Read Awing Məfaʼə 24 Bible Online

Məfaʼə 24 - Awing bible

Məfaʼə 24

¹Əlěmbî tâ ə́ laŋə̂, Ananyasə ándó a nə ḿbə́ nə́ Mbêsê yi Ngweŋ lə́ a tsó ńgɛnə̂ Sisalya pópə mətû məláʼ mətsə́ ḿbéenə əsáʼməsáʼ ándó əlɛ́n yí nə ḿbə́ nə́ Tətulɔsə lə́, pó tíʼ ə́fɛ̂ əsáʼ əghóobə́ á mbô əfo.

²Əghâ ándó pə́ nə fóŋ nə́ Pɔl lə́, Tətulɔsə a fiʼtə̂ mənu pó néŋ nə́ atû Pɔl lə́ á mbô əfo Fɛlɛsə ə́sóŋ ńgə́, “Atsɛ pəfo Fɛlɛsə, gho túgə áwə́g əshîʼnə, tə ndi kə̂ ə́sag páʼ mbwɔ́dnə ə́ chî nə́ aláʼ ghɛn leenə́. Mənu mimə nɨ́ nə́ mə́ kə́ ńkwúblə á mə́ ghɛd nə́ ńgə́ aláʼ azɛ̂n zəənə́ á pɔŋə̂.

³Pəg túgə kwúblə ghɛn tsɔʼə əliʼ ətsəmə mbɨ əzəg kə́ ḿbyádnə ḿbɔŋ pəg ə́fɛ̂ ndǎ á mbô gho.

⁴Maŋ kě kɔŋə̂ á mə́ tɔ nə́ ndɛd əzo tə́shú pô, maŋ póʼmbô á mbô gho ńgə́ ndzaŋ gho pə́ nə́ ŋwu yi əshîʼnə lə́, gho lɔg ndɛd ńjwə́ʼtə mɔ́ akəmə atsáb ghɛnə̂.

⁵Pəg zə́ənə a ŋwu nə́ a pə́ lə́ ŋwunə ándó a jwaʼ nə́ əliʼə́, mbɔʼ a yǐ nə́ ngə́ʼə á mə́mə aláʼə azə́gə́. A nyinə̂ ńdoonə̂ afyaʼə́ á mə́m Pəjus pətsəmə á mə́m mbîə. Lə́ kə́ ḿbə́ nətû nə́ nkyeetə zə́ páʼ pə́ fóŋ nə́ nə́ Nazalin lə́.

⁶A kə kə́ ńtə́ ńdoonə̂ á mə́ féŋkə nə́ Tə́kɔʼndɛ̂sê, pəg waamə̂ yə́

⁷Lə́ ŋwu yi ngweŋ ngaŋə́maʼə́ntso páʼ əlɛ́n yí pə́ nə Lysasə lə́ a tíʼ ńgyǐ ńdɔg mətɨ ńkwáalə yí ə́wə́ á mbô pəgə́.

⁸Lysasə a tíʼ ə́sóŋ ńgə́ pɨ pə́ wam nə́ yí lə́ pó yǐəə á mbô gho. Təmbɔʼ gho pítə ŋwu ghɛn nə́ mənu, tə ḿbə́ gho nə nkɔ̌ʼmbɨ əgho yǐ zóʼ mənu tsɔʼə mətsəm á mbô yí páʼ pəg wam nə́ yí ńté lə́.”

⁹Pəjusə tsɔʼə pətsəm pó tíʼ nkyeetə ə́sóŋ ńgə́ mənu tsɔʼə mətsəm pó sóŋ nə́ ńté Pɔl lə́ ndə̌ŋdəŋə́.

