Read Awing Məfaʼə 28 Bible Online

Məfaʼə 28 - Awing bible

Məfaʼə 28

¹Əghâ ándó pəg nə ńkə nə́ nəwû tə ńkoʼə̂ á nkaŋ asəg lə́, ńdzóʼ ńgə́ kyádkənkǐ yi ə́wɨ́ lə́ Malta.

²Pɨ pə́ aliʼ yi wɨ́ pó kə chígə́ ńnəələ̂ akɔŋnə á mbô pəgə́, ńnyagtə̂ móg ńtíʼ ńgɛd pəg zɔ́gə, ńté ńgə́ mbəŋ nə ńtə́ ńdô, əfə́g kə́ ńchîə apeŋə́.

³Pɔlə a nə ńdag nkwə́ŋ ńchúʼə á mə́ tɔ nə́, ndzaŋ móg nə ńtə́ nə́ ńkɛ́lə lə́, sénəsê a fɛ́lə á mə́m nkwə́ŋ zə̂ ńdúmə apô Pɔlə ńdáʼ ə́wə́.

⁴Əghâ ándó ngaŋə́láʼə Malta nə ńjɨ́ nə́ ndzaŋ sénəsê wə́ á tsə́ŋnə nə́ apô Pɔlə lə́, pó chúʼə á mə́ sóŋ nə́ tətɨ pó ńgə́, “Lə́ ndə̌ŋdəŋ ńgə́ ŋwu ghɛn lə́ njwítə ńté ńgə́ a pǎtə ńkəələ̂ nəwûə á mə́m nkǐ lə́, əsê páʼ ä sáʼ nə́ məsáʼ mə́ pɨ ńkə́ ə́fɛ̂ ajú páʼ á pə́ nə́ azɔ́b a kě yǐ mɛdtə̂ yə́ a chîə á mbî pô.”

⁵Lə́ Pɔlə a megə̂ apô ají, nó zə̂ ə́ wǔəə á mə́m móg tsɔʼə tə ghɛlə̂ anu yitsə̌ nə́ yə́.

⁶Ngaŋə́láʼ zə̂ pyádnə ńtíʼə ḿbyáabə ńgə́ a yǐ kɔ́ʼkə kɨ ghabkə̂ wǔəə əsê kwûə. Pó pyáb nə́ tə́sɛ ndɛd anu yətsə̌ a pə́ ńkě nə́ Pɔl laŋ pô, pó tíʼ ńkwúblə məntɨ́ mɔ́b, ńtíʼ ńkwaŋ ńgə́ lə́ əsê yitsə̌.

⁷Ḿbáatə aliʼ páʼ Pɔl pó pətsə́ pɨ pó nə chî nə́ wɨ́ lə́, əliʼ ndəsê pətsɨ́ kə chî wɨ́ ḿbə́ pipə́ ŋwu pə́ fóŋ nə́ nə́ Publusə lə́, a kə pə́ lə́ Əfo kyádkənkǐ yi wə́. A nə ńdɔgə̂ áwə́g əshîʼnə, ńkə́ ńdzə́gə áwə́g nə́ əlě mbî pɛ́n teelə́.

⁸Á laŋ ńgə́ Tǎ pə Publusə a nə noŋnə̂ ńtə́ ńgoonə̂. A nə ńtúg əfə́g pó ntsə́ŋə. Pɔlə a ghɛn ńdzə́ənə yí ńnoŋkə̂ mbô míə á ndu yí ńtíʼ ńchaʼtə́sê nə́ yə́ a tíʼ ńgyáŋə.

⁹Ndzaŋə á nə ńdaŋ nə lə́, pɨ pətsəm á mə́m kyádkənkǐ páʼ pó nə ńtə́ nə́ ńgoonə̂ pó yǐəə á mbô Pɔlə a chaʼtə́sê pó yáŋə.

¹⁰Pɨ pə̂ pó fɛ̂ əpú pipə́ nɨ́ nə́ á mbô pəgə́, ndzaŋə ándó pəg nə ńchî nə́ á mə́ ghɛn nə́ nə́ mbi nə́ nənyi əwəg lə́, pó néŋə ajúmə atsəmə á mə́m aŋkənúʼə́ páʼ á nə́ ńkoʼnə̂ nə́ nə́ nənyi əwəgə́.

¹¹Ndzaŋ pə́ nə ńchî nə́ Malta nə́ sáŋ teelə́ lə́, pəg ghɛn nə́ mbi nə́ nənyi əwəgə́ á mə́m aŋkənúʼə́ yə ndaʼ páʼ á kə lǒo nə́ Alekzanda, pə́ fóŋə nə́ “Məfág mə́ məsê,” zə́ələ́ á kə pə́ ndɛd əfə́g ńtíʼ ńtə́əmə kyádkənkǐ ghɛnə́.

