Read Awing Məfaʼə 27 Bible Online

Məfaʼə 27 - Awing bible

Məfaʼə 27

¹Ndɛd páʼ Fɛstusə a nə sóŋ nə́ ńgə́ mbɔʼ pəg kwúnə aŋkənúʼə́ ńgɛnə̂ á Itali lə́, pə́ tíʼ fɛ̂ Pɔl pó pətsə́ ngaŋə́tsáŋə á mbô Julusə páʼ a nə ḿbə́ nə́ nətû nə́ ngaŋə́maʼə́ntso nə́ Lom ándó a faʼ nə́ á mə́m akwɛlə ngaŋə́maʼə́ntso Kasa yi weŋə́.

²Pəg ghɛn ńkwúnə aŋkənúʼə́ á fɛ́d nə́ aláʼ Adəlamatium, yi páʼ a nə̈ ńgɛn nə́ əliʼ páʼ əŋkənúʼə̈ tɨ́ nə́ ə́wə́ á nkǎŋkǐ á mboʼ Esya, pəg tíʼ ńchúʼə á mə́ tə́ nə́ ghɛnə̂. Alistakus, ŋwu Masedonya páʼ a nə fɛ́d nə́ Tɛsalonika lə́, a nə ńgɛn pəg po.

³Mbî ə́ fóg pəg yǐ ńkoʼə̂ Sidɔnə. Julusə a nɨd ntɨ́ yi əshîʼnə á mbô Pɔlə, ńtíʼ ḿmɛdtə̂ yí ńgə́ a ghɛn ńjɨ́ ngaŋmə́ko əjí pó fɛ̂ əpú páʼ a nə ńdɔ nə́.

⁴Pəg fɛ́lə á Sidɔn ńkwúnə aŋkənúʼə́ ńtə́ ńgɛnə̂ á ndú yi ndaʼ lə́ ńté ńgə́ kəfəələ á nə ńtə́ ńkɔ́ʼə á ndú pəg nə́ ńgɛn nə́ ə́wə́, pəg tíʼ ńgɛnə̂ á ndú Sayiplus páʼ kəfəələ a nə ńkě nə́ ə́wɨ́ tə́ ńkɔ́ʼə pô.

⁵Pəg túmə tə́kɔʼ nkǐ ńgɛnə̂ əlá aláʼə Silisya pó Pamfilya ńtíʼ ńkwúnə mala á mə́m mboʼ Lysya.

⁶Aliʼ wɨ́d wə́ nətû nə́ ngaŋə́maʼə́ntso nə́ zə́ənə apáŋə́nkǐ páʼ á lǒo nə́ aláʼ Alezanda ńtə́ ńgɛnə̂ á Itali a tíʼ ńnéŋ áwə́g ə́wə́.

⁷Pəg nə ńtíʼə ńnyinə̂ tsɔʼə ndǎ ndǎ nə́ əlěmbî pətsə́, ḿbyádnə ńjɨ́ ngə́ʼ záʼ pɔŋə́ yǐ laŋ páatə á tɔ̂ŋ Sinidusə. Kəfəələ a nə ńkě pí ńgə́ mbɔʼ pəg ghɛn əlá wɨ́d wə́ pô, apáŋə́nkǐə azə́gə́ á tíʼ ńgɛnə̂ pə́ á ndú aláʼ Glikə ńdaŋə̂ á nəpɛnə́ Kep Salmonə páʼ kəfəələ a nə ńkě nə́ ə́wɨ́ tə́shú tə́ ńkɔ́ʼə pô.

⁸Pəg jɨ́ ngə́ʼ ńtíʼ ńnyi tsɔʼə nəpɛnə́ nə́ nkǐ záʼ ḿbɔŋə̂ yǐ kwúnə aliʼ yətsə́ pə́ fóŋə nə́ Sef Abɔ, á nəpɛnə́ nə́ tə́kɔʼ tɔ̂ŋ Lasea.

