Read Awing Məfaʼə 25 Bible Online

Məfaʼə 25 - Awing bible

Məfaʼə 25

¹Ndzaŋə ándó Fɛstusə a kə lɔg nə́ aliʼə́ yə́ á mboʼə aláʼ wɨ́d wə́ ándó gɔbnɔ lə́, əlěmbî teelə́ laŋ á lǒo Sisalya ńkɔ́ʼ ńgɛnə̂ á Jelusalɛm.

²Pətə́kɔʼ pə́ ngaŋə́pêsê pópə mətû mə́ láʼ mə́ Pəjus mətsə́ mə́ ghɛnə̂ á mbô yí ə́wə́, ńchúʼə á mə́ néŋ nə́ mənuə á tû Pɔlə. Pó tíʼ ḿbóʼmbô nə́ Fɛstus ə́sóŋə ńgə́,

³a kwáalə ághóobə́ á mə́ ghɛd nə́ Pɔlə a ghɛnə̂ Jɛlusalɛm, ńté ńgə́ pó nə ńgɛlə̂ á ndzəmə á ndzəm ńgə́ pɨ pó yǐ ḿbántə á alaŋə́ ndú ńgwaamə̂ Pɔlə ńjwítə.

⁴Fɛstusə a kwěe ághɔ́b ńgə́, “Pə́ nə́ fwɔnə̂ Pɔlə á Sisalya pə́ tə́ ḿbyáabə yə́. Maŋ nə́ nkɔ̌ʼmbəəmə mə maŋ tə́ ńkwaŋə̂ á mə́ ghɛn nə́ ə́wɨ́ nə́ mɔ́ akəmə ndɛlə́.

⁵Lə́ələ́ pə́ ńgə́ nə́ ghɛd mətû mə́ aláʼ mi mətsə́ mə́ zoŋə̂ á mə á Sisalya, ńjî ńgə́ mbɔʼ Pɔlə á nə ńgɛlə̂ anuə təpɔŋ yətsə́ nə sóŋə á mbi maŋ ə́wə́.”

⁶Ndzaŋə ándó Fɛstusə a nə ńchî nə́ pó po nə́ əlěmbî nəfeemə́ kɨ nəghə́m lə́ ńtíʼ ńtsó ńgɛnə̂ á mə́m tɔ̂ŋ Sisalya. Mbî fóg a lɔgə̂ aliʼə́ ajíə ándó əsáʼməsáʼə, ńtíʼ ə́sóŋ ńgə́ pə́ yǐ nə́ Pɔlə.

⁷Əghâ ándó pə nə ńgyǐ nə́ nə́ Pɔl lə́, Pəjus pó kə lǒo nə́ Jelusalɛm ńtsó lə́ pó tɨ́ ńdíblə yí ńchúʼə á mə́ néŋ nə́ ətyǎntə mənuə á atû yə́, ḿbə́ ńkě chîə á mə́ nɨd nə́ anu yəwə́ á əshîsaŋ páʼ Pɔlə a ghɛd nə́ pô.

⁸Pɔlə a chúʼə á mə́ tsáb nə́ á mə́ nɨd nə́ ńgə́ a kě anu yitsə̌ jî pô, ńtíʼə ə́sóŋə ńgə́, “Maŋ kě anuə təpɔŋ ghɛd ńté noŋkə Pəjus kɨ ńté Tə́kɔʼndɛ̂sê kɨ ńté Kasa pô.”

⁹Lə́ Fɛstusə a pə́ ńtə́ ńdoonə̂ á mə́ ghɛd nə́ Pəjusə pó kɔŋtə̂, ńtíʼ ə́sóŋ nə́ Pɔlə ńgə́, “Gho kɔŋə̂ á mə́ ghɛn nə́ á Jɛlusalɛm maŋ sáʼ əsáʼ əgho ńté ndɛn mənu ghɛn páʼ pə̈ néŋ nə́ atû gho lɛ̌?”

