Read Awing Lomanə 5 Bible Online

Lomanə 5 - Awing bible

Lomanə 5

¹Əghâ nə́ ándó pə́ ghɛd nə́ pɛn tɨ́ ndə̌ŋdəŋə́ á mbi Əsê ńdaŋə̂ á mə́m mbimə́ lə́, pɛn túg mbwɔ́dnə pɛn pə́ Əsê ńdaŋə̂ á ndzəm Mmaʼmbî əwɛ̂n Yeso klisto.

²Yeso lɔgə̂ áwɛ̂n pɛn laŋə̂ á mə́m mbimə́ ńjwə́ʼə apɔŋə́ntə́əmə Əsê, pɛn chî nə́ mə́m wɨ́ əghâ nə́ lɛ. Ńdaŋ ə́lɨ́d pɛn túgə akɔŋtə á mə́mə akwaŋ ńtə́ ḿbyáabə ńté ńgə́ pɛn túg əseenə á mə́m nəgháʼ Əsê.

³Lə́ kě tsɔʼə ə́lɨ́d pô, pɛn kə́ ńkɔŋtə̂ əghâ ándó pɛn chî nə́ á mə́m ngə́ʼə, ńté ńgə́ ngə́ʼ yǐəə nə́ awaamə́ntə́əmə,

⁴awaamə́ntə́əmə á yǐəə nə́ mbɔ́ yi əshîʼnə, mbɔ́ yi əshîʼnə á yǐəə nə́ akwaŋ ńtə́ ḿbyáabə

⁵Akwaŋ zɨ ńtə́ ḿbyáabə á kě áwɛ̂n yǐ fɨg pô, ńté ńgə́ Əsê nə ńkwɛlə̂ akɔŋnə ajíə á məntɨ́ pɛn ńdaŋə̂ á mə́mə Ajwǐəsê páʼ a kə fɛ̂ nə́ á mbô pɛnə̂.

⁶Á nə ḿbə́ əghâ páʼ pɛn nə ḿbɛ́d nə́ ḿbwɔ́dkə ńkě chî təmbɔʼ pɛn kwá mbɨ əzɛn lə́, tsɔʼə nə́ chigə ndɛd Əsê, Klisto a kwû ńté atûə ngaŋə́ghɛlə təpɔŋə.

⁷Á tyantə̂ təmbɔʼ ŋwu tsə̌ a kwû ńté atûə ŋwu páʼ a tɨ́ nə́ ndə̌ŋdəŋə́. Lə́ mbɔʼ əghâ tsə̌ ŋwu tsə̌ nyaʼ moomə̂ á mə́ kwû nə́ ə́ té atûə ŋwu yi əshîʼnə.

⁸Lə́ Əsê a nəələ̂ akɔŋnə ajíə á mbô pɛn ńté ńgə́ á nə ḿbə́ əghâ páʼ pɛn nə́ ḿbɛ́d nə́ ngaŋə́ghɛlə təpɔŋ lə́ Klisto a kwû ńté atûə azɛ̂nə.

⁹Ńdaŋə̂ á mə́mə achǐə ají pə́ ghɛd pɛn tɨ́ ńkoʼnə̂ á mbi Əsê, á yǐ pɨ̌ kě anu páʼ á tsɛ nə́ ə́lɨ́d faʼ, páʼ á pə́ nə́ mə chwádkə nə́ áwɛ̂nə á mə́mə azáŋə́ndé Əsê lə́ ə́lɛ́!

¹⁰Pɛn nə ḿbə́ ngaŋkə́pa Əsê, Əsê a yǐ ḿbɨ ńgɛd pɛ̌npo pímnə ńdaŋə̂ á mə́m nəwû Mɔ́ əyǐə, əghâ nə́ ándó pɛn pə́ Əsê pímnə nə́ lə́, Əsê yǐ pɨ chwádkə áwɛ̂n ə́ ghɛnə̂ pə́ nə́ mbi ə́ laŋ nə́ nchîmbî Klisto.

¹¹Á kě lə́ měe nə́ měe pô, pɛn kɔŋtə̂ á mə́m Əsê ńdaŋ nə́ Mmaʼmbî əwɛ̂n Yeso Klisto páʼ a ghɛd nə́ pɛn pə́ Əsê pímnə.

¹²Təpɔŋə á nə ńgyǐəə á mə́m mbî ńdaŋə̂ á ndzəm táʼ ŋwunə, təpɔŋ əyǐə yi wɨ á yǐ nə́ nəwûə, ńdaŋ ə́lɨ́d nəwûə á shamnə̂ á mə́m ngwud ŋwu məsɔŋ ntsəm ńté ńgə́ ŋwu ntsəmə a ghɛlə̂ təpɔŋə.

¹³Təpɔŋə á nə ńchîə á mə́m mbî záʼ pə́ pɔŋə̂ fɛ̂ noŋkə, lə́ aliʼə́ ándó noŋkə á kě nə́ ə́wɨ́ chî, pə́ kě təpɔŋ nə́ anu yətsə́ lɔg pô.

