néŋ nə́ ntɨ́ nə́ Əsê lə́, pɨ kə kwáalə Ajwǐəsě?” Pó kwěe yí ńgə́, “Ngá, pəg kě kə̂ láʼə zóʼə ńgə́ Ajwǐəsê a chî ə́wɨ́ pô.”

³A pɨ ḿbítə ághɔ́b ńgə́, Lə́ kə pə́ zə́ənə́ mbô akwáalə́nkǐ pɨ kə kwá nə́? Pó kwěe yí ńgə́, “Lə́ kə pə́ akwáalə́nkǐə Jɔnə?”

⁴Pɔlə á sóŋ ńgə́, “Akwáalə́nkǐə Jɔnə á kə chî lə́ á mbô pɨ páʼ pó kwúblə nə́ ə́fɛ́lə á mə́m pətəpɔŋ póobə̈; ə́fiʼtə̂ pɨ pə́ Islɛlə ńgə́ pó néŋ ntɨ́ əghɔ́b nə́ ŋwu páʼ á yǐ nə́ yǐəə á ndzəm yə́ á pə́ nə́ Yeso.”

⁵Əghâ ándó pó nə ńdzóʼ nə́ atsáb páʼ Pɔlə a tsáb nə́ lə́, ńtíʼ ńkwá nkǐ nə́ əlɛ́n Mmaʼmbî Yeso.

⁶Pɔlə á tíʼ noŋkə̂ mbô míə atû pó, Ajwǐəsê a yǐəə á mbɨ pó, pó tíʼ ńchúʼə á mə́ tsáb nə́ ətsáb pəfîə̈, ńnáŋkə nkɨ Əsê páʼ pó zóʼ nə́.

⁷Pó pətsəm kə pə́ lə́ ándó ntsɔb pɛ̌.

⁸Pɔlə a nə ńdɔg sáŋ zɛ́n teelə̈ ńgɛnə̂ á ndɛ̂sê Pəjus ńtséebə tsɔʼə tə pɔ́gə ŋwu tsə̌, ńkəʼlə̂ atsáb pó po ńdegtə̂ ághɔ́b ə́fiʼtə̂ anu ńté anuə nəfoonə Əsê;

⁹lə́ ndzaŋə ándó pɨ pətsɨ́ pó kə tyantə̂ nə́ atû ńkǐə ághóobə́ á mə néŋ nə́ ntɨ́ nə́ atsáb zɨ lə́, ḿbɨ́ ńtséebə pə́ ətsáb təpɔŋə á ndzɔʼ nkyeetə ntsəm ńté Alaŋə́ ndúmə Mmaʼmbî[13] lə́, Pɔlə á lɔg ngaŋə́zoŋə́ndzəm Yeso pó po fɛ́lə ághóobə́ á ndzɔʼ pó, ńtíʼə ńkəʼlə̂ atsáb əlětsəmə á mə́m ndɛ̂ ndzeʼkə́ Tayilanusə.

¹⁰Zəənə́ á kə ghɛn nə́ mbi tə ńkoʼ ngoʼ pɛ̌, tə pɨ pətsəm pə́ chî nə́ Esya, Pəjus pópə Pətəjǐsê pó zóʼə atséebə Mmaʼmbîə.

¹¹Ńdaŋə̂ á ndzəm Pɔl Əsê á ghɛd əkɨʼnəmə́nu páʼ ŋwunə a kě nə́ kə zə́ənə pô,

¹²tsɔʼə əpú ətsəʼ Pɔlə ä shíg nə́ alɛ̌dnə wɨ́ pópə ətsəʼə́ afaʼ pí, pɨ pə́ lɔg ńgɛn ńtéekə pəghɔ pɔ́b ə́wɨ́, məghɔ mɔ́b mə́ féŋtə, əjwi təpɔŋ kə́ ə́fɛ́dkə á mbɨ pó.

¹³Pɨ pə́ Jusə pətsə́ pó nə ńchî ə́wɨ́ páʼ pó nyi nə́ əliʼ əliʼ ə́fóg əjwi təpɔŋə, pó nə ńkə́ ńtə́ moomə̂ á mə́ lɔg nə́ əlɛ́n Mmaʼmbî Yeso ə́fógə pɨ́d wə́. Ńtíʼə ə́sóŋə nə́ əjwi təpɔŋ pəwɨ́ ńgə́, “Maŋ sóŋə á mbô pɨ nə́ əlɛ́n Yeso páʼ Pɔlə á náŋkə nə́ nkɨ yí lə́, ńgə́ nə́ fɛ́lə.”

