Read Awing Lomanə 3 Bible Online

Lomanə 3 - Awing bible

Lomanə 3

¹Pəjus pó tsɛ Pətəjǐsê lə́ nə́ akə̂? Kɨ pə́ póʼə ŋwu lə́ a kwáalə yí lə́ nə́ akə̂?

²Akwá yə nɨ́ nə́ á chî nə́ məlá mətsəmə! Ntsɛɛmbiə anu lə́ ńgə́ Əsê a nə fɛ̂ atséebə ajíə á mbô Pəjusə.

³Lə́ mbɔʼ pó pətsə́ ə́ nə ńchîə noŋkə pí kə́ zoŋə̂ wɨ́d pô, akə̂ yǐ ńgɛlə̂, zəənə́ á nəələ̂ lə́ ńgə́ Əsê a kě anu a kə laʼnə̂ nə́ ńgə́ a yǐ faʼ lə́ faʼə̂?

⁴Á yǐ kě pə́ ə́lɨ́d pô! Əsê a shib ḿbə́ lə́ ndə̌ŋdəŋ ŋwunə, pɨ pə́ mbî pətsəm pə́ pǎ nə́ tə ḿbə́ pə́ ngǎŋntsɨd lə̂. Ndzaŋ páʼ aŋwaʼlə Əsê á sóŋ nə́ ńgə́, “Pɨ pə́ shib sóŋ ńgə́ anuə atsəm páʼ ghö sóŋ nə́ lə́ á tɨ́ ndə̌ŋdəŋə́; gho kə́ ə́shib ńdaŋ əsáʼ əghô əghâ pə́ tə́ nə́ ńtsɔ́ʼtə əsáʼ əghô.”[2]

⁵Lə́ mbɔʼ təpɔŋ əwɛnə̂ á kwáatə á mə́ nɨd nə́ ńgə́ Əsê a tɨ́ ndə̌ŋdəŋ pɛn tíʼ ḿbɨ ə́sóŋ ńgə́ akə̂? Mbɔʼ pɛn sóŋ ńgə́ Əsê a wǔ lə́ anuə á mə́ néŋ nə́ atsáŋə a mbɨ pɛn? (Mäŋ tséebə lə́ ándó ŋwu mbîə.)

⁶Lə́ kě ə́lɨ́d pô! Mbɔʼ Əsê a chî ndə̌ŋdəŋ ŋwu pô, a pə́ ńkoʼnə̂ á mə́ sáʼ nə́ mbî lə́ ə́lɛ́?

⁷Ŋwu tsə̌ a chî ə́sóŋ ńgə́, “Mbɔʼ ntsəələ mə ə́ ghɛd ndə̌ŋdəŋ Əsê á fɛ́d ŋ́ŋwáʼ, ḿbɨ ńkə́ ḿbegə̂ nəgháʼ əyǐ, lə́ pə́ ńgɛlə̂ akə̂ pə́ pɛ́d ńgɛd maŋ wǔ əsáʼə ándó ngɛdtəpɔŋə?”

⁸Mbɔʼ pɛn kě sóŋə ándó pɨ pətsə́ pə́ zɔ nə́ áwɛ́n ə́sóŋə ńgə́ pɛn sóŋ ńgə́, “Pɛn ghɛlə̂ təpɔŋ ńjî ńgə́ əshîʼnə ə́ yǐəə?” Əsê yǒ ghɛd pó wǔ əsáʼ ndzaŋ á koʼnə̂ nə́ təpɔŋ əghoobə́.

⁹Mbɔʼ á tíʼ ḿbə́ ə́lɛ́ tə ḿbə́ pɛn Pəjus pɛn pɔŋ ńtsɛ Pətəjǐsê? Ngá lə́ kě ə́lɨ́d pô! maŋ pɛ́d tə ńnɨd ńgə́ Pəjus pó Pətəjǐsê pó pətsəm ə́ chîə á mə́m təpɔŋə[3].

