Read Awing Məfaʼə 20 Bible Online

Məfaʼə 20 - Awing bible

Məfaʼə 20

¹Ndzaŋə ándó ajwaʼlə zə̂ á Ɛfesusə á nə ńdaŋ nə́ lə́, Pɔlə a fóŋ ngaŋə́zoŋə́ndzəm Yeso ńtséebə á mbô pó á mə́ néŋ nə́ ntɨ́ əghɔ́b ə́ tyantə̂, ńtíʼ ḿbookə̂ ághɔ́b, ə́fɛ́d ńchúʼə á mə́ ghɛn nə́ á mboʼ Masedonya.

²Ndzaŋə a nə̈ nyi nə́ ńdaŋ əliʼə́ á mə́m Masedonya lə́, ńnéŋə məntɨ́ mə́ ngaŋə́zoŋə́ndzəm Yeso á mə́m pətɔ̂ŋ nə́ ətsáb ntəgə́. Ńgɛn ńkwúnə á mə́m Glik,

³ńchî ə́wɨ́ sáŋ zɛ́n teelə́. A nə ńtə́ ńdoonə̂ á mə́ nyi nə́ á mə́m nkǐ ə́ ghɛnə̂ á mboʼ Sylya lə́ ḿbə́ ńdzóʼ ńgə́ mətû mə́ Pəjus pó nə ńtyáŋtə á mə́ jwítə nə́ yə́ á ndú nkǐ á Sylya. A tíʼ ńkwúblə ntɨ́ yí ḿbəənə̂ á Masedonya á mə́ tíʼ nə́ ghɛnə̂ Sylya.

⁴Pɨ pətsə́ pó nə ńdzoŋə̂ Pɔlə á nənyi wɨ́d wə̂, pó nə ḿbə́ lə́, Sopata mɔ́ Pilus páʼ a pə́ nə ŋwu Belya, Alistakus ḿbɨ́ ḿbə́ nə́ Sɛkondus páʼ pó nə ə́fɛ́d nə́ Tɛsalonika, Gayɔs páʼ a nə ə́fɛ́d nə́ Debə, Tikikɔs po Təlofimusə á mə́m mboʼ Esya, ḿbɨ́ ḿbə́ nə́ Timoti.

⁵Pó nə ńkwá mbi ńgɛn ḿbyáabə áwə́gə́ á Təlowasə.

⁶Pəg laŋə̂ á mə́m nkǐ ńdǒ á Filipi tsɔʼə páʼə alě akɔŋtə páʼ pə́ kɔ́d nə́ apéenə məkálə́ tə mbê a kə́ laŋ nə́, əlě mbî tâ laŋ pəg tégə ághóobə́ Təlowasə, pə̌gpo chî ə́wɨ́ əlě mbî asaambɛ̂.

⁷A nə ḿbə́ nə́ ntsɛɛmbiə alě á mə́m ngab mbî lə́, pəg kyeetə̂ pə̂gpə ngaŋə́zoŋə́ndzəm Yeso á mə́ jî nə́ ntéelə. Pɔlə a tsáb pó po nə tə́sɛ ndɛd tə ńkoʼə̂ á ntɨ̌túʼ ńté ńgə́ a kə chîə á mə́ lê nə́ ghɛnə̂ yə́ á məsânə.

⁸Pə lam pipə nɨ́ nə́ pə́ kə tə́ ńkɛ́lə á mə́m ndɛ̂ ajábtə aliʼ pə́ nə ńkyeetə̂ nə́ ə́wə́.

⁹Mɔ́ mbyâŋnə yitsə̌ páʼ əlɛ́n yí nə ḿbə́ nə́ Utikɔsə á nə ńnáanə a ntsoolə ajweekə. Ndzaŋə atséebə Pɔlə a kə sag nə́ lə́, a wǔəə mə́m ntɨ pəlê, ńtíʼ ńgwǔ ə́fɛ́lə á ndumə ajábtə ndɛ̂ teelə́ pə́ yǐ ńtə́ ńtwáamə yə́ a pɛ́dtə ńkwûə.

¹⁰Pɔlə a tsóolə əsê ŋ́ŋwúʼnə á ndu yí, ńgwaamə̂ ghaŋ yí ńtíʼ ə́sóŋ ńgə́, “Kɔ nə́ pɔ́gə, nchîmbî əjǐ ə́ pɛ́lə á mə́m yə́”

¹¹Ndzaŋə ándó Pɔlə po kə pɨ nə́ ńkɔ́ʼə á mə́m ndɛ̂ ajábtə lə́, ńtíʼ ńjî ntéelə. Pɔlə a pɨ ńkə́ ńtsáb pó po nə tə́sɛ ndɛd tə mbî ə́ fógə. A tíʼ mɛdtə̂ ághɔ́b ńgɛnə̂ yə́.

¹²Pó tíʼ ńdɔgə̂ mɔ́ mbyâŋnə yí wɨ́ ńgɛn nə́ yí páʼ a pɛ́d nə́ mbî nə tə́kɔʼ akɔŋtə.

