Read Awing Məfaʼə 9 Bible Online

Məfaʼə 9 - Awing bible

Məfaʼə 9

¹Əghâ yi wɨ́ lə́ Sɔlə a pɛ́lə ńkéelə ńkag ngaŋə́zoŋə́ndzəm Mmaʼmbîə á mə́ jwítə nə́ ághóobə́. Ńgɛnə̂ á mbô Mbêsê yi Ngweŋ

²ḿbítə aŋwaʼlə á mbô yí páʼ a yǐ nə́ fɛ̂ mətɨ nə́ yí ńgə́ á ghɛnə̂ á mə́m məláʼ mə́ Əsê mə́ Pəjus á Damaskɔs, ńjî ńgə́ mbɔʼ á zə́ənə ŋwu ntsəm páʼ a tə́ nə́ ńdzoŋ Ndú Mmaʼmbî, kəənə á pə́ yi mbyâŋnə kɨ pəngyě, a waamə̂ ághóobə́ ándó ngaŋə́tsáŋ ńgɛn nə́ pó á Jɛlusalɛmə.

³Sɔlə a tíʼ ńkwá əŋwaʼlə pə́ ńtə́ ńgɛnə̂ Damaskɔs, ndzaŋ a nə ńtə́ nə́ ḿbáatə lə́, nkyaʼ yitsə̌ ə́ ghabkə̂ ə́fɛ́lə á nəpó ŋ́ŋwaŋkə̂ ńdíblə yə́.

⁴A wǔəə á ndəsê ńdzóʼ ngye yitsə̌ ə́ sóŋ nə́ yí ńgə́, “Sɔl, Sɔl! gho tsaŋkə̂ mə lə́ ńgə́ akə̂?”

⁵Sɔlə a pítə ńgə́, “Gho lə́ əwə Mmaʼmbî?” Ngye zə́ ə́ kwěe ńgə́, “Maŋ lə́ Yeso páʼ ghö tsaŋkə̂ nə́ lə̂.”

⁶Lə́ əghâ nə́, lǒo əsê ńkwúnə á mə́mə aláʼə Damaskɔs pə́ fiʼtə̂ gho nə́ anu gho ghɛlə̂.

⁷Pɨ pó po nə ńtə́ nə́ ńnyinə̂ pó tə́əmə aliʼ yi wɨ́ məntso mɔ́b mə́ naʼnə̂; pó zóʼ ngye zə̂ ḿbə́ ńkě ŋwu páʼ ä tsáb nə́ lə́ jɨ́ pô.

⁸Sɔlə a lǒo ndəsê ŋ́ŋáʼ əmə́g mí, ḿbə́ ńkě chî təmbɔʼ a jɨ́ əliʼ pô. Pə́ tíʼ ńgwaamə̂ apô ají ńdɔgə̂ yí ńkwúnə á Damaskɔs.

⁹A lɔg əlě teelə́ ńkě chî təmbɔʼ a jɨ́ əliʼ pô ńkě ajûtsə́ kə́ ńjî kɨ ńnô pô.

¹⁰Ndzoŋdzəm Yeso yitsə̌ a nə ńchîə á Damaskɔs pə́ fóŋ əlɛ́n yí nə́ Ananyasə. Mmaʼmbîə a sóŋə á mbô yə́ á mə́m ndzəəmə atəəmə́tɨ́ ńgə́, “Ananyas!” A kwěe ńgə́, “Maŋ ghɛnə́ Mmaʼmbî.”

¹¹Mmaʼmbîə a sóŋə á mbô yí ńgə́, “Lǒo əsê ńgɛnə̂ á ndɛ̂ Judas á alaŋə́ páʼ pə́ fóŋ nə́ ńgə́ tɨ́ ndə̌ŋdəŋ lə́ ḿbítə ŋwu tsə̌ páʼ pə́ fóŋ nə́ nə́ Sɔl páʼ a fɛ́d nə́ Tasus. A chî ə́wɨ́ əghâ nə́ ńtə́ ńchaʼtə́sê.

¹²A pə̂ ńchîə á mə́m njɨ páʼ a kě nə́ tə́ ńdê pô ńdzə́ənə a ŋwu tsə̌ páʼ pə̈ fóŋ nə́ ńgə́ Ananyas, a yǐ ńnoŋkə̂ mbô míə a atû yí ńjî ńgə́ təmbɔʼ a pɨ ńjɨ́ əliʼ ngǎ yitsə̌.”

