Read Awing Məfaʼə 22 Bible Online

Məfaʼə 22 - Awing bible

Məfaʼə 22

¹“Pɔ́pə́mɛ́ mə pópə pətǎ mə, jwə́ʼtə nə́ maŋ tsáb ńkwá mbəəmə mə á mbô pəənə́.”

²Ndzaŋ pó nə ńdzóʼ nə́ a tséebə á mbô pó nə́ atséebə Alamya lə́, pó kwéʼnə ńtíʼ ńnaʼnə̂ pə́ ńgə́ ntóʼ. Pɔlə a tíʼ Ə́sóŋə á Mbô Pó ńgə́,

³“Maŋ lə́ ŋwu Jusə, pə́ pə̂ ḿbîə mə á mə́m tɔ̂ŋ Tasusə á mboʼ Silisya, maŋ pə́ ńtíʼ ńkwíŋə á mə aláʼ Jɛlusalɛm. Gamilya a nə ḿbyádnə ńdzéʼkə mə nə́ pənoŋkə pə́ pətǎ pə́ pətǎ pɛ́nə, maŋ kə́ ńtə́gə atûə mə nə́ anǔəsê tsɔʼə ndzaŋ pɨ kə́ nə́ ńtə́gə azɨ́ ə́wɨ́ ə́sɛ̂n lə̂.

⁴Maŋ nə̈ ńtsaŋkə̂ pɨ pó nə́ ńdzoŋ nə́ ndzəm Yeso tə́ ńjwítə pətsə́. Maŋ nə̈ ńgwam mbyâŋnə pópə pəngyě ńgɛnə̂ ńnéŋə á nkáʼə atsáŋə.

⁵Mbɔʼ Mbêsê yi Ngweŋ pópə ngaŋə́sáʼə́məsáʼ ətsəm pó pímə á mbô pɨ ńgə́ maŋ tséebə lə́ ndə̌ŋdəŋə́. Maŋ nə ńgɛd tə ńkə́ ńkwá əŋwaʼlə á mbô pó ńgɛn ə́fɛ̂ á mbô pɔ́pə́mɛ́ póobə́ á Damaskɔsə. Maŋ nə ńgɛn ə́wɨ́ lə́ á mə́ wam nə́ pɨ pɨ ə́ kwúd nə́ məŋkɛd ə́ pɨ nə́ pó á Jɛlusalɛm pə́ tsaŋkə̂ ághóobə́.”

⁶“Ndzaŋə ándó maŋ nə ńgyǐ nə́ tə ńtíʼə ḿbáatə Damaskɔsə ándó ntɨ̌numnə lə́, nkyaʼ ə́ ghabkə̂ ə́ fɛ́lə á nəpó ŋ́ŋwaŋkə̂ ńdíblə mə.

⁷Maŋ wǔəə á ndəsê ńtíʼ ńdzóʼ ngye yitsə̌ ə́sóŋ nə́ maŋ ńgə́, Sɔl! Sɔl! Gho lánə ńchígə́ ńtsaŋkə̂ mə lə́ ńgə́ akə̂?”

⁸Maŋ pítə ńgə́, Mmaʼmbî, lə́ gho əwə? A kwěe ńgə́, “Lə́ maŋ Yeso Mɔ́ Nazalɛd páʼ gho tsaŋkə̂ nə́ lə̂.

⁹Ngaŋmə́koolə mə nə ńjɨ́ nkyaʼ yi wə́, lə́ ḿbə́ ńkě zóʼ ngye ŋwu páʼ a tsáb nə á mbô maŋ pô.”

¹⁰Maŋ pítə ńgə́, “Maŋ yǐ ghɛd lə́ ə́lɛ́ Mmaʼmbî?” Mmaʼmbîə a tíʼ ə́sóŋə á mbô maŋ ńgə́: Lǒo ndəsê ńgɛnə̂ á Damaskɔsə. Pə́ yǐ fiʼtə̂ gho nə anuə atsəmə ándó Əsê a pɛ́d nə́ tə ńtsɔ́ʼə gho wɨ́ ńgə́ gho faʼə̂.

