Read Awing Lomanə 2 Bible Online

Lomanə 2 - Awing bible

Lomanə 2

¹Təmbɔʼ gho pə́ pə́ əwə, gho kě chî nə́ anu yitsə̌ á mə́ sóŋ nə́ lɔg nɨd ńgə́ gho koʼnə̂ á mə́ tsɔ́ʼtə əsáʼ pɨ pipə ndaʼ pô. Ńté ńgə́ təmbɔʼ gho tə́ ńtsɔ́ʼtə əsáʼ ŋwu ndaʼ, ḿbə́ ńgɛlə̂ tsɔʼə ntê anu páʼ ngaŋə ä ghɛd nə́ zɨ́d, ghö wǔ lə́ əsáʼ á ngǎ gho.

²Pɛn jî ńgə́ ńtsɔ́ʼtə əsáʼ Əsê ə́ koʼnə̂ á mbô pɨ páʼ pó ghɛd nə́ ntê mənu mɨ́d məənə́.

³Lə́ pə́ ńgə́, nə́ gho əshunə́ mə, gho tsɔ́ʼtə əsáʼ əghóobə́, lə́ ńkə́ ḿbɛ́lə ńgɛd ntê mənu páʼ pó ghɛd nə́, gho kwaŋ ńgə́ mbɔʼ gho lə́ʼ ńtsɔ́ʼtə əsáʼ Əsê?

⁴Kɨ əghâ yitsə̌ gho wág nə́ lə́ ntəənə anu yi əshîʼnə páʼ Əsê a ghɛd nə́ nə́ gho, kɨ mənu páʼ gho ghɛd nə́ Əsê a wágnə ḿbɨ ḿbə́ nə́ awaamə́ntɨ́ páʼ a túg nə́ ńté gho, lə́ ndə̌ŋdəŋ ńgə́ gho jî ńgə́ Əsê a túg ntɨ́ yi əshîʼnə. Ńté ńgə́ a tə́ ńdɔ ndú ətsəm ńgə́ gho kwúblə ntɨ́ əgho ə́fɛ́lə á mə́m təpɔŋ əgho.

⁵Lə́ gho túgə atyǎntə atûə ńkě kɔŋə̂ mə́ kwúblə nə́ ntɨ́ əgho ə́fɛ́lə á mə́m təpɔŋ əgho pô. Ńdaŋ ə́lɨ́d gho tíʼə̈ ńgɛlə̂ ńgə́ atsáŋə azô á yǒ ńnə́ənə Alě páʼ azáŋə́ndé Əsê pó ńtsɔ́ʼtə əsáʼ əjǐ yi tɨ nə́ ndə̌ŋdəŋ ə́ yǒ nə́ nɨd mbɨ əjǐə.

⁶Ńté ńgə́ Əsê a yǒ tsɔ́ʼə afaʼə ŋwu ntsəm ə́zoŋ lə́ ndzaŋə a nə̈ faʼ nə.

⁷Pɨ pətsə́ pə́ ghɛn nə́ mbiə á mə́ tə́ nə́ faʼ əshîʼnə ńnáŋə nəgháʼə, ńnáŋ ngóʼkə ḿbəənə̂ ńnáŋ nchîmbî páʼ pó yǐ nə́ kě kwû pô. Əsê a yǐ fɛ̂ nchîntɨ páʼ ə́ mɛdnə̂ nə́ ngǎ mɔʼə́ á mbô pô.

⁸Pətsə́ pɨ pó náŋə lə́ tsɔʼə mbɨ əzoobə́ ńkǐə ághóobə́ ndə̌ŋdəŋə́, ńdzoŋə̂ ághóobə́ á pə́ mənu mə́ tə koʼə̂. Əsê a yǒ záŋ ndě ə́ tíʼ néŋ ngə́ʼə a mbɨ pó.

