Read Awing Məfaʼə 26 Bible Online

Məfaʼə 26 - Awing bible

Məfaʼə 26

¹Əghâ ándó Fɛstusə a nə ḿməgtə̂ nə́ á mə́ tsáb nə́ lə́, əfo Aglɛpa a sóŋə á mbô Pɔl ńgə́ “Pɔl, gho túg əsa əghâ nə́ á mə́ tsáb nə́ ńté mənu mɨ pə́ néŋ nə́ atû gho leenə́.” Pɔlə a ŋáŋkə apô a ajíə á atǐ ńtíʼ ńchúʼə á mə́ tsáb nə́ ə́ kǐ əsɔ́ pə̈ tə́m nə́ atû yí ńtíʼ ə́sóŋ ńgə́,

²“Maŋ lɔg mbəəmə ándó mbɔŋə atû lə́ á mbi gho əfo Aglɛpa, maŋ tɨ́ lə́ á mə́ tsáb nə́ ńté əsɔ́ Pəjusə pə́ tə́m nə́ atû maŋ ə́sɛ̂nə̌.”

³Maŋ sóŋ ńgə́ atûə mə á lánə ḿbɔŋ lə́ ńté ńgə́ gho lánə ńjî mənu ńté pənoŋkə pə́ Pəjusə ḿbɨ ńkə́ ḿbə́ nə́ mənu pó kě nə́ ə́wɨ́ pímnə pô. Maŋ pɛn tíʼ ə́ ḿbóʼmbô ńgə́ gho wam ntɨ́ ńjwə́ʼtə anu maŋ chî nə́ á mə́ sóŋ nə́.

⁴“Pəjus pətsəm pə́ jî ndzaŋ maŋ nə ńchî nə́ ə́fɛ́d nə́ ndɛd maŋ nə ḿbə́ nə́ Mɔ̂nkə̂. Pó nə ńjî ndzaŋ maŋ nə ńchî nə́ á mə́m pəənə mə, ńkə́ ńchîə á Jɛlusalɛm.

⁵Pó nə ńjîə mə ndi sagə̂, ńgə́ maŋ nə ḿbə́ lə́ táʼ ŋwunə á mə́m nkyeetə Pəfalasi, pɨ páʼ pó pyádnə nə́ néŋ ntɨ́ nə́ mənu mə́ Əsê mə́gə́. Təmbɔʼ pó kɔŋə̂ ndə̌ŋdəŋ tə ḿbə́ pó ngǎ pó yǐ sóŋ lə́ələ́.

⁶Nə́ əghâ nə́ maŋ tə́əmə aliʼə́ nə́ á mə́ sáʼ nə́ əsáʼ ńté ńgə́ maŋ túgə akwaŋ ńtə́ ḿbyáb ndaʼnə páʼ Əsê a nə ńgɛd nə́ á mbô pətǎ pə́ pətǎ pɛnə̂.

⁷Lə́ kə́ ḿbə́ tsɔʼə ndaʼnə páʼ məla mɛ́n ntsɔb pɛ̌ á mə́m Islɛlə pó tə́ nə ḿbyáabə ńgə́ ə́ yǐ ńdɔgə̂ aliʼ ndzaŋə ándó pö ghóʼkə nə́ Əsê pə nətúʼ pópə ənumnə. Əfo ntɔ́ʼ, lə́ ńté akwaŋ zɨ ńtə́ ḿbyáabə páʼ Pəjus pó tə́m nə́ əsóomə atû maŋə.

⁸Lə́ ghɛlə̂ akə̂ a tyantə̂ á mbô pəənə́ á mə́ pí nə́ ńgə́ Əsê a júmkə pəənə á mə́m nəwûə?”

⁹Tsɔʼə maŋ nə́ nkɔ̌ʼmbəəmə mə nə ńkə́ ńtúgə atyǎntə atûə á mə́ póʼnə nə́ məlaʼ ə́ kǐ mənu ńté əlɛ́n wə́ ńgə́ Yeso Mɔ́ Nazalɛd lə́.

¹⁰Maŋ nə ńkə́ ḿbóʼnə məlaʼə́ á Jɛlusalɛm nə́ mətɨ páʼ Pətə́kɔʼ pə́ ngaŋə́pêsê pə́ nə fɛ̂ nə́ nə́ maŋ, maŋ kə̈ ńgɛlə̂ pə́ waamə̂ pɨ pə́ Əsê ńnéŋə atsáŋə, əghâ ándó pə́ nə ńtə́ nə́ ńjwítə pətsə́ lə́, maŋ nə ńkə́ ḿbí ńgə́ pə́ jwítə ághóobə́.