⁹Pəg nə ńchîə aláʼ yi wɨ́ tə əlě mbî pipə nɨ́ nə́ laŋə̂, á tíʼ ḿbyádnə ńtyantə̂ á mə́ nyi nə́ á mə́m nkǐ ńté ńgə́ ndɛd təpɔŋ páʼ pə́ nyi nə́ á mə́m nkǐ lə́ zɨ́d kə pɛ́d tə ńkoʼə̂, alě Akɔŋtə á mə́ Ləgnə̂ nə́ pətəpɔŋ á kə́ ḿbɛ́d tə ńdaŋə̂. Pɔlə a tíʼ ńtə́gtə ághɔ́b ə́sóŋ ńgə́,

¹⁰“Pətǎ mə, maŋ jɨ́ ńgə́ nənyi əwɛn aliʼə́ nə́ á mə́ ghɛn nə́ nə́ mbi lə́ chigə tə́kɔʼ ngə́ʼə, apeʼə yǐ péŋə, aŋkənúʼə́ á shaʼkə̂, pɨ pó kə́ ńtú ńkwúkə.”

¹¹Lə́ nətû nə́ ngaŋə́maʼə́ntso zə́ nə́ pə́ ńkě anu páʼ Pɔlə a nə sóŋ nə́ lə́ zoŋ pô, ḿbə́ ńdzoŋə̂ pə́ anu páʼ ŋwu a kə chî nə́ á nətû nə́ aŋkənúʼə́ pó ŋwu páʼ aŋkənúʼə́ a nə ḿbə́ nə́ ají pó nə sóŋ nə́.

¹²Aliʼ pə́ tə́g nə́ əŋkənúʼə́ ə́wə́ aliʼə́ nə́ a nə ńkě pɔŋ nə́ ndɛd zɨ mbɔʼ pəg tə́gə aŋkənúʼə́ ə́wɨ́ ńkə́ ńchî ə́wɨ́ pô ńté ńgə́ lə́ kə pə́ ndɛd əfə́gə. Pɨ pipə nɨ́ nə́ pó nə ńkɔŋ ńgə́ aŋkənúʼə́ zə̂ á kwúnə nkǐ ńgɛn nə́ mbi əghâ tsə̌ mbɔʼ atûə pɔŋ pó koʼə̂ Fɔniksə, ńjî ńgə́ pó chî ə́wə́ á ndɛd əfə́gə. Lə́ nə ḿbə́ aliʼ pə̈ təŋnə̂ nə́ əŋkənúʼə́ ə́wə́ á Kəlet páʼə á náŋ nə́ əlá mətoŋə́ pó məkɔʼnə́.

¹³Tsɔʼə əghâ ə́wɨ́ mɔ́ kəfəələ á lǒo á ndú mətoŋə́ ḿbɔ́ʼnə ńkɔ́ʼə, pɨ pipə wɨ́ pó kwaŋ ńgə́ anu pó pěʼ nə́ ńkwaŋ lə́ á koʼnə̂, ńtíʼ ə́soŋə̂ á tə́kɔʼ atəənə́ pó pěʼ nə́ ḿmaʼə̂ á mə́m nkǐ ńgwaamə̂ aŋkənúʼə́ wə́, pó tíʼ ńchúʼə á mə́ nyi nə́ á mə́m nkǐ ńgɛnə̂ ḿbáatə ndú nkǎŋkǐ Klɛtə.

¹⁴Tsɔʼə əghâ yi wɨ́, tə́kɔʼ kəfɨd pə́ fóŋ nə́ nə́ Nɔd Ɛsta á chúʼə á mə́ kɔ́ʼ nə́ ə́fɛ́lə á mə́m aláʼ zə̂ ə́ kwúnə ńkǐə.

¹⁵Kəfɨd wə̂ á chúʼə á mə́ twá nə́ aŋkənúʼə́ zə̂ ńté ńgə́ á nə tyantə̂ á mə́ nyinə̂ á mə́m aŋkənúʼə́ ə́ ghɛnə̂ á ndú páʼ kəfəələ á nə̈ ńkɔ́ʼ nə́ wɨ́ lə́, ndzaŋ pəg nə ńjɨ́ nə́ ńgə́ anu yitsə̌ á kě ə́wɨ́ chî təmbɔʼ pəg faʼ lə́ ńtíʼ ḿmɛdtə̂ aŋkənúʼə́ zə̂ ńgə́ kəfəələ á twá ńgɛn nə́ əyí ndúmə.

¹⁶Pəg náŋ ndú ətsəmə á mə́m ngə́ʼ tə ńgɛn ńdaŋə̂ á ndzəm mɔ́ aláʼ yitsə̌ á mə́m nkǐ páʼ kəfəələ a kə kě nə́ ə́wɨ́ pyádnə ńtyantə̂ pô, pə́ fóŋə zɨ́d nə́ Kauda. Pəg kə jɨ́ ngə́ʼ lɛ tə, tə ḿbə́ ńkə́ ńtáŋnə tə ə́soŋə̂ mɔ́ kə́nyaŋə́ aŋkənúʼə́ á chî nə́ á ndzəm tə́kɔʼ lə́ ńtəŋnə̂ wɨ́d nə́ məŋkɛlə́ á mə́m wə́.

