Read Awing Məfaʼə 2 Bible Online

Məfaʼə 2 - Awing bible

Məfaʼə 2

¹Ndzaŋə ándó alě Pɛntekɔsə á nə ńkoʼ nə́ lə̂, pəlimə́ á mə́m Yeso tsɔʼə pətsəm pə́ kyeetə̂ aliʼə́ mɔʼə́.

²Ńgabkə̂ ńdzóʼə ajûtsə́ a zoolə̂, ə́fɛ́lə á nəpóolə ándó ntɨ sə́mə a tə́ nə́ ńkɔ́ʼə lə̂, ńkwú ńdwɛ́nkə ndɛ̂ páʼ pó nə ńnáanə ə́wɨ́ lə́ tsɔʼə ntsəmə.

³Əpú pətsɨ́ ə́ ghabkə̂ ə́fɛ́lə mbi pó ándó əlɨ́ móg lə̂ ńtíʼ ńgabtə̂ ńtə́əmə á ndu pó táʼ táʼə.

⁴Ajwǐəsê a lwɛ́nkə ághɔ́b tsɔʼə pó pətsəm pó tíʼ ńchúʼə á mə́ tsáb nə́ nə́ ətsáb ətú pipə́ ndaʼ ndzaŋ páʼ Ajwǐəsê á nə ńgɛd nə́ ńgə́ pó tséebə.

⁵Pəjus pətsə́ pó nə ńchîə á Jɛlusalɛm páʼ pó nə̈ ḿbɔ́g nə́ Əsê ə́fɛ́lə á mə́m ətú ətsəmə á mə́m mbîə.

⁶Ndzaŋ pó nə ńdzóʼ nə́ ajúmə á zɔd lə́, mboŋ pɨ ə́ kyeetə̂. Anu yəwə́ á kɨʼnə̂ ághɔ́b pətsəm ńté ńgə́ ŋwu ntsəmə á mə́m pó a nə ńdzóʼ ndzaŋ páʼ pəlim pə̂ á mə́m Yeso pó nə̈ ńtsáb nə́ nə́ atséebə aláʼə azóobə́.

⁷Anu yəwə́ á tsɛɛlə̂ ághɔ́b ńkə́ ḿbə́ anu yə yɛ́d nə́ á mbô pó, pó tíʼə ḿbítə ńgə́, “Pɨ pɨ pətsəm pə́ tsáb nə́ lɛ̌ lə́ kě pɨ pə́ Galili pô?

⁸Lə́ pə́ ńtíʼ ńgɛlə̂ akə̂ pɛn pətsəm zóʼ ndzaŋ pó tsáb nə́ nə́ ətsáb əláʼ əpɛ́nə?

⁹Pɛn fɛ́d lə́ Pəsya, pópə Medya nə́ Ɛlam; ə́fɛ́lə Mesopotemya pópə Judya nə́ Kapadosya; ə́fɛ́lə Pɔŋtus pópə Esya,

¹⁰nə́ Fagai ə́fɛ́lə Pamfilya nə́ Ijibə ḿbɨ ḿbə́ nə́ məmboʼ mətsə́ á mə́m Libya ḿbáatə Tɔ̂ŋ Silɛnə. Pɛn pətsə́ ə́ fɛ́lə á Lomə.

¹¹Pó pətsə́ pə́ pə́ Pəjusə, pópə pətəjǐsê páʼ pó kwúblə nə́ mbimə́ əzɔb ńtíʼ ńdzoŋ mbimə́ Pəjusə. Pɛn pətsə́ ə́ fɛ́d lə́ Klɛt pópə Alabya, lə́ pɛn pətsəm pə́ ḿbɛ́lə ńdzóʼ ndzaŋ pó tsáb nə́ nə́ ətsáb əláʼ əpɛ́n ə́sóŋə pətə́kɔʼ pə́ əkɨʼnəmə́nu páʼ Əsê a faʼ nə!”

¹²A kɨʼnə̂ ághɔ́b tə́ pó jwaʼlə̂ ńtíʼə ḿbítə məmbɨ mɔ́b ńgə́, “Ndɛn mənu ghɛn ə́ sóŋə lɛ̌ ńgə́ akə̂?”