⁹Ngə́ʼ pó mbɨ yi ńdzáŋnə nə́ yǒ chîə á mbɨ pɨ pö ghɛd nə́ mənu mə́ təpɔŋə, ə́ chwáakə nə́ Pəjus ḿbɨ́ ḿbá Pətəjǐsê ə́wə́.

¹⁰Lə́ Əsê a yǒ fɛ̂ nəgháʼ pó ngóʼkə nə́ mbwɔ́dnə á mbô pɨ pö ghɛd nə́ əshîʼnə: ə́ chwáakə nə́ Pəjus ḿbɨ ḿbá Pətəjǐsê.

¹¹Ńté ńgə́ Əsê ä tsɔ́ʼtə əsáʼ ŋwu ntsəm lə́ tsɔʼə táʼ ntê.

¹²Pɨ pətsəm páʼ pó kə ghɛd nə́ təpɔŋ á əghâ noŋkə Mosisə a kə kě nə́ ə́wɨ́ chî, pó yǒ kwû ə́ péŋ, pə́ kə́ ə́sáʼ əsáʼ əghɔ́b tə noŋkə. Pəənə́ ándó pó ghɛd nə́ təpɔŋə á əghâ noŋkə Mosisə a kə chî nə́ ə́wɨ́, pə́ yǒ sáʼ əsáʼ əghɔ́b lə́ nə́ noŋkə.

¹³Ńté ńgə́ lə́ kě pɨ páʼ pó zóʼ nə noŋkə wə̂ páʼ mənu mɔ́b mə́ tɨ́ nə́ ndə̌ŋdəŋə́ á mbi Əsê pô, lə́ pəənə ándó pó faʼ nə́ anu páʼ noŋkə yi wə́ á sóŋ nə́, Əsê náŋkə nə́ ńgə́ mənu mɔ́b mə́ tɨ́ ndə̌ŋdəŋə́.

¹⁴Pətəjǐsê pó kě noŋkə túg pô, lə́ pó pǎtə ńkě noŋkə túg lə́, təmbɔʼ á pə́ əghâ pó faʼ nə́ anu noŋkə á sóŋ nə́, ńdzoŋ ndzaŋ mbɨ əzɔb ə́ sóŋ nə́ ńgə́ pó faʼ, zəənə́ nɨd lə́ ńgə́ pó túgə noŋkə.

¹⁵Ngɛdmə́nu əghɔ́b ə́ nɨd ńgə́ anuə atsəm noŋkə á sóŋ nə́ ńgə́ pó faʼ, pə ŋwaʼlə̂ zə́ələ́ á ntɨ́ pó. Əkwaŋ ntɨ́ pɔ́b ə́ kə́ nɨd ńgə́ anu yə wɨ́ lə́ ndə̌ŋdəŋ ńté ńgə́ əkwaŋ pɔ́b ə́ pə́ əghâ yitsə̌ ə́ sáʼə ághɔ́b ńgə́ kɨ pó lɛ̌ ńgɛlə̂ á koʼnə̂ kɨ ńkě koʼnə̂.

¹⁶Á pə́ ńgə́ anu páʼ Nkɨ yi əshîʼnə wə́ mäŋ fɛ̂ nə́ ə́ sóŋ nə́, lɛ̌ ndzaŋ a yǒ nə́ chîə Alě páʼ Əsê a yǒ nə́ tsɔ́ʼtə mənu mə́ nəlyaŋnə́ mə́ ŋwu ntsəm ə́ laŋ nə́ əlɛ́n Mɔ́ əyǐ Yeso Klisto.