¹⁴Ńchwáakə nə ndɛd Adam tə ńkoʼ nə́ Mosisə, nəwûə á túg mətəənə á ndu ngwud ŋwu məsɔŋ ntsəmə, tə ḿbá pɨ əghɔb təpɔŋə á nə ńkě nə́ chîə ándó yi Adam páʼ a nə ńgɛd nə́ əghâ ándó a nə ńkǐ nə́ á mə́ zóʼnə nə́ noŋkə Əsê lə́. Adamə a nə ḿbə́ lə́ afiʼkə ŋwunə a nə ńchî nə́ mə́ yǐ nə́ lə́.

¹⁵Lə́ pɨ pɨ pɛ́n pɛ̌ pó kě lə́ pələŋ pô, ńté ńgə́ məfɛ̂nə mə́ Əsê mimə kətaŋ mə́ kě chî lə́ ándó təpɔŋ Adam pô. Lə́ ndə̌ŋdəŋ ńgə́ pɨ pipə nɨ́ nə́ pə́ kə kwû ńté təpɔŋ táʼ ŋwu wə̂. Lə́ anu páʼ á pɔŋ nə́ tə ńdaŋ lə́ apɔŋə́ntə́əmə Əsê pópə məfɛ̂nə mí mimə kətaŋ á mbô pɨ pipə nɨ́ nə́ ńdaŋə̂ á mə́m apɔŋə́ntə́əmə táʼ ŋwu wə̂ a pə́ nə́ Yeso Klisto lə́.

¹⁶Məfɛ̂nə mə́ Əsê mimə kətaŋ mə́ kě chî lə́ ándó təpɔŋ táʼ ŋwu wə̂ pô, kwúblə á chî ə́wə́. Lə́ pə́ ńgə́ ndzaŋə ándó pə́ kə ghɛd nə́ táʼ təpɔŋ wə́ lə́, pə́ tsɔ́ʼtə əsáʼ ńdə́g ńgə́ pə́, “Wǔ Əsáʼə.” Ə́fɛ́d ə́lɨ́d pə́ ghɛd pətəpɔŋ pipə nɨ́ nə́, məfɛ̂nə mə́ Əsê mimə kətaŋ mə́ pə́ nə́ apɔŋə́ntə́əmə ají mə́ ghɛd pə́ tíʼ ḿbɨ ńtsɔ́ʼtə Əsáʼ ńdə́gə pə́ ńgə́ pə́, Kě Əsáʼ Wǔ Pô.

¹⁷Lə́ ndə̌ŋdəŋ ńgə́ ńdaŋ nə́ təpɔŋ táʼ ŋwu, nəwûə á chwáakə á mə́ túg nə́ mətɨ ə́ té táʼ ŋwu wə̂. Lə́, anu Yeso Klisto páʼ a pə́ nə́ táʼ ŋwu wə́ a ghɛd nə́, á pyádnə ńtsɛɛlə̂. Ŋwu ntsəm páʼ a kwá nə́ apɔŋə́ntə́əmə Əsê yə nɨ́ nə́ zə̂ pópə məfɛ̂nə mə́ Əsê mimə kətaŋ mə̂ mə́ pə́ nə́ mə tɨ́ nə́ ndə̌ŋdəŋ, á yǒ sáʼ mbî ə́laŋə̂ á ndzəm táʼ ŋwu wə̂ á pə́ nə́ Yeso Klisto.

¹⁸A pə́ ńgə́ ndzaŋə ándó táʼ təpɔŋə á nə́ ńgɛd nə́ ŋwu ntsəmə a wǔ əsáʼ lə́, lə́ á kə́ ḿbə́ ndzaŋə ándó táʼə anu páʼ ŋwunə á tɨ́ nə́ ndə̌ŋdəŋə́ a ghɛd nə́ á yǐ nə́ ghɛd ŋwu ntsəmə a kě əsáʼ wǔ pô ńkə́ ńtúg nchîmbîə.

¹⁹Tsɔʼə ndzaŋə ándó táʼ ŋwunə a nə tyantə̂ nə́ atû, pə́ kə́ ńgɛd pɨ pipə nɨ́ nə́ pó tíʼ ngaŋə́ghɛlə təpɔŋə lə́, á pə́ ńgə́ ńdaŋ nə́ ńdzóʼnə táʼ ŋwunə, pə́ yǐ ghɛd pɨ pipə nɨ́ nə́ pó tɨ́ ndə̌ŋdəŋə́.

²⁰Noŋkə á yǐəə ají lə́ á mə́ ghɛd nə́ pətəpɔŋ pə́ pegə̂! Lə́, aliʼə́ ándó təpɔŋə á nɨ́ nə́ ə́wɨ́, apɔŋə́ntə́əmə Əsê á pɨ ḿbyádnə ńnə́ənə.

²¹Tsɔʼə ndzaŋə ándó təpɔŋə á nə ńtúg nə́ mətɨ ńdaŋə̂ á ndzəm nəwû lə́, lə́ á kə́ ḿbə́ ndzaŋə ándó apɔŋə́ntə́əmə Əsê á túg nə́ mətɨ ńdaŋə̂ á mə́m mə tɨ́ nə́ ndə̌ŋdəŋ páʼ mə́ fɛ̂ nə́ nchîntɨ páʼ ə́ mɛdnə̂ nə́ ngǎ mɔʼə́, ńdaŋə̂ á mə́m Mmaʼmbî əwɛ̂n Yeso Klisto.