¹¹Ngaŋmə́koolə mə tíʼ ńgwaamə̂ apô mə ńdɔgə̂ mə ńgɛnə̂ á Damaskɔsə ńté ńgə́ ndzaŋə ándó nkyaʼ zə̂ nə ŋ́ŋwaŋkə̂ nə lə́, ə́fəkə̂ əmə́gə mə.

¹²Ŋwu yitsə̌ a nə ńchî ə́wɨ́ páʼ pə́ nə̈ ə́fóŋ nə́ yí nə́ Ananyasə a yǐəə á mə́ jɨ́ nə mə. A nə ḿbə́ lə́ ŋwu ńdzoŋ məntəgə́ tsɔʼə mətsəmə, Pəjusə pə́ chî nə́ á Damaskɔsə tsɔʼə pətsəm pó nə́ chigə ńdzóʼ nə́ yə́.

¹³A tíʼ ńtə́əmə á nəpɛnə́ maŋ ə́sóŋ ńgə́, “Ndimə́ mə Sɔl, jɨ́ əliʼə́! Tsɔʼə əghâ yi ə́wɨ́ maŋ chî təmbɔʼ maŋ zə́ənə yə́.”

¹⁴A tíʼ ə́sóŋ nə́ maŋ ńgə́, Əsê a pə́ nə́ tǎpə pətǎ pɛ́n ə́ tsɔʼə gho ńgə́ gho jîə anuə ä lɔ nə́, ńkə́ ńdzə́ənə Ngaŋəfaʼ əyǐə a Tɨ nə́ Ndə̌ŋdəŋə́ ḿbɨ ńkə́ ńtû ńdzóʼə atséebə á ntso yə́.

¹⁵Gho yǒ tə́əmə ándó ŋwu páʼ a yǒ nə́ fiʼtə̂ ŋwu ntsəm nə́ anu páʼ gho jɨ́ nə́ ńkə́ ńdzóʼ ńté yə́.

¹⁶Nə́ pə əghâ nə́ gho pɛ́lə ḿbyáabə lə́ akə̂? Lǒo ndəsê ńgɛn ńkwá nkǐə ńtíʼ ə́fóŋ əlɛ́n əyí ńjî ńgə́ a sogə̂ təpɔŋ əgho.

¹⁷Əghâ maŋ nə ḿbɨ nə́ Jɛlusalɛm ńtə́ chaʼtə́sê á Tə́kɔʼndɛ̂sê lə́, ńdê ndzəəmə atəəmə́tə́əmə,

¹⁸Mmaʼmbiə a tsáb ə́sóŋə á mbô maŋ ńgə́, “Ghə́glə! Fɛ́lə á Jɛlusalɛm tsɔʼə əghâ nə́, ńté ńgə́ pó kě ntɨ́ nə́ anu páʼ gho yǐ nə́ sóŋ té mə lə́ néŋ pô.”

¹⁹Maŋ kwěe ńgə́, “Mmaʼmbî, pɨ pɨ pó jî ńgə́ maŋ nə̈ ńkwúnə á mə́m məndɛ̂ mə́ əsê mə́ Pəjusə tsɔʼə mətsəm ńgwamtə̂ ághɔ́b ńnéŋə atsáŋə, ńtûə ə́shúmə pətsə́ ándó pó néŋ nə́ ntɨ́ nə́ gho.”

²⁰Á nə ḿbə́ əghâ ándó pə́ nə ńjwítə nə́ Stifən, ŋwu páʼ a kə náŋkə nə́ nkɨ ńté gho lə́, maŋ nə́ nkɔ̌ʼmbəəmə mə maŋ nə ńchî ə́wə́. Maŋ kə tɨ́ əwɨ́ ḿbí ńgə́ pə́ jwítə yí ńkə́ ńtə́ ńnáŋ ətsəʼ pəənə ándó pó nə ńjwítə nə́ yə́.

²¹Mmaʼmbîə a tíʼ ə́sóŋə á mbô maŋ ńgə́, “Ghɛnə̂, maŋ yǐ túmə gho tə ndi ə́ sagə̂ á mbô pətəjǐsê.”