¹⁴Pɔ́pə́mɛ́ pipə́ mbyâŋnə pətsɨ́ pɛ́nə asaambɛ̂, pó kə pə́ nə́ pɔ́ pə́ ŋwu Jusə yitsə́, á kə pə́ nə́ ají Mbêsê yi Ngweŋ pə́ fóŋə yí nə́ Seba, pó nə ńkə́ faʼə̂ ə́lə́ələ́.

¹⁵Ajwiə təpɔŋ zə̂ á kwěe ághɔ́b ńgə́, “Maŋ jîə Yeso ńkə́ ńjîə Pɔlə, pəənə́ azɨ́ lə́ ḿbə́ akə̂?”

¹⁶Ŋwu páʼ ajwiə təpɔŋ zə̂ á nə ńchî nə́ á mbɨ yí lə́ á wǔəə á ndu pó ńchúʼə ághɔ́b nə́ məlaʼ, ḿbóʼə ághɔ́b pətsəm, pó kə ə́fɛ́dkə ndɛ̂ wə́ ntə̌blə nə́ məfəŋə́ á mbɨ pó.

¹⁷Ŋwu ntsəmə a kə chî nə́ á Efesusə, Pəjus pópə Pətəjǐsê pó kə zóʼə anu zəənə́, ŋwu ntsəmə a tíʼ ńdwɛ́nkə nə́ apɔ́gə, pɨ pə́ tíʼ fɛ̂ tə́kɔʼ ngóʼkə nə́ Mmaʼmbî Yeso.

¹⁸Pɨ pipə nɨ́ nə́ páʼ pó kə néŋ nə́ ntɨ́ nə́ Əsê, pó fɛ́lə əshîsaŋ ḿbímə ńkə́ ə́fiʼtə̂ pətəpɔŋ póobə́.

¹⁹Pɨ pipə nɨ́ nə́ páʼ pó nə ḿbə́ nə́ ngaŋnə́kaŋ, pó kə tsɛntə̂ əŋwaʼlə nəkaŋ pɔ́b ətsəm táʼə aliʼ ńtoonə̂ á əshîsaŋə. Əŋwaʼlə pə́ kə tɔ nə́ mbɔʼ pə́ kə tsɛntə̂ pɨ́d ə́fi pɨ́d pə́ nkéebə atəənə́ Sɛləba tɔsə məghə́m mɛ́n tênə.[14]

²⁰Ńdaŋ ə́lɨ́d atséebə Mmaʼmbîə á ghɛn nə́ mbiə á mə́ nyi nə́ ə́ kə́ kwéŋ tyantə̂.

²¹Ndzaŋə ándó mənu mɨ mə́ kə laŋ nə́ lə́, Ajwǐəsê á néŋə akwaŋə á ntɨ́ Pɔlə ńgə́ á laŋə̂ á mə́m Masedonya pó Akaya ńtíʼ ńkoʼə̂ á Jɛlusalɛmə. Pɔlə a tíʼ ə́sóŋ ńgə́, “Əghâ páʼ maŋ yǐ nə́ ghɛn kwú wɨ́ lə́, ə́shib ghɛn ghéenə á Lomə.”

²²A tíʼ ńtúmə Timoti pó Ɛlastusə, pó pɛ́n pɛ̌ pó kə kwá nə́ yí lə́ ńgə́ pó ghɛnə̂ Masedonya, ḿbɨ́ ńtíʼ nyáʼ ńchîə á Esya nə́ akəmə ndɛd yitsə̌.

²³Nə́ ndɛd zɨ́d zɨ tə́kɔʼ ngə́ʼə á nə́ ńchîə aláʼə Ɛfesus ńté alaŋə́ ndúmə Mmaʼmbîə.

²⁴Ŋwu tsə̌ a nə ńchî ə́wɨ́ páʼ əlɛ́n yí nə ḿbə́ nə́ Demetəlosə, á pə́ ntwîəleemə. A kə lɔgə̂ atəənə́ Sɛləba ńtwî məndɛ̂ mə́ əsêməngyě yitsə̌ wɨ́ pə́ fóŋə yí nə́ Atemisə. Afaʼə ajíə á nə ḿbyádnə ə́fɛ̂ ape á mbô pɨ pó po kə faʼ nə́.