¹³Pəg kwá mbi ńdaŋə̂ á mə́mə aŋkənúʼə́ ńgɛnə̂ á Asos á mə́ pyáb nə Pɔlə ə́wə́, ńté ńgə́ a kə sóŋ ńgə́ pəg lɔgə̂ yí ə́wə́. A kə pɨ ńtə́ ńdoonə̂ ajíə á mə́ ńnyi nə́ lə́ á məko ə́fɛ́lə Təlowasə ə́ ghɛnə̂ Asosə, a kə jɨ́ ńgə́ mbɔʼ a nyinə̂ məko ńgɛn wə́.

¹⁴Ndzaŋə a kə téekə nə áwə́gə́ Asos lə́, pəg tíʼ ńdɔgə̂ yí nə́ aŋkənúʼə́ pə̌gpo tíʼ ńgɛn ńkwúnə Mitilɛnə.

¹⁵Mbî pɨ ə́fóg pəg tíʼ ńnyinə̂ á nkǐ ə́fɛ́lə á Mitilɛn ńgɛn ḿbáatə Kayus, yitsə̌ mbî ə́fóg pəg ghɛnə̂ Samos, yitsə̌ mbî pɨ ə́fóg pəg ghɛnə̂ Miletus.

¹⁶Pɔlə a nə jɨ́ ńgə́ mbɔʼ a nyinə̂ á mə́m nkǐ ńdaŋə̂ Ɛfesus ńté ńgə́ a kə kě kɔŋə̂ á mə́ laŋkə̂ nə́ ndɛd yitsə̌ á mboʼ Esya pô. A kə tə́ ńgə́glə ńgə́ mbɔʼ á kwúnə á Jɛlusalɛm záʼ alě akɔŋtə Pɛntekɔs á pɔŋə̂ koʼə̂.

¹⁷Əghâ ándó pəg nə ńkoʼ nə á Militɔs lə́, Pɔlə a tú nkəənə á Ɛfesus ńgə́ mətû mə́ nkyeetə mə́ téekə yə́.

¹⁸Ndzaŋ pó nə ńgyǐ nə́ lə́, a chúʼə á mə́ sóŋ nə́ nə́ pó ńgə́, “Pɨ pətsəm nə́ jî ndzaŋ páʼ maŋ chî nə́ á tətɨ pɨ ə́fɛ́d nə́ ndɛd maŋ kə tə́g nə́ məkoolə mə á Esya.

¹⁹Maŋ nə̈ faʼə̂ á mbô Mmaʼmbî Yeso lə́ nə atsóokə́mbəəmə atsəm nə́ nəkyéŋə á əmə́g maŋ ḿbɨ ḿbə́ nə́ əkwaʼlə páʼ ə́ nə̈ ńgyǐ nə́ á mbô maŋ ndzaŋə ándó pɨ pə́ Islɛl pó nə̈ ńdɔ nə á mə́ néŋ nə mə á mə́m ngə́ʼə.

²⁰Nə kə̂ ńjî ńgə́ maŋ nə ńkě chîə tə ghə́ maŋ fiʼtə̂ áwɨ́ nə́ anu mbɔʼ á kwáalə áwɨ́ pô, ńkə́ ńdzéʼkə áwɨ́ nə́ anǔəsê á əshîsaŋ pópə ntso məláʼə.

²¹Nə jî ndzaŋ maŋ nə̈ ńkwantə̂ pɨ pə́ Islɛl po pə Pətəjǐsê ńgə́ pó kwúblə á mə́m təpɔŋ əghɔb ńgyǐəə á mbô Əsê ńkə́ ńtúg mbimə́ a mə́m Mmaʼmbî əwɛn Yeso Klisto.

²²Əghâ nə maŋ ghɛnə̂ lɛ̌ á Jɛlusalɛmə á mə́ zóʼ nə́ anu páʼ Ajwǐəsê a sóŋ nə́ ńgə́ maŋ ghɛlə̂, ḿbə́ ńkě jîə anu maŋ yǐ nə́ ghɛn wə́ á laŋə̂ á mbɨ maŋ pô.

²³Ndaʼə anu maŋ jî nə́ lə́ ńgə́ Ajwǐəsê ä sóŋ nə maŋ ńgə́ á mə́m tə́kɔʼ tɔ̂ŋ ntsəm pə́ yǐ ńnéŋə mə atsáŋə ə́ kə́ ghɛd maŋ zɨ́ ngə́ʼə.

²⁴Maŋ pə́ ńkě nchîmbîə mə ándó ajûtsə́ lɔg pô, tsɔʼə ńgə́ anu yəwə́ á mɛdtə̂ maŋ məgtə̂ ndə̌ mə ḿbɨ́ ḿbə́ nə́ afaʼ páʼ Mmaʼmbî Yeso Klisto a nə ə́fɛ̂ nə́ ńgə́ maŋ faʼə̂. Afaʼ yə́ wɨ́ lə́ mə fiʼtə̂ nə́ pɨ nə́ nkɨ yi əshîʼnə ńté ndzaŋ páʼ Əsê a nɨd nə́ apɔŋə́ntə́əmə ajíə á ndu pəənə.”