¹³Lə́ pətsə́ pɨ pə́ pə́ ńnyegnə̂ ághɔ́b ə́sóŋə ńgə́, “Pɨ pɨ pə́ pɛ́ lə́ məloʼə!”

¹⁴Pita Pópə yitsə̌ ngaŋə́zoŋə́ndzəm Yeso zə̂ ntsɔb mɔʼə́ ə́ lǒo əsê ńtɨ́ Pita a tséebə á mbô mboŋ pɨ zə̂ nə́ tə́kɔʼ ngye ə́sóŋ ńgə́, “Pɨ pə́ Judya ḿbɨ́ ḿbə́ nə́ ŋwu ntsəm páʼ ä chî nə́ Jɛlusalɛm, jwə́ʼtə nə́ á mbô maŋ ńtíʼ maŋ fiʼtə̂ áwɨ́ nə́ anu páʼ mənu mɨ mə́ sóŋ nə́.

¹⁵Pɨ pɨ pə́ kě məloʼ pɛ́ ndzaŋ nə́ kwaŋ nə́ lə̂ pô. Lɛ̌ tsɔʼə pəmə́nu pɛ́n nəpuʼə́ á məsânə.

¹⁶Lə́ lɛ̌ anu páʼ ntûsê Joelə a nə sóŋ nə́:”

¹⁷Əsê a sóŋ ńgə́, “Lɛ̌ mənu páʼ maŋ yǐ nə́ ghɛd nə́ ndwegtə əlěmbîə.” Maŋ yǒ kwɛlə̂ Ajwiə mə a ndu ŋwu ntsəmə. Pɔ́ pɨ́ pipə́ mbyâŋnə pópə pipə́ pəngyě pó yǒ ə́sóŋə anu páʼ Əsê ä sóŋ nə́ nə́ pó á mbô pəənə́. Nkaŋŋwu əjɨ́ pó yǒ lê ndzəəmə atəəmə́tə́əmə, pəlɛn pə́ pɨ pɨ́ pó kə́ ńdê məndzəəmə.

¹⁸Alǒ ngaŋə́faʼə mə yi mbyâŋnə pópə pəngyě, Maŋ yǒ kwɛlə̂ Ajwiə mə á ndu pó nə́ əlě pi wə́, pó tíʼ ə́sóŋə anu páʼ Əsê ä sóŋ nə́ nə́ pó á mbô pəənə́.

¹⁹Maŋ yǒ nɨd mənu mə́ yɛ́d nə́ yɛ́d nə́ á nəpóolə atǐə ə́ kə́ nɨd əkyeʼmə́nuə á ndəsê a mətoŋə́. Achǐ pó móg nə́ mbə̌mpə ndíʼ ə́ yǒ chî ə́wə́.

²⁰Mə́numə á yǒ sɛdnə̂ ə́sɛ́nə ándó túʼə, sáŋə á sɛdnə̂ ḿbaŋə̂ ándó achǐə, záʼ alě Mmaʼmbî zə̂ a pɔŋə̂ yǐəə, chigə tə́kɔʼə alě nəgháʼ əyǐ wə́.

²¹Ŋwu ntsəm ntsəm páʼ a fóŋ nə́ əlɛ́n Mmaʼmbî a yǒ chwáalə.

²²Pɨ pə́ Islɛl, jwə́ʼtə nə́ atsáb zəənə́! Nə jî ńgə́ Yeso Mɔ́ Nazalɛd a nə́ ḿbə́ lə́ ŋwu Əsê kə tsɔ́ʼ nə́ ńtúmə á mbô pɨ, ńdaŋ nə́ pətə́kɔʼ pə́ mənu pópə mənu mə́ yɛ́d nə́ yɛ́d nə́, nə́ əkyeʼmə́nu páʼ a nə ńgɛd á mə́m pɨ? Pɨ jî ńté ńgə́ mənu mimə wɨ́ mə́ nə ńdaŋ lə́ á əmə́g pəənə́.

