Read Awing Lomanə 16 Bible Online

Lomanə 16 - Awing bible

Lomanə 16

¹Maŋ pímə afaʼə ndim əwɛ̂n Fobe páʼ a pə́ nə́ nətûə á mə́m nkyeetə pɔ́ pə́ Əsê aláʼə Sɛnklya,

²kwá nə́ yí ándó pɨ pó túg nə́ mbimə́ nə́ əlɛ́n Mmaʼmbîə, ndzaŋə ándó pɔ́ pə́ Əsê pó chî nə́ á mə́ chî nə́, ńkə́ fɛ̂ akwáalə á mbô yí nə́ ajúmə atsəmə a lɔ nə́, á mbô pəənə́; ńté ńgə́ yí nə́ nkɔ̌ʼmbɨ əyí a nə ńkə́ ńkwá pɨ pipə nɨ́ nə́ ńdzoŋ ḿbéenə mə.

³Chaʼtə̂ nə́ Plisila pó Akwila, pɨ páʼ pəg pö faʼ nə́ á mbô Yeso Klisto lə́,[43]

⁴páʼ pó nə fɛ̂ nə́ nchîmbî əzɔb ńté atûə mə. Maŋ lánə ńchígə́ ə́fɛ̂ ndǎ á mbô Əsê ńté ághóobə́, ńkě tsɔʼə maŋ pô, lə́ pəg pə́ mənkyeetə mətsəm páʼ mə́ chî nə́ á mə́m Pətəjǐsê.

⁵Ńkə́ ńtú ńchaʼtə̂ nkyeetə páʼ ə́ kwú nə́ á ndɛ̂ pó. Chaʼtə̂ nə́ chigə əshunə́ mə Əpanetusə, páʼ a nə ḿbə́ nə́ ntsɛɛmbi ŋwunə á mboʼ Esya á mə́ pí nə́ Klisto.

⁶Chaʼtə̂ nə́ Mɛɛlə páʼ a kə chígə́ nə́ ə́faʼə̂ á ndzɔʼ pəənə́.

⁷Chaʼtə̂ nə́ Andlonikusə pó Junyasə, pəlimə́ mə páʼ pə̌gpo nə ńchî nə́ á nkáʼə atsáŋə, pə́ nə ḿbyádnə ńjîə ághóobə́ á mə́m məntú mə́ Yeso mə̂, pó nə ḿbeg nə́ ńjîə Klisto záʼ maŋ pɔŋə̂ jîə yə́.

⁸Chaʼtə̂ nə́ Aplatusə, chigə əshunə́ mə á mə́m Mmaʼmbîə.

⁹Chaʼtə̂ nə́ Ulbanus táʼ ngaŋəfaʼ əwɛ̂n yitsə̌ á mə́m Klisto, pó əshunə́ mə Stakus.

¹⁰Chaʼtə̂ nə́ Apelles, páʼ a nɨd nə́ ńgə́ yí lə́ chigə ndzoŋdzəm Klisto lə̂. Chaʼtə̂ nə́ ŋwu ntsəm páʼ a fɛ́d nə́ á mə́m ngwud Alistobulusə.

¹¹Chaʼtə̂ nə́ Ɛlɔdyon páʼ a fɛ́d nə́ á mə́m ngwud əzəgə́, ńkə́ ńchaʼtə̂ pɔ́pə́mɛ́ pɛnə̂ á mə́m ngwud Nasissusə.

¹²Chaʼtə̂ nə́ Təlifena, pó Təlifosa, páʼ pö faʼ nə́ á mbô Mmaʼmbî lə́; ńkə́ ńchaʼtə̂ əshunə́ mə Pelsis páʼ a chígə́ nə́ ə́faʼə̂ á mbô Mmaʼmbîə lə́.

¹³Chaʼtə̂ nə́ Lufus, a pə́ nə́ atyǎntə ngaŋəfaʼə á mbô Mmaʼmbîə, ńkə́ ńchaʼtə̂ mǎ əyǐ páʼ a lɔg nə́ mə ándó mɔ́ əyǐə.

¹⁴Chaʼtə̂ nə́ Asynklitus pó Flegon ḿbɨ ḿbə́ nə Elmes pó Patlobas, Elmas ḿbɨ ḿbə́ nə́ pɔ́pə́mɛ́ pɛn páʼ pó po chî nə́ pó po.

¹⁵Chaʼtə̂ nə́ Filologus pó Julya, ḿbéenə Neleus pó ndim əyǐ yi məngyě ḿbɨ ḿbə́ nə́ Olympas ḿbɨ ḿbə́ nə́ pɔ́ pə́ Əsê tsɔʼə pətsəm pó po chî nə́.

¹⁶Ŋwu ntsəmə a chaʼtə̂ mɔ́mɛ́ əyǐ ńchwigə̂ yə́ á nəghag yí nə́ akɔŋnə Klisto. Mənkyeetə mə́ pɔ́ pə́ Klisto tsɔʼə mətsəm mə́ túmə achaʼtə á mbô pəənə́.

