Read Awing Lomanə 12 Bible Online

Lomanə 12 - Awing bible

Lomanə 12

¹Pəlimə́ mə, ńté tə́kɔʼə akóolə́mə́lə́ŋ Əsê á ndu pɛn, maŋ póʼmbô á mbô pɨ ńgə́; nə́ fɛ̂ məmbɨ mə́ənə́ ándó ajúmə afyaʼə́sê páʼ á chî nə́ mbîə á mbô Əsê. Ajúmə afyaʼə́sê yə ŋwaʼ nə́ páʼ Əsê á kɔŋ nə́. Lɛ̌ ndə̌ŋdəŋ ndú páʼ təmbɔʼ pɨ tə́ ngóʼkə Əsê wə́.

²Kɔ nə́ tə́ ńgɛlə̂ mənu páʼ pɨ pə́ mbî pö ghɛd nə́, nə́ mɛdtə̂ Əsê a kwúblə məntɨ́ mɨ́ tsɔʼə mətsəm tə əkwaŋ mənu əpɨ́ ə́ tíʼ ḿbə́ pi fîə. Ńjî ńgə́ nə́ tíʼ ńjîə anu páʼ Əsê a lɔ nə́, mənu mimə əshîʼnə páʼ Əsê a kɔŋ nə́ ńkə́ ḿbə́ nə́ mənu páʼ mə́ koʼnə̂ nə́ ńgɛn ə́fyagə̂.

³Ńté ńgə́ Əsê a túgə apɔŋə́ntə́əmə á ndu maŋ, maŋ sóŋə á mbô pɨ pətsəm ńgə́, kɔ nə́ ŋáŋkə mbɨ əzɨ ńtsɛ ndzaŋ nə́ pěʼ nə́ ńchîə á mə́ chî nə́. Lə́ ŋwu ntsəmə a tə́ ńkwaŋə̂ anu ńté mbɨ əjǐ, ńkwaŋə̂ pə́ ndzaŋ páʼ a tsóokə mbɨ əjǐə, ndzaŋ páʼ Əsê ä kwá nə́ yə́ a túg mbimə́ á mbô yə́.

⁴Pɛn túg əlam pi nɨ́ nə́ á mə́m táʼ mbəəmə, lə́, əlam mbɨ pɨ ə́ kě lə́ táʼə afaʼ túg pô.

⁵Lə́ tsɔ́ʼə ə́lɨ́d nə́ pɛnə̂, pɛn pǎtə nɨ́ lə́, ḿbə́ ḿbə́ lə́ tsɔʼə táʼə á mə́m Klisto, lə́ pə́ ńgə́ pɛn kyeetə̂ məmbɨ mɛ́n ńtíʼ ḿbə́ táʼə ándó əlam mbɨ ə́ kə́ nə́ ńkyeetə̂ ḿbə́ táʼ mbəəmə.

⁶Ŋwu ntsəmə á mə́m pɛnə̂ a lɔgə̂ ajíə ajú páʼ Əsê a fɛ̂ nə́ nə́ apɔŋə́ntə́əmə ají ńtíʼə faʼə̂ ə́wə́. Təmbɔʼ məfɛ̂nə mɛ́n mə́ pə́ lə́ á mə́ tə́ nə́ náŋkə nkɨ Əsê, pɛn shib faʼ ə́lɨ́d ńdzoŋ mbimə́ páʼ pɛn túg nə́.

⁷Təmbɔʼ á pə́ pə́ mə faʼ nə́ á mbô pɨ, pɛn faʼə̂. Təmbɔʼ á pə́ mə tə́ nə́ zéʼkə pɨ, pɛn zéʼkə.

⁸Təmbɔʼ á kə́ ḿbə́ ńgə́ pɛn tə́ ńkwáalə pɨ néŋə məntɨ́ mɔ́b, pɛn faʼ lə́ələ́; ŋwu tsəm páʼ a ghab nə́ ajúmə atsəm páʼ a túg nə́ á mbô pətsə́, a shib fɛ̂ tə ghɔnkə̂ apô; ŋwu ntsəm páʼ a chî nə́ nətû pɨ, a shib faʼ nə́ ntɨ́ əyí ətsəmə; ŋwu páʼ ä ghɛd nə́ mənu mimə əshîʼnə a mbɨ pətsə́ pɨ, a shib ńgɛlə̂ á mə́mə akɔŋtə.

