Read Awing Lomanə 10 Bible Online

Lomanə 10 - Awing bible

Lomanə 10

¹Pəlimə́ mə, maŋ pyádnə ńdoonə̂ nə́ ntə́əmə mə ətsəmə ńkə́ ńchaʼtə́sê ńgə́ təmbɔʼ pəənə mə pó yǒ ńchwáalə.

²Maŋ jî ndə̌ŋdəŋ ńgə́ pó pyádnə ńtyantə̂ á mə́mə anǔəsê, ḿbə́ ńkě jî chigə ndú páʼ wɨ́d koʼnə̂ nə́ á mə́ faʼ nə́ á mbô yí pô.

³Ndzaŋ pó kə kě nə́ əsê ndú páʼ Əsê ghɛd nə́ pɨ pó tə́əmə ńkoʼnə̂ pó po jî pô lə́, ńtíʼ ńdɔ ndú ətsəmə á mə́ náŋ nə́ əghɔ́b ndúmə. Ńdaŋ ə́lɨ́d pó kě tsóokə məmbɨ mɔ́b ńdzoŋ əsê ndú páʼ Əsê lɔ nə́ mə́ ghɛd nə́ pɨ pó tɨ́ ńkoʼnə̂ lə́ pô.

⁴Ńté ńgə́ noŋkə á lwigtə̂ lə́ a mbɨ Klisto, ńjî ńgə́ ŋwu ntsəm páʼ a néŋ nə́ ntɨ́ əyí nə́ yí, Əsê a ghɛd mənu mí mə́ tɨ́ ńkoʼnə̂.

⁵Mosisə a nə ŋ́ŋwaʼlə̂ ńgə́ ŋwu páʼ a lɔ nə́ á mə́ tɨ́ nə́ ə́ koʼnə̂ ndzaŋ páʼ noŋkə á nɨd nə́ á yǒ chîə mbî zoŋ lə́ ndzaŋ a zóʼnə nə́ noŋkə.

⁶Lə́ aŋwaʼlə Əsê á sóŋ ńgə́ mə́ tɨ́ nə́ koʼnə̂ pɨ Əsê əlaŋə̂ á mə́m mbimə́ lə́ ńgə́, Kɔ sóŋə á mə́m ntɨ́ gho ńgə́, “Lə́ yǐ kɔ́ʼ əwə ghɛnə̂ á nəpóolə?” (á mə́ lɔg nə́ Yeso tsó nə́ yə́ á ndu ndəsê)

⁷kɨ əwə a yǐ tsóolə atéemə́təndwegtə? (lə́ á pə́ ńgə́, ə́ júmkə Klisto á nəwûə)

⁸Anu páʼ á sóŋ nə́ lə́ ńgə́, “Nkɨ Əsê yǐ tə ḿbáatə gho, ə́ chîə a ntso gho ńkə́ ńchîə á ntɨ́ gho, lə́ nkɨ ńté mbimə́ páʼ pɛn sóŋ nə́ anǔəsê ə́wɨ́.

⁹Ńté ńgə́ təmbɔʼ gho sóŋ nə́ ntso əghô ńgə́ Yeso lə́ Mmaʼmbî ńkə́ néŋ ntɨ́ ńgə́ Əsê a nə ńjúmkə yə́ á nəwûə, tə ḿbə́ gho yǐ chwáalə.

¹⁰Mbɔʼ pɛn néŋ ntɨ́ nə́ Yeso á mə́m ntɨ́ pɛn Əsê ghɛd mənu mɛn mə́ tɨ́ ńkoʼnə̂, ńkə́ ńtsáb nə́ ntso əwɛ̂n tə ḿbə́ Əsê a yǐ chwádkə áwɛ̂nə!”

¹¹Aŋwaʼlə Əsê á sóŋ ńgə́, “Ŋwu ntsəm páʼ a néŋ nə́ ntɨ́ nə́ yí, pə́ yǒ kě əsə́ənə atû yí néŋ pô.”

¹²Ńté ńgə́ pə́ kě ŋwu tsə̌ chwɛ́d pô, kəənə a pə́ ŋwu Jus kɨ Təjǐsê. Mmaʼmbî lə́ táʼə ńkə́ ḿbə́ Mmaʼmbî ŋwu ntsəmə ńkə̈ ə́fɛ̂ afoʼə ajíə á mbô ŋwu ntsəm páʼ ä fóŋ nə́ əlɛ́n yə́.

