Read Awing Lomanə 4 Bible Online

Lomanə 4 - Awing bible

Lomanə 4

¹Pɛn yǐ tíʼ sóŋ lə́ ńgə́ akə̂ ńté Ablaam páʼ a pə́ nə́ tǎpə ngwud əzɛnə̂? Lə́ kə laŋə̂ akə̂ a mbɨ yə́?

²Təmbɔʼ a nə ńtɨ́ ndə̌ŋdəŋə́ á mbi Əsê ńdaŋ lə́ nə́ mənu páʼ a nə faʼ nə́, tə ḿbə́ mbɔʼ a nə ńtúgə anu páʼ mbɔʼ a kɔn ndzɔʼ əji ńté, lə́ ḿbə́ ńkě lə́ á mbi Əsê pô.

³Aŋwaʼlə Əsê á sóŋ ńgə́, “Ablaamə a nə ḿbímə anu Əsê sóŋ nə́, Əsê a lɔgə̂ yə́ ándó ŋwunə a kə tɨ́ nə́ ndə̌ŋdəŋ ńté mbimə́ əjǐə.”

⁴Ŋwu ntsəm páʼ ä faʼ nə́ pə́ afaʼə ají, nkéebə afaʼ əjǐ ə́ kě chî lə́ ándó ajú pə́ fɛ̂ nə́ nə́ yí kətaŋ pô, lə́ ajú páʼ á pə́ nə́ ajíə.

⁵Lə́ ŋwu páʼ á kě nə́ ntɨ́ əyə́ á mə́mə afaʼ néŋ, ḿbə́ ńnéŋə á pə́ á mbô Əsê páʼ a ghɛd nə́ ńgə́ pɨ pó tɨ́ ndə̌ŋdəŋə́, lə́ mbimə́ əjǐ páʼ Əsê a lɔg nə́ nə́ anuə á mə́ ghɛd nə́ a tɨ́ ndə̌ŋdəŋ pó yə́.

⁶Lɛ̌ anu páʼ Debilə a nə sóŋ nə́ ńgə́ á pɔŋə̂ á mbô ŋwu páʼ Əsê a lɔg nə́ yí ándó ŋwunə a tɨ́ nə́ ndə̌ŋdəŋə́, ńkě té pə́ mənu mimə əshîʼnə páʼ ŋwu yi wə́ a faʼ nə́ pô. Debilə a tíʼ ə́sóŋ ńgə́:

⁷“Mbɔŋə́ yə pəənə ándó Əsê a ləgnə̂ nə́ pəfankə póobə́, Yí páʼ əsê a kə́bkə nə́ pətəpɔŋ póobə́!

⁸Mbɔŋə́ yə ŋwu páʼ Mmaʼmbîə a kě nə́ təpɔŋ əyǐ nə́ anu yətsə̌ yǐ lɔg pô!”

⁹Á pə́ ńgə́ a pɔŋ lə́ tsɔʼə á mbô pɨ páʼ pə́ póʼ nə́ ághɔ́b? Ngá! Á kə́ ḿbɔŋə̂ á mbô pɨ páʼ pə́ kě nə́ ághɔ́b póʼ pô. Pɛn nə ńdzóʼə á mə́m aŋwaʼlə Əsê ńgə́, “Ablaamə a nə néŋ ntɨ́ nə́ Əsê, ńdaŋ nə́ mbimə́ əjǐ Əsê a lɔgə̂ yə́ ándó ŋwu páʼ a tɨ́ nə́ ndə̌ŋdəŋə́.”

¹⁰Zəənə́ á kə lɔgə̂ aliʼ lə́ nə́ ndɛlə́ akə̂? Lə́ nə́ ḿbə́ ndɛd páʼ pə́ nə ḿbóʼ nə́ yí kɨ nə́ ndɛd pə́ nə ńkě nə́ yí kə̂ póʼə? Lə́ nə ḿbə́ ndɛd páʼ pə́ nə ńkě nə́ yí kə̂ póʼə pô, lə́ nə ńkě pə́ ndɛd páʼ pə́ nə ḿbɛ́d nə́ tə ḿbóʼə yí pô.

¹¹Mə póʼ nə́ yí mə́ nə ḿbə́ lə́ akyeʼə́nu á mə́ nɨd nə́ ńgə́ Ablaamə a nə ḿbɛ́dtə ńtúg mbimə́, ḿbɨ ńkə́ ńnɨd ńgə́ Əsê a nə ḿbɛ́dtə ńdɔgə̂ yə́ ándó ŋwu páʼ a tɨ́ nə́ ndə̌ŋdəŋə́, záʼ pə́ láʼ ḿbɔŋə̂ tə́ póʼə yə́. Á pə́ ńgə́ Ablaamə lə́ tǎ á mə́mə ajwiə á mbô ŋwu ntsəm páʼ a túg nə́ mbimə́, pə́ pə́ ńkě yí póʼ pô. Pó koʼnə̂ a mbi Əsê lə́ ńdaŋ lə́ nə́ mbimə́.

¹²A kə́ ḿbə́ lə́ tǎpə pɨ páʼ pə́ póʼ nə́ ághóobə́, ńkě té lə́ tsɔʼə ńgə́ pə́ póʼə ághɔ́b pô, ńkə́ ńté ńgə́ pó nə ńtúg mbimə́ tsɔʼə ándó tǎ əwɛ̌n Ablaamə a kə túg nə́ záʼ pə́ yǒ ḿbɔŋə́ póʼə yə́.