¹⁰Lə́ Pɔlə a kwěe ə́sóŋ ńgə́, “Maŋ chîə á ndɛ̂ əsáʼməsáʼ Kasa, aliʼə́ ándó pə́ chî nə́ á mə́ sáʼ nə́ əsáʼə mə ə́wə́. Gho chigə ńjî ńgə́ maŋ kě anuə təpɔŋ yətsə́ ghɛd nə́ Pəjus pô.

¹¹Təmbɔʼ á pə́ ńgə́ maŋ tə́ ńgwǔ ntəgə́ yətsə́ ńkə̈ ńgɛlə̂ anuə təpɔŋ yətsə́ təmbɔʼ á ghɛd ńgə́ pə́ jwítə mə tə ḿbə́ mbɔʼ maŋ kě moomə̂ á mə́ kə nə́ á mbô nəwû pô. Lə́ mbɔʼ maŋ pə́ ńchîə anuə yətsə́ ghɛd, pó pə́ ńtə́ ńtə́m əsóomə atû maŋ, ŋwu tsə́ a kě mə á mbô pó fɛ̂ pô. Maŋ lɔ ńgə́ pə́ chaakə̂ əsáʼə mə á mbô Kasa.”

¹²Əghâ ándó Fɛstusə a nə ńtsáb nə́ pópə ngaŋə́sáʼə́məsáʼ əjí lə́, ńtíʼ ə́sóŋə á mbô Pɔl ńgə́ “Gho sóŋ ńgə́ pə́ chaakə̂ əsáʼ gho á mbô Kasa, gho yǐ ghɛnə̂ á mbô Kasa.”

¹³Ndzaŋə ándó əlěmbî pətsə́ nə ńdaŋ nə́ əfo Aglɛpa pó mɔ́mɛ́ əyǐ yi məngyě əlɛ́n əyí nə ḿbə́ nə́ Bɛnisə ghɛnə̂ á tɔ̂ŋ Sisalya á mə́ chaʼtə̂ nə́ Fɛstusə.

¹⁴Ndzaŋə ándó pó nə ńchî nə́ ə́wɨ́ əlěmbî pipə nɨ́ nə́ lə́, Fɛstusə fiʼtə̂ anu ńté Pɔlə á mbô pó ə́sóŋ ńgə́, “Ngaŋətsáŋ yətsə́ a chîə aliʼə́ nə́ páʼ Fɛlɛsə a nə mɛdtə̂ nə́.

¹⁵Əghâ ándó maŋ nə ńchî nə́ Jɛlusalɛm lə́ pətə́kɔʼ pə́ ngaŋə́pêsê pópə mətû mə́ Pəjusə, pó fiʼtə̂ mə nə́ anu ńté Pɔlə ńtíʼ ḿbítə ńgə́ maŋ sáʼ əsáʼ əyí ńtíʼ ńdə́g ńgə́ pə́ jwítə yə́.”

¹⁶Lə́ maŋ pə́ sóŋə á mbô pó ńgə́, “A kě koʼnə̂ ńdzoŋə̂ a noŋkə pɨ pə́ Loman ńgə́ pə́ fɛ̂ ŋwunə á mbô pɨ pə́ néŋ nə́ anuə atû yí tsɔʼə tə ghə́ pə́ peg ḿmɛdtə̂ yə́ a tə́əmə á əshîsaŋ pó po ńkwěe anu yə wɨ́ pô.

¹⁷Lə́ ndɛd pó nə ńgyǐ nə́ aliʼə́ nə́, maŋ nə ńkě lɛ́ɛlə pô, lə́ mbî ə́ fóg maŋ náanə á ndumə aləŋə́ asáʼə́məsáʼə mə, ńtíʼ ə́sóŋ ńgə́ ngaŋə́maʼə́ntso yǐ nə́ yə́.

¹⁸Əghâ ándó pɨ pó nə néŋ nə́ anuə atû yí pó nə ńdǒ nə́ əsê lə́, pó kě sóŋə anuə təpɔŋ yətsə́ ńté Pɔlə ándó maŋ nə ńkwaŋ nə́ ńgə́ pó yǐ sóŋ ńgə́ a ghɛd pô.