¹³Ndzaŋ páʼ aŋwaʼlə Əsê á sóŋ nə́ ńgə́, “Ŋwu ntsəm páʼ a fóŋ nə́ əlɛ́n Mmaʼmbî a yǒ chwáalə.”

¹⁴Təmbɔʼ pɨ pó pə̈ ńtíʼə ə́fóŋ əlɛ́n əyí ńgə́ a kwáalə ághɔ́b lə́ ə́lɛ́ páʼ mbɔʼ pó chî ntɨ́ əghɔ́b nə́ yí néŋ pô? Təmbɔʼ pó pə̈ ńtíʼ ńnéŋ ntɨ́ əghɔ́b nə́ ŋwu páʼ pó kě nə́ anuə ají kə́ zóʼə lə́ ə́lɛ́? Təmbɔʼ pó pə́ ńdzóʼ lə́ ə́lɛ́ páʼ təmbɔʼ pə́ chî nkɨ ńté yí náŋkə pô?

¹⁵Təmbɔʼ pə́ náŋkə nkɨ yi ə́wɨ́ lə́ ə́lɛ́, tə ghə́ pə́ tú pɨ ńgə́ pó fiʼtə̂ anu yi ə́wə́? Ándó aŋwaʼlə Əsê á sóŋ nə́ ńgə́, “Zɨ́ nə́ ndzaŋ məko mə́ pɨ pó sóŋ nə́ anǔəsê mə́ pɔŋ nə́.”

¹⁶Lə́ pó pətsəm pə́ ńkě Nkɨ yi Əshîʼnə yi ə́wɨ́ kə́ pímə pô, ndzaŋ páʼ Izaya a nə sóŋ nə́ ńgə́, Mmaʼmbî, lə́ néŋ əwə ńnéŋ ntɨ́ nə́ nkɨ əwə́gə́?[18]

¹⁷Ńdaŋ ə́lɨ́d mbimə̈ fɛ́lə lə́ nə́ nkɨ pə́ zóʼ nə́, ŋwu ntsəmə a kə́ ńdzóʼ nkɨ yi wɨ́ lə́ əghâ pə́ sóŋ nə́ anu ńté Klisto.

¹⁸Maŋ tíʼ ḿbítə ńgə́: Pó nə ńkě nkɨ yi ə́wɨ́ zóʼ? Lə́ ndə̌ŋdəŋə́, pó nə ńdzóʼə, ńté ńgə́ aŋwaʼlə Əsê a sóŋ ńgə́, “Ngye əzɔb nə fɛ́d ńgɛn nə́ məlá mə́ mbî mətsəmə, nkɨ əghɔ́b ə́ kə́ ńgɛn nə́ məlá mə́ mbî mətsəmə.”[19]

¹⁹Maŋ pɨ ḿbítə ngǎ yitsə̌ ńgə́: Atûə Pəjusə á nə ńkě lá? A nə́ chwáakə Mosisə sóŋ ńgə́, “Maŋ yǐ ghɛd nə́ túgə ŋwéetə́ ńté pɨ páʼ pó kě nə́ aláʼ túg pô; Maŋ yǐ ghɛd nə́ záŋ ndě nə́ aláʼ páʼ pɨ pə́ chî nə́ ə́wɨ́ ḿbə́ əkəkógə́.”[20]

²⁰Izaya a pɨ ńtsáb tə apɔ́g ńgə́, “Pɨ pə́ nə ńdzɨ́ nə́ mə lə́ pɨ páʼ pó nə ńkě nə́ mə tə́ náŋə pô; Maŋ nə ńnɨd mbəəmə mə á mbô pɨ páʼ pó nə ńkě nə́ mə tə́ ḿbítə pô.”[21]

²¹Lə́ a nə ńtsáb ńté Pəjusə, ə́sóŋ ńgə́, “Əlě ətsəm, əlě ətsəm, maŋ ŋáʼkə mbô mə ə́fóŋnə pɨ páʼ pó pə́ nə́ ngaŋə́tyǎntə́tû ńkə̈ ńkǐə anu páʼ maŋ nə sóŋ nə́ lə̂.”[22]