¹³Ananyasə a kwěe ńgə́, “Mmaʼmbî, maŋ pɛ́d tə ńdzóʼ mənu mimə nɨ́ nə́ ńté ŋwu yi wə́ ḿbɨ ńkə́ ḿbə́ nə́ ndɛn mənu mə́ təpɔŋ páʼ a ghɛd nə́ nə́ pɨ pô a Jɛlusalɛmə.

¹⁴A pɛn ńtíʼ ńgyǐ ə́fênə̌, ḿbə́ ńgyǐ lə́ nə́ mətɨ páʼ a kwá nə́ á mbô Mbêsê yi Ngweŋə́ á mə́ wamtə̂ nə́ a ŋwu ntsəm páʼ a fóŋ nə́ əlɛ́n əghô.”

¹⁵Lə́ Mmaʼmbîə a pə́ ə́sóŋə á mbô Ananyasə ńgə́, “Ghɛnə̂! Maŋ tsɔ́ʼə yí ńgə́ á pə́ ngaŋəfaʼə mə ńjî ńgə́ a lɔg əlɛ́nə mə ńgɛn nə́ wə́ələ́ á mbô Pətəjǐsê pópə pəfo póobə́, ńkə́ ńgɛn nə́ wə́ələ́ á mbô pɨ pə́ Izlɛlə.

¹⁶Maŋ yǐ nəələ̂ yí ndzaŋ mbɔʼ a jɨ́ ngə́ʼ ńté əlɛ́nə mə.”

¹⁷Ananyasə a tíʼ ńgɛnə̂ a ndɛ̂ yi wɨ́ ńkwú ə́wɨ́ ńnoŋkə̂ mbô míə á ndu Sɔl ə́sóŋ ńgə́, “Ndimə́ mə Sɔl, Mmaʼmbî Yeso páʼ a nə ńjáʼ nə́ á mbi gho á alaŋə́ páʼ gho nə ńtə́ nə́ ńgyǐəə ə́fɛ̂ lə́, a túmə mə ńjî ńgə́ mbɔʼ gho pɨ ńjɨ́ əliʼ ngǎ yitsə̌ ńkə́ ńdwɛ́nkə nə́ Ajwǐəsê.”

¹⁸Tsɔʼə əghâ yi wɨ́, əpú pətsə́ ándó əpú páʼ ə́ fɛ́d nə́ á mbɨ əshû lə́ ə́ fɛ́dkə á əmə́g yí ńgwukə̂, a pɨ ńchwáakə á mə́ jɨ́ nə́ əliʼə́. Ńtíʼ ńdǒ á ndəsê ńkwá nkǐə,

¹⁹ńjî məjî apɛ̂ ajíə á pəənə̂. A chî pɔ́ pə́ əlě pópə ngaŋə́zoŋə́ndzəm Yeso á Damaskɔsə.

²⁰Ńtɔ́g ńgɛn ńchúʼə á mə́ fiʼtə̂ nə́ pəənə á Ndɛ̂sê Pəjus ńgə́, “Yeso lə́ Mɔ́ Əsê.”

²¹A nə ńkɨʼnə̂ ŋwu ntsəm páʼ a nə ńdzóʼ nə́ atséebə ají tə pó tíʼə ḿbítə ńgə́, “Lɛ̌ kě ŋwu páʼ a nə̈ nyi nə́ ńtsaŋkə̂ pɨ páʼ pó nə̈ ńgóʼkə nə́ əlɛ́n Yeso ghɛnə́ á Jɛlusalɛm lə́ pô? A pɛn ńkə́ ńgyǐ ə́fɛ̂ lə́ tsɔʼə nə́ anu yəwə́ á mə́ wam nə́ ághɔ́b ə́ ghɛn nə́ pó á mbô Pətə́kɔʼ pə́ ngaŋə́pêsê á Jɛlusalɛmə.”

