Read Awing Lomanə 15 Bible Online

Lomanə 15 - Awing bible

Lomanə 15

¹Pɛnə̂ ándó mbimə́ əzɛn tyantə̂ nə́ chîə á mə́ kwá nə́ pɨ páʼ mbimə́ əzɔb pwɔ́dnə nə́ á mə́m məngə́ʼ móobə́. Pɛn kě chîə á mə́ ghɛd nə́ á pə́ mənu mə́ yǐ nə́ pɔŋə̂ áwɛ̂n pô.

²Ŋwu əwɛn ntsəmə a chîə á mə́ ghɛd nə́ mbɨ mɔ́mɛ́ əyǐ ə́ pɔŋ ńjî ńgə́ mɔ́mɛ́ əyǐə a kwéŋə á mə́m mbimə́.

³Ńté ńgə́ Klisto a nə ńkë ghɛlə̂ anu lə́ ńgə́ əjǐ mbɨ ə́ pɔŋ pô, lə́ ndzaŋə á chî nə́ á mə́mə aŋwaʼlə Əsê ńgə́, “Məndzɔmnə ándó páʼ pɨ pə́ zɔ nə́ gho əwɨ́ mə́ záŋə lə́ mə.”

⁴Anuə atsəmə ándó pə́ nə ŋ́ŋwaʼlə̂ nə́ á mə́mə aŋwaʼlə Əsê, pə́ nə ŋ́ŋwaʼlə̂ lə́ á mə́ zéʼkə nə́ áwɛ̂n ə́wə́, ńjî ńgə́ mbɔʼ pɛn túgə akwaŋ ńtə́ ḿbyáabə ńdaŋə̂ á mə́mə awaamə́ntɨ́ pópə mə́ néŋ nə́ ntɨ́ páʼ aŋwaʼlə Əsê á fɛ̂ nə́ á mbô pɛnə̂.

⁵Pəg chaʼtə́sê ńgə́, Əsê páʼ a fɛ̂ nə́ awaamə́ntɨ́ pópə mə néŋ nə́ ntɨ́, a yǐ ghɛd nə́ túgə apímnə á ndzɔʼ pɨ ńdaŋə̂ á ndzəm ntag məko Yeso Klisto.

⁶Ńjî ńgə́ təmbɔʼ pɨ pətsəm nə́ táʼ ngye pɨ ŋáŋkə Əsê a pə́ nə́ Tǎ pə Mmaʼmbî əwɛn Yeso Klisto.

⁷Pímə ndim əgho tsɔʼə ndzaŋ Yeso a nə ḿbí nə́ gho ńjî ńgə́ á fɛ̂ nəgháʼ á mbô Əsê.

⁸Maŋ fiʼtə̂ áwɨ́ ńgə́ afaʼ páʼ Klisto a nə̈ faʼ nə́ á mə́m nchîmbî əjǐ, a nə̈ faʼə̂ lə́ á mbô Pəjus, á mə́ nɨd nə́ ńgə́ Əsê a nə ńdzoŋ ndaʼnə əjǐə á mə́ ghɛd nə́ ndaʼnə a nə fɛ̂ nə́ á mbô pətǎ pɔ́b ə́ fɛ́d ḿbə́ ndə̌ŋdəŋə́,

⁹á mə́ pɨ nə́ ghɛd mbɔʼ Pətəjǐsê pó ŋáŋkə Əsê ńté akóolə́mə́lə́ŋə ajíə, tsɔʼə ndzaŋ pə́ ŋwaʼlə̂ á mə́m aŋwaʼlə Əsê ńgə́, “Ńdaŋ ə́lɨ́d maŋ yǐ ŋáŋkə gho á ndzɔʼ Pətəjǐsê; ə́ kə́ əzɔb nkǐ ŋáŋkə əlɛ́n əghô ə́wə́.”[38]

¹⁰Ngǎ yitsə̌ á kə́ ḿbɨ ə́sóŋ ńgə́, “Pətəjǐsê, kɔŋtə̂ nə́ pɨ pə́ pɨ pə́ Əsê.”[39]

¹¹Aŋwaʼlə Əsê a kə́ ḿbɨ ə́sóŋ ńgə́, “Pətəjǐsê ŋáŋkə Mmaʼmbîə, ńkə́ ńgɛd ŋwu ntsəmə a ŋáŋkə yə́.” [40]