¹²Pəg nyi ńtə́əmə á tɔ̂ŋ yitsə̌ pə́ fóŋ nə́ nə́ Silakusə ńtíʼ ńchî ə́wɨ́ əlěmbî pɛ́n teelə́.

¹³Pəg fɛ́lə Silakus ńnyinə̂ á mə́m nkǐ tə ńtíʼ ńgyǐ ńkwúnə á tɔ̂ŋ Ligumə. Mbî fóg kəfəələ á fɛ́lə á ndú mətoŋə́ ńchúʼə á mə́ kɔ́ʼ nə́, yətsə̌ alě á laŋ pəg kwúnə á tɔ̂ŋ Putɔli á mə́mə aláʼə Itali, ńtə́gə aŋkənúʼə́ ńtíʼ ńgɛnə̂ á mə́m tɔ́ŋə.

¹⁴Pəg jɨ́ pəlim pətsə́ ə́wɨ́ á mə́m Yeso pó tíʼ sóŋ ńgə́ pəg yǐ ńchî pə̌gpo nə́ əlěmbîə asaambɛ̂. Ə́fɛ́d ə́wɨ́ ńgɛn ńkwúnə á Lomə.

¹⁵Pəlimə́ a ndzəm Yeso á Lom pó zóʼ ńgə́ pəg yǐəə, ńtíʼ ńchúʼə á mə́ yǐ nə́ tégə áwə́gə́. Pó pətsə́ pó láʼ ńtégə áwə́gə́ á məta Apusə, pətsə́ pə́ tégə áwə́gə́ aliʼ pə́ fóŋ nə́ ńgə́ (Məndɛ̂ mɛ́n teelə́ mimə́ Pəghəənə) əghâ ándó Pɔlə a nə ńdzɨ́ nə́ ághɔ́b lə́ ə́fɛ̂ ndǎ á mbô Əsê anu yi wə́ á tíʼ ńnéŋ ńtíʼ əyə́.

¹⁶Əghâ ándó pəg nə koʼ nə́ á Lom, pəg mɛdtə̂ Pɔl ńgə́ a chîə á ngǎ yə́, táʼ ŋwunə á mə́m ngaŋə́maʼə́ntso á tə́ ńnáŋə yə́.

¹⁷Əlěmbî pɛ́n teelə́ laŋ, Pɔlə a fóŋ mətû mə́ Pəjusə á Lomə, əghâ pó nə ńgyǐ nə́ á sóŋə á mbô pó ńgə́, Pəlimə́ mə, maŋ pǎtə ńkě anu yətsə̌ ghɛd ndzaŋ mbɔʼ ndě pɨ pɛn ə́ záŋ lə́, maŋ kě noŋkə pətǎ pɛn kǐ pô, pɨ pɛn pó waamə̂ mə á Jɛlusalɛm ńtíʼ ə́fɛ̂ mə á mbô pɨ pə́ Lomə ándó ngaŋətsáŋə.

¹⁸Əghâ ándó mətû mə́ Lom mə́ nə náŋ nə́ əsáʼə mə lə́, ńtə́ ńdoonə̂ á mə́ mɛdtə̂ nə́ mə, ńté ńgə́ pó nə jɨ́ ńgə́ maŋ kě ghɛlə̂ anu yətsə̌ təmbɔʼ pə́ jwítə mə pô.

¹⁹Lə́ mətû mə́ Pəjusə á Jɛlusalɛm pó kǐ ńgə́ kɔ pɨ pə́ Lom pó mɛdtə̂ mə. Maŋ tíʼ ńkě chî nə́ anu yitsə̌ á mə́ ghɛd nə́ tə ńdéʼtə ńgə́ maŋ sóŋ ńgə́ pə́ chaakə̂ əsáʼə mə á mbô Kasa pô, lə́ ḿbə́ ńkě túgə anu yətsə̌ á mə́ sóŋ nə́ ńté pəənə mə páʼ pó ghɛd nə́ á kě koʼnə̂ pô lə́.

²⁰Lə́ ghɛd ə́lɨ́d maŋ fóŋə áwə́ənə́ á mə́ tsáb nə́ á mbô pəənə́, ńté ńgə́ maŋ nə ńdɔ ńgə́ nə́ jî ńgə́, maŋ chî feenə́ atsáŋ lə́ ńté ŋwu páʼ Pəjus pó tə́ nə́ ḿbyáabə lə́.