¹¹Maŋ nə̈ ńgɛlə̂ pó zɨ́ ngə́ʼ nə ndɛd ntsəm á mə́m məláʼ məsê mə́ Pəjusə ńkə́ ńdoonə̂ á mə́ ghɛd nə́ pó zɔmtə̂ Əsê. Maŋ nə ńkwéʼnə ńdzáŋ ndě lɛ tətə, tə ńtûə ńgɛnə̂ ńtsaŋkə̂ ághóobə́ á mə́m pətə́kɔʼ pə́ tɔ̂ŋ pi pə́ ndaʼə.

¹²Táʼə alě yətsə́ maŋ tə́ ńgɛnə̂ á Damaskɔs nə́ aŋwaʼlə pópə mətɨ páʼ maŋ nə ńkwá nə́ á mbô pətə́kɔʼ pə́ ngaŋə́pêsê á mə́ wamtə̂ nə́ ngaŋə́zoŋə́ndzəm Yeso ə́wə́.

¹³Əfo ntɔ́ʼ! ndzaŋ maŋ nə ńtə́ nə́ ńgɛnə̂ a ntɨ̌mə́nu lə́ ńdjɨ́ nkyaʼ yitsə̌ ŋ́ŋwaŋkə̂ tə ńtsɛɛlə̂ mə́nu, ńgabkə̂ ə́fɛ́lə á nəpó ŋ́ŋwaŋkə̂ ńdíblə mə ḿbɨ ḿbə́ nə́ pɨ pə̌gpo nə̈ nyi nə́.

¹⁴Pəg pətsəm nə ńgwukə̂ a ndəsê, maŋ tíʼ ńdzóʼ ngye yitsə̌ ə́ tsáb nə́ maŋ nə́ atséebə Iblu ə́sóŋ ńgə́, “Sɔl, Sɔl gho lánə ńtsaŋkə̂ mə lə́ ńgə́ akə̂? Ghö jwítə lə́ mbɨ əzo, ándó neemə aliʼə́líʼ ə́ tə́ nə́ ńtə́mtə mbaŋ ŋwunə á túg nə́ yə́.”

¹⁵Maŋ pítə ńgə́, Lə́ gho əwə Mmaʼmbî? Mmaʼmbîə a kwěe ńgə́ “Lə́ maŋ Yeso páʼ ghö tsaŋkə̂ nə́.”

¹⁶Nə́ əghâ nə́ lǒo əsê ńtɨ́ ńté ńgə́ maŋ yǐəə á mbi gho lə́ á mə́ tsɔ́ʼ nə́ gho ándó ngaŋəfaʼ mə. Gho chîə á mə́ fiʼtə̂ nə́ pətsə́ pɨ nə́ anu páʼ gho jɨ́ nə́ ə́sɛ̂n ńté mə ńkə́ ḿbə́ nə mənu páʼ maŋ yǒ nə́ pɔŋə̂ nəələ̂ á gho.

¹⁷Maŋ yǐ tə́ kɨ́ʼtə gho á mbô pɨ pə́ Islɛlə pópə pətəjǐsê; pɨ páʼ maŋ yǐ nə́ túmə gho á mbô pó.

¹⁸Maŋ túmə gho lə́ ńgə́ gho ghɛn ŋ́ŋáʼkə əmə́g mɔ́b pó fɛ́lə á mə́m ndzəmə ńgyǐəə á mə́m nkyaʼə, ńkə́ fɛ́lə á mə́m mətɨ mə́ Satan ńgyǐəə á mbô Əsê. Ńjî ńgə́ əghâ pó yǐ nə́ ńtúg mbimə́ nə́ maŋ, maŋ ləgnə̂ pətəpɔŋ pɔ́b pó tíʼ ńchîə á mə́m pɔ́ pə́ Əsê.

¹⁹Lə́ələ́ pə́ ńgə́, Əfo Aglɛpa, maŋ nə ńkě atû tyantə̂ á mə́ faʼ nə mənu páʼ Yeso a nə ńdǒ nə nəpó ə́fiʼtə̂ ńgə́ maŋ faʼ lə́ pô.

²⁰Lə́ maŋ nə ḿbeg nə́ ńchwáakə á mə́ fiʼtə̂ nə́ lə́ pɨ pə́ Damaskɔsə, ə́fɛ́d ə́wə́ ńkwúnə á Jɛlusalɛm ńkə́ ńnyi nə́ əláʼ ətsəm á mə́m mboʼ Judya á mə́m pɨ pətəjǐsê, ə́fiʼtə̂ anǔəsê á mbô pó ńgə́ pó fɛ́lə á mə́m pətəpɔŋ pɔ́b ńgyǐəə á mbô Əsê ńtíʼ ńtə́ faʼə̂ mənu mə̈ nɨd nə́ ńgə́ pó fɛ́lə á mə́m pətəpɔŋ póobə́.

²¹Lə́ nə ńgɛd ə́lɨ́d Pəjus pó waamə̂ mə á mə́m Tə́kɔʼndɛ̂sê ńtə́ ńdoonə̂ á mə́ jwítə nə́ mə.