²³Əsê a nə ḿbɛ́d tə ńdɔʼkə̂ á ńtɨ́ yí ńkə́ ńjî ńgə́ pə́ yǒ fɛ̂ Yeso ghɛnə́ á mbô pəənə́. Pɨ fɛ̂ yə́ á mbô pɨ pə́ təpɔŋ pó kwumtə̂ atûə atǐə apagləpaglə ńjwítə yə́,

²⁴lə́ Əsê a pə́ ńjúmkə yə́ a nəwûə, ńchwádkə yə́ á mə́m ngə́ʼ nəwû ńté ńgə́ anu yətsə́ a nə ńkě ə́wɨ́ chî təmbɔʼ nəwûə á nə ńgɛlə̂ á mə́ ghɔ́ŋkə nə́ yə́ nəse pô.

²⁵Debilə a nə sóŋ ńté yí ńgə́, Maŋ nə̈ ńdzə́ənə Mmaʼmbîə a mbi maŋ əghâ ətsəmə. A chîə á əlá apô maŋ yi təənə, ńjî ńgə́ kɔ ajûtsə́ á chiʼə̂ mə.

²⁶Ńdaŋ ə́lɨ́d ntə́əmə mə ə́ chî nə́ akɔŋtə, atséebə ntsoolə mə a ləəmə̂, na mbəəmə mə ə́ kə́ ńtə́ ḿbyáb ndaʼnə páʼ Əsê a nə ńdaʼnə̂,

²⁷ńté ńgə́ gho yǒ kě mə á mə́m mbî pəkwû ghɔ́ŋkə pô; kɨ kě yi páʼ a ŋwaʼ nə́ á mbi gho mɛdtə̂ a lə̂ pô.

²⁸Gho nəələ̂ mə nə́ məsémə́ndú páʼ mə̈ fɛ̂ nə́ nchîmbîə, gho yǐ lə ńgɛd akɔŋtə á lwɛ́nkə ntə́əmə mə á mbi gho.

²⁹Pəlimə́ mə, maŋ yǐ tséebə á mbô pəənə́ a əshîsaŋ ńté tǎ əwɛn Debilə. A nə ńkwû pə́ twə́ŋə, nəse jî nə́ kə́ ńchî ə́fênə̌, tə ńkoʼ nə́ pə ə́sɛ̂nə̌.

³⁰A nə ḿbə́ lə́ ntûsê ńkə́ ńjî ndaʼnə páʼ Əsê a nə ńdaʼnə̂ yí ə́wə́: Əsê a nə ńgɛlə̂ atyǎntə ndaʼnə ńgə́ a yǒ lɔgə̂ táʼ mɔ́ Debid yitsə̌ ə́ ghɛlə̂ əfo ə́wɨ́ á náanə aləŋ Debid.

³¹Debilə a nə ńdzə́ənə anu páʼ Əsê a chî nə́ á mə́ yǐ nə́ ghɛd ńtíʼ ńtsáb ńté yi páʼ Əsê tsəʼ nə́ á mə́ júmnə nə́ a nəwû, ə́sóŋ ńgə́, Pə́ nə ńkě yə́ a mbî pəkwû ghɔ́ŋkə pô na mbɨ əjǐ ə́ kě kə́ ńdə̂ pô.

³²Əsê a júmkə Yeso wɨ́d ghɛnə́ a nəwûə, pəg pətsəm ə́ zə́ənə yí nə́ əmə́g mə́g ndzaŋ páʼ a júmnə nə́ a nəwûə.

³³Pə kɔ́ʼkə yə́ a əlá apô Əsê yi təənə a kwáalə Ajwǐəsê á mbô Tǎ əyǐə ndzaŋ páʼ Tǎ əyǐə a nə ńdaʼnə̂ nə́. Anuə atsəm páʼ nə́ zɨ́ nə́ kɨ ńdzóʼ əghâ nə́ lə́ Ajwǐəsê páʼ Klisto a kwɛd nə́ a mbɨ pəgə́.

³⁴Ńté ńgə́ Debid nə́ nkɔ̌ʼmbɨ əyí a nə ńkě á nəpó kɔ́ʼ ńgɛn pô; lə́ ḿbə́ ḿbɛ́d sóŋ ńgə́, Mmaʼmbîə a sóŋ nə́ Mmaʼmbîə mə ńgə́: Náanə a əlá apô maŋ yi təənə

³⁵tə maŋ láʼ ńgɛd ngaŋkə́pa əzô ə́ tíʼ ḿbə́ pə́ ajúmə tə́gtə məkoolə azô.