²¹Mətû mə́ Pəjusə mə́ mə́ kwěe a Pɔl ńgə́, “Pəg kě aŋwaʼlə yətsə̌ jɨ́ páʼ á fɛ́d nə́ Judya ńté gho pô, lə́ táʼ ŋwunə á mə́m pəlim pəg a kě kə́ ńdǒ ə́wə́ ńgyǐ fiʼtə̂ áwə́g nə́ nkɨ ńgə́ gho ghɛlə̂ anuə təpɔŋ pô.

²²Lə́ pəg yǐ kɔŋə̂ á mə́ zóʼ nə́ á mbô gho, azô anu gho kwaŋ nə́, ńté ńgə́ pəg jî ńgə́ á mə́m əliʼ ətsəm, anu ńté nkyeetə zɨ nə́ sóŋ nə́ anu ńté lə́, pɨ pə́ tséebə tsɔʼə təpɔŋ ńté zə́ələ́.”

²³Pó tíʼ ńdaʼnə̂ alě pó yǒ nə́ tégə yə́. Ndzaŋə ándó alě yə wə̂ a nə́ ńkoʼ nə́ lə́ pó pipə nɨ́ nə́, pó yǐ ńtéekə a Pɔl aliʼ páʼ a nə ńchî nə́ ə́wə́. Ńchúʼə məsânə tə ńkoʼə̂ á ndɛd nkwanə́, Pɔlə a fiʼtə̂ ághɔ́b nə́ anu ńté anuə nəfoonə Əsê, ńtíʼə ńdoonə̂ á mə́ ghɛd nə́ pó jîə anu ńté Yeso Klisto ńdɔgə̂ aŋwaʼlə pənoŋkə pə́ Mosisə ḿbá əŋwaʼlə páʼ Məntúmə́sê mə́ nə ŋwaʼlə̂ nə́ á mə́ nɨd nə́ ághɔ́b nə́ anu páʼ a pěʼ nə̈ ə́sóŋə.

²⁴Pó pətsə́ nə ḿbímə anu páʼ Pɔlə a sóŋ nə́, lə́ pətsə́ pə́ pə́ ńkě pí pô.

²⁵Pó chúʼə á mə́ zɔŋ nə́ á tətɨ pó. Pó nə ńjǐ tə́ shamnə̂ lə́, Pɔlə a fiʼtə̂ táʼ anuə yətsə́ ńgə́ “Ajwǐəsê a nə koʼnə̂ á mə́ tsáb nə́ á mbô pətǎ pɨ́ ńdaŋə̂ á mbô ntûsê Izaya ńgə́,”

²⁶[16]Ghɛn fiʼtə̂ pɨ pɨ ńgə́, Nə́ yǒ zóʼ kə́ zóʼ ngǎ yi nɨ́ nə́, lə́ atûə azə́ənə́ á pə́ ńkě nə́ anu yəwɨ́ tsɔ́ʼnə pô; Nə́ yǒ náŋə kə́ pɨ náŋə ə́ pə́ kě jɨ́ pô

²⁷ńté ńgə́ pɨ pɨ pó kwúd məntɨ́ móobə́, pó kə́bkə mətôglə móobə́, ńjî ńgə́ kɔ pó zóʼə. Pó kə́bkə əmə́g móobə́, ńjî ńgə́ kɔ pó jɨ́ nə́ əmə́g móobə́, ńdzóʼ nə́ mətôglə móobə́, ńjî nə́ məntɨ́ móobə́, ə́sɛdnə̂ ńgyǐəə á mbô maŋ, ńgə́ maŋ tsóʼə ághóobə́.

²⁸[17]Á mə́ lwigtə̂ nə́, Pɔlə a sóŋ ńgə́, “Maŋ loonə̂ lə́ ńgə́ nə́ jî ńgə́ nkɨ Əsê ndzaŋ páʼ Əsê a chwádkə nə́ pɨ lə́, pə́ túmə á mbô Pətəjǐsê, pó yǐ ə́ tə́gə atû ńjwə́ʼtə.”

³⁰Pɔlə tíʼ ńchî ə́wɨ́ ngoʼ pɛ̌ ə́faʼə̂ anuə atsəmə á ngǎ yə́, ńtû ndɛ̂ əjǐə a ngǎ yə́ ńtíʼə̈ ńdɔgə̂ ŋwu ntsəm əshîʼnə páʼ a yǐ nə́ á mə́ jɨ́ nə́ yə̈.

³¹Ə́sóŋə anu ńté Anuə Nəfoonə Əsê ńdzéʼkə ághɔ́b nə́ anuə ńté Mmaʼmbî Yeso Klisto á əshîsaŋə ŋwu tsə̌ a kě yí pɨ ńjwaʼ pô.