¹⁷Ndzaŋ pó kə néŋ nə́ zə́ələ́ á mə́mə apáŋə́nkǐ lə́, ńtíʼ ńdɔg məŋkɛd ńkwúd ńdíblə apáŋə́nkǐ zə̂ ngǎ yitsə̌. Ngaŋə́faʼə á mə́m aŋkənúʼə́ nə ńtə́ ḿbɔ́gə ńgə́ mbɔʼə aŋkənúʼə́ á yǒ ńkə ńgɛnə̂ á mbɛnə́ mə́ wáakə́ Libya. Pó fógə á tə́kɔʼə atəənə́ wə́ ńnéŋə á nkǐ ńjî ńgə́ kəfəələ á tíʼ ńtwáamə aŋkənúʼə́ zə́ ndǎ ndǎ.

¹⁸Atyǎntə kəfɨd zə̂ á ghɛn nə́ mbiə á mə́ twá nə́ aŋkənúʼə́ zə́, mbî ə́ tíʼ fóg, pə́ maʼ əpeʼ pətsə́ á mə́m nkǐə.

¹⁹Tə á koʼ əlěmbî pɛ́n teelə́, tsɔʼə əpúmə afaʼə aŋkənúʼə́ pətsə́ po kə́ ḿmaʼə̂ á mə́m nkǐə.

²⁰Nə́ əlěmbî pipə nɨ́ nə́ mə́numə á kě tɛ̂ pô, pɔ́ pə́ sáŋ pə́ kě kə́ fɛ́d pô. Tə́kɔʼ kəfɨd wə̂ á ghɛn nə́ mbiə á mə́ twá nə́ aŋkənúʼə́ zə̂, tə pəg ləgnə̂ anuə atsəm ńté nchîmbî əzəgə́.

²¹Pó nə ńchî tə ndi ə́ sag tə jî məjîə, Pɔlə a tíʼ ńtə́əmə á mbi pó ə́sóŋ ńgə́, “Pəlimə́ mə, pɨ nə ńchîə á mə́ jwə́ʼtə nə́ á mbô maŋ ə́ kě nyinə̂ á mə́m nkǐ fɛ́lə á Klɛtə pô, mbɔʼ pɨ nə ńjwə́ʼtə á mbô maŋ tə ḿbə́ aŋkənúʼə́ zəənə́ á nə ńkě shaʼkə̂ pô, apeʼə á kě kə́ ḿbéŋ pô.

²²Lə́, nə́ pə əghâ nə́ maŋ sóŋ nə́ pɨ ńgə́ wam nə́ məntɨ́ mə́ənə́, kɔ nə́ pɔ́gə, aŋkənúʼə́ á yǐ shaʼkə̂ lə́ ŋwu tsə̌ a kě kwû pô.

²³Maŋ jîə anu zɨ ńté ńgə́, á nə ḿbə́ á nətúʼ Əsê páʼ a túg nə́ mə, yí páʼ mäŋ ghóʼkə nə́, a nə ńtúmə ntseŋndɛ̂ yə́ a yǐ ńtə́əmə á nəpɛnə́ maŋ;”

²⁴a tíʼ sóŋ ńgə́ “Pɔl kɔ pɔ́gə, gho yǐ shib tə́əmə á mbi Kasa, ńté ńgə́ Əsê nə́ ntɨ́ yí yi əshîʼnə ńté gho á fɛ̂ nchîmbî ŋwu ntsəmə á nyi nə́ pɨ po á mbô gho.

²⁵Lə́ pə́ ńgə́ wam nə́ ntɨ́ əwə́ənə́ pəlim, ńté ńgə́ maŋ túg mbimə́ nə́ Əsê ńgə́ a yǐ chî tsɔʼə ndzaŋ páʼ ntseŋndɛ̂sê a pěʼ nə́ ə́sóŋ nə́ maŋ lə́.

²⁶Lə́ pɛn chîə á mə́ ghɛn nə́ tə ə́fɛ́lə á kyádkənkǐ yitsə̌.”