¹³Əsê a nə ńdaʼnə̂ Ablaam pópə ngwud əjǐ ńgə́ mbî yǐ chîə á mbô yə́, a nə ńgɛd ə́lɨ́d lə́ ńkě ńté lə́ ńgə́ Ablaamə a nə ńdzóʼnə noŋkə pô, a nə ńgɛd ə́lɨ́d lə́ ńté ńgə́ Ablaamə a nə néŋ ntɨ́ əyí nə́ Əsê, Əsê a tíʼ ńdɔgə̂ yə́ ándó ŋwunə a tɨ́ nə́ ndə̌ŋdəŋə́.

¹⁴Təmbɔʼ Əsê a chîə á mə́ fɛ̂ nə́ əpú páʼ a kə laʼnə̂ nə́ lə́ á mbô pəənə ándó pó zóʼnə nə́ noŋkə, á pə́ ńgə́ mbimə́ lə́ ənukə́taŋə, ndaʼnə Əsê ə́ kě atûə anu yətsə́ kə́ ńchî pô.

¹⁵Noŋkə á ghɛlə̂ ndě Əsê ə́ záŋə, lə́ aliʼə́ ándó páʼ noŋkə á kě nə́ ə́wɨ́ chî, ŋwu tsə̌ a kě noŋkə aliʼ yi wɨ́ wǔ pô.

¹⁶Əsê a nə ńgɛd ndaʼnə əjǐə á mbô Ablaam lə́ ńdaŋ lə́ nə́ mbimə́, ńjî ńgə́ ndaʼnə əjǐ ə́ chîə ándó ajúmə kətaŋ Əsê a fɛ̂ nə́ á mbô ngwud Ablaamə ntsəmə, ńkě lə́ tsɔʼə á mbô pɨ pó zóʼnə nə́ noŋkə pô, lə́ ńkə́ ḿbə́ á mbô pɨ páʼ pó néŋ nə́ ntɨ́ əghɔ́b nə́ Əsê tsɔʼə ándó Ablaamə. Ńté ńgə́ Ablaam lə́ tǎ əwɛ̌n pətsəmə á mə́mə ajwiə,

¹⁷ndzaŋ páʼ aŋwaʼlə Əsê a sóŋ nə́ ńgə́, “Maŋ ghɛd gho pə́ tǎpə ətúumbî pipə nɨ́ nə́.” Á pə́ ńgə́ ndaʼnə yi əwə ə́ pɔŋə̂ á mbi Əsê ándó Ablaamə a nə néŋ nə́ ntɨ́ nə́ yí lə́, Əsê páʼ ä júmkə nə́ pəkwûə, ə́ ḿbɨ ńkə́ ńtsáb tsɔʼə nə́ ntso, ajú páʼ á kə kě nə́ á mbî chî pô, zə́ələ́ á chîə á mbîə.

¹⁸Ablaamə a nə néŋ ntɨ́ əyí nə́ Əsê ńkə́ ńtúgə akwaŋ ńtə́ ḿbyáabə, nə́ ndɛlə́ ándó anu yətsə́ á nə́ ńkě nə́ ə́wɨ́ chî təmbɔʼ a túgə akwaŋ ə́wɨ́ ńtə́ ḿbyáabə pô, ńdaŋ ə́lɨ́d ńtíʼ ḿbə́ “tǎ pə ətú pipə nɨ́ nə́.” Tsɔʼə ndzaŋ páʼ aŋwaʼlə Əsê á sóŋ nə́ ńgə́, “Ngwud əzo yǒ nɨ́ lə́ ándó pɔ́ pə́ sáŋə.”

¹⁹A kə tíʼə̈ ḿbáatə ngoʼ nkɛlə́, mbimə́ əjǐ ə́ pə́ ńkě pwɔ́d pô, páʼ mbɨ əjǐ ə́ nə ḿbǎ nə́ tə ńchîə ándó yə akwûə ŋwu, ngwě əyǐ Sala a kě pɔ́ kə́ ńtúg lə́.

²⁰A nə ńkě mbimə́ əjǐ mɛdtə̂ pô, atûə ajíə á kě kə́ ńkoʼlə̂ ńté ndaʼnə Əsê pô. Mbimə́ əjǐ nə́ ńdwɛ́nkə yí nə́ mətəənə a tíʼə ŋ́ŋáŋkə Əsê.

²¹A nə ḿbyádnə ńjîə á ntɨ́ yí ńgə́ Əsê a túg mətəənə á mə́ faʼ nə́ anu páʼ a nə ńdaʼnə̂ nə́.

²²Lə́ ghɛd ə́lɨ́d Əsê a kə́ ńdɔgə̂ Ablaamə ándó ŋwunə a tɨ́ nə́ ndə̌ŋdəŋ ńdaŋ nə́ mbimə́ əjǐə.

²³Ətsáb pɨ ńgə́, “pə́ kə lɔgə̂ yə́ ándó ŋwu páʼ a tɨ́ nə́ ndə̌ŋdəŋə́,” pə́ nə ńkě lə́ tsɔʼə á mbô yə́ a ngǎ yí ŋwaʼlə̂ pô.

²⁴Pə́ nə ńkə́ ŋwaʼlə̂ lə́ á mbô pɛn páʼ pə́ chî nə́ á mə́ lɔg nə́ áwɛ̂nə ándó pɨ páʼ pó tɨ́ nə́ ndə̌ŋdəŋə́, páʼ pó néŋ nə́ ntɨ́ əghɔ́b nə́ yí páʼ a kə júmkə nə́ Mmaʼmbî əwɛ̂n Yeso á nəwûə.

²⁵Ńté təpɔŋ əwɛ̂n, pə́ nə́ fɛ̂ yə́ á mbô nəwûə, a tíʼ ńjúmnə á nəwûə á mə́ ghɛd nə́ pɛn tɨ́ ndə̌ŋdəŋə́ á mbi Əsê.