¹⁹Pó pɨ ńtíʼ ńchúʼə á pə́ mə́ zɔŋ nə́ pópə Pɔlə nə́ mənu mətsə́ ńté anǔəsê azóobə́, ńkə́ ńté ŋwu tsə́ páʼ əlɛ́n yí pə́ nə́ Yeso Klisto páʼ a nə ńkwû nə́, lə́ Pɔlə a pə́ ńtə́ ə́sóŋə ńgə́ a chîə mbîə.

²⁰Maŋ nə ńkě jî ndúmə á mə́ náŋ nə́ anu páʼ pó nə sóŋ nə́ pô, ńtíʼ ḿbítə Pɔl ńgə́ kəənə a lɛ yǐ kɔŋə̂ á mə́ ghɛn nə́ Jɛlusalɛm pə́ sáʼ əsáʼ əyí ə́wə́?

²¹Lə́ Pɔlə a pə́ ə́sóŋ ńgə́ pə́ néŋə yə́ atsáŋ ńtə́ ḿbyáabə tə ńgɛd ńkoʼ nə́ ndɛd páʼ əfo Lomə a yǒ nə́ ńdə́g əsáʼ əyə́. Maŋ tíʼ sóŋ ńgə́ pə́ mɛdtə̂ yə́ á atsáŋ tə ńkoʼ nə́ ndɛd maŋ yǒ nə́ ńtúmə yə́ á mbô Kasa.”

²²Aglɛpa a sóŋə á mbô Fɛstusə ńgə́ “Maŋ nə́ nkɔ̌ʼmbəəmə mə yǐ kɔŋə̂ á mə́ jwə́ʼtə nə́ á mbô ŋwu nə́.” Fɛstusə a kwěe yí ńgə́ gho yǒ zóʼə atséebə ají á ngwɛʼə́.

²³Mbî ə́ fóg, əfo Aglɛpa pó mɔ́mɛ́ əyǐ yi məngyě Bɛnisə pó yǐ nə́ tə́kɔʼ ńgóʼkə ńkwúnə á ndɛ̂ asáʼə́məsáʼə pópə mətû mə́ ngaŋə́maʼə́ntso mbɨ ḿbə́ nə́ chigə pəənə á mə́mə aláʼə. Fɛstusə a tíʼ ə́sóŋ ńgə́ pə́ yǐ nə́ Pɔlə.

²⁴Pə́ yǐ nə́ yə́ a sóŋ ńgə́, Əfo Aglɛpa pópə pɨ pətsəm pə́ chî nə́ aliʼə́ nə́! Jɨ́ nə́ a ŋwu páʼ Pəjusə pətsəm pó chî nə́ a Jɛlusalɛm pó aláʼə Sisalya zɨ pó yǐ nə́ á mbô maŋ ńgyɛ́ɛlə ə́sóŋə ńgə́, “Lə́ kě ŋwu təmbɔʼ a chîə á mbî pô.”

²⁵Lə́ maŋ pə́ ńkě zə́ənə anuə təpɔŋ yətsə́ ándó a ghɛd nə́ təmbɔʼ pə́ jwítə yí pô, ndzaŋə ándó a sóŋ nə́ ńgə́ pə́ chaakə̂ əsáʼ yə́ á mbô Kasa lə́, maŋ tíʼ ńtsɔ́ʼ ńtúmə á mbô Kasa.

²⁶Lə́ ḿbə́ ńkě jîə anu maŋ yǐ nə́ ŋwaʼlə̂ ə́fɛ̂ á mbô Kasa pô, ńdaŋ ə́lɨ́d maŋ tíʼ ńdɔgə̂ yí ńgyǐəə á mbi pɨ, ḿbə́ pə́ nə́ á mbi gho əfo Aglɛpa ńjî ńgə́ əghâ ándó pɛn chígə́ nə́ ńnáŋə anu páʼ a ghɛd nə́, əghâ tsə́ maŋ jîə anu təmbɔʼ maŋ ŋwaʼlə̂.

²⁷Ńté ńgə́ á chîə á mbô maŋ ándó á kě koʼnə̂ á mə́ tú nə́ ngaŋətsáŋə á mbô Kasa tə́ ŋwaʼlə̂ chigə anu páʼ pə́ sóŋ nə́ ńgə́ a ghɛd pô.