³⁶“Pɨ pə́ Islɛl tsɔʼə pətsəm pə́ tíʼ ńchîə á mə́ jî nə́ ndə̌ŋdəŋ ńgə́, lə́ Yeso wɨ́d ghɛn páʼ pɨ nə ńkwumtə̂ nə́ atǐə apagləpaglə lə́, lə́ yí páʼ Əsê a lɔg nə́ yí ńgɛlə̂ Mmaʼmbî wɨ́ pó Yi Ńtsəʼ nə́!”

³⁷Əghâ ándó pɨ pipə wɨ́ pə́ nə ńdzóʼ nə́ anu jɨ lə̂, a pyádnə ńjwaʼ məntɨ́ mɔ́b pó tíʼ ḿbítə Pita pópə mətsə́ məntú mə́ ńgə́, “Pəlim, pəg yǐ ghɛd lə́ ə́lɛ́?”

³⁸Pita a kwěe ńgə́, “Fɛ́d nə́ á mə́m təpɔŋ əwɨ ńkwúblə məntɨ́ mɨ́ tsɔʼə pɨ pətsəm ńkwá nkǐ nə́ əlɛ́n Yeso klisto ńjî ńgə́ pə́ ləgnə̂ pətəpɔŋ pə́ənə́, nə́ tíʼ ńkwáalə Ajwǐəsê páʼ a lǒo nə́ á mbô Əsê.

³⁹Ńté ńgə́ ndaʼnə Əsê ə́ chî lə́ á mbô pɨ̌pə pɔ́ pə́ənə́, ḿbá pɨ pó chî nə a ndi yi sɛ, ḿbɨ ḿbə́ nə ŋwu ntsəm páʼ Mmaʼmbî əwɛn Əsê a yǒ nə́ fóŋə.”

⁴⁰Pita a nə ńtsáb ətsáb pi nɨ́ nə́ ńkwantə̂ ághɔ́b ńtû ḿbóʼmbô ə́sóŋ ńgə́, “Chwádkə nə́ mbɨ əzəənə́ á mə́m ngə́ʼ páʼ ə́ tə́ nə́ ńgyǐəə á mbô pɨ pə́ təpɔŋ pə́ ngoʼ pəənə́!”

⁴¹Pɨ pə́ nə ḿbí nə́ nkɨ əyǐ pó nə ńkwá nkǐə. Pɨ pə́ nə ḿbegə̂ á mə́m pó a əlě yi wɨ́ pó nə ńkoʼə̂ ándó tɔsə teelə́.

⁴²Pó nə fɛ̂ ndɛd əzoobə́ á mə́ zéʼ nə́ á mbô məntú mə́ pó po kə̈ faʼə̂ mənu nə́ apô mɔʼə́ á mə́m nkyeetə ńkə́ ńtûə ńnoolə̂ ńjîə məjî ńchaʼtə́sê.

⁴³Məntú mə́ Yeso mə̂ mə́ nə̈ ńgɛlə̂ mənu mimə yɛ́d nə́ yɛ́d nə́ mimə nɨ́ nə́ pópə əkyeʼmə́nuə, mə́ tíʼ ńgɛd ŋwu ntsəmə a chîə á mə́mə apɔ́gə.

⁴⁴Ŋwu ntsəm páʼ a nə ḿbí nə́ ńdzoŋ ndzəm Yeso po nə̈ ńtsɛntə̂ nəkaʼə́, əpú əpɔ́b ə́ pə́ táʼə.

⁴⁵Pó finə̂ apeʼə azɔ́b pópə əliʼ ndəsê əpɔ́b ńgabtə̂ nkéebə a tətɨ pó ndzoŋ ndzaŋ páʼ ŋwu ntsəmə a nə̈ túg nə́ anu

⁴⁶Əlě ətsəm pó noolə̂ ńjwánə a Tə́kɔʼndɛ̂sê, ńnoolə̂ ńjîə məjîə á məláʼ pó, ńjîə nə́ akɔŋtə nə́ táʼə apímnə

⁴⁷Ŋ́ŋáŋkə Əsê, ńdzóʼ əshîʼnə nə́ əpú pi əshîʼnə páʼ ə́ fɛ́d nə́ á mbô pó pətsəmə. Əlě ətsəm lə́, Mmaʼmbîə a peg pɨ páʼ pó chwád nə́ á mə́m nkyeetə əzoobə́.