Read Awing Lomanə 11 Bible Online

Lomanə 11 - Awing bible

Lomanə 11

¹Maŋ tíʼ ḿbítə ńgə́, Əsê a kǐ pɨ pí? Təmbɔʼ á kě ə́lɨ́d chî pô! maŋ nə́ nkɔ̌ʼmbəəmə, maŋ lə́ mɔ́ Islɛl, ḿbə́ ngwud Ablaamə, ńkə́ ə́fɛ́d nə́ əla Bɛnjamɛnə.

²Əsê a kě kə́ kǐəə pɨ pí páʼ a nə ńtsɔ́ʼ nə́ ə́fɛ́lə á nəchwaakənə́ pô. Nə́ jîə anu páʼ aŋwaʼlə Əsê a sóŋ nə́ aliʼ páʼ Elayija a nə ńtə́ nə́ ḿbóʼmbô á mbô Əsê ńgə́ a néŋ ngə́ʼə á tû pɔ́ pə́ Islɛl ńté təpɔŋ pó ghɛd nə́.

³Elayija a nə sóŋ ńgə́, “Mmaʼmbî, pó jwítə məntúmə́sê mô tsɔʼə mətsəm ńkə́ shaʼtə̂ məpá mô; Lə́ tíʼ ḿbɛ́d tsɔʼə maŋ təjiʼə, pó kə́ ńtə́ ńdoonə̂ á mə́ jwítə nə́ mə.”[23]

⁴Lə́, Əsê a nə ńkwěe á mbô yí ńgə́, “Maŋ túg pəpá pɨ tɔsə asaambɛ̂ páʼ pó kě nə́ kə́ ghóʼkə əsê məfɨgə Baal pô.”[24]

⁵Lə́ kə́ ḿbə́ tsɔʼə ə́lɨ́d əghâ nə́, ntaʼlə pɨ pətsə́ pə́ chî əwɨ́ páʼ Əsê a tsɔʼ nə́ ághɔ́b ńdaŋə̂ á mə́mə apɔŋə́ntə́əmə ajíə.

⁶Lə́, təmbɔʼ a tə́ ńtsɔ́ʼə pɨ ńté á pə́ ńgə́ a túgə apɔŋə́ntɨ́, tə ḿbə́ a kě pɛ́lə ńtsɔ́ʼə pɨ ńté lə́ məfaʼ mimə əshîʼnə pö faʼ nə́ pô; ńdaŋ ə́lɨ́d apɔŋə́ntə́əmə yə́ á kě pɛ́d ḿbə́ lə́ ndə̌ŋdəŋ apɔŋə́ntɨ́ pô.

⁷Lə́ laŋə̂ akə̂? Pɔ́ pə́ Islɛl pó nə ńkě zə́ənə ajú pó nə ńnáŋ nə́ lə́ pô. Lə́ nə ḿbə́ pɔ́ pə́ ntaʼlə pɨ pə́ Əsê a nə ńtsɔ́ʼ nə́ pó nə ńdzɨ́ nə́ zə́ələ́; lə́ Əsê a ghɛd apuʼə pəənə a kě chîə á mə́ zóʼ nə́ ngye əjǐ pô.

⁸Ndzaŋ páʼ aŋwaʼlə Əsê á sóŋ nə́ ńgə́, “Əsê a nə ńgɛd pó kě chî təmbɔʼ pó jî kɨ ńkwaŋə̂ anu yitsə̌ pô; ńkě kə́ ńchî təmbɔʼ pó zɨ́ nə́ əmə́g mɔ́b kɨ ńdzóʼ nə́ mətôglə mɔ́b pô, tə ńkoʼ ə́sɛ̂nə̌”[25]

⁹[26]Lə́, Debilə a nə sóŋ ńgə́, “Tíʼə aliʼ pó jî nə́ məjî ə́wɨ́ á tíʼ ə́sɛdnə̂ ḿbə́ atəənə́ páʼ pə́ yǐ nə́ ə́ wamtə̂ ághɔ́b ə́wə́; tíʼ pó wǔəə á mə́mə atəənə́, ńjî ńgə́ pə́ néŋ ngə́ʼə á atû pó!

