Read Awing Məfaʼə 21 Bible Online

Məfaʼə 21 - Awing bible

Məfaʼə 21

¹Pəg kə fɛ̂ mbǒ nə́ pó lə́ ńkwúnə á tə́kɔʼə aŋkənúʼə́ ńgɛn ndə̌ŋdəŋə́ á Kɔsə. Mbî fóg pəg ghɛn ńkwúnə á Ludɛs ə́fɛ́d ə́wɨ́ ńgɛnə̂ a Patala.

²Pəg zə́ənə tə́kɔʼ aŋkənúʼə́ ə́wɨ́ páʼ á ghɛn nə́ Fonisya, ńkwúnə zɨ́d ńtíʼə ńgɛnə̂.

³Əghâ ándó pəg nə ńkwú nə́ aliʼ mbɔʼ pəg zɨ́ ndzɛnə́ Sayiplus lə́, ḿmɛdtə̂ Sayiplus á apô yə kwab ńtíʼ ńgɛn ndə̌ŋdəŋ ńkwúnə Sylya, ńtə́əmə aliʼ yitsə̌ pə́ fóŋə nə́ Tayile, aliʼə́ ándó apáŋə́nkǐə a kə chî nə́ mə́ fóg nə́ apeʼ wə́.

⁴Pəg nə ńkoʼə̂ á Tayil ńdjɨ́ ngaŋə́zoŋə́ndzəm Yeso ə́wɨ́, ńtíʼ ńchî pə̌gpo nə́ əlě mbîə asaambɛ̂. Ajwǐəsê a ghɛd pó jîə anu páʼ a yǐ nə́ laŋ nə́ Pɔlə á Jɛlusalɛm, pó tíʼ sóŋ nə́ Pɔl ńgə́, kɔ á ghɛnə̂ a yí ə́wə́.

⁵Ndɛd əzəgə́ á mə́ chî nə́ pə̌gpo ə́ kə měe, pəg fɛ́d ə́wə́ ńgɛn nə́ mbi nə́ nənyi əwəgə́, pó pətsəm ḿbá pəngyě nə́ pɔ́, pó tíʼ ńdzoŋə̂ áwə́g ə́fɛ́lə á mə́m aláʼ ńgɛn ńkoʼə̂ á ntsǒnkǐə aliʼ páʼ pəg nə ńchî nə́ á mə́ lɔg nə́ tə́kɔʼə aŋkənúʼə́ ə́wə́. Pəg kwə́ʼtə əsê ńtíʼ ńchaʼtə́sê ḿbookə̂ ághɔ́b ə́sóŋ ńgə́ ŋwu ntsəmə a chî əshîʼnə.

⁶Pə̌gpo pookə̂ məmbɨ mə́g pǒ, pəg tíʼ ńkwúnə á tə́kɔʼə aŋkənúʼə́ ńtə́ ńgɛnə̂ pó tíʼ ḿbəənə̂ á məláʼ pó.

⁷Pəg ghɛn nə́ mbi nə́ nənyi əwəg, ə́fɛ́lə á Tayile ńtíʼ ńtə́əmə á Tolɛma. Pəg fɛ́lə á mə́m tə́kɔʼə aŋkənúʼə́ ńtíʼ ńkɔ́ʼ ńgɛnə̂ á mə́m tɔ̂ŋ ńchaʼtə̂ ngaŋə́zoŋə́ndzəm Yeso ńtíʼ ńchî pə̌gpo nə́ táʼ alěmbîə.

⁸Mbî fóg, pəg mɛdtə̂ á Tolɛma ńtíʼ ńnyinə̂ á mə́mə aŋkənúʼə́ ńkɔ́ʼ ńkwúnə á Sisalya, əwɨ́ pəg tíʼ ńgɛnə̂ á ndɛ̂ Filipə ŋwu páʼ a kə̈ nyi nə́ ə́sóŋə anuə Əsê, ńtíʼ ńchî pəg po. Filipə a nə ḿbə́ lə́ táʼ ŋwunə á mə́m pɨ pə̂ asaambɛ̂ páʼ pə́ nə ńtsɔ́ʼ nə ághóobə́ á Jɛlusalɛm ńgə́ pó tə́ ńkwáatə ngaŋə́zoŋə́ndzəm Yeso zə́ ntsɔb pɛ̌ lə́.