¹⁰Ndzaŋ páʼ aŋwaʼlə Əsê a sóŋ nə́ ńgə́, “Ŋwu tsə̌ a kě ə́wɨ́ chî páʼ a tɨ́ nə́ ndə̌ŋdəŋ pô, kɛ́ táʼ ŋwunə;

¹¹ŋwu tsə̌ a kě ə́wɨ́ chî páʼ atûə ajíə á lá nə́ pô, ŋwu tsə̌ a kě ə́wɨ́ kə́ ńchî páʼ ä chwa nə́ Əsê pô.

¹²Ŋwu ntsəmə (a tə́m nkadtə əyí nə Əsê, a sɛdnə̂ á ndzəm Əsê) pó pətsəm wǔəə anuə; ŋwu tsə̌ a kě ə́wɨ́ kə́ ńchî páʼ ä faʼ nə́ anu á pɔŋ nə́ pô, kɛ́ táʼ ŋwunə.

¹³Məntso mɔ́b mə́ chî lə́ ándó azagə́ páʼ á fɛ́d nə́ á mə́m nəse páʼ nə́ tɨ́ nə́ ngəələ́; Əlɨ́ əpɔ́b ə́ lwɛ́nkə nə́ məntsəələ; ətsáb ntso əpɔ́b ə́ chîə ándó ndíʼ nóolə;

¹⁴Məntso mɔ́b mə́ lwɛ́nkə nə́ məndzɔmnə pópə ətsáb pipə záŋ nə́.[4]

¹⁵Pö ghə́glə á mə́ twáb nə́ məndě mə́ pɨ ńkə́ ńgə́glə mə́ jwítə nə́ pəənə;

¹⁶aliʼə́ atsəm pó laŋ nə́ ə́wɨ́ pó shaʼtə̂ əliʼ ńgɛd pɨ pə́ jɨ́ ngə́ʼə.

¹⁷Pó kě jî ndzaŋ mbɔʼ pó ghɛd pópə pɨ chî nə́ mbwɔ́dnə pô.

¹⁸Ńkě kə́ ńdzéʼə á mə́ pɔ́g nə́ Əsê pô.”

¹⁹Əghâ nə́, pɛn jî ńgə́ anuə atsəm páʼ pə́ ŋwaʼlə̂ nə́ á mə́m noŋkə á yǐ waamə̂ ŋwu ntsəm páʼ a chî nə́ á mə́m noŋkə yí wɨ́ ńjî ńgə́ kɔ ŋwu mbî yitsə̌ a túgə anuə á mə́ sóŋ nə́ ə́ kwáalə atûə ají ə́wə́, ńdaŋ ə́lɨ́d mbî ntsəm ə́ chîə á mə́ yǒ nə́ tə́əmə á mbi Əsê ə́fiʼtə̂ mənu mətsəm páʼ pó nə ńgɛd nə́.

²⁰Lə́ələ́ pə́ ńgə́ ŋwu tsə̌ a yǒ kě á mbi Əsê tɨ́ koʼnə̂ á pə́ ńgə́ a faʼ mənu páʼ noŋkə á nɨd nə́ pô. Anu páʼ noŋkə ä ghɛd nə́ lə́ ńgə́ ä nəələ̂ pɨ ńgə́ pó ghɛlə̂ təpɔŋə.[5]

²¹Əghâ nə́, Əsê a nəələ̂ áwɛ́n nə́ alaŋə́ əsêndúmə ajíə á mə́ ghɛd nə́ pɨ pə́ tɨ́ ndə̌ŋdəŋə́ á mbi yə́, ńkě pə́ á ndzəm noŋkə laŋ pô; páʼ noŋkə Mosisə pópə məntúmə́sê kə pǎ nə́ tə ə́sóŋə anu ńté ndú ghɛn lə́.