¹⁷Lə́ nə́ gho, mbɔʼ gho tə́ ə́fóŋ mbɨ əzo nə́ ŋwu Jus ńkə́ ńnéŋ ntɨ́ əgho nə́ noŋkə ńtíʼə ńkɔn ndzɔʼ əzo ńté ńgə́ gho jî Əsê,

¹⁸ńkə́ ńjîə anu páʼ Əsê ä lɔ nə́ ńgə́ gho faʼ, ńkə́ ḿbɨ ńdzéʼə á mə́m noŋkə á mə́ jɨ́ nə́ anu páʼ a koʼnə̂ nə́,

¹⁹ḿbyádnə ńjî ńgə́ gho lə́ ngwaamə apô pəfəg, ńkə́ ḿbɨ ḿbə́ nkyaʼ pɨ pó chî nə́ á mə́m ndzəmə,

²⁰ḿbə́ ntə́gtə əkəkóg, ḿbɨ ḿbə́ ndzéʼkə pɔ̂nkə̂ ńté ńgə́ gho pyádnə ńjî ńgə́ gho túgə ajíənuə atsəm pó ndə̌ŋdəŋ páʼ á chî nə́ á mə́m noŋkə,

²¹ndzéʼkə pɨ pə́ ndaʼə, lə́ pə́ ńgɛlə̂ akə̂ mbɔʼ gho kě əzo mbɨ zéʼkə pô? Ghö sóŋə ńgə́, “Kɔ pə́ zəələ̂” ghö zəələ̂ azô?

²²Ghö sóŋə ńgə́, “Kɔ pə́ jîə mə̂ghabə,” ghö jîə azô mə̂ghabə? gho pa məsê mə́ məfɨgə, lə́ ḿbə́ ńdzəələ̂ á mə́m pəŋweŋ?

²³Gho kɔn ndzɔʼ əzo ńgə́ gho túgə á noŋkə Əsê, lə́ ghö néŋ əsə́ənə atû Əsê ńté ńgə́ ghö wǔəə á noŋkə əyǐ?

²⁴Aŋwaʼlə Əsê ä sóŋə ńgə́, “Pɨ Pəjus nə́ ghɛd Pətəjǐsê pə́ tíʼə ńdzɔ Əsê.”[1]

²⁵Mbɔʼ gho zoŋə̂ anu páʼ noŋkə ä sóŋ nə́, mə póʼ nə́ mɔ́ mə́ yǐ ńkwúnə anuə; lə́ mbɔʼ gho pə́ ńchîə anu páʼ noŋkə a sóŋ nə́ zoŋ pô, á chîə ándó pə́ nə ḿběʼ ńkě gho póʼ pô.

²⁶Mbɔʼ pɨ pə́ kě nə́ ághɔ́b póʼ pô pó zoŋ mənu páʼ noŋkə ä sóŋ nə́ tə ḿbə́ pə́ yǐ kě ághɔ́b lɔg tsɔʼə ándó pə́ póʼə ághɔ́b?

²⁷Ŋwu páʼ pə́ kě nə́ na mbɨ əji póʼ pô a pə́ ńdzoŋə̂ noŋkə lə́, a yǐ sóŋ ńgə́ gho wǔ əsáʼə, gho pǎtə ńtúgə noŋkə pə́ pɨ ḿbóʼə gho lə́, gho pə̈ fankə̂ noŋkə.

²⁸Pə́ kě ŋwu Jüs jîə lə́ ndzaŋ páʼ a nɨd nə́ á əshî pô. Chigə mə póʼ nə́ ŋwu mə́ kě kə́ ḿbə́ lə́ anu páʼ a nɨd nə́ a apeŋ pə́ kə́ ńdzə́ənə á əshî pô.

²⁹Chigə Jus a pɨ ḿbə́ lə́ ŋwu páʼ a pə́ nə́ wə́ələ́ á mə́mə. Lə́ələ́ á pə́ ńgə́ lə́ ŋwu páʼ pə́ póʼ nə́ ntɨ́ əyǐ ńdaŋ nə́ Ajwǐəsê, ńkě laŋə̂ á pə́ nə́ noŋkə pə́ ŋwaʼlə̂ nə́ pô. Mbô ŋwu zɨ́d zɨ ə́ chî lə́ Əsê ä ŋáŋkə nə́ yə́, lə́ kě ŋwu mbî ŋáŋkə pô.