²²Ənɔ pɨ wə́ kə̈ ńjwə́ʼtə Pɔl tə a yǐ ńtíʼ ə́sóŋə zəənə́ atséebə. Pó tíʼ ńjwáglə nə́ pətə́kɔʼ pə́ ngye ə́sóŋ ńgə́, “Ghɛn nə́ nə́ yə́! jwítə nə́ yə́; A kě chî təmbɔʼ a chîə á mbî pô.”

²³Ndzaŋə ándó pó nə ńjwáglə nə́ lə́, ńtsɔ́ʼ ətsəʼ pɔ́b ńtíʼə ḿmegtə̂, nchwáʼə akəpóglə́ ńkwɛlə̂ atǐə.

²⁴Nətû nə́ ngaŋə́maʼə́ntso nə tíʼ sóŋ ńgə́ pó lɔgə̂ Pɔl ńgɛn nə́ yə́ á pə́lə́gə́ pəsoye ə́shúmə yə́, ńkə́ ḿbítə yí nə́ anu páʼ a ghɛd nə́ pə́ pɔŋə̂ tíʼə jwáglə á atû yí nə́ mbô zəənə́.

²⁵Ndzaŋə ándó pó nə ńkwúd nə́ yí ńtə́ ńdoonə̂ á mə́ shúm nə́ lə́, Pɔl a sóŋə á mbô nətû nə́ ngaŋə́maʼə́ntso páʼ a nə ńtɨ́ nə́ aliʼ yə wɨ́ ńgə́, “Noŋkə a pí ńgə́ pə́ shúmə ŋwu Loman páʼ pə́ kě nə́ əsáʼ əyí sáʼ ńdə́g ńgə́ a wǔəə?”

²⁶Əghâ páʼ nətû nə́ ngaŋə́maʼə́ntso nə́ nə́ ńdzóʼ nə́ atsáb zɨ lə́, ńtíʼ ńgɛn ḿbítə nətû zɔ́b yi nəweŋ ńgə́, “Gho ghɛlə̂ lə́ ə́lɛ́? Ŋwu nə́ lə́ ŋwu Loman.”

²⁷Nətû zɔ́b yi nəweŋ nə́ ghɛnə̂ á mbô Pɔl ńtíʼ ḿbítə yí ńgə́, “Fiʼtə̂ mə, gho lə́ ŋwu Lom?” A kwěe ńgə́, “Ə̂, maŋ lə́ wə́ələ́.”

²⁸Nətû nə́ ngaŋə́maʼə́ntso yi nəweŋ zə̂ nə́ tíʼ ə́sóŋ ńgə́, “Maŋ nə ńtûə tə́kɔʼ nkéebə a mə́ pə́ nə́ ŋwu Lomə.” Pɔl a kwěe ńgə́, “Lə́ pə́ pə́ ḿbîə mə lə́ ándó ŋwu Loman.”

²⁹Pəənə́ ándó pó nə ńchî nə́ á mə́ pítə nə́ yí nə́ əpítə ətsáb lə́, pó shwiʼtə̂ ḿbəənə̂ ághɔ́b nə́ ndzəm tsɔʼə əghâ ə́wə́. Tsɔʼə nətû nə́ ngaŋə́maʼə́ntso yi nəweŋ zə́ nə́ nə́ ḿbɔ́g əghâ ándó a nə ńdeŋ nə́ ńgə́ a kwúlə Pɔl nə́ məŋkɛd páʼ a pə́ nə́ ŋwu Loman.

³⁰Mbî fóg, ndzaŋə ándó nətû nə́ ngaŋə́maʼə́ntso yi nəweŋ nə́ nə́ ńtə́ nə́ ńdoonə̂ á mə́ jî nə́ chigə anu páʼ Pɔlə a nə ńgɛd nə́ Pəjusə pó tə́ ńgwaamə̂ yí ə́wɨ́ lə́, ńtíʼ ə́fógə Pɔlə nkáʼə atsáŋ ə́sóŋə á mbô pətə́kɔʼ pə́ ngaŋə́pêsê pópə ngaŋə́sáʼə́məsáʼ tsɔʼə ətsəm ńgə́ pó kyeetə̂ táʼ aliʼə́. A tíʼ ńgyǐ nə́ Pɔl ńtə́gə á mbi pó.