Read Awing Məfaʼə 23 Bible Online

Məfaʼə 23 - Awing bible

Məfaʼə 23

¹Pɔlə a tə́g əmə́g mí ndə̌ŋdəŋ ńnáŋ ngaŋə́sáʼə́məsáʼ ńtíʼ ə́sóŋə á mbô pó ńgə́, “Pəlimə́ mə, ntə́əmə mə ə́ ŋwaʼə̂ á mbi Əsê ńté ndzaŋ nchîmbî mə kə chî nə́ tə ńkoʼ ə́sɛ̂nə̌.”

²Mbêsê yi Ngweŋə́ ándó pə́ nə̈ fóŋ nə́ nə́ Ananyasə a tíʼ ə́sóŋ nə pɨ pó nə ńtɨ́ nə́ a nəpɛnə́ Pɔl ńgə́ pó kə́ʼə apô á əmə́g yə́.

³Pɔlə a tíʼ ə́sóŋə á mbô yí ńgə́, “Əsê a yǐ kə́ ləbə̂ gho, gho chî lə́ ándó mbɨ ndɛ̂ pə́ zɔ́ʼ nə́ nə́ mbəəmə́ ə́ tə́ fógə! Gho náanə aliʼ wə́ ńdoonə̂ á mə́ sáʼ nə́ əsáʼə mə ə́ zoŋə̂ noŋkə, lə́ gho nə́ nkɔ̌ʼmbɨ əgho, gho pə́ ńgwǔəə noŋkə á mə́ sóŋ nə́ ńgə́ pə́ ləbə̂ mə.”

⁴Pɨ pó nə ńtɨ́ nə́ ḿbáatə Pɔl pó sóŋ ńgə́, “Gho zoomə̂ lə́ Mbêsê yi Ngweŋ lɛ̌?”

⁵Pɔlə a kwěe ághɔ́b ńgə́, “Pəlimə́ mə, maŋ pěʼ ńkě jî ńgə́ lə́ Mbêsê yi Ngweŋ pô, ńté ńgə́ aŋwaʼlə Əsê a sóŋ ńgə́, Kɔ gho tséebə á təpɔŋ ńté nətû nə́ pɨ pô.”[15]

⁶Əghâ ándó Pɔlə a nə ńjî nə́ ńgə́ pɨ pətsə́ lə́ Pəsadusi pətsə́ pópə Pəfalasi lə́, ńtíʼ ə́sóŋə á mbô ngaŋə́sáʼə́məsáʼ ńgə́, “Pəlimə́ mə, maŋ lə́ ŋwu Falasi, ńkə́ ḿbə́ mɔ́ ŋwu Falasi. Maŋ tɨ́ pə́ sáʼ əsáʼə mə lə́ ńté ńgə́ maŋ túgə akwaŋ ńtə́ ḿbyáabə ńgə́ pəkwû pó yǒ júmnə á nəwûə.”

⁷Əghâ ándó Pɔlə a nə ńtsáb nə́ atsáb zɨ lə́ afyaʼə́ fɛ́lə tətɨ Pəfalasi pó Pəsadusi, nkyeetə yi wɨ́ nə ńtíʼ ńgabnə̂ əliʼ pɛ̌.

⁸Ńté ńgə́ (Pəsadusi pó sóŋə ńgə́ pɨ pə́ yǒ kě nəwû pɨ júmnə pô, ńkə́ ə́sóŋə ńgə́ pətseŋpə́ndɛ́pə́sê pópə ajwi ə́ kě ə́wɨ́ kə́ chîə pô, lə́ Pəfalasi pó pə́ ńjî ńgə́ mənu mɨ́d mɨ mə́ chî ə́wə́.)