²²Tə ńkoʼ nə́ ə́sɛ̂n, lə́ kwá Əsê ńkwáalə mə, maŋ tə́əmə aliʼə́ nə́ əghâ nə́ lɛ á mə́ fiʼtə̂ nə́ pɨ pə́ kətaŋ pópə chigə pəənə. Maŋ kě lə́ anu yə́ ndaʼ sóŋə tə ńdéʼtə anu məntúmə́sê pópə Mosisə nə ŋwaʼlə̂ nə́ ńgə́ a yǐ lɔgə̂ aliʼ pô.

²³Anu yə ə́wɨ́ lə́ ńgə́ yí páʼ Əsê a nə Ńtsəʼ nə́ a kə chîə á mə́ jɨ́ nə́ ngə́ʼ kə́ kwûə, ə́ tíʼ pə́ ntsɛɛmbi ŋwunə á mə́ júmnə nə́ nəwû, ə́laŋ ə́lɨ́d ńnáŋkə nkɨ nkyaʼ Əsê páʼ wɨ́d chwádkə nə́ pəənə á mbô Pəjus pópə pətəjǐsê.

²⁴Ndzaŋ Pɔlə a nə ńtsáb nə́ á mə́ kǐ nə́ əsɔ́ pə́ nə ńtə́m nə́ atû yí lə́, Fɛstusə a sóŋə á mbô yí nə́ tə́kɔʼ ngye ńgə́, “Pɔl, gho tə́ ḿbɛ́ɛlə? Tə́kɔʼ aŋwaʼlə gho zéʼ nə́ á ghɛd gho pɛ́ɛlə.”

²⁵Pɔlə a kwěe yí ńgə́, Maŋ kě pɛ́ pô ḿbə́ Fɛstusə, gho páʼ gho túg nə́ tə́kɔʼ ngóʼkə! Anu páʼ maŋ sóŋ nə́, lə́ ndə̌ŋdəŋ ńkə́ ńtúgə ajíənuə.

²⁶Əfo Aglɛpa a jî mənu mɨ tsɔʼə mətsəm maŋ sóŋ nə́, ńdaŋ ə́lɨ́d maŋ tséebə á mbô yí tə apɔ́gə. Maŋ chígə́ ńjî ńgə́ a jî mənu mɨ lə́ ńté ńgə́ pə́ kə kě mənu mɨ lə́ á nəlyaŋnə́ faʼ pô.

²⁷Əfo Aglɛpa gho pí ńgə́ anu Məntúmə́sê mə́ nə ŋ́ŋwaʼlə̂ nə lə́ ndə̌ŋdəŋ? Maŋ jî ńgə́ gho pí ńgə́ lə́ ndə̌ŋdəŋə́.

²⁸Aglɛpa a tíʼ ńkwěe Pɔl ńgə́, “Pɔl! gho kwaŋ ńgə́ təmbɔʼ gho yǐ ńdɔg lə́ mɔ́ akəmə ndɛd ńgɛd maŋ pə́ Mɔ́ Klisto.”

²⁹Pɔlə a kwěe yí ńgə́, “Maŋ chaʼtə́sê ńgə́ kɨ nə́ mɔ́ akəmə ndɛd kɨ nə tə́sɛ ndɛd lə́ kě tsɔʼə gho pô, lə́ pɨ pətsəm nə́ jwə́ʼtə nə́ mə ə́sɛ̂n nə́ yǐ nə́ pə́ ándó maŋ, tə ńdéʼtə məŋkɛd mə́ atəənə́ mɨ maŋ chî nə́ əwɨ́ leenə́, pɨ yǐ kě á mə́m mɨ́d chî pô.”

³⁰Əfo Aglɛpa a lǒo ndəsê, ḿbéenə Ngɔmna Fɛstus ḿbɨ ḿbə́ nə ndim əyǐ Bɛnisə ḿbéenə ŋwu ntsəm páʼ a nə náanə nə́ pó po.

³¹Ndzaŋ pó nə ḿmɛdtə̂ nə́ ndɛ̂ lə́ ńtíʼ ńtséebə tətɨ pó ə́sóŋ ńgə́, “Ŋwu nə́ a kě anu yitsə̌ ghɛd mbɔʼ pə́ jwítə yí kɨ ńnéŋə yə́ á atsáŋ pô.”

³²Əfo Aglɛpa a tíʼ ə́sóŋə á mbô Ngɔmna Fɛstus ńgə́, “Mbɔʼ pə́ pěʼ ə́fógə ŋwu nə́ atsáŋ ḿmɛdtə̂ təmbɔʼ a pěʼ ńchî sóŋ ńgə́ pə́ chaakə̂ əsáʼ yə́ á mbô Kasa pô.”