¹⁰Tíʼ əmə́g mɔ́b mə́ fəg ńjî ńgə́ kɔ pó zɨ́ əliʼə́; tíʼ məngə́ʼ mɔ́b mə́ ghɛd mənkadtə mɔ́b mə́ pə́ʼkə nə́ əghâ ntsəmə.”

¹¹Maŋ tíʼ ḿbítə ńgə́: Á nə ḿbə́ əghâ ándó Pəjusə pó nə ńkɔntə̂ nə́ ńgwǔ tə ńkablə̂ lə́, pó nə ə́shaʼkə̂? Lə́ kě ə́lɨ́d pô! Ńté ńgə́ pó nə ńgɛlə̂ təpɔŋə, ńdaŋ ə́lɨ́d nchîntɨ yǐəə á mbô Pətəjǐsê, ńtíʼ ńgɛd ńgə́ Pəjus pó ŋwéetə ághóobə́.

¹²Əghâ nə́ təmbɔʼ təpɔŋ Pəjusə á pə́ lə́ afoʼə á mbô mbî ntsəm? mə wǔ nə́ mɔ́b mə́ kə́ ḿbə́ lə́ afoʼə á mbô Pətəjǐsê? Afoʼ yə weŋə́ a yǐ ńkě kə́ ḿbyádnə ńchî əghâ ándó Pəjus pətsəm pó kwú nə́ á mə́m nchîntɨ páʼ ə́ mɛdnə̂ nə́ ngǎ mɔʼə́ lə́ ə́lɛ́!

¹³Əghâ nə́ lɛ̌ maŋ tséebə lə́ á mbô pɨ Pətəjǐsê; ndzaŋə ándó pə́ tú nə́ mə ńgə́ maŋ pə́ ənáŋkə nkɨ Yeso Klisto lə́, maŋ yǐ faʼə̂ afaʼə mə nə́ kətəələ.

¹⁴Ńjî ńgə́ əghâ tsə̌ maŋ ghɛd ngaŋə́láʼə mə, Pəjus pó chîə á mə́m ŋwéetə́, ńtíʼ ńdaŋ nə́ ŋwéetə́ yi wɨ́ pó pətsə́ chwáalə.

¹⁵Mbɔʼ á nə ḿbə́ əghâ ándó pə́ nə ńkǐ nə́ ághɔ́b, pɨ pə́ mbî pə́ tíʼ ḿbə́ pəshu pə́ Əsê, á yǒ ḿbɨ ńtíʼ ńchî lə́ ə́lɛ́ əghâ ándó Əsê a pɨ nə́ ḿbímə ághóobə́? Á yǒ kě tíʼ chî lə́ ándó pó júmnə nəwûə?

¹⁶Təmbɔʼ pə́ fɛ̂ ntsɛɛmbiə apagə apéenə məkálə́ á mbô Əsê, tə ḿbə́ apá yə wɨ́ atsəm á ŋwaʼə̂, təmbɔʼ pə́ kə́ fɛ̂ məŋaŋ mə́ atǐ nə́ Əsê, tə ḿbə́ məfag mə́ atǐə yə wɨ́ mə́ kə́ ŋwaʼə̂.

¹⁷Təmbɔʼ pə́ fag məntá mimə tsə̌ nə́ atǐə Olif, yi páʼ á chî nə́ á mə́mə alíʼ ḿbɨ ńtíʼ ńdɔg məntá mə́ atǐə Olif páʼ á chî nə́ á mə́mə akɔb ńgyǐ ḿbádkə ə́wɨ́ ńkwúd; lə́ á pə́ ńgə́ pɨ Pətəjǐsê nə́ chî lə́ ándó atǐə Olif yi akɔb zə̂, əghâ nə́ pɨ tíʼə ńjîə məjî pópə afoʼ páʼ á fɛ́d nə́ nə́ atǐə Olif zə́ á mə́mə alíʼə.