⁹Chigə mɛ́ tə́kɔʼə ajwaʼlə a nə ńchî ə́wə́, ngaŋə́zéʼkə pənoŋkə pətsə́ ándó pó nə ḿbə́ nə́ pɨ pə́ Falasi pó lǒo ńtɨ́ ə́sóŋ ńgə́, “Pəg kě anu yitsə̌ zə́ənə ándó ŋwu nə a wǔ nə́ pô, əghâ tsə́ lə́ pěʼ ńtsáb ntseŋndɛ̂sê kəənə ajwiə á mbô yə́!”

¹⁰Afyaʼ yəwə́ a nə ńtíʼ ńtyantə̂ lɛ tətə nətû nə́ ngaŋə́maʼə́ntso nə́ tíʼə ḿbɔ́gə ńgə́ pə́ yǐ sɛɛtə̂ Pɔlə apagə apagə. A tíʼ ə́sóŋə á mbô ngaŋə́maʼə́ntso ńgə́ pó tsó ńkwáalə Pɔlə nə́ mətəənə, ńdɔgə̂ yí ńgɛn nə́ yə́ á pə́lə́gə́ pó.

¹¹A yǐ ḿbə́ nətúʼ, Mmaʼmbiə a tíʼ ńgyǐ ńtə́əmə a nəpɛnə́ Pɔl ə́sóŋ ńgə́, “Wam ntɨ́ əghô! gho tə́əmə aliʼə́ nə́ á Jɛlusalɛm ə́sóŋə anu ńté mə á əshîsaŋə, lə́ kə́ ḿbə́ ndzaŋ gho yǐ nə́ tə́əmə Lom ə́sóŋə anu té mə á əshîsaŋə.”

¹²Mbî ə́ fóg á məsânə Pəjus pətsə́ pó kyeetə̂ táʼ aliʼə́, ńtíʼ ńtyáŋə mənaŋ ńdzoŋ ńgɛlə̂ atyǎntə ndaʼnə ə́sóŋ ńgə́ pó kě ajú yǐ jî kɨ nô tə ńdéʼtə ńgə́ pó jwítə Pɔlə pô.

¹³Pɨ pó nə ńkwaŋ nə́ anu zɨ pó nə ńdaŋ məghə́m mɛ́n nəkwa.

¹⁴Pó tíʼ ńgɛnə̂ á mbô pətə́kɔʼ pə́ ngaŋə́pêsê pópə mətû mə́ aláʼ ə́sóŋ ńgə́, “Pəg chwíʼnə táʼ aliʼ ńgɛlə̂ atyǎntə ndaʼnə ńgə́ pəg yǐ kě ajûtsə́ jî kɨ nô tə ńdéʼtə ńgə́ pəg jwítə Pɔlə pô.

¹⁵Nə́ pə əghâ nə́ pɨ̌pə ngaŋə́sáʼə́məsáʼ yǐ shib tú nkəənə á mbô nətû nə́ ngaŋə́maʼə́ntsoolə á Lom ńgə́ a lɔgə̂ Pɔl ńgyǐ nə́ yə́ á mbô pəənə́. Nə yǐ tsɨd ntsəələ á mbô yí ńgə́ nə́ loonə̂ lə́ á mə́ pyádnə nə́ zóʼə anuə á mbô yí ndzaŋə á nə́ ńdaŋ nə́. Pəg koʼnə̂ á mə́ jwítə Pɔl záʼ a pɔŋə̂ yǐ kwúnə aliʼə́ nə́.”

¹⁶Əghâ ándó mɔ́ ndim Pɔl yi məngyě a nə ńdzóʼ nə́ mənaŋ ghɛn ńté yí lə́, ńtíʼ ńgɛn ńkwúnə á pə́lə́gə́ pəsoye ə́fiʼtə̂ Pɔlə.

¹⁷Pɔlə a tíʼ ə́fóŋə a táʼ nətû nə́ ngaŋə́maʼə́ntso zə́ yi nətsə́ ə́sóŋə á mbô yí ńgə́, “Lɔgə̂ a mɔ́ nkaŋŋwu ghɛn ńgɛn nə́ yə́ á mbô ŋwu əwɨ yi ngweŋə́, a chî nə́ anu á mə́ fiʼtə̂ nə́ yə́.”