¹⁰Əghâ ándó əfo ə́wə́ a nə nɨd nə́ apô əjí ńgə́ Pɔlə atsáb lə́, Pɔlə a tíʼ ńtsáb ə́sóŋ ńgə́: “Maŋ jî ńgə́ gho sáʼ məsáʼə á mə́mə aláʼ zɨ nə́ məngoʼ mə́ nɨ́ nə́, maŋ kə́ ḿbyádnə ńkɔŋtə̂ á mə́ tsáb nə́ á ndə̌ŋdəŋə́ mə á mbi gho.

¹¹Mbɔʼ gho tə́ ńtɔʼnə̂ gho jî ńgə́ a kě əlěmbî ntsɔb pɛ̌ kə́ koʼə̂ páʼ maŋ nə ńkɔ́ʼ nə́ ńgɛnə̂ á Jɛlusalɛm á mə́ ghóʼkə nə́ Əsê pô.

¹²Pəjusə pó nə ńkě jɨ́ pəg ŋwu tsə́ tə fyaʼnə̂ á mə́m Tə́kɔʼndɛ̂sê kɨ maŋ kə́ ńtə́ ḿmaʼə̂ ajwaʼlə á mə́m məláʼ mə́ Əsê mə́ Pəjus, kəənə aliʼ yitsə̌ á mə́m tə́kɔʼ tɔ̂ŋ pô.

¹³Təmbɔʼ pó kě kə́ ńdánə nɨd ńgə́ lə́ ndə̌ŋdəŋ ńgə́ maŋ ghɛd mənu pó sóŋ nə́ ńgə́ maŋ ghɛd lɛ̌ pô.

¹⁴Lə́ maŋ pə́ ḿbí ńgə́ mäŋ ghóʼkə lə́ Əsê pətǎ pɛnə̂, ńdzoŋ Ndú páʼ pó sóŋ nə́ ńgə́ wɨ́d kě koʼnə̂ lə̂. Maŋ pí pənoŋkə pətsəm ándó pə́ ŋwaʼlə̂ nə́ á mə́mə aŋwaʼlə Mosisə pópə Məntú mə́ Əsê.

¹⁵Maŋ kə́ ńtúgə akwaŋ ńtə́ ḿbyáabə nə́ Əsê lə́ tsɔʼə ándó pɨ pɨ pó túg nə́, ńgə́ pɨ pó tɨ́ nə́ ndə̌ŋdəŋ pópə pɨ pó kě nə́ ndə̌ŋdəŋ tɨ́ pô pó yǒ júmnə nəwûə.

¹⁶Ńdaŋ ə́lɨ́d ńdoonə̂ á mə́ ghɛd nə́ akwaŋə ntə́əmə mə a ŋwaʼə̂ á mbi Əsê ńkə́ ŋwaʼə̂ á mbi pɨ pə́ məsɔŋə́.”

¹⁷“Ndzaŋ maŋ nə fɛ́d nə́ á Jɛlusalɛm ńgɛn ńchîə apeŋ nə́ məngoʼ mimə nɨ́ nə́ lə́, ḿbɨ ḿbɨ fɛ̂ əpúmə á mbô pəpóŋə, ńkə́ ńtú ə́fyaʼə́nuə á mbô Əsê.

¹⁸Lə́ əghâ ándó maŋ nə ńtə́ nə́ ə́fyaʼə́nuə á mbô Əsê á mə́m Tə́kɔʼndɛ̂sê pó nə ńdzə́ənə mə əghâ ándó maŋ nə məgtə̂ nə́ á mə́ ghɛd nə́ mbəəmə ə́ ŋwaʼə̂, ńdzoŋ ndzaŋ noŋkə a nɨd nə́. Maŋ nə ńkě ə́wɨ́ chî pə̂gpə pɨ pipə nɨ́ nə́ pô, pɨ pə́ ńkě ə́wɨ́ kə́ ńtə́ ńgyɛ́ɛlə pô.

¹⁹Lə́ Pəjus pətsə́ pó chî ə́wə́ ándó pó nə fɛ́d nə́ á mboʼ Esya, pó pěʼ ńchîə á mə́ chî nə́ aliʼə́ nə́ á mbi gho á mə́ fiʼtə̂ nə́ gho nə́ anu páʼ maŋ ghɛd nə́.