¹⁸Lə́ á pə́ ńgə́ kɔ nə́ wág pɨ páʼ pə́ nə fag nə́ ághóobə́ ándó məntá mə́ atǐ lə́; Nə́ yǐ tɨd lə́ ə́lɛ́? Pɨ lə́ tsɔʼə mənteemə́, nə́ kě məŋaŋ mə́ atǐ nə́ anu yətsə́ tɔ́mtə pô, lə́ pə́ ńtɔ́mtə məŋaŋ mə́ atǐ ńtɔ́mtə áwə́ənə́.

¹⁹Lə́ nə yǐ sóŋ ńgə́, “Pə́ nə fag məfag mə́ atǐ lə́ ńgə́ mbɔʼ pə́ kwúlə mə á aliʼ yə́.”

²⁰Lə́ ndə̌ŋdəŋə́, pə́ nə fagtə̂ ághɔ́b lə́ ńté ńgə́ pó po nə ńkě mbimə́ túg pô, lə́ nə́ tíʼ ńtə́əmə á mə́m ndə̌ŋdəŋ ńté ńgə́ nə́ túg mbimə́. Lə́ á pə́ ńgə́ kɔ pɨ tə́ ńtəələ̂, pɨ tə́ ńyinə̂ á pə́ nə́ apɔ́gə.

²¹Lə́ á pə́ ńgə́ təmbɔʼ Əsê a nə ńchî pəjus páʼ pó pə́ nə́ məfag mə́ atǐ mə́ alíʼə aliʼ pó mɛdtə̂ pô, nə́ kwaŋ ńgə́ a yǐ mɛdtə̂ pə́ áwə́ənə́ aliʼ pɨ?

²²Əghâ nə́ pɛn zɨ́ ndzaŋ páʼ Əsê a túg nə́ apɔŋə́ntɨ́, ńkə́ ḿbə́ ndzaŋ páʼ a tsə́g nə́. Əsê á tsə́gə á mbô pɨ páʼ pó wǔ nə́, lə́ ḿbə́ ńtúgə apɔŋə́ntɨ́ ńté áwə́ənə́, təmbɔʼ nə́ kə́ ńgɛn tsɔʼə nə́ mbiə á mə́ pə́ nə́ ntê pɨ páʼ Əsê a túg nə́ apɔŋə́ntɨ́ ńté ághóobə́. Lə́ təmbɔʼ nə́ chî ntê pɨ yi ə́wɨ́ pô, tə ḿbə́ pə́ yǐ kə́ fagtə̂ áwɨ́ myaʼə̂.

²³Lə́ təmbɔʼ Pəjus pó pɨ ńtúg mbimə́ nə́ Yeso, tə ḿbə́ pə́ yǐ pɨ ńnéŋə ághóobə́ aliʼ páʼ pó nə ḿbeg nə́ ńchî ə́wə́, ńté ńgə́ Əsê a túg mətəənə á mə́ pɨ nə́ néŋə ághóobə́ aliʼ páʼ pó nə ḿbeg nə́ ńchî ə́wə́.

²⁴Pɨ Pətəjǐsê nə́ chî lə́ ándó məfag mə́ atǐ mə́ olif mə́ akoobə́, páʼ pə́ nə́ fagtə̂ nə́, ḿbádkə áwɨ́ pɨ̌pə atǐə Olif yə alíʼə, ńkě zoŋə̂ pə́ ndzaŋ Əsê a nə ńtsoŋkə̂ mbî əjǐ pô. Pəjus pó chî lə́ ándó atǐə olif yə alíʼə, lə́ á yǐ pyádnə pwɔ́dnə á mbô Əsê á mə́ pɨ nə́ pádkə məfag mə́ atǐ mɨ nə́ atǐə azɔ́b ə́ kwúd ngǎ yitsə̌.

²⁵Pəlimə́ mə, ndə̌ŋdəŋə́ anuə nəlyaŋnə́ yitsə̌ á chî ə́wɨ́ maŋ lɔ nə́ ńgə́ nə́ jîə. Á yǐ ghɛd nə́ mɛdtə̂ á mə́ tə́ nə́ kwaŋə̂ ńgə́ nə́ jínuə. Ndə̌ŋdəŋə́ anu yə ə́wɨ́ lə́ ńgə́, atyǎntətûə pɨ pə́ Islɛl á yǒ kě mɛdnə̂ pô, á yǒ lwigtə̂ əghâ ándó Pətəjǐsê pətsəm pə́ yǐ nə́ á mbô Əsê.