²⁵Demetəlosə a tíʼ ə́fóŋə ághɔ́b táʼə aliʼ ńdzoŋ ḿbá pətsɨ́ pɨ pó kə faʼ nə́ afaʼ yə wɨ́, ńtíʼ ə́sóŋ nə́ pó ńgə́, “Pəshu, nə́ jî ńgə́ pɛn kə pyádnə ńkwá nkáb nə́ atûə afaʼ zəənə́.

²⁶Pɨ pɛn ńdzɨ́ ńkə́ ńdzóʼə anu páʼ ŋwu ghɛn pə́ fóŋ nə́ nə́ Pɔlə lə́ á ghɛd nə́. A sɛdkə̂ məntɨ́ mə́ ŋwu ntsəm ə́sóŋ ńgə́, Məsê páʼ lə́ tsoŋkə̂ nə́ ŋwu lə́ kě məsê mətsə́ pô, a sɛdkə̂ pɨ pipə nɨ́ pó pí ńdzoŋ ndzəm əjǐə á mə́mə aláʼə Ɛfesusə. A kě lɛ lə́ tsɔʼə Ɛfesus faʼ pô a kə́ faʼə̂ Esya tsɔʼə ntsəmə.

²⁷Mbɔʼ pɛn chî ndɛd lɔg pó məta əwɛn ghɛnə́ á yǐ ńkwá əlɛ́n təpɔŋə. Lə́ kě tsɔʼə ə́lɨ́d pô, lə́ kə́ ḿbə́ ńgə́ mbɔʼ ndɛ̂ tə́kɔʼ əsêməngyě Atemis yǐ ńkě atûə anu yitsə̌ pɨ ńchî pô, nəfɔ jí nə́ kə́ měe yə́. Lə́ pə́ ḿbə́ əsê páʼ ŋwu ntsəmə á ghóʼkə nə́ á mə́m Esya ńdzoŋ ḿbá mbî ntsəm wə́.”

²⁸Ndzaŋə ándó apoŋə pɨ zə̂ á kə zóʼ nə́ atsáb zɨ lə́, məntɨ́ mɔ́b mə́ lum pó chúʼə á mə́ tsáb nə́ məngye mɔ́b mə́ kɔ́ʼə atǐə̈, ə́sóŋə ńgə́, “Atemis páʼə á chî nə́ á mə́m Ɛfesusə á gháʼ ńgɛn nə́ mbiə!”

²⁹Ajwaʼlə yəwə́ á kə nyinə̂ á mə́m tɔ̂ŋ Ɛfesus tsɔʼə ntsəmə. Apoŋə pɨ yəwə́ á waamə̂ Gayɔs pó Alistakus, pɨ pə́ Masedonya pɛ́n pɛ̌ páʼ pópə Pɔ̈l nyi nə́ ńdɔgə̂ ághɔ́b ńkə́ ńgɛn nə́ pó aliʼ páʼ pɨ pə́ tɔ̂ŋ pó kyeetə̂ nə́ ə́wə́.

³⁰Pɔlə nə́ nkɔ̌ʼmbɨ əyə́ a kə tə́ ńdoonə̂ á mə́ ghɛn nə́ á mbiə apoŋə pɨ zəənə́, lə́ ngaŋə́zoŋə́ndzəm Yeso pə́ ńkě pí ńgə́ á ghɛn ə́wɨ́ pô;

³¹Tsɔʼə mətsɨ́ mətû mə́ aláʼ páʼ pó kə pə́ nə́ ngaŋə́ko Pɔl, pó kə́ ńtú nkɨ ḿbóʼmbô ə́sóŋ nə́ yí ńgə́ kɔ á fiʼə̂ á mə́ ghɛn nə́.

³²Ndzaŋ pó kə kyeetə̂ nə́ táʼə aliʼ lə́ ńchîə á mə́mə ajwaʼlə, pətsɨ́ pɨ pó tə ńjwáglə ə́sóŋə azóobə́ anu pətsɨ́ pə́ kə́ ńtə́ ńjwáglə ə́sóŋə azóobə́, ńté ńgə́ pó pipə nɨ́ nə́ kə kě jîə pə́ anu pə́ kə kyeetə̂ nə́ ághɔ́b ńté pô.