²⁰Kɨ pɨ pɨ pó chî nə́ aliʼə́ nə lə́, pó lánə ə́fiʼtə̂ gho nə́ təpɔŋ páʼ maŋ ghɛd nə́ wə́ələ́, əghâ ándó maŋ nə ńtɨ́ nə́ á mbi ngaŋə́sáʼə́məsáʼ lə́.

²¹Tə ńdéʼtə táʼə anu ghɛn mɔʼə́ páʼ maŋ nə ńtsáb nə́ wɨ́d ngye mə kɔ́ʼə atǐə əghâ ándó maŋ nə ńtɨ́ nə́ á mbi pó. Lə́ anu ńté á mə júmnə nə́ nəwû páʼ maŋ chî nə́ aliʼ ghɛn ə́sɛ̂n pə́ tíʼə ə́sáʼ əsáʼə mə lɛ̌.”

²²Lə́ Fɛlɛsə, páʼ a nə ḿbə́ nə́ ŋwu ńjî Ndú Yeso lə́, a lɔʼkə̂ əsáʼə. Ə́sóŋ ńgə́, “Maŋ yǐ sáʼ əsáʼ əwə́ənə́ əghâ ándó Lysasə, ŋwu yi ngweŋ ngaŋə́maʼə́ntsoolə a yǐ nə́.”

²³A sóŋə á mbô mətû mə́ ngaŋə́maʼə́ntso ńgə́ pó lɔgə̂ Pɔl ńgɛn ńdɔʼkə̂ ńtə́ ḿbyáabə yə́, lə́ ḿbə́ fɛ̂ mɔ́ əseenə á mbô yí ńgə́ mbɔʼ ngaŋmə́ko əjí tə̈ ńgyǐəə ə́fɛ̂ ajúmə atsəmə á mbô yí páʼə a kɔŋ nə́.

²⁴Əlěmbî pətsə́ laŋ Fɛlɛsə a yǐ pó ngwě əyǐə Dəlusilla páʼ a nə ḿbə́ nə́ mɔ́ Jusə. A tú nkɨ ńgə́ pə fóŋə Pɔlə a yǐəə, á yǐəə a tíʼ ńjwə́ʼtə anuə atsəmə ándó Pɔlə sóŋ nə́ ńté mbimə́ nə́ Yeso Klisto.

²⁵Lə́ Pɔlə a pə́ ńtsáb ńté á mə́ tɨ́ nə́ ndə̌ŋdəŋ á mbi Əsê pópə á waamə̂ mbɨ, ḿbá əsáʼ páʼ wɨ́d chî nə́ mə́ yǐ nə́ lə́, Fɛlɛsə a tíʼ ḿbɔ́g ə́sóŋ ńgə́, “Ndɛn wə́ ə́ koʼ əghâ nə́, təmbɔʼ gho ghɛnə̂. Təmbɔʼ maŋ yǐ ńtúg ndɛd maŋ pɨ fóŋ gho.”

²⁶Tsɔʼə əghâ yi wɨ́ a tíʼ ńtúgə akwaŋ ńtə́ ḿbyáabə ńgə́ Pɔlə a yǐ jíʼ ntso yí nə́ nkéebə, á tíʼə ńdzá ńtúmə pə́ fóŋə yí, a yǐəə pó yí tséebə.

²⁷Ndzaŋ ngoʼ pɛ̌ nə ńdaŋ nə lə́, Pɔsius Fɛstusə a lɔgə̂ aliʼə́ Fɛlɛsə ándó əfo. Ńté ńgə́ Fɛlɛsə a nə ńtə́ ńdoonə̂ ńgə́ Pəjus pó kɔŋə̂ yə́, ńtíʼ ńgɔ́ŋkə Pɔlə á atsáŋə.