⁹Filibə a nə ńtúg pɔ́ pə́ pəngyě pɛ́n nəkwa á ndɛ̂ yí páʼ pó nə ńkě nə́ kə́ zɔ́ʼə pô. Pó kə chî mbɔʼ pó sóŋə anu páʼ á chî nə́ mə́ yǐ nə́ pɔŋə̂ laŋə̂.

¹⁰Əghâ ándó pəg nə ńchî nə́ ə́wɨ́ nə́ əlěmbî pətsə́ lə́, táʼ ntûsê yitsə̌ páʼ əlɛ́n yí nə ḿbə́ nə́ Agabus a fɛ́lə á mboʼ Judya ńtsó ńgyǐ ə́wə́.

¹¹A tíʼ ńgyǐəə á mə́ ghá nə́ áwə́gə́, ńkwáalə atwíŋə Pɔl ńdɔg ńkwúd məko mí (mimə́ Agabus) pópə mbô mí əwɨ́ ńtíʼ sóŋ ńgə́, “Ajwǐəsê a sóŋ nə́ maŋ ńgə́, Lɛ̌ ndzaŋ Pəjus pó chî nə́ á Jɛlusalɛm pó yǒ nə́ kwúlə a ŋwu páʼ a túg nə́ atwíŋ zəənə́, ə́ tíʼ ə́fɛ̂ yə́ á mbô Pətəjǐsê.”

¹²Əghâ pəg nə ńdzóʼ nə́ anu jɨ pə̂gpə pətsə́ ngaŋə́zoŋə́ndzəm Yeso ə́ nə ńchî nə́ aliʼ wə́ póʼmbô nə́ Pɔl ńgə́ kɔ a ghɛnə̂ á Jɛlusalɛmə.

¹³A kwěe áwə́g ńgə́, “Nə́ ghɛlə̂ lə́ akə̂ lɛ̌? Nə́ kyéŋ lə́ akə̈ ḿbə́ʼtə mbô mə leenə́? Maŋ pí ńgə́ pə́ kě mə lə́ tsɔʼə atsáŋə á Jɛlusalɛm yǐ néŋ pô, pə́ kɔŋ pə́ kə́ ńtû ńjwítə mə ńté Mmaʼmbî Yeso klisto.”

¹⁴Ndzaŋə ándó pəg nə ńdzɨ́ nə́ ńgə́ mbɔʼ pəg kě ghɛd Pɔlə a kwúblə ntɨ́ yí pô lə́, ḿmɛdtə̂ ńtíʼ ə́sóŋ ńgə́, “Á chî ndzaŋ páʼ Əsê lɔ nə́.”

¹⁵Ndzaŋə ándó əlěmbî əpə́g nə měe nə́ á mə́ chî nə́ Sisalya lə́, pəg tyáŋtə əpú əpə́gə́ á mə́ mɛdtə̂ nə́ ghɛnə̂ á Jɛlusalɛmə.

¹⁶Ngaŋə́zoŋə́ndzəm Yeso yitsə̌ á Sisalya ə́ghɛn pə̌gpo á Jɛlusalɛm ńtíʼ ńdɔgə̂ áwə́g ńgɛnə̂ á ndɛ̂ Mnasɔn, aliʼ páʼ pəg nə ńchî nə́ á mə́ chî nə́ ə́wə́. Mnasɔn a nə ḿbə́ lə́ ŋwu Sayiplus páʼ a nə néŋ nə́ ntɨ́ nə́ Yeso ə́fɛ́lə á ngoʼ pəchə́.