²⁶Lɛ̌ ndzaŋ pó yǒ nə́ chwádkə pɔ́ pə́ Islɛlə pətsəm, tsɔʼə ndzaŋ páʼ aŋwaʼlə Əsê á sóŋ nə́ ńgə́[27], “Nchwádkə a yǒ fɛ́d lə́ a zayɔn, a yǐ ə́fóg pɨ pó túg nə́ məntɨ́ mə́ təpɔŋ á mə́m pɔ́ pə́ Jekɔbə.

²⁷Zəənə́ á yǐ ə́ pə́ lə́ əkeenə á mə́m pə̌gpo əghâ ándó maŋ yǐ nə́ ləgnə̂ pətəpɔŋ póobə́.”[28]

²⁸Pəjus pó nə ńkǐə ághɔ́b Nkɨ yi Əshîʼnə, ńtíʼ ḿbə́ ngaŋkə́pa Əsê ńté atûə azɨ́ Pətəjǐsê. Lə́ ńté ńgə́ Əsê a kə tsɔ́ʼə ághɔ́b pó pə́ ngaŋmə́ko əjí ńdaŋə̂ á ndzəm ndaʼnə páʼ a nə́ ńdaʼnə̂ nə́ pətǎ pətǎ pɔ́b ə́wə́.

²⁹Ńté ńgə́ təmbɔʼ Əsê a kě ntɨ́ əyí kwúblə əghâ páʼ a tsɔ́ʼ nə́ ŋwu tsə̌ ńkə́ əfɛ̂ afoʼ nə́ yí pô.

³⁰Ńgɛn nə́ pɨ Pətəjǐsê pɨ nə́ ńtyantə́tûə á mbô Əsê á ntsɛɛmbi, lə́ nə́ pə́ əghâ nə́, nə́ pɛn ńkwáalə akóolə́mə́lə́ŋə Əsê ńté ńgə́ Pəjus pó tyantə́tûə.

³¹Tsɔʼə nə́ ndú wɨ́d wə́, ńté akóolə́mə́lə́ŋə Əsê páʼ pɨ kwá nə́ lə́, Pəjus pó tə́ ńtyantə́tûə á mbô Əsê, ńjî ńgə́ pó kə́ ńkwáalə akóolə́mə́lə́ŋ Əsê.

³²Ńté ńgə́ Əsê a ghɛd ŋwu ntsəmə a tíʼ ńchîə ándó ngaŋətsáŋə á mə́m atyǎntətûə, ńjî ńgə́ mbɔʼ a nəələ̂ akóolə́mə́lə́ŋə ajíə á mbô pó pətsəmə.

³³Wə́ ndzaŋə ándó páʼ afoʼə Əsê á nɨ́ nə́! Wə́ ndzaŋə ándó páʼ ayáŋə ají pó ajíənuə ají shǐ nə́! Təmbɔʼ əwə á tyáatə anuə ajíə? Təmbɔʼ əwə jî məndú míə?

³⁴Tsɔʼə ndzaŋə ándó páʼ aŋwaʼlə Əsê á sóŋ nə́ ńgə́, “Əwə a jî nə́ akwaŋə anuə Mmaʼmbîə? Əwə a chî təmbɔʼ a fɛ̂ ntəgə́ nə́ yə́?[29]

³⁵Əwə a pɛ́dtə ə́fɛ̂ ajûtsə́ nə́ yə́, ńjî ńgə́ a pɨ ńtûə zə́ələ́ á mbô yə́?”[30]

³⁶Ńté ńgə́ ajúmə atsəm lə́ nə ńtsoŋkə̂ yə́, ńkə́ ńchîə á mbî lə́ á mbô yə́ ńkə́ ńdaŋ lə́ nə́ yə́. Nəgháʼə á chî tsɔ́ʼə á mbô Əsê tə mɛdnə̂! Amɛn.[31]