²²Əsê ä ghɛlə̂ pɨ pə́ tɨ́ ndə̌ŋdəŋ ńdaŋə̂ á mə́m mbimə́ əzoobə́ á mə́m Yeso Klisto. Əsê ä ghɛlə̂ ə́lɨ́d lə́ á mbô ŋwu ntsəm páʼ a néŋ nə́ ntɨ́ əyí nə́ Yeso Klisto, a mbi Əsê, ŋwu tsə̌ a kě yitsə̌ tsɛ pô,[6]

²³ńté ńgə́ ŋwu ntsəmə a ghɛlə̂ təpɔŋ ńkě pɨ ńkwéʼnə ńtúgə nəgháʼ Əsê pô.

²⁴Pə̈ chwádkə pɨ ńdaŋə̂ nə́ apɔŋə́ntə́əmə Əsê páʼ a fɛ̂ nə́ kətaŋ ńdzoŋə̂ ndzəm Yeso Klisto páʼə̈ tsóʼ nə́ atûə azóobə́.

²⁵Əsê a nə ə́fɛ̂ yí lə́ ńjî ńgə́ nəwû əyǐə[7] á yǐ ḿbə́ əsêndú mbɔʼ pə́ laŋ ə́wɨ́ ńdəgnə̂ pətəpɔŋ pə́ pɨ páʼ təmbɔʼ pó túg mbimə́ nə́ yə́. Əsê a nə ńgɛd ə́lɨ́d lə́ á mə́ nɨd nə́ ńgə́ a tɨ́ ndə̌ŋdəŋə́. A nə ḿbə́ a ntsɛɛmbi lə́, Əsê a wam ntə́əmə, ńkə́ ńgwágnə pətəpɔŋ pə́ pəənə;

²⁶a pɛn ḿbə́ əghâ nə́ lə́ Əsê náŋə pətəpɔŋ pə́ pəənə, ńjî ńgə́ a nɨd ndzaŋ páʼ a tɨ́ nə́ ndə̌ŋdəŋə́. Nə́ ndú wɨ́d ghɛn Əsê a nɨd ńgə́ yí nə́ nkɔ̌ʼmbɨ əyíə a tɨ́ ndə̌ŋdəŋə́, ńkə́ ńgɛd ŋwu ntsəm a néŋ nə́ ntɨ́ əyí nə́ Yeso a tɨ́ ndə̌ŋdəŋə́.

²⁷Mbɔʼ a pə́ lɛ̌, pɛn tíʼə ńkɔn ndzɔʼ lə́ nə́ akə̂? Kɛ́! Á pə́ ə́lɨ́d lə́ ńté akə̂? Lə́ ghɛd ńgə́ pɛn zoŋə̂ noŋkə? Ngá! Lə́ ńté ńgə́ pɛn túg mbimə́.

²⁸Ńté ńgə́ pɛn pímnə ńgə́ ŋwunə ä tɨ́ ndə̌ŋdəŋə́ a mbi Əsê lə́ ńdaŋə̂ lə́ tsɔʼə á mə́m mbimə́ ńkě pə́ ńgə́ a faʼə̂ anu páʼ Noŋkə á sóŋ nə́ pô.

²⁹Kɨ ńgə́ Əsê lə́ tsɔʼə Əsê Pəjusə? A kě kə́ ḿbə́ lə́ Əsê Pətəjǐsê pô? Lə́ ndə̌ŋdəŋə́, a kə́ ḿbə́ lə́ Əsê Pətəjǐsê.

³⁰Əsê lə́ táʼə mɔʼə́, a yǐ ghɛd Pəjus pó tɨ́ ndə̌ŋdəŋə́ á mbi yí ńdaŋ lə́ nə́ mbimə́ əzoobə́, ə́ kə́ ghɛd Pətəjǐsê pó tɨ́ ndə̌ŋdəŋ ńdaŋ nə́ mbimə́ əzoobə́.

³¹Zəənə́ ä sóŋə lə́ ńgə́ mbɔʼ pɛn túg mbimə́ pɛn myaʼə̂ noŋkə? Ngá! lə́ kě ə́lɨ́d pô. Pɛn pəənə̂ ńgwaamə̂ noŋkə lə́ wam nə́.