¹⁷Əghâ pəg nə ńkoʼ nə́ á Jɛlusalɛm lə́, pɨ pó néŋ nə́ ntɨ́ nə́ Yeso pó chî nə́ ə́wɨ́ pó lɔgə̂ áwə́g nə́ akɔŋtə.

¹⁸Mbî ə́ fóg Pɔlə a ghɛn pə̌gpo á mə́ ghá nə́ Jɛmsə, mətû mə́ nkyeetə tsɔʼə mətsəm mə́ nə́ ńchî ə́wə́.

¹⁹Pɔlə a chaʼtə̂ ághɔ́b ńtíʼ ə́fiʼtə̂ anuə atsəm páʼ Əsê a nə faʼ nə́ á mə́m Pətəjǐsê ńdaŋ nə afaʼə ajíə.

²⁰Əghâ ándó mətû mə́ nkyeetə mə́ nə ńdzóʼ nə́ atséebə ándó Pɔlə a tsáb nə́ lə́, pó ghóʼkə Əsê ńtíʼ ə́sóŋ nə́ yí ńgə́, “Ndim əwəg Pɔl, jwə́ʼtə, Pəjus pó chî ə́wɨ́ tə ńkoʼ pətɔsə páʼ pó néŋ nə́ məntɨ́ mɔ́b nə́ Yeso Klisto, ńkə́ ńtə́gə atûə á mə́ zoŋ nə́ məntəgə́ mə́ Mosisə.

²¹Lə́, pə́ fiʼtə̂ ághɔ́b ńgə́ gho tə́ ńdzéʼkə Pəjus páʼ pó chî nə́ á ndzɔʼ pətəjǐsê, ńdzéʼkə ághɔ́b ńgə́ kɔ pó pɨ ńdzoŋ pənoŋkə pə́ Mosisə, ńkə́ ə́fiʼtə̂ ághɔ́b ńgə́ kɔ pó póʼ pɔ́ póobə́, ńgə́ kɔ pó pɨ ńdzoŋə̂ á mbɔ́ Pəjusə.

²²Pɛn yǐ tíʼ ghɛd ə́lɛ́ əghâ nə́, pɨ pə́ pó yǐ shib zóʼ ńgə́ gho yǐəə.

²³Lɛ̌ anu pəg lɔ̈ nə́ ńgə́ gho faʼ əghâ nə́. Pɨ pɛ́n nəkwa pó chî ə́wɨ́ páʼ pó wad nə́ əkeenə.

²⁴Tíʼ ńgɛn pɨ̌pə pɨ pəənə́ á tə́kɔʼndɛ̂sê ńtéekə ághɔ́b pɨ po kyeetə̂ ə́sog mbɨ əzɨ ŋ́ŋwaʼə̂ á mbi Əsê, ńtíʼ ńtû ndɛn əpú páʼ pó yǐ nə́ lɔg ə́fyaʼə́nu ə́wə́ á mbô pó, ńjî ńgə́ pó kɔ́ ətû póobə́. Á yǐ ghɛd ŋwu ntsəm a jî ńgə́ mənu pə́ zóʼ nə́ ńté gho lə́ ntsəələ, pó kə́ ńjî ńgə́ gho tə́ ńdzoŋə̂ pənoŋkə pə́ Mosisə.

²⁵Nə́ anu ńté Pətəjǐsê, páʼ pó néŋ nə́ ntɨ́ nə́ Yeso pəg ŋwaʼlə̂ aŋwaʼlə ńtúmə á mbô pó ə́fiʼtə̂ ághɔ́b ńgə́ kɔ pó jî məjî páʼ pə́ lɔg nə́ ə́fyaʼ məsê mə́ məfɨgə ə́wə́, ńgə́ kɔ pó jîə achǐə, kɨ na ntsəm páʼ pə́ kě nə́ ndě əyí sə́ pô ńgə́ kɔ pó tə́ ńdzɔ́ʼnə mbǒʼḿbóʼə́.”