²⁷Ndzaŋə ándó əlěmbî ntsɔb nəkwa nə ńkoʼ nə́ tə́kɔʼ kəfəələ á tə́ ńtwáamə aŋkənúʼə́ azə́g ńdaŋə̂ á mə́m tə́kɔʼ nkǐ yitsə̌ pə́ fóŋ nə́ ńgə́ Nɨ́ Meditelinyan lə́, á yǐ ḿbə́ ntɨ̌túʼ, pɨ páʼ pó nə̈ ə́soŋ nə́ aŋkənúʼə́ lə́ pó kwaŋ ńgə́ pə́ tə́ ḿbáatə asəgə́.

²⁸Pó lɔg nkɛd ńkwúlə atəənə́ ə́wɨ́ ḿmaʼə̂ á mə́m nkǐə á mə́ fiʼ nə ndzaŋ páʼ nkǐ shǐ nə́, pó jɨ́ ńgə́ nkǐ lə́ pə məntag məghə́m mɛ́n nəkwa á mə́ shǐ nə́. Əghâ ándó páʼ aŋkənúʼə́ á nə ńgɛn nə́ á mbi mɔ́ aliʼ lə́ pó pɨ fiʼ ńjɨ́ ńgə́ mə́ shǐ nə́ lə́ məntag məghə́m mɛ́n teelə́.

²⁹Pó pɔ́g ńgə́ aŋkənúʼə́ azóobə́ á yǐ ghɛn kɔn ngwúbə, pó tíʼ ńtsóokə ətəənə́ pɛ́n nəkwa páʼ ə́ nə ńchî nə́ á ndzəm aŋkənúʼə́ ḿmaʼə̂ á mə́m nkǐə á mə́ ghɛd nə́ ńgə́ kɔ zə́ələ́ á pɨ nyi ńgɛn nə́ mbiə. Pó kə́ ńchaʼtə́sê á mbô Əsê əzɔb ńgə́ əliʼ ə́ ŋwaʼ ńjî ńgə́ pó jɨ́ əliʼ ńkě á mə́m ngə́ʼ kwú pô.

³⁰Ndzaŋə ándó pó nə ḿmaʼ nə́ ətəənə́ pə́ lə́, pɨ pó nə́ soŋ nə́ əŋkənúʼə́ pó náŋ ndúmə á mə́ kəəkə̂ nə́, ńtíʼ ńnéŋ mɔ́ kə́nyaŋə́ aŋkənúʼə́ wə́ á mə́m nkǐə, pó nə ńgɛd ə́lɨ́d lə́ á mə́ póŋkə nə́ əmə́g ńgə́ pó maʼə̂ lə́ tsɔʼə ətəənə́ á mə́m nkǐə.

³¹Lə́ Pɔlə a sóŋə á mbô nətû nə́ ngaŋə́maʼə́ntso pópə ngaŋə́maʼə́ntso ńgə́, “Mbɔʼ ngaŋə́soŋə́ aŋkənúʼə́ zɨ ə́ chîə á mə́mə aŋkənúʼə́ chî pô, ŋwu əwɨ yitsə̌ a yǐ ńkě chwád pô.”

³²Ngaŋə́maʼə́ntso zə̂ zóʼə atséebə Pɔl, ńtíʼ ńdə́gtə məŋkɛd páʼ mə́ nə ńchî nə́ nə́ aŋkənúʼə́, ńtíʼ ḿmɛdtə̂ ńgə́ nkǐ twáamə mɔ́ kə́nyaŋə́ aŋkənúʼə́ yi wɨ́ ńgɛn nə́ wə́ələ́.

³³Tsɔʼə ndzaŋ páʼ mbî nə ńtə́ nə́ ə́fógə lə́, Pɔlə a póʼmbô nə́ pɨ páʼ pó nə ńchî nə́ á mə́mə aŋkənúʼə́ ńgə́ pó jî məjîə. A sóŋə á mbô pó ńgə́, “Lɛ̌ əlěmbî ntsɔb nəkwa pɨ chîə á mə́mə apɔ́g ḿbyáabə, ńkě ajûtsə́ jî pô.

³⁴Maŋ tíʼ ḿbóʼmbô ńgə́ nə́ jî məjîə. Nə́ chîə á mə́ jî nə́ məjîə á mə́ chî nə́ á mbîə. Tsɔʼə táʼ nənoŋə á kě atû pɨ yǐ péŋ pô.”

