Read Awing Lomanə 14 Bible Online

Lomanə 14 - Awing bible

Lomanə 14

¹Pí nə́ pɨ nə́ jî nə́ ńgə́ mbimə́ əzɔb ə́ kě tyantə̂ pô, kɔ nə́ tə́ ńdzɔŋnə̂ pɨ po ńté akwaŋə anuə azóobə́.

²Ńté ńgə́ pɨ pətsə́ pó kwaŋ ńgə́ mbɔʼ pó jîə ajúmə atsəmə, pətsə́ páʼ mbimə́ əzɔb kě nə́ tyantə̂ pô pó kwaŋ ńgə́ mbɔʼ pó kɔ́d tsɔʼə ndzɛ̌.

³Kɔ pɨ pö jî nə́ ajúmə atsəm pó wág pɨ pó kě nə́ jîə pô. Kɔ pɨ pó kɔ́d nə́ tsɔʼə ndzɛ̌ pó tsɔ́ʼtə əsáʼ pɨ pö jî nə́ ajúmə atsəmə, ńté ńgə́ Əsê a pímə ághóobə́.

⁴Gho lə́ əwə á mə́ sóŋ nə́ ńgə́ ngaŋə́faʼ ŋwu ndaʼ pó tə́ faʼ əshîʼnə kɨ ńkě tə́ faʼə̂? Lə́ Tǎ afaʼ əghɔb páʼ a yǐ nə́ sóŋ ńgə́ pó tə́ faʼ əshîʼnə kɨ ńkě əshîʼnə tə́ faʼə̂ pô, pó yǒ faʼ əshîʼnə ńté ńgə́ Mmaʼmbîə a chî təmbɔʼ a ghɛd pó faʼ əshîʼnə.

⁵Pɨ pətsə́ pó kwaŋ ńgə́ əlěmbî pətsə́ ə́ səglə̂ ńtsɛ pətsə́, lə́ pɨ pətsə́ pó kwaŋə̂ azɔ́b ńgə́ əlěmbî ətsəm lə́ ndə̌ŋdəŋə́. Anuə atsəm ŋwu ntsəmə a jî nə́ ńgə́ á koʼnə̂ á mbô yə́ á waamə̂ zə́ələ́ a ntɨ́ yə́ á tyantə̂.

⁶Ŋwu ntsəm páʼ a zɨ́ nə́ ńgə́ alěmbî yətsə́ á səglə̂ ńtsɛ pətsə́ əlěmbî a ghɛlə̂ ə́lɨ́d ńdzóʼnə lə́ Mmaʼmbîə. Pɨ páʼ pó kə́ nə̈ ńjîə ajúmə atsəm pó ghɛlə̂ ə́lɨ́d ńdzóʼnə lə́ Mmaʼmbî ńté ńgə́ pó fɛ̂ ndǎ á mbô Əsê nə́ məjî mə əwə. Pəənə ándó pó kǐ nə́ á mə́ jî nə́ məjî mətsə́ pó ghɛlə̂ ə́lɨ́d ńdzóʼnə lə́ Mmaʼmbî ńkə̈ ə́fɛ̂ ndǎ á mbô Əsê.

⁷Ŋwu tsə̌ a kě mbî chïə ńté tsɔʼə mbɨ əjǐ pô, ŋwu tsə̌ kě kə́ ńkwûə ńté tsɔʼə mbɨ əjǐ pô.

⁸Təmbɔʼ pɛn chîə á mbî pɛn chî ńté lə́ Mmaʼmbîə, ńkə́ ńkwû pɛn kwû ńté lə́ Mmaʼmbîə. Á pə́ ńgə́ kɨ pɛn chîə á mbî kɨ ńkwû, pɛn chî lə́ á mbô Mmaʼmbîə.

⁹Ńté ńgə́ Klisto a nə ńkwû ḿbɨ ńjúmnə, ńdaŋ ə́lɨ́d á pə́ Mmaʼmbî pɨ pə́ chî nə́ á mbî ńkə́ ḿbə́ yi pɨ pó kwû nə́.

¹⁰Gho, lə́ ghɛlə̂ akə̂ gho tsɔ́ʼtə əsáʼ mɔ́mɛ́ əgho? Kɨ gho, lə́ kə́ ńgɛlə̂ akə̂ gho wágə mɔ́mɛ́ əgho? pɛn pətsəm yǒ tə́əmə á mbi Əsê a tíʼ ńtsɔ́ʼtə əsáʼ əwɛ́nə.

¹¹Ńté ńgə́ aŋwaʼlə Əsê á sóŋ ńgə́, “Mmaʼmbîə mə a sóŋ ńgə́ ndzaŋ páʼ maŋ chî nə́ á mbî lə́, ŋwu ntsəmə a yǒ kwə́ʼtə á mbi maŋə, ŋwu ntsəmə a kə́ ŋ́ŋáŋkə mə ə́sóŋ nə́ ntso əyí ńgə́ maŋ lə́ Əsê.”[37]

¹²Lə́ ŋwu ntsəmə á mə́m pɛnə̂ a yǐ tíʼ fiʼtə̂ ndzaŋə a nə faʼ nə́ á mbô Əsê.

