Read Awing Lomanə 13 Bible Online

Lomanə 13 - Awing bible

Lomanə 13

¹Ŋwu ntsəmə a shib ńdzóʼnə pəsáʼ pə́ aláʼ póobə́, ńté ńgə́ ŋwu tsə̌ a kě chîə á nətû nə́ aláʼ tə ghə́ Əsê a néŋ nə́ yí ə́wɨ́ pô. Lə́ néŋ Əsê néŋə a ŋwu ntsəmə á nətû nə́ aláʼə.

²Ŋwu ntsəm páʼ a kǐ nə́ mətû páʼ mə́ chî nə́ ə́wɨ́ a kǐ lə́ anu páʼ Əsê a noŋkə̂ nə́. Ŋwu ntsəm páʼ a ghɛd nə́ ə́lɨ́d a néŋ lə́ atsáŋə a mbɨ yə́.

³Pɨ pö ghɛd nə́ əshîʼnə pó kě chîə á mə́ pɔ́g nə́ mətû pô, lə́ pɨ pö ghɛd nə́ təpɔŋ pó chî nə́ á mə́ pɔ́g nə́ mətûə. Gho kɔŋə̂ á mə́ chî nə́ tə pɔ́g pɨ̌pə pɨ páʼ pó chî nə́ á nətû? Lə́ pə́ ńgə́ gho yǐ faʼə̂ anu páʼ á koʼnə̂ ńjî ńgə́ pó ŋáŋkə gho.

⁴Ńté ńgə́ pó lə́ ngaŋə́faʼ Əsê, ə́faʼə̂ lə́ á mbô gho. Lə́ təmbɔʼ gho ghɛlə̂ təpɔŋ, gho chîə á mə́ pɔ́g nə́ ághóobə́, ńté ńgə́ pó túg chigə mətəənə á mə́ néŋ nə́ atsáŋə mbɨ gho. Pó lə́ ngaŋə́faʼ Əsê ńkə́ fɛ̂ atsáŋə Əsê á mbô pɨ pó ghɛd nə́ təpɔŋə.

⁵Ńdaŋ ə́lɛ́ nə́ shib ńdzóʼnə mətû mə́ənə́, ńkě ńté lə́ tsɔʼə azáŋə́ndé Əsê pô ńkə́ ḿbɨ ńté ńgə́ lə́ ndzaŋə ándó akwaŋə ntə́əmə azô á sóŋ nə́ ńgə́ gho faʼə̂.[35]

⁶Lə́ kə́ ḿbə́ anu páʼ á ghɛd nə́ pɨ̈ tû nchubə aláʼ lə́, ńté ńgə́ mətû mə́ faʼə̂ lə́ á mbô Əsê əghâ ándó pó faʼ nə́ afaʼə azóobə́.

⁷Tû nə́ ághɔ́b nə́ ajúmə atsəm nə́ wam nə́ ághɔ́b əwə. Tû nə́ nchubə aláʼ nkɔʼə́tû əwə́ənə́ pópə yə apeʼə azə́ənə́ á mbô pó, kɔ nə́ wágə ághóobə́, zóʼnə nə́ pɨ páʼ pə́ chî nə́ mə́ zóʼnə nə́ ághóobə́.

⁸Kɔ nə́ túg nəkyɛ́ pɨ̌pə ŋwu tsə̌, ndaʼ nəkyɛ́ pɨ chî nə́ mə́ wam nə́ lə́ mə́ kɔŋ nə́ məmbɨ mɨ́ ńté ńgə́ ŋwu ntsəm páʼ a faʼ nə́ zəənə́, a lwɛ́nkə lə́ noŋkə.

⁹Məntəgə́ páʼ mə̈ sóŋ nə́ ńgə́, “Kɔ gho jîə mə̂ghabə, kɔ gho jwítə, kɔ gho zəələ̂, kɔ gho loonə̂ á mə́ túg nə́ ajú páʼ á kě nə́ pə́ azô pô.” Məntəgə́ mɨ mətsəm ńdzoŋ ḿbéenə mimə tsə̌ ə́wɨ́ mə́ tsɛntə̂ ḿbə́ lə́ táʼ ntəgə́ páʼ á sóŋ nə́ ńgə́, “Kɔŋə̂ ngaŋnəpad əgho ándó gho kɔŋ nə́ mbɨ əzo.”

¹⁰Təmbɔʼ gho kɔŋə̂ ŋwu, gho láʼ ńkě anuə təpɔŋ yətsə́ a mbɨ yí ghɛd pô; mə́ kɔŋ nə́ lə́ mə́ zóʼnə nə́ məntəgə́ mə́ Əsê mətsəmə.

¹¹Pɨ yǐ shib faʼ ndɛn mənu ghɛnə̂, ńté ńgə́ Pɨ jî ndɛd páʼ ə́ pə́ nə́ zɨ́d əghâ nə́, ńté ńgə́ ndɛd ə́ koʼə̂ á mbô gho á mə́ jimnə̂ nə́ á mə́m pəlê əgho. Ńté ńgə́ ndɛd páʼ pɛn yǐ nə́ chwád ə́ páatə əghâ nə́ ńdaŋ ndzaŋ pɛn nə́ ḿběʼ nə́ ńchwáakə néŋ ntɨ́ nə́ Əsê lə́.

¹²Nətúʼə á tíʼə ḿměe áwə́ələ́, ngǎ pɛ̌ əliʼ ə́ ŋwaʼə̂, kɔ pɛn pɨ ńgɛn nə́ mbi á mə́ tə́ nə́ faʼə̂ mənu mə́ nətúʼə; pɛn twá əpú ntso páʼ pə́ póʼnə nə́ nə́ pə́ələ́ á mə́m əliʼ pi ŋwaʼ nə́.

¹³Pɛn tə́ faʼə̂ mənuə ándó pɨ pó chî nə́ á mə́m nkyaʼə, ḿmɛdtə̂ á mə́ tə́ nə́ jîə tə́shúnə́, ńkɔ kə́ tə́ ńnô məloʼ ḿbɛ́ɛlə, ńkɔ tə́ ńdzɔ́ʼ ndzɔʼə́ tə apímnə kɨ ńgɛlə̂ mənu mə́ əsə́ənə, ńkə́ ḿmɛdtə̂ afyaʼə́ pópə ŋwéetə́.

¹⁴Ghɛd Mmaʼmbî Yeso Klisto a chîə ándó atsəʼə́ á mbô gho, gho mɛdtə̂ á mə́ zóʼ nə́ á mbô na mbɨ əzo ńtíʼə ə́faʼə̂ anu páʼ zɨ́d lɔ nə[36].