¹⁸A tíʼ ńdɔgə̂ yí ńgɛnə̂ á mbô ŋwu əghɔb yi ngweŋ ə́sóŋ ńgə́, “Ngaŋətsáŋ wə́ pə́ fóŋ nə́ nə́ Pɔlə lə́ a túmə mə á mbô gho ńgə́ maŋ lɔgə̂ mɔ́ nkaŋŋwu ghɛn ńgyǐ fɛ̂ nə́ gho ńté ńgə́ a túgə anu yətsə́ á mə́ sóŋ nə́ gho.”

¹⁹Ŋwu yi ngweŋ əghɔb wə́ á tíʼ ńgwaamə̂ a mɔ́ nkaŋŋwu wə́ apô yí ńdɔgə̂ yí ə́fɛ́lə apeŋ ḿbítə yə́ á ndzəmə ndzəm ńgə́, “Gho túg lə́ akə̂ anuə á mə́ fiʼtə̂ nə́ mə?”

²⁰A sóŋ ńgə́, “Pəjus pó pímnə ńgə́ pó yǒ yǐ ə́sóŋ nə́ gho ńgə́ gho lɔgə̂ Pɔl ńtsó nə́ yə́ ngwɛʼə́ á mbô ngaŋə́sáʼə́məsáʼ ńjî ńgə́ pó tíʼ ḿbɨ́ʼkə əmə́g ńgə́ pó loonə̂ lə́ á mə́ pyádnə nə́ zóʼə anu Pɔl á kə ghɛd nə́.

²¹Lə́ kɔ gho pə́ ńjwə́ʼtə á mbô pó ńté ńgə́ pó chî tə ńdaŋ məghə́m mɛ́n nəkwa pó yǒ nə pánə akɔb ə́ tə́ pyáabə yə́ á mə́ jwítə nə́. Pó wad əka ńgə́ mbɔʼ pó kě ajûtsə́ jî kɨ nô pô tə ńdéʼtə ńgə́ pó jwítə yə́. Pó koʼnə̂ əghâ nə́ á mə́ jwítə nə́ yə́ ḿbə́ ńtíʼə ḿbyáabə atséebə á mbô gho.”

²²Lə́ ŋwu yi ngweŋ əghɔb wə̂ a nə́ ńgɛd mɔ́ nkaŋŋwu wə́ a tə ńgɛnə̂ yə́, a pə́ ńkwantə̂ yí ńgə́, “Kɔ gho fiʼtə̂ ŋwu tsə́ ńgə́ gho sóŋə anu zəənə́ á mbô maŋə.”

²³Lə́ ŋwu yi ngweŋ ngaŋə́maʼə́ntso zə́ a tíʼ ə́fóŋ mətû mə́ ngaŋə́maʼə́ntso mɛn mbɛ̌ ə́sóŋ ńgə́, “Lɔg nə́ ngaŋə́maʼə́ntso nkɛd pɛ̌ nə́ ngaŋə́kəələlə́əmə́ məghə́m mɛ́n asaambɛ̂ ḿbɨ ḿbə́ nə́ ngaŋə́maʼənə́kɔŋ nkɛd pɛ̌ pɨ po ghɛnə̂ á Sisalya nə́ pəmə́nu pɛ́n nəpuʼə́ á nətúʼ ə́sɛ̂nə̌.

²⁴Fɛ̂ nə́ pələəmə́ pətsə́ Pɔlə a kɔ́ʼə á ndu ə́wə́, nə́ lɔg ndɛd nə́ yí kɔ anu yitsə̌ á ghɛlə̂ yə́, nə́ ghɛn ə́fɛ̂ yí nə́ Əfo Fɛlɛsə.”