¹³Lə́ pə́ ńgə́ kɔ pɛn ghɛn nə́ mbiə á mə́ tə́ nə́ tsɔ́ʼtə əsáʼ mɔ́mɛ́ əwɛ́nə. Anu páʼ a pɔŋ nə́ lə́ ńgə́ kɔ gho ghɛlə̂ anu yətsə́ páʼ á yǐ ghɛd nə́ mɔ́mɛ́ əgho a wǔəə á mə́m təpɔŋə.

¹⁴Ndzaŋ páʼ maŋ kyeetə̂ nə́ ḿbə́ táʼ pəg Mmaʼmbî Yeso lə́, a ghɛd maŋ jî ńgə́ məjî mətsə́ mə́ kě ə́wɨ́ chî páʼ mə́ kě nə́ ŋwaʼ ńdzoŋə̂ á ndzəm noŋkə pô. Lə́ təmbɔʼ ŋwu tsə̌ a néŋə á mə́m ntɨ́ əyí ńgə́ məjî mətsə́ mə́ chî ə́wɨ́ páʼ mə́ kě nə́ ŋwaʼ pô, lə́ á pə́ ńgə́ məjî mimə́ wɨ́ mə́ kě á mbô ngaŋ ŋwaʼ pô.

¹⁵Təmbɔʼ gho jwaʼ ntɨ́ mɔ́mɛ́ əgho, lə́ á pə́ ńgə́ gho kě pɛ́lə faʼə̂ lə́ á mə́mə akɔŋnə pô. Kɔ gho pí məjî páʼ ghö jî nə́ mə́ tə́mə́sɛ́ nə́ ŋwu páʼ Klisto a nə ńkwû nə́ ńté yə́.

¹⁶Kɔ gho pí ajú gho zɨ́ nə́ ázə́ələ́ ándó ajú yə əshîʼnə á túg əlɛ́n təpɔŋə.

¹⁷Ńté ńgə́ anuə Nəfoonə Əsê á kě lə́ anuə mə́ tə́ nə́ jîə kə́ nô pô, lə́ á mə́ tɨ́ nə́ ndə̌ŋdəŋə́, ə́ túg mbwɔ́dnə pó akɔŋtə á mə́mə Ajwǐəsê.

¹⁸Təmbɔʼ pɨ pə́ ghóʼkə Klisto nə́ ndú ghɛn pó faʼ lə́ anu páʼ Əsê a lɔ nə́, pɨ pə́ mbî pə́ kə́ ńkɔŋə̂ ághóobə́.

¹⁹Lə́ á pə́ ńgə́ pɛn zoŋ mənu mə́ yǐ nə́ nə́ mbwɔ́dnə ńkə́ ńgɛlə̂ ŋwu ntsəmə a kwéŋə á mə́mə anǔəsê.

²⁰Kɔ pɛn zoŋ ndzəm məjî ə́ tsəŋə̂ anu páʼ Əsê a faʼ nə́. Təmbɔʼ pə́ jî məjî mətsəmə, lə́ á pə́ kě pɔŋə̂ á mə́ jî nə́ məjî mbɔʼ mə́ ghɛd mɔ́mɛ́ əgho a wǔəə á mə́m təpɔŋ pô.

²¹Anu á koʼnə̂ á mə́ ghɛd nə́ lə́ á mə́ mɛdtə̂ nə́ á mə́ kɔ́d nə́ na, á mə́ nô nə́ məloʼ mə́ tyantə̂ nə́, kəənə á mə́ faʼ nə́ anu yətsə́ təmbɔʼ a ghɛd ndim əgho yi mbyâŋnə kɨ yi məngyě á wǔəə á mə́m təpɔŋə.

²²Anu atsəm páʼ gho néŋ nə́ á ntɨ́ gho ńgə́ zə́ələ́ á koʼnə̂, lɔʼkə̂ zə́ələ́ á chîə tətɨ pɨ Əsê. A pɔŋə̂ á mbô pəənə ándó məntɨ́ mɔ́b mə́ kě nə́ ághɔ́b tə́ ńjwaʼə̂ əghâ ándó pó faʼ nə́ anu pó jî nə́ ńgə́ á koʼnə̂ pô.

²³Lə́ təmbɔʼ atûə azóobə́ a ńtə́ koʼlə̂ ńté ajú páʼ pö jî nə́, Əsê a yǐ ńgɛd pó wǔ əsáʼə á əghâ pó jî nə́ zə́ələ́, Ńté ńgə́ anu pó faʼ nə́ pó kě zə́ələ́ á mə́m mbimə́ faʼ pô; Anuə atsəm páʼ pə́ kě nə́ á pə́ mə́m mbimə́ faʼ pô lə́ təpɔŋə.