⁹Təmbɔʼ pɛn tə́ ńkɔŋə̂ pətsə́ pɨ pɛn kɔŋə̂ ághɔ́b ndə̌ŋdəŋə́. Nə́ peenə̂ ajúmə atsəm páʼ á kě nə́ pɔŋ pô. Tɨ́ nə́ ńtyantə̂ nə́ ajúmə atsəm páʼ á pɔŋ nə́.

¹⁰Kɔŋ nə́ a ŋwu ntsəmə á mə́m pəənə́ ándó pəlimə́ á mə́m klisto, ŋwu ntsəmə á mə́m pəənə́ a chígə́ ńdzóʼnə mɔ́mɛ́ əyǐə.

¹¹Pɨ faʼ nə́ mətəənə kɔ nə́ tə́ ńdɔ́ŋnə. Faʼ nə́ á mbô Mmaʼmbî nə́ məntɨ́ mɨ́ mətsəmə.

¹²Tə́ ńkɔŋtə̂ nə́ anuə atsəm gho tə́ nə́ ńkwaŋə̂ ḿbyáabə, ńgwam ntɨ́ nə́ ndɛd ngə́ʼə ńkə̈ ńchaʼtə́sê əghâ atsəmə.

¹³Ghab nə́ apeʼə azə́ənə́ á mbô pɨ pə́ Əsê pi ŋwaʼ nə́ pó kě nə́ túg pô, ńkə́ ḿbí pəghəənə á mə́m məláʼ mə́ənə́.

¹⁴Néŋ nə́ mbwɔ́dnə á atû pɨ pó tsaŋkə̂ nə́ áwə́ənə́. Kɔ nə́ néŋə á pə́ ndoonə atû pó, fɛ̂ nə́ pə́ mbwɔ́dnə á mbô pó.[32]

¹⁵Tə́ nə́ ńkɔŋtə̂ pɨ̌pə pɨ páʼ pó tə́ nə́ ńkɔŋtə̂, ńkə̈ ńkyéŋə pɨ̌pə pɨ páʼ pó kyéŋ nə́.

¹⁶Chî nə́ nə́ mbwɔ́dnə pɨ pə́ ŋwu ntsəmə. Kɔ nə́ tə́ ńtəələ̂, kə́ nə́ ḿbímə á mə́ faʼ nə́ á mbô ŋwu ntsəm nə́ atsóokə́mbəəmə. Kɔ nə́ lɔg mbɨ əzəənə́ ándó pɨ pó jî nə́ ənuə.

¹⁷Təmbɔʼ ŋwunə a ghɛlə̂ á təpɔŋə á mbô gho, kɔ gho tûə yí nə́ təpɔŋə. Lɔ nə́ ndú ətsəmə á mə́ ghɛd nə́ anu páʼ ŋwu ntsəmə a jî nə́ ńgə́ á pɔŋə̂.

¹⁸Lɔ ndú ətsəm nə́ əzo ngǎ, á mə́ zɨ́ nə́ ńgə́ gho chî nə́ mbwɔ́dnə pɨ̌pə ŋwu ntsəmə.

¹⁹Pəlimə́ mə, kɔ nə́ láʼ ḿbəələ̂ təpɔŋ nə́ təpɔŋə, lə́ mɛdtə̂ azáŋə́ndé Əsê á faʼə̂ zə́ələ́. Ńté ńgə́ aŋwaʼlə Əsê á sóŋ ńgə́, “Mmaʼmbîə a sóŋ ńgə́ lə́ chî maŋə á mə́ pɨd nə́ təpɔŋ páʼ ŋwunə a ghɛd nə́ á mbô gho.”[33]

²⁰Lə́ aŋwaʼlə Əsê á pə́ mbɨ ə́sóŋə á mbô pɨ lə́ ńgə́, Təmbɔʼ nji tə́ ńdzáŋə ngaŋkəpa əgho, fɛ̂ məjîə á mbô yə́, nji nkǐ ə́ tə́ ńdzáŋə yí fɛ̂ nkǐə á mbô yə́ a nô. Ndzaŋə ándó gho faʼ nə́ ə́lɨ́d lə́, ghö kwɛlə̂ lə́ wummogə́ á atû yə́[34].

²¹Kɔ gho pí təpɔŋə á tsɛɛlə̂ gho, á tíʼə ə́lɨ́d əshîʼnə əghô tsɛɛlə̂ təpɔŋə.