¹²Izaya a nə ńkə́ ḿbɨ ə́sóŋ ńgə́, “Ŋwu tsə̌ a yǒ fɛ́d nə́ əla Jese ə́ yǐəə, a yǒ yǐəə á mə́ sáʼ nə́ Pətəjǐsê, pó yǒ túgə akwaŋ té yí tíʼə pyáabə.” [41]

¹³Maŋ chaʼtə́sê ńgə́ Əsê páʼ a ghɛd nə́ pɛn túgə akwaŋ ńté yí ńtíʼə ḿbyáabə a yǐ lwɛ́nkə ntɨ́ ə́wɨ́ nə́ akɔŋtə pó mbwɔ́dnə ə́ laŋə̂ á mə́m mbimə́ əzo nə́ yə́. Ńjî ńgə́ akwaŋ páʼ ghö pyáb nə́ lə́ a ghɛn nə́ mbiə á mə́ kwéŋ nə́ ńdaŋə̂ á ndzəm mətɨ mə́ Ajwǐəsê.

¹⁴Pəlimə́ mə, maŋ nə́ nkɔ̌ʼmbəəmə mə, maŋ chígə́ ńjî ńgə́ məntɨ́ mɨ́ mə́ lwɛ́nkə nə́ əshîʼnə. Ńkə́ ḿbɨ ńjî ńgə́ atûə azə́ənə́ á lwɛ́nkə nə́ ntê ajîə atsəmə, pɨ tíʼ ńkoʼnə̂ mbɔʼ nə́ zéʼkə məmbɨ mə́ənə́.

¹⁵Lə́ ńgɛnə̂ á mə́m aŋwaʼlə zɨ maŋ lánə ńtúg ntə́əmə á mə́ ŋwaʼlə̂ nə́ mənu mətsə́ á mbô pɨ lɔg ə́ kwumtə̂ áwɨ́ ə́wə́. Maŋ túg ntə́əmə á mə́ ŋwaʼlə̂ nə́ mənu lə̂ ńté apɔŋə́ntə́əmə Əsê páʼ a túg nə́ ńté mə,

¹⁶ńté ńgə́ maŋ lə́ ngaŋəfaʼ Yeso Klisto páʼ ä faʼ nə́ á mbô Pətəjǐsê. Mäŋ faʼə̂ lə́ ándó mbêsê ńnáŋkə nkɨ yi Əshîʼnə páʼ ə́ lǒo nə́ á mbô Əsê, ńjî ńgə́ mbɔʼ Pətəjǐsê pó chîə ándó akáŋə́sê páʼ á koʼnə̂ nə́ á mbô Əsê, páʼ Ajwǐəsê á ghɛd nə́ á ŋwaʼə̂ á mbô Əsê.

¹⁷Ndzaŋ maŋ chî nə́ á mə́m Yeso Klisto mbɔʼ maŋ tíʼ ńtúgə kətɨd nə́ afaʼ maŋ faʼ nə́ á mbô Əsê.

¹⁸Maŋ yǐ túg ntə́əmə á mə́ tsáb nə́ tsɔʼə anu Əsê a ghɛd nə́ ńdaŋə̂ á mə́m maŋə. Á mə́ ghɛd nə́ Pətəjǐsê pó zóʼnə Əsê ńdaŋ nə́ anu mäŋ sóŋ nə́ ńkə́ faʼə̂,

¹⁹ḿbɨ ńdaŋ nə́ mətɨ mə́ əkyeʼmə́nu pópə mənu mə́ yɛ́d nə́ yɛ́d nə́, nə́ mətɨ mə́ Ajwǐəsê ńjî ńgə́ əliʼ ətsəm ńchwáakə nə́ Jɛlusalɛm ńgɛn tə ńkoʼə̂ Ililikum, maŋ pɛ́dtə ńnáŋkə nkɨ yi əshîʼnə ətsəm ə́wɨ́ tə məgə̂.

²⁰Azéemə anu maŋ lɔ nə́ á mə́ faʼ nə́ lə́ á mə́ ghab nə́ nkɨ yi əshîʼnə wə́ aliʼə́ ándó pə́ kě nə́ əlɛ́n Klisto ə́wɨ́ kə́ zóʼə pô, ńjî ńgə́ kɔ maŋ pɔ́ ndɛ̂ á ndumə achîəndɛ̂ ŋwu ndaʼə.

²¹Tsɔʼə ndzaŋ páʼ aŋwaʼlə Əsê ä sóŋ nə́ ńgə́, “Pəənə ándó pó nə ńkě nə́ anu kə́ zóʼə ńté yí pô, pó yǐ zə́ənə́, pəənə ándó pó kě nə́ kə́ zóʼə pô, pó yǐ zóʼ atûə azóobə́ a lá ə́wə́.”

²²Lɛ̌ anu á kə́ kɨ́ʼ nə́ mə ngǎ yi nɨ́ nə́ maŋ kě əsa túg á mə́ ghá nə́ á wɨ́ pô.

²³Lə́ nə́ əghâ nə́ maŋ məgtə̂ nə́ afaʼə á mboʼ ghɛn lə́, ḿbɨ ḿbə́ nə́ ndzaŋ maŋ kə tə́ nə́ ńdoonə̂ á mə́ yǐ nə́ zə́ənə wə́ənə́ mə́m məngoʼ mimə nɨ́ nə́ lə́,

²⁴maŋ loonə̂ lə́ mə́ faʼ nə́ ə́lɨ́d əghâ nə́. Maŋ yǐ kɔŋə̂ á mə́ ghá nə́ á wɨ́ nə́ ndɛlə́ ándó maŋ tə́ nə́ ńdaŋə̂ ńgɛnə̂ á Spen, ńjî ńgə́ pɛn chî nə́ akɔŋtə nə́ mɔ́ akəmə ndɛd nə́ tíʼ ńkwáalə mə, maŋ ghɛn ə́wə́.

²⁵Nə́ pə́ əghâ nə́ maŋ ghɛnə̂ lə́ Jɛlusalɛm nə́ əpúmə á mbô ńkyeetə̂ pɔ́ pə́ Əsê ə́wə́.[42]

²⁶Ńté ńgə́ mənkyeetə mə́ chî nə́ Masedonya pó Akaya pó fɛ̂ əpú nə́ apɔŋə́ntə́əmə á mbô pəfə́m pó chî nə́ á ndzɔʼ pɨ pə́ Əsê á Jɛlusalɛmə.

²⁷Lə́ kɔŋ pó a ngǎ pó á mə́ faʼ nə́ ə́lə́ələ́, lə́ nə ḿbə́ aliʼə́nuə azóobə́ á mə́ kwá nə́ pəfə́m pə̂. Təmbɔʼ Pəjus pó nə̈ ńgeebə̂ afoʼə ajwi ə́fɛ̂ á mbô Pətəjǐsê, lə́ á kə́ ḿbə́ ndzaŋ Pətəjǐsê pó yǐ nə̈ gheebə̂ apeʼə azɔ́b ə́fɛ̂ á mbô Pəjusə.

²⁸Əghâ ándó maŋ məgtə̂ nə́ afaʼ zɨ ḿbɨ́ fɛ̂ nkáb pə́ nə maʼ nə́ ńgə́ pə́ fɛ̂ á mbô pó lə́, maŋ tíʼ ńgɛnə̂ á Spenə, lə́ əghâ maŋ tə́ nə́ ńgɛnə̂ ə́wɨ́ lə́ maŋ yǐ laŋ ə́ ghéenə áwə́ənə́.

²⁹Maŋ jî ńgə́ əghâ maŋ yǐ nə́ yǐəə á mbô pɨ lə́, Klisto a yǐ fɛ̂ afoʼ nə́ pɨ əshîʼnə.

³⁰Pəlimə́ mə, maŋ póʼmbô nə́ pɨ ndzaŋ nə́ néŋ nə́ ntɨ́ nə́ Mmaʼmbî əwɛ̂n Yeso Klisto, ńkə́ ḿbə́ ndzaŋə Ajwiə ä ghɛd nə́ ńgə́ pɛn kɔŋ məmbɨ mɛ́n: mbɔʼ pɛn kyeetə̂ ńtə́ ńchaʼtə́sê á atû maŋə.

³¹Chaʼtə̂ nə́ Əsê ńgə́ təmbɔʼ a kwáalə mə á mbô pɨ pə́ kě nə́ Əsê pímə á mə́m aláʼə Judya, ńkə́ ńgɛd ńgə́ mbɔʼ pɔ́ pə́ Əsê pó chî nə́ á Jɛlusalɛm pó pímə afaʼə mə.

³²Ńdaŋ ə́lɨ́d mbɔʼ Əsê a pí maŋ tíʼ ńgyǐəə á mbô pɨ ńdwɛ́nkə nə́ akɔŋtə, ńtíʼ ńdzóʼ əshîʼnə ándó ngəənə á mə́m pəənə́.

³³Pɛn chaʼtə́sê ńgə́, Əsê páʼ ä fɛ̂ nə́ mbwɔ́dnə á mbô ŋwu ntsəm a chî pɨ po. Amɛnə.