²⁶Pɔlə a tíʼ ńdɔg pɨ pə̂ nəkwa, mbî ə́ fóg pó po ghɛn ə́faʼə̂ anu pə́ nə náŋkə nə́ á mbô pó á mə́ sog nə́ mbɨ əzɔb ə́ ŋwaʼ lə́. A tíʼ ńgɛnə̂ á Tə́kɔʼndɛ̂sê á mə́ ghɛd nə́ ngaŋə́pêsê ə́ jîə alě ándó məsog nə́ məmbɨ mɔ́b mə́ yǐ nə́ měe. Pó tíʼ ńgɛlə̂ afyaʼə́nu ńté ŋwu ntsəm á mə́m pó.

²⁷Ndzaŋə ándó əlěmbî asaambɛ̂ nə́ ndɛlə́ asogə́mbɨ əzɔb ə́ nə́ ńtíʼ nə́ měe lə́, Pəjus pətsə́ á mboʼ Esya zə́ənə Pɔlə á Tə́kɔʼndɛ̂sê, ńtíʼ ńtóotə mboŋ pɨ ə́ nə ńchî nə́ aliʼ yi wɨ́ pó waamə̂ Pɔlə,

²⁸ńtíʼ ńkyéŋ nə́ pətə́kɔʼ pə́ ngye ə́sóŋ ńgə́, “Pɨ pə́ Islɛl, kwá nə́ áwə́gə́! Lɛ̌ ŋwu páʼ ä zéʼkə nə́ pəənə aliʼə́ atsəm nə́ mənu mə́ təpɔŋ ńté pɨ pɛnə̂, mənu mə́ təpɔŋ ńté pənoŋkə ńkə́ ńté Tə́kɔʼndɛ̂sê! A ghɛd lɛ tə ńtíʼ ńdɔg pɨ pə́ Glik ńgyǐ nə́ pó á Tə́kɔʼndɛ̂sê pó yǐ ńtadkə̂ aliʼ yə́ ŋwaʼ nə́ zəənə́!”

²⁹(Pó sóŋ ə́lɨ́d lə́ ńté ńgə́ pó nə ńdzə́ənə Təlofimus ŋwu Ɛfesus pó Pɔl á mə́m tə́kɔʼ tɔ̂ŋ ńkə́ ńtíʼ ńkwaŋ ńgə́ Pɔlə a nə ńdɔgə̂ yí ńkwúnə á Tə́kɔʼndɛ̂sê).

³⁰Pə́ nə ńgɛlə̂ aláʼə atsəmə a záŋ ndě ńté Pɔl, ńtíʼ ə́fɛ́d ńtsɛntə̂ táʼə aliʼ ńgwaamə̂ Pɔl ńtíʼ ə́soŋə̂ yí ə́fógə á mə́m Tə́kɔʼndɛ̂sê. Tsɔʼə əghâ yi ə́wɨ́ məntso məndɛ̂ á Tə́kɔʼndɛ̂sê pə́ wuʼtə̂ mə́ələ́.

³¹Pɨ pə̂ pó tə́ ńdoonə̂ á mə́ jwítə nə́ Pɔlə, lə́ pə́ nə ńtú nkəənə á mbô nətû nə́ ngaŋə́maʼə́ntsoolə á Lom ńgə́ pɨ pə́ Jɛlusalɛm tsɔʼə pətsəm pó chîə á mə́mə ajwaʼlə.

³²Tsɔʼə əghâ yi wɨ́ nətû nə́ ngaŋə́maʼə́ntso nə́ lɔg ngaŋə́maʼə́ntso yitsə̌ pópə mətû mɔ́b ńtíʼ ńkə ńgɛnə̂ aliʼə́ ándó ajwaʼlə nə ńchî nə ə́wɨ́ lə́. Əghâ ándó pɨ pə́ pó nə ńdzɨ́ nə́ yí pópə ngaŋə́maʼə́ntso lə́, ḿmɛdtə̂ á mə́ póʼ nə́ Pɔlə.