²²Lə́, Əsê a pə́ ńgɛd Sɔlə a megnə̂ ńtyantə̂ tyantə̂ nə́, ńtíʼə ńnáŋkə nkɨ Əsê nə́ mətəənə. A jwaʼlə̂ Pəjusə a Damaskɔs lɛ̌ ńté ńgə́ a nə nəələ̂ á mbô pó ńgə́ Yeso lə́ Yi Ńtsəʼ nə́ wə́.

²³Əlě mbî pətsə́ ə́ laŋ, Pəjusə pə́ tyáŋə mənaŋ á mə́ jwítə nə́ yə́.

²⁴Pə́ kə ghɛd Sɔlə á jîə anu pó kə lɔ́btə nə́. A nənumnə pópə nətúʼ pó pyáabə a ntsǒnkáʼə á mə́ wam nə́ yí ə́jwítə.

²⁵Ńdaŋ ə́lɨ́d, ngaŋə́zoŋə́ndzəm Sɔl lɔgə̂ yə́ á nətúʼ ńnéŋə yə́ á mə́m mɛ́ nka ńdaŋkə̂ yə́ á mə́m ngɔ́d yitsə̌ á mbɨ nkáʼ páʼ wɨ́d ə́ nə ńdíblə nə́ aláʼ ńtsóokə yə́ a ndzəm yitsə̌ á kəələ̂.

²⁶Sɔlə a yǐ ńkwúnə á Jɛlusalɛm ńtə́ ńdoonə̂ á mə́ kwú nə́ á ndzɔʼ ngaŋə́zoŋə́ndzəm Yeso, pó pətsəm pə́ ńtə́ ḿbɔ́gə yə́. Pó nə ńkě pí ńgə́ lə́ chígə́ ndzoŋdzəm Yeso pô.

²⁷Lə́ ŋwu tsə̌ pə́ nə̈ fóŋ nə́ yí nə́ Banabasə a pə́ ńdɔgə̂ yí pó yí ghɛn ńtég məntú mə́ Yeso ńtíʼ ə́fiʼtə̂ ághɔ́b ndzaŋ páʼ Sɔlə a nə ńjɨ́ nə́ Mmaʼmbîə á alaŋə́ ndú Damaskɔs, ńkə́ fiʼtə̂ ághɔ́b nə́ anu páʼ Mmaʼmbîə a nə sóŋ nə́ á mbô Sɔlə, ńkə́ fiʼtə̂ ághɔ́b ndzaŋ páʼ Sɔlə a nə sóŋ nə́ anǔəsê nə́ əlɛ́n Yeso nə́ mətəənə á Damaskɔs tsɔʼə tə apɔ́gə.

²⁸Sɔlə a tíʼ ńchîə á mə́m pó á Jɛlusalɛm ńgéelə ńyinə̂ ə́sóŋə anǔəsê nə́ əlɛ́n Mmaʼmbî tsɔʼə tə apɔ́gə.

²⁹A nə ńtsáb ńkə́ ńkwúblə atsáb pópə Pəjus pətsə́ páʼ pó nə̈ ńtsáb nə́ atséebə Glikə, pó tíʼə ńnáŋ ndúmə á mə́ jwítə nə́ yə́.

³⁰Əghâ ándó yitsə̌ ngaŋə́zoŋə́ndzəm Yeso ə́ nə ńdzóʼ nə́ anu yə wɨ́ lə́, ńdɔgə̂ yí ńtsó ńgɛnə̂ á Kasalya ńtíʼ ńgɛlə̂ a ghɛnə̂ á Tasusə.

³¹Mənkyeetə mə́ pɔ́ pə́ Əsê mətsəm páʼ mə́ nə́ ńchî nə́ á Judya pópə Galili nə́ Samalya mə́ nə ńchî nə́ mbwɔ́dnə. Ndzaŋə Ajwǐəsê á kə kwá nə́ ághɔ́b, pö kwéŋə ndɛn əghɔ́b kə́ ḿbegə̂ ndzoŋ ndzaŋ nchîmbî əzɔb ə̈ fɛ̂ nə́ nəgháʼə á mbô Mmaʼmbîə.

³²Pita a nə ńtə́ nə́ ńkéelə ńnyinə̂ á mə́mə aláʼ ńgɛnə̂ á mə́ ghá nə́ pɨ pə́ Əsê á Lida.