³³Pətsɨ́ pɨ pó kə kwaŋə̂ azɔ́b ńgə́ lə́ jî Alezanda ńjîə anu pə́ tsɛntə̂ nə́ ághɔ́b ńté, ńté ńgə́ Pəjus pó kə tsɛɛkə̂ yə́ á mbi ńgə́ a fiʼtə̂ anu pə́ tsɛntə̂ nə́ ńté. Alezanda á tíʼ ńjíʼtə ághɔ́b nə́ apô ají ńgə́ pó naʼə̂, ńtíʼ ńdoonə̂ á mə́ twágtə nə́ anu yəwə́ á mbô pó.

³⁴Əghâ ándó pó kə leŋ nə́ ńgə́ lə́ ŋwu Jusə lə́, ńtíʼ ńchúʼə á mə́ tsáb nə́ ngye əzɔb kɔ́ʼə atǐ nə́ əkəmtə pəmə́nu zɛ́n pɛ̌ ḿbégnə táʼə anu ə́sóŋə ńgə́: “Atɛmisə páʼə á chî nə́ Ɛfesus lə́ tə́kɔʼ əsê!”

³⁵Tə əŋwaʼlə aŋwaʼlə tɔ̂ŋ yi wə́ a yǐ ńgɛd ŋwu ntsəmə á naʼə̂, a tíʼ ə́sóŋ ńgə́, “Pɨ pə́ Ɛfesus, lə́ əwə a kě nə́ jî ńgə́ lə́ tɔ̂ŋ pɨ pə́ Ɛfesus páʼ á lɔʼkə̂ nə́ ndɛ̂ tə́kɔʼ əsê Atemisə ḿbɨ́ ḿbə́ nə́ mɔ́ pəkɔ́ ngɔʼ páʼ á kə lǒo nə́ nəpó ńgwǔ lə́?

³⁶Mbɔʼ ŋwu tsə̌ á kě mənu mɨ kǐ pô. Lə́ pə́ ńgə́ nə́ tsóokə məntɨ́ mɨ́, ńkɔ ghɛlə̂ akəkógə́ anu yitsə̌.

³⁷Pɨ wam nə́ pɨ pɨ ńgyǐ nə́ pó aliʼ ghɛnə́, páʼ pó pǎ nə́ tə ńkě ajûtsə́ á mə́m məndɛ̂ mə́ Əsê zɔ pô, ńkě atséebə təpɔŋ yitsə̌ kə́ ńtsáb ńté əsê məngyě əzɛn pô.

³⁸Mbɔʼ Dɛmətiosə pópə ngaŋə́faʼ əjí túgə azɔŋ pópə pɨ pətsɨ́, ḿbə́ aliʼə́sáʼə́məsáʼə á chî ə́wə́, ngaŋə́sáʼə́məsáʼə kə́ ńchî ə́wə́, mbɔʼ pó lɔgə̂ ághɔ́b ə́wə́.

³⁹Lə́ mbɔʼ anuə ndaʼ yitsə̌ á pɨ ńchî ə́wɨ́ pə́ yǐ ńnáŋə zə́ələ́ á nkyeetə pə̈ náanə nə́ ə́wɨ́ ńnáŋə mənuə,

⁴⁰ńté ńgə́ mbɔʼ pɨ pə́ filə̂ áwɛ̂n ńgə́ pɛ̈n tə́ ńgyǐəə nə́ ajwaʼlə ńdzoŋ nə́ anu páʼ á laŋ nə́ ə́sɛ̂n lə́. Anu yitsə̌ á kě wɨ́ chî mbɔʼ pɛn lɔg ńtɔ́mtə atséebə azɛ̂n wɨ́ nə́ ajwaʼlə zɨ pɛn maʼ nə́ lɛ̌ pô, ńkě kə́ ńchî mbɔʼ pɛn fiʼtə̂ chigə nətɛ́n nə́ anu yi nə́ wɨ́ pô.”

⁴¹A sóŋ ə́lɨ́d lə́, ńtíʼ ə́shamkə̂ nkyeetə zə̂.