²⁵“Əghâ nə́, nə́ jwə́ʼtə, maŋ jî ńgə́ pɨ pətsəm páʼ maŋ yǐ nə́ á mbô pɨ ńnáŋkə nkəənə anuə nəfoonə Əsê, nə yǒ kě mə pɨ jɨ́ pô.”

²⁶Maŋ tíʼ ə́sóŋə á mbô pɨ ə́sɛ̂n ńgə́, mbɔʼ ŋwu əwɨ yətsə́ a kwû tsɔʼə tə néŋ ntɨ́ əyí nə́ Yeso, apô mə á kě nə nəwû əyí chî pô.

²⁷Maŋ sóŋ lɛ̌ ńté lə́ ńgə́ maŋ kě chîə tə ghə́ maŋ fiʼtə̂ áwɨ́ nə́ anuə atsəm páʼ Əsê a lɔ́btə nə́ ńté áwɨ́ pô.

²⁸Lɔg nə́ ndɛd nə́ məmbɨ mɨ́ ńkə́ ńdɔg ndɛd nə́ pɨ pətsəm páʼ Ajwǐəsê a mɛdtə̂ nə́ á mbô pəənə́ ándó mətûə, ńjî ńgə́ pó lɔg ndɛd nə́ nkyeetə pɔ́ pə́ Əsê páʼ Əsê nə ńjú nə́ nə́ achǐə mɔ́ əyǐ Yeso Klisto.

²⁹Maŋ jî ńgə́ əghâ maŋ yǐ nə́ ghɛnə̂ mə əfunə́ təpɔŋ ə́ yǐ kwúnə á tətɨ pɨ ə́ kě wɨ́ pɔ́ pə́ Əsê ḿmɛdtə̂ pô.

³⁰Ndɛd tə́ ńkoʼə̂ páʼ pɨ pətsə́ pó yǐ nə́ ə́fɛ́lə á tətɨ pɨ páʼ pó yǒ nə́ kwúblə á ndə̌ŋdəŋ ńté atséebə Əsê, ə́ chúʼə á mə́ zéʼkə nə́ mənu mimə ndaʼ páʼ mə́ yǐ nə́ jwaʼlə̂ pɨ ə́ tíʼ soŋə̂ ághɔ́b pó zoŋə̂ ághóobə́.

³¹Lə́ələ́ pə́ ńgə́ nə lɔg ndɛlə́. Kwúmtə nə́ ńgə́ nə́ ngoʼ teelə́, “Maŋ tə́gtə áwɨ́ tsɔʼə tə jwitə̂ á nətúʼ pópə nənumnə nə́ nəkyéŋə á əmə́g maŋ.”

³²“Əghâ nə́ mäŋ néŋə áwə́ənə́ á mə́m atéelə pô Əsê ńkə́ ə́sóŋə nə́ pɨ ńgə́ nə kwúmtə atsáb ńté apɔŋə́ntə́əmə Əsê páʼ a túg nə́ á ndu pɛnə̂. Atséebə Əsê jɨ́d zə̂ á chî təmbɔʼ á ghɛd nə́ tɨ́ ńtyantə̂ á mə́m mbimə́ ńkə́ ə́fɛ̂ ajú páʼ Əsê a nə ńdaʼnə̂ nə á mbô ŋwu ntsəm páʼ a tsɔʼ nə́ ńgə́ lə́ ŋwu əyǐə.

³³Əghâ maŋ nə ńchî nə́ pɛn lə́, maŋ nə ńkě kə́ láʼə pítə ŋwu əwɨ yitsə̌ nə́ gôlə, kɨ sɛləba kɨ ətsəʼ pô.

³⁴Tsɔʼə pɨ pətsəm jî ńgə́ maŋ nə̈ faʼə̂ lə́ nə mbô mə á mə́ túg nə ajúmə atsəm páʼ pə̂gpə ngaŋmə́koolə mə lɔ nə́.

³⁵Maŋ nəələ̂ áwɨ́ ńgə́, á mə́m anuə atsəm á pɔŋə̂ mə́ pyádnə nə́ ə́faʼə̂ á mə́ kwá nə pɨ páʼ pó pwɔ́d nə́. Pɛn kwúmtə atséebə Mmaʼmbî Yeso páʼ a sóŋ nə ńgə́, Afoʼə á chî nə́ mbô páʼ mə́ fɛ̈ nə ńtsɛ mi páʼ mə́ kwá nə́.”

³⁶Əghâ ándó Pɔlə a nə məgtə̂ nə́ á mə́ tsáb nə́ lə́, ńtíʼ ńkwə́ʼtə ndəsê pó po pətsəm chaʼtə́sê.

³⁷Ńtíʼ ńnɔd ńkyéŋ ńgwaamə̂ yí ḿbáʼnə nə́ yí ńtíʼ ńchwegə̂ yə́, ə́fɛ̂ á mbǒ nə́ yə́.

³⁸Pó nə fɨnə̂ tə́shú ńté atsáb páʼ a nə sóŋ nə́ nə́ pó ńgə́ pó láʼ kě yí pɨ jɨ́ pô lə́, ńtíʼ ńgɛn ńchaakə̂ yə́ á mə́mə apáŋə́nkǐə.