³³Ńgɛn ə́wɨ́ lə́ ńdzə́ənə nkweglə yitsə̌ pə́ fóŋə nə́ Anas páʼ a nə ńkə́ nə́ ńnoŋnə̂ tsɔʼə a əkwu nə́ ngoʼ nəfeemə́.

³⁴Pita a sóŋə á mbô yí ńgə́, “Anas, Yeso a tə́ ńtsóʼə gho əghâ nə́. Lǒ əsê ńkéelə mə́ta gho.” Tsɔʼə əghâ yi wɨ́ Anasə a sad mbɨ əjǐ ńdǒo əsê.

³⁵Əghâ ándó ŋwu ntsəm páʼ a nə ńchî nə́ á mə́mə aláʼə Lida pó Shalɔn a nə ńjɨ́ nə́ ndzaŋ pə́ tsóʼ nə́ Anas lə́, ńnéŋ ntɨ́ əghɔ́b nə́ Mmaʼmbî Yeso.

³⁶Məngyě yitsə̌ páʼ a nə ḿbí nə́ nə́ Yeso a nə ńchîə á Joppa pə̈ fóŋə yí nə́ Tabita (əlɛ́n yi wɨ́ ńgə́ Tabita ə́ chî nə́ atséebə Glik lə́ ńgə́ Dokas páʼ wɨ́d pə́ nə́ lə́ ńgə́ “ngéebə.”) A nə̈ ńgɛlə̂ mənu mimə əshîʼnə ńkə́ ńkwáalə pəpóŋə.

³⁷Nə́ əlě pɨ́d pə̂, a wǔəə aghɔ ńtíʼ ńkwûə. Pə́ sogə̂ akwûə ají ńnoŋkə̂ nə́ atɔ́gə ndɛ̂ á atǐə.

³⁸Lida a nə ḿbáatə Joppa, ngaŋə́zoŋə́ndzəm Yeso páʼ pó nə ńjî nə́ ńgə́ Pita a chîə Lida lə́, pó tú pɨ pɛ́n pɛ̌ ńgə́ pó ghɛn ḿbóʼmbô nə́ yí ə́sóŋ ńgə́ “Pəg póʼmbô, yǐəə Joppa tsɔʼə əghâ nə́.”

³⁹Pita a tíʼ ńdǒo əsê ńgɛn pó po, əghâ ándó pó nə ńkoʼ nə́ Joppa lə́, ńdɔgə̂ Pita ńkɔ́ʼ ńgɛnə̂ á mə́mə atɔ́gə ndɛ̂ zə̂ á atǐə. Pəkog tsɔʼə pətsəm pə́ tɨ́ ńdíblə Pita ńtíʼə ńkyéŋə ńnəələ̂ yí nə́ ətsəʼ páʼ Dokasə a nə ńtsoŋkə̂ nə́ əghâ páʼ a nə ḿbɛ́d nə́ á mbîə.

⁴⁰Pita a ghɛd pó pətsəm fɛ́lə a apeŋə́; a tíʼ ńkwə́ʼtə á ndəsê ńchaʼtə́sê, ńtíʼ ə́sɛdnə̂ ńtə́ ńnáŋə akwûə məngyě wə̂ ńgə́, “Tabita, lǒo əsê.” Tabita a ŋáʼ əmə́g mí ńdzə́ənə Pita ńtíʼ ńdǒo əsê ńnáanə.

⁴¹Pita a waamə̂ apô ají ńtíʼ ńkwáalə yə́ a lǒo əsê ńtə́əmə. Pita a tíʼ ə́fóŋ ngaŋə́zoŋə́ndzəm Yeso pópə pəkog pə̂ á mə́m ndɛ̂ ńtíʼ ńnəələ̂ yə́ á mbô pó páʼ a chî nə́ á mbîə.

⁴²Anu zəənə́ a nə nyinə̂ á mə́mə aláʼə Joppa tsɔʼə atsəm pɨ pipə nɨ́ nə́ pə́ tíʼ ḿbí ńdzoŋ ndzəm Mmaʼmbîə.

⁴³Pita a kə lɔg ndɛd yitsə̌ ńchîə Joppa á ndɛ̂ ŋwu tsə́ páʼ pə́ nə̈ fóŋ nə́ yí nə́ Saamun páʼ a nə̈ ńtsoŋkə̂ nə́ məngwub mə́ neemə.