²⁵Ŋwu yi ngweŋ ngaŋə́maʼə́ntso wə́ a nə ńtə́ ńtúmə ághɔ́b lə́ ḿbə́ ŋ́ŋwaʼlə̂ aŋwaʼlə ə́fɛ̂ á mbô pó páʼ á sóŋ nə́ ńgə́:

²⁶Atsɛ Pəfo Fɛliks, lə́ maŋ Klodiɔsə Lysas páʼ maŋ tú nə́ aŋwaʼlə zəənə́ á mbô gho: Maŋ chaʼtə̂ gho.

²⁷Pəjusə pó nə ńgwaamə̂ ŋwu ghɛn ńtə́ ńdoonə̂ á mə́ jwítə nə́ yə́, lə́ maŋ yǐ pə̂gpə ngaŋə́maʼə́ntsoolə mə ńkwáalə yə́, ḿbə́ ńtíʼ ńdzóʼ ńgə́ lə́ ŋwu Lomə.

²⁸Maŋ nə ńtə́ ńdoonə̂ mə́ jî nə́ anu a ghɛd nə́ pó waamə̂ yə́, ńtíʼ ńdɔgə̂ yí ńgyǐəə á mbô ngaŋə́sáʼə́məsáʼ əzóobə́.

²⁹Maŋ nə ńjɨ́ ńgə́ anu pə́ nə ńgwam nə́ yí ə́wɨ́ lə́, á túg əpítə ńté noŋkə əghoobə́, lə́ a pə́ ńkě anu yətsə́ fankə̂ mbɔʼ pə́ nə ńjwítə yí kɨ ńnéŋə yə́ atsáŋ pô.

³⁰A nə mbɛn ḿbə́ əghâ maŋ nə ńdzóʼ nə́ ńgə́ pə́ tə́ ńtyáŋə mənaŋ ńté yí lə́, maŋ tíʼ ńtúmə yə́ á mbô gho tsɔʼə əghâ yi ə́wə́. Maŋ nə ńkə́ ńtú pəənə ándó pó nə ńtyáŋ nə́ mənaŋ ńté yí lə́ á mbô gho ńgə́ pó yǐ fiʼtə̂ anu páʼ ŋwu nə a fankə̂ nə́ á mbô pó lə́ nə́ gho.

³¹Ngaŋə́maʼə́ntso zə̂ tíʼ faʼə̂ afaʼə azɔ́b tsɔʼə ndzaŋ pə́ nə sóŋ nə́ á mbô pó. Pó lɔgə̂ Pɔl tsɔʼə á nətúʼ wə́ ńgɛn nə́ yə́ Antipatilisə

³²Mbî ə́ fóg ngaŋə́maʼə́ntso ə́ nə nyi nə́ məko lə́, pó pəənə́ ághóobə́ á pə́lə́gə́ pó ńtíʼ ḿmɛdtə̂ pətsə́ páʼ pó nə nyi nə́ á ndu pələəmə́ lə́ pó ghɛn pópə Pɔlə.

³³Əghâ ándó pó nə ńkoʼ nə́ á Sisalya lə́, ə́fɛ̂ aŋwaʼlə zə̂ á mbô əfo Lomə, ńkə́ ḿmɛdtə̂ Pɔlə á mbô yə́.

³⁴Əfo wə̂ a fóŋə aŋwaʼlə zə̂ ńtíʼ ḿbítə Pɔl nə́ mboʼ páʼ a fɛ́d nə́ ə́wə́. Ndzaŋə a nə ńdzóʼ nə́ ńgə́ a fɛ́d lə́ á mboʼ Sisalya lə́,

³⁵ə́sóŋ ńgə́, “Maŋ yǐ zóʼ əsáʼ əgho lə́ əghâ ándó pɨ pó néŋ nə́ anuə atû gho lə́ pó chî nə́ ə́wə́, ńtíʼ ə́sóŋ ńgə́ pə́ lɔʼkə̂ Pɔlə á mə́m ntɔ́ʼ əfo Ɛlɔdə ngaŋə́maʼə́ntso ə́ tə́ ḿbyáabə yə́.”