³⁵Əghâ ándó Pɔlə a nə sóŋ nə́ anu zɨ lə́ ńtíʼ ńdɔgə̂ apéenə məkálə́ ə́fɛ̂ ndǎ á mbô Əsê á mbi pó pətsəm, ńtíʼ ḿbagə̂ ázɨ́d ńchúʼə á mə́ kɔ́d nə́.

³⁶Pó wam məntɨ́ mɔ́b ŋwu ntsəmə á mə́m pó a chúʼə á mə́ kɔ́d nə́.

³⁷Pəg nə ńchîə á mə́mə aŋkənúʼə́ lə́ pɨ nkɛd pɛ̌ nə́ məghə́m mɛ́n asaambɛ̂ nə́ pɨ pɛ́n ntogə́.

³⁸Ndzaŋə ándó ŋwu ntsəmə a nə ńjî nə́ ńdzɛ́d lə́, pó twá əpa ngəsáŋ pó nə ńtúg nə́ á mə́mə aŋkənúʼə́ zə́ ḿmaʼə̂ á mə́m nkǐə, ńjî ńgə́ kɔ aŋkənúʼə́ á pɨ ńdɛlə̂.

³⁹Ndzaŋ mbî nə fóg nə́ lə́, ngaŋə́soŋə́ aŋkənúʼə́ nə ńkě aliʼ pó kə chî nə́ ə́wɨ́ jî pô, lə́ ḿbə́ ńdzə́ənə aliʼ páʼ wáakə́ á nə ńchî nə́ ə́wə́ á nkǎŋkǐə, ńtíʼ sóŋə á mə́m pó ńgə́ mbɔʼ ndú chî ə́wɨ́ pó ghɛlə̂ aŋkənúʼə́ á ghɛn ńtə́əmə aliʼ yəwə́.

⁴⁰Pó tíʼ ńdə́gtə məŋkɛd mə́ ətəənə́ mə̂, ḿmɛdtə̂ mə́ ḿmɛ́lə á mə́m nkǐə, tsɔʼə əghâ yi wɨ́ pó kyagtə̂ məŋkɛd páʼ mə́ wam nə́ əkəm nkwə́ŋ páʼ pə́ lɔg nə̈ ə́soŋə̂ aŋkənúʼə́ ə́wə́. Pó tíʼ ŋ́ŋáʼə apagə atsəʼə́ á mbiə aŋkənúʼə́ ńjî ńgə́ kəfəələ á twáamə aŋkənúʼə́ zə́ ńgɛnə̂ á nəpɛnə́ nə́ nkǐə.

⁴¹Lə́ aŋkənúʼə́ zə́ á ghɛn ńkɔnə̂ aliʼə́ wáakə́ á nkǎŋkǐə, ńtíʼ ńkwúnə á ndu asəgə́, mbiə aŋkənúʼə́ yi wɨ́ láʼə á mə́m wáakə́ ńkě pɨ ńchî təmbɔʼ á nyi pô, lə́ mətɨ mə́ nkǐ páʼ kəfəələ a ghɛd nə́ wɨ́d tóʼnə lə́ mə́ shaʼtə̂ ndzəmə aŋkənúʼə́ zə̂.

⁴²Ngaŋə́maʼə́ntso zə̂ kwaŋ ńgə́ mbɔʼ pó jwítə ngaŋə́tsáŋ zə̂ tsɔʼə ətsəm ńjî ńgə́ kɔ ngaŋətsáŋ wə̂ yitsə̌ a zɔ́ʼ nkǐ ńgɛnə̂ á ndu ndəsê ńtíʼ ńkəələ̂.

⁴³Lə́ nətû zɔ́b nə́ loonə̂ á mə́ chwádkə nə Pɔlə, a tíʼ ńgɛd ngaŋə́maʼə́ntso mɛdtə̂ á mə́ jwítə nə́ ngaŋə́tsáŋ zə̂, a tíʼ sóŋ ńgə́ ŋwu ntsəm páʼ a jî nə́ á mə́ zɔ́ʼ nə́ nkǐə á peg ńkanə̂ nkǐ ńdzɔ́ʼ nkǐ ńkɔ́ʼə nkaŋə́ asəgə́,

⁴⁴pətsə́ pɨ pó wam əpag plaŋ kɨ əpag aŋkənúʼə́ ńtíʼ ńdzoŋə̂ ághóobə́ á nkaŋə asəgə́. Lɛ̌ ndzaŋ pəg pətsəm kə laŋ nə́ ńtíʼ ńchwáalə.