³³Lə́ nətû zɔ́b nə́ ghɛn ńgwaamə̂ a Pɔlə ńtíʼ sóŋ ńgə́ pə kwúlə yí nə́ məŋkɛd mə́ atəənə́ mɛ́n mbɛ̌. Nətû zə́ nə́ tíʼ ḿbítə ńgə́, ŋwu ghɛn lə́ əwə, anuə təpɔŋ ándó páʼ a ghɛd nə́ lə akə̂?

³⁴Pɨ pətsə́ á mə́m apoŋə pɨ zə̂ á yɛ́ɛlə ə́sóŋə táʼ anuə, pətsə́ pə́ kə́ ńgyɛ́ɛlə azɔ́b ə́sóŋə á yə ndaʼə. Əliʼ jwaʼlə̂ lɛ tə nətû nə́ ngaŋə́maʼə́ntso nə́ kě chî tə mbɔʼ nə́ jîə anu páʼ á laŋ nə́ pô, ńtíʼ ńgɛd ngaŋə́maʼə́ntso lɔgə̂ yí ńgɛnə̂ aliʼ páʼ ngaŋə́maʼə́ntso nə ńchî nə́ ə́wə́.

³⁵Əghâ ándó pó nə ńkoʼ nə́ aliʼ páʼ pə́ pɔ́ nə́ ńkɔ́ʼə ə́wɨ́ ḿbɔŋə̂ kwúnə á ngyaʼə́ ngaŋə́maʼə́ntso lə́, pó twáamə Pɔl ńté ńgə́ pɨ pə́ nə ńtə́ ńdoonə̂ á mə́ kwá nə́ yə́ á mbô pó nə́ mətəənə.

³⁶Apoŋə pɨ zə̂ nə ńtə́ ńdzoŋə̂ Pɔlə ńjwáglə ə́sóŋə ńgə́, “Pə́ jwítə yə́, pə́ jwítə yə́!”

³⁷Ndzaŋə ándó ngaŋə́maʼə́ntso nə ńtə́ nə́ ńdoonə̂ á mə́ kwúnkə nə́ Pɔlə á ngyaʼə́ pó lə́, a sóŋə á mbô nətû zɔ́b nə́ atséebə Glik ńgə́ “Mbɔʼ maŋ sóŋə anu yətsə́ á mbô gho?” Nətû zɔ́b nə́ pítə yí ńgə́, “Lə́ pə́ ńgə́ gho tséebə atséebə Glik?”

³⁸Lə́ pə́ ńgə́ gho kě lə́ ŋwu Ijib wə̂, páʼ a nə ḿbə́ á ndɛd yitsə̌, gho fɛ̂ ngə́ʼ, tə ńtíʼ ńdɔg pəməkizâ tɔsə nəkwa pó pěʼ əpú ntso gho lɔgə̂ ághɔ́b ńgɛnə̂ a kɔŋ məŋkwâʼlə̌ lə?

³⁹Pɔlə a kwěe yí ńgə́, “Maŋ lə́ ŋwu Jusə, pə́ pî mə lə́ á tɔ̂ŋ Tasusə á mə́m mboʼ Silisya. Maŋ lə́ ŋwunə aláʼə nə́, ə́fɛ́lə á mə́m chigə tɔ́ŋə. Maŋ póʼmbô, tíʼ maŋ tséebə á mbô pɨ pəənə́.”

⁴⁰Nətû nə́ ngaŋə́maʼə́ntso nə́ ghɛd ńgə́ Pɔlə a tséebə, Pɔlə á tíʼ ńtə́əmə á ntsǒndɛ̂ ńdɔgə̂ apô əjí ńgɛd ńgə́ ŋwu ntsəmə a naʼə̂. Ndzaŋ pó nə́ naʼ nə́ lə́, a atséebə á mbô pó nə atséebə pɨ pə́ Islɛl.