¹⁷Pəlimə́ mə, maŋ póʼmbô á mbô pɨ ńgə́ nə́ lɔg ndɛd nə́ pɨ pó ghɛd nə́ nə́ chîə məntsoolə məntso, ńdaŋ ə́lɨ́d ḿmaʼ ngə́ʼə á mə́m pɨ pó túg nə́ mbimə́ nə́ Əsê. Pó kə kǐə ághɔ́b ndzéʼkə pə́ nə fɛ̂ nə́ á mbô pɨ lə̂, lə́ʼ nə́ ághóobə́.

¹⁸Ńté ńgə́ mbô pɨ zɨ pó kě lə́ á mbô Klisto a pə́ nə́ Mmaʼmbîə əwɛ̂n faʼə̂ pô, pó faʼə̂ ńté lə́ məpəm móobə́. Ńdaŋ nə́ ətsáb pipə əshîʼnə pɔ́b pópə ətsáb məfɨgə pɔ́b, pó fɨgə̂ məntɨ́ mə́ pɨ páʼ pó kě nə́ anu yətsɨ́ jî pô.

¹⁹Ńté ńgə́ ŋwu ntsəmə a jî ndzaŋ nə́ zóʼnə nə́ Nkɨ yi Əshîʼnə, ńdaŋ ə́lɨ́d maŋ tíʼə ńkɔŋtə̂ ńté áwə́ənə́. Maŋ loonə̂ ńgə́ nə́ túgə ajíənu ńté anu yi əshîʼnə, ḿbə́ ḿbə́ pəpóʼ pə́ ngaŋ á mə́mə anuə təpɔŋə.

²⁰Ńdaŋ ə́lɨ́d, Əsê páʼ ä fɛ̂ nə́ mbwɔ́dnə á mbô pɛn a yǐ ghɛd pɛn ghɔʼə̂ Satan nə́ məko mɛ́nə. Maŋ chaʼtə́sê ńgə́ Apɔŋə́ntə́əmə Mmaʼmbî əwɛn Yeso Klisto á chîə á ndu pəənə́.

²¹Timoti táʼ ŋwu pəg yí faʼ nə́ lə́, a ghə́ maŋ chaʼtə̂ áwə́ənə́; Lusis pó Jason nə́ Sosipata páʼ pó pə́ nə́ ngwud əzəg pó tə́ chaʼtə̂ áwə́ənə́.

²²Maŋ Tetiyus páʼ maŋ ŋwaʼlə̂ nə́ aŋwaʼlə zɨ lə́, mäŋ chaʼtə̂ áwɨ́ nə́ əlɛ́n Yeso Klisto.

²³Gayɔs ŋwu páʼ mäŋ chî nə́ á ndɛ̂ yí, páʼ nkyeetə kə́ nə́ ńkwúnə á ndɛ̂ yí lə́, á ghə́ maŋ chaʼtə̂ áwə́ənə́. Elastus, ŋwu páʼ a lɔʼkə̂ nə́ nkéebə á tə́kɔʼ tɔ̂ŋ ghɛn lə́ pó mɔ́mɛ́ əwɛ̂n Kwatus pó kə́ ńgə́ maŋ chaʼtə̂ áwə́ənə́. (Maŋ chaʼtə́sê ńgə́ Apɔŋə́ntə́əmə Mmaʼmbî əwɛ̂n Yeso Klisto á chîə á mbô pɨ pətsəmə. Amɛn)[44]

²⁵Pɛn tíʼ ə́fɛ̂ nəgháʼə á mbô Əsê! A koʼnə̂ təmbɔʼ a ghɛd gho tɨ́ ńtyantə̂ á mə́m mbimə́ əzo, ńdaŋə̂ á mə́m Nkɨ yi Əshîʼnə maŋ náŋkə nə́, nkɨ ńté Yeso Klisto, ńdaŋ ndzaŋ páʼ Əsê a nə nɨd nə́ ndə̌ŋdəŋ əyǐ yi ńdyáŋ nə́, á nə ńdyáŋ nə́ ə́fɛ́lə á ngoʼ pəchə́.

²⁶Lə́ nə́ pə́ əghâ nə́ ndə̌ŋdəŋ wɨ́d wə́ á fɛ́lə á əshîsaŋ ńdaŋ nə́ aŋwaʼlə məntúmə́sê; pə́ tíʼ ńgɛd ətú ətsəm ə́ jîə, ńdzoŋ ndzaŋ Əsê mɛdnə̂ ngǎ mɔʼə́ a kə sóŋ nə́ ńgə́ pə́ faʼə̂, ńjî ńgə́ təmbɔʼ ŋwu ntsəmə á néŋ ntɨ́ nə́ yí ńkə́ ńdzóʼnə yə́.

²⁷Pɛn fɛ̂ nəgháʼ á mbô Əsê páʼ a pə́ nə́ ndaʼ yí páʼ a túg nə́ ajíə atsəmə. Pɛn tə́ fɛ̂ nəgháʼ tə měe á mbô yí ńdaŋə̂ á